Fieri Tv

Fundi i vakuumit 3-vjeçar: Eric Wendt dorëzon sot letrat kredenciale te Presidenti Begaj si Ambasador i SHBA-së

TIRANË — Shtetet e Bashkuara të Amerikës rikthejnë zyrtarisht përfaqësimin e tyre të plotë diplomatik në Shqipëri pas një periudhe gati trevjeçare pritjeje. Këtë të shtunë, në orën 11:00, diplomati i ri amerikan Eric Wendt do t’i dorëzojë letrat kredenciale Presidentit të Republikës, Bajram Begaj, gjatë një ceremonie zyrtare që do të ndiqet nga një takim kokë më kokë mes tyre.

Ardhja e diplomatisit amerikan përmbyll periudhën e mbetur pa ambasador që prej qershorit të vitit 2023, kohë kur përfundoi misionin e saj Yuri Kim. Përgjatë këtij tranzicioni, drejtimi i Ambasadës së SHBA-së në Tiranë u mbajt nga Nancy VanHorn në cilësinë e të ngarkuarës me punë.

Emërimi i Eric Wendt u propozua nga Presidenti Donald Trump dhe mori miratimin e plotë të Senatit amerikan më 6 gusht. Wendt vjen në Tiranë me një prapavijë të fuqishme ushtarake dhe sigurie, pas më shumë se 34 vitesh shërbim në ushtrinë amerikane, ku një pjesë të madhe të karrierës e ka kaluar në radhët e Forcave Speciale “Green Berets”, si dhe ka drejtuar Komandën e Operacioneve Speciale të NATO-s.

Gjatë dëgjesës së tij konfirmuese në Senat më 20 maj, Wendt përcaktoi me qartësi linjat kryesore të mandatit të tij në Shqipëri. Ai vuri theksin te lufta e paprerë kundër korrupsionit, krimit të organizuar dhe trafikut të drogës, si dhe te thellimi i bashkëpunimit në fushën e mbrojtjes dhe sigurisë kibernetike.

Po ashtu, diplomati i ri amerikan rikonfirmoi mbështetjen e palëkundur të Uashingtonit për Strukturën e Posaçme Antikorrupsion (SPAK), duke vlerësuar punën e përbashkët me agjencitë amerikane të zbatimit të ligjit. Ai nënvizoi se roli i SPAK-ut mbetet jetik për vendin, për sa kohë ky institucion ruan me vendosmëri pavarësinë dhe mbetet i paprekur nga ndikimet politike.

Sipas kalendarit zyrtar, pas marrjes së detyrës, ambasadori Eric Wendt do të presë më 2 tetor përfaqësuesit e të gjithë spektrit politik shqiptar në një pritje zyrtare të organizuar në Tiranë

Ndeshja Shqipëri-Bjellorusi/ Policia publikon planin e masave të sigurisë, ja rrugët që do të bllokohen


Policia e Shtetit ka marrë masat për garantimin e rendit dhe sigurisë para, gjatë dhe pas ndeshjes mes Shqipërisë dhe Bjellorusisë, e cila do të zhvillohet mbrëmjen e sotme në stadiumin “Air Albania”, në orën 20:45.

Për shkak të fluksit të tifozëve, nga ora 17:00 deri në përfundim të ndeshjes do të ketë kufizime të qarkullimit të automjeteve në disa akse rrugore pranë stadiumit.

Rrugët që do të bllokohen janë:

Bulevardi “Dëshmorët e Kombit”, nga fast food-i “Laguna”, pranë urës së ish-Hotel Dajtit;

Rruga “Papa Gjon Pali II”, te kryqëzimi i RTSH-së;

Rruga “Dervish Hima”, pranë Ambasadës së SHBA-së;

Rruga “Asim Zeneli”, pranë Ambasadës së SHBA-së;

Rruga “Themistokli Gërmenji”, në hyrje;

Rruga “Ismail Qemali”, te kryqëzimi i RTSH-së;
Rruga “Lekë Dukagjini”, pranë ish-Gardës së Republikës, ku do të lejohet vetëm kalimi i mjeteve të autorizuara nga FSHF-ja;

Rruga “Abdyl Frashëri”, pranë kryqëzimit të Librit Universitar;

Te sheshi “Willson”, ku lëvizja do të devijohet në drejtim të rrugës “Sami Frashëri”, pak para përfundimit të ndeshjes. Ndërkohë, Rruga e Elbasanit, Unaza dhe bulevardi “Bajram Curri” do të jenë të lira për qarkullimin e mjeteve.

Policia njofton gjithashtu se tifozët do t’i nënshtrohen kontrolleve të imtësishme para hyrjes në stadium. Në ambientet e stadiumit nuk do të lejohet futja e banderolave me përmbajtje raciste, fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve dhe sendeve të tjera të forta apo të rrezikshme.

Njoftimi i policisë:

Policia e Shtetit/Plan masash për garantimin e rendit dhe sigurisë, para, gjatë dhe pas zhvillimit të ndeshjes së futbollit ndërmjet ekipeve të Shqipërisë dhe Bjellorusisë, që do të zhvillohet mbrëmjen e sotme, në orën 20:45, në stadiumin “Air Albania”.

Plani i masave parashikon detyrat që do të kryejnë të gjitha strukturat, duke u mbështetur në përvojën pozitive për planifikimin, organizimin dhe menaxhimin e situatës së rendit dhe sigurisë publike gjatë aktiviteteve ndërkombëtare.

Për mbarëvajtjen e këtij aktiviteti, si dhe për të lehtësuar qarkullimin e automjeteve në qytetin e Tiranës, gjatë datës 26.09.2026, nga ora 17:00 deri në përfundim të ndeshjes, nga Policia e Shtetit, në bashkëpunim me Policinë Bashkiake të Tiranës, do të aplikohen kufizime të qarkullimit të mjeteve në disa akse rrugore në afërsi të stadiumit.

Rrugët që do të jenë të bllokuara nga ora 17:00 deri në përfundim të ndeshjes:

-Bulevardi “Dëshmorët e Kombit”, nga fast food-i “Laguna”, pranë urës së ish-Hotel Dajtit;

-Rruga “Papa Gjon Pali II”, te kryqëzimi i RTSH-së;

-Rruga “Dervish Hima”, pranë Ambasadës së SHBA-së;

-Rruga “Asim Zeneli”, pranë Ambasadës së SHBA-së;

-Rruga “Themistokli Gërmenji”, në hyrje;

-Rruga “Ismail Qemali”, te kryqëzimi i RTSH-së;

-Rruga “Lekë Dukagjini”, pranë ish-Gardës së Republikës (koridor hyrjeje për në parkimin e caktuar, vetëm për mjetet e autorizuara nga FSHF-ja);

-Rruga “Abdyl Frashëri”, pranë kryqëzimit të Librit Universitar;

-Te sheshi “Willson”, devijohet lëvizja në drejtim të rrugës “Sami Frashëri”, pak para përfundimit të ndeshjes.

Rruga e Elbasanit, Unaza dhe bulevardi “Bajram Curri” do të jenë të lira për lëvizjen e mjeteve.

Në zbatim të planit të masave, punonjësit e Policisë së Shtetit do të ushtrojnë kontroll të imtësishëm ndaj tifozëve, para futjes në stadium, me qëllim parandalimin e futjes në stadium të banderolave me përmbajtje raciste, të fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.

Kërkojmë mirëkuptimin e tifozëve që të paraqiten në hyrjen e stadiumit, duke filluar nga ora 18:30, pasi, për shkak të fluksit të tifozëve, pak para fillimit të ndeshjes mund të humbasin mundësinë për të hyrë në stadium.

Për mbarëvajtjen e këtij aktiviteti sportiv, Policia e Shtetit ka angazhuar qindra punonjës policie, të cilët do të garantojnë rendin dhe sigurinë publike, si dhe do t’iu ofrojnë ndihmë dhe informacion, në rast nevoje, në mënyrë që ky aktivitet të përmbyllet pa incidente, në interes të imazhit të vendit.

Parashikimi tronditës i Bill Gates: Inteligjenca artificiale mund të shkaktojë vdekjen e një miliard njerëzve dhe të zhdukë njerëzimin

Një parashikim tronditës se inteligjenca artificiale mund të shkaktojë vdekjen e një miliard njerëzve dhe, gradualisht, të çojë në zhdukjen e njerëzimit, ka bërë Bill Gates në një intervistë televizive.

Në një intervistë për emisionin “Meet the Press” të NBC, e cila do të transmetohet të dielën, Bill Gates deklaroi për gazetaren Kristen Welker se inteligjenca artificiale tashmë ka një fuqi të tillë, saqë mund të shkaktojë ngjarje me humbje masive jetësh njerëzore.

“Inteligjenca artificiale është padyshim mjaftueshëm e fuqishme për të çuar në ngjarje që, e dini, shkaktojnë vdekjen e një miliard njerëzve”, shprehet ai në një pjesë të intervistës që NBC e publikoi sot.

Gates thekson gjithashtu se, megjithëse është jashtëzakonisht e vështirë të arrihet një probabilitet 100%, “nuk ka ekzistuar kurrë një armë aq e fuqishme sa kombinimi i njerëzve me qëllime të këqija dhe mjeteve më moderne të inteligjencës artificiale”.

Vetëm një muaj më parë, Bill Gates e cilësonte inteligjencën artificiale si një teknologji me ndikim më të madh se pothuajse çdo teknologji tjetër në histori. Ai argumentonte se AI mund të bëhet ose “barazuesi më i madh i shpikur ndonjëherë”, ose “burimi më i keq i padrejtësisë”.

“Me trajektoren dhe ritmin aktual, ekziston një probabilitet shumë i lartë që rezultati përfundimtar të jetë negativ”, ishte vlerësimi i tij.

Gates ka theksuar se inteligjenca artificiale mund të sjellë ndryshime të mëdha në punë, shëndetësi, ekonomi dhe shoqëri, por e konsideron të domosdoshme krijimin e mekanizmave të kontrollit për të kufizuar rreziqet.

Ai argumenton gjithashtu se qeveritë dhe partitë politike duhet të bashkëpunojnë menjëherë për të gjetur mënyra që inteligjenca artificiale të mos shndërrohet në një forcë që del jashtë kontrollit njerëzor.

Sipas tij, synimi nuk duhet të jetë ndalimi i zhvillimit të AI, por garantimi që kjo teknologji të përdoret në të mirë të shoqërisë dhe të mos krijojë rreziqe të paprecedenta.

Bashkëthemeluesi i Microsoft, një prej mbështetësve më të njohur të progresit teknologjik, ka nisur vitet e fundit të shprehë gjithnjë e më shumë shqetësime për rreziqet e mundshme që mund të sjellë zhvillimi i pakontrolluar i inteligjencës artificiale.

Deklaratat e reja të Gates vijnë në një kohë kur drejtues të lartë të kompanive teknologjike dhe qeveri në mbarë botën po shqyrtojnë mënyra për t’u përballur me skenarët katastrofikë që mund të shkaktohen nga inteligjenca artificiale.

Sandër Simoni shpallet kryetar i Gjykatës së Lartë


Sandër Simoni është zgjedhur këtë të premte në krye të Gjykatës së Lartë.

Procesi i numërimit për kandidatët përfundoi me një rezultat të barabartë, pasi secili prej tyre mori nga 179 vota.

Në këto kushte, rregullorja përcaktonte që fituesi të vendosej përmes shortit. Pas hedhjes së shortit me gogla, kryetar u shpall gjyqtari Sandër Simoni.

Mbërrin në Shqipëri ambasadori i ri i SHBA, Eric Wendt i dorëzon nesër letrat kredenciale Presidentit Begaj


Ambasadori i sapoemëruar i Shteteve të Bashkuara në Shqipëri, Eric Wendt, ka mbërritur në Tiranë. Takimi i tij i parë zyrtar do të zhvillohet nesër me Presidentin Bajram Begaj, të cilit do t’i dorëzojë letrat kredenciale.

Takimi kokë më kokë mes ambasadorit Wendt dhe kreut të shtetit, Bajram Begaj, është planifikuar për orën 11:00.

Wendt është gjeneral-lejtnant amerikan në pension, me një karrierë më shumë se 34-vjeçare në ushtrinë e Shteteve të Bashkuara. Përvoja e tij është e lidhur veçanërisht me operacionet speciale dhe çështjet e sigurisë.

Gjatë shërbimit ushtarak, ai ka drejtuar forcat e operacioneve speciale të NATO-s, ku ka punuar edhe me trupa shqiptare.

Bashkëpunimi me ushtarakë shqiptarë ka vijuar edhe gjatë misioneve në Afganistan.

Pas pensionimit nga ushtria, ambasadori i ri amerikan e ka vijuar veprimtarinë në fushën e sigurisë dhe të lidershipit. Ai ka dhënë mësim për komandimin dhe udhëheqjen në Naval Postgraduate School.

Gjatë dëgjesës së konfirmimit në Senatin amerikan, në muajin maj, Wendt bëri të ditura edhe objektivat që synon të ndjekë gjatë mandatit të tij diplomatik në Shqipëri.

Ndër prioritetet e tij janë lufta ndaj korrupsionit, krimit të organizuar dhe trafikut të drogës, si dhe zgjerimi i bashkëpunimit në mbrojtje e siguri kibernetike.

Ai ka theksuar gjithashtu, rëndësinë e një trajtimi të drejtë dhe transparent për investitorët amerikanë.

Wendt ka përmendur si fusha me interes energjinë, infrastrukturën, industrinë minerare dhe inteligjencën artificiale.

Me ardhjen e tij në kryeqytet, Eric Wendt nis zyrtarisht detyrën në drejtimin e misionit diplomatik amerikan në Shqipëri.

Plagosja e të riut në Lezhë/ Kamerat e sigurisë zbardhin konfliktin! Autorët u larguan me makinë, babë e bir në kërkim (EMRAT)


Detaje të reja janë zbardhur nga plagosja me armë zjarri e ndodhur ditën e djeshme në fshatin Manati të Lezhës. Sipas hetimeve, dyshohet se ngjarja ka ndodhur pas një konflikti mes dy personave, babë e bir dhe punonjësit të një servisi, Danjel Pikuli.

herri ka ardhur pasi babë e bir, Gjergj dhe Seldo Voci kishin dërguar automjetin për riparim dhe më pas janë konfliktuar për pagesën e shërbimit.

Pagesa për riparimin e mjetit duket se është bërë mollë sherri mes tyre, e cila më pas ka përfunduar me përdorimin e armës së zjarrit.

Gjatë sherrit, Daniel Pikuli ka marrë një plagë në bark dhe është transportuar me urgjencë drejt Spitalit të Traumës në Tiranë. I riu i është nënshtruar një ndërhyrjeje kirurgjikale dhe aktualisht ndodhet nën kujdesin e mjekëve.

Ndërkohë, dy personat e dyshuar për ngjarjen, babë e bir janë identifikuar nga policia dhe janë shpallur në kërkim.

Po ashtu, kamerat e sigurisë kanë fiksuar momentin e konfliktit, ku tre personat dyshohet se janë përfshirë fillimisht në një përplasje fizike.

Më pas, njëri prej tyre ka qëlluar me armë zjarri ndaj Pikulit. Pas ngjarjes, dy të dyshuarit janë larguar me një automjet tip Volkswagen.

Policia ka mundur t’i gjurmojë lëvizjet e mjetit deri në Shënkoll të Lezhës, ndërsa janë sekuestruar pamjet e kamerave të sigurisë të bizneseve përgjatë autostradës Lezhë-Laç, me qëllim dokumentimin e itinerarit të ndjekur pas largimit nga vendi i ngjarjes.

Sakaq, Policia po vijon hetimet për zbardhjen e plotë të rrethanave dhe dokumentimin e përgjegjësisë së personave të shpallur në kërkim.