Maghreby

طيب ياصديقي، حسين عموته علقة تكتيكية الماتش اللي فات، ولحد الدقيقة 60 كان نايم في العسل قبل ما يفوق ويرمي بطاهر وكوكا بره الملعب، وينزل لعيبة كورة تفهم وتفك الكلكعة لحد ما ربنا كرُمنا وخلصنا الماتش..
لكن واضح أوي إنه لسه متعلمش الدرس، وواضح إنه مش ناوي يفهم بالطريقة السهلة أبداً؛ ولازم نقرص ودنه بخسارة تزلزله أو تضيع مننا بطولة عشان يستوعب إن فيه أشباه لاعيبة كورة، منتحلين صفة نجوم وهم أصلاً ميعرفوش عن الكورة غير اللفة في الترتان!

على المستوى الدفاعي، مش هحمله بربع جنيه مسؤلية؛ أصل خط الدفاع "الأموات" دول مش ذنبه، ده ذنب إدارة الكرة بالكامل، بما فيهم محمد بيه هاني "المونديالي" اللي قلب بطة بلدي أول ما رجع من كأس العالم ومنتخب مصر! ومن رأيي مفيش أسوأ من لاعب مستواه متذبذب بالشكل ده، وتفضل كل ماتش تتحايل عليه عشان يلعب كورة.

وعلى مستوى خط الوسط الهجومي والتلت الأمامي بشكل عام؟ لا، هنا هحمله المسؤولية كاملة ومجبر يراجع نفسه؛ هو ميبقاش عندك عمر الساعي بالحلاوة دي والجاهزية البدنية والفنية، وعندك أحمد رضا الموهوب، وتصر تلاعب زيزو صانع ألعاب أو وسط مهاجم! يا عموتة أنت عايز لاعب يسلم ويستلم تحت الضغط، عنده رؤية، يقدر يعدي من واحد واتنين في مساحات ضيقة ويعمل تمريرة مفتاحية "بانوراما" تكسر خطوط الخصم، وده مش

بخصائص زيزو أصلاً اللي بيحتاج مساحات طولية يجري فيها.
ده أنت لو لعبت حسين الشحات في المركز ده هيطلع نار من كل حتة، ما بالك بواحد زي عمر الساعي جاهز أصلاً ودماغه شغالة؟ ما بالك بعلي محمود رغم اندفاعه الهجومي والإنفعال أحياناً، بس كل يوم بيتطور عن اللي قبله وبقى مشروع لاعب وسط محترم جداً لو خد ثقة مستمرة.
تعال بقى نتكلم عن الفزلكة والمجاملات؛ الحسنة الوحيدة لعموتة في الماتشات الأخيرة هي إنه رجع أشرف بن شرقي شمال في مكانه الأساسي بدون أي افتكاسات عقيمة. لكن تعال للمصيبة الكبرى: عندك منصف بقرار لاعب مقاتل في الجناح اليمين، وفاهم يعني ايه تحركات عرضية، ليه مصر تحرقه وتصر تلعبه مهاجم صريح وهو فاقد حساسية المهاجم الصريح أصلاً، أو حتى مهاجم تاني؟ ليه تكسبه جناح خطير وتضيعه في العمق بالشكل ده؟!

وطاهر محمد طاهر؟ ده أكتر لاعب خادع في تاريخ الكورة المصرية! في التدريبات والتقسيمات هتلاقيه "الظاهرة رونالدو" بيسجل من الزوايا الصعبة، علشان الجملة التكتيكية بتتعاد مرة واتنين وتلاتة وفي راحة، إنما في الماتشات الرسمية والضغط العصبي مش هتلاقي أي أثر خالص، لأنه ببساطة لاعب يفتقد الإبداع الفطري وحسن التصرف تحت الضغط العالي.

ونيجي للمظلوم الأكبر: ليه سفيان بن جديدة دكة؟ هداف الدوري المغربي والعربي، واللاعب اللي دماغه كلها جوة الـ 18، وشُه عايش على الجون، وعدلته مظبوطة، وكل لمسة بخطورة! ليه تخسر لاعب بالقدرات دي وتنزله نص ساعة بس كل ماتش وهو الكفيل يخلص لك الزحمة الدفاعية؟!
احنا بننتقد بمرارة واحنا فايزين، بس على فرق تانية بتهاجم وفاتحة مساحات و عايزة تلعب كورة أصلاً.. أومال هتعمل إيه بقى لما تقابل الفرق اللي "بتركن الأتوبيس" قدام الجون وشعارها الأساسي في الدنيا "لا لكرة القدم، إفساد اللعب أولاً" هنا يبان المدرب الذكي اللي عنده حلول تكتيكية مش مجرد عشوائية.

لكن يتقال لعموتة بالحق عشان نديه حقه: يحسب له جداً شجاعته في سرعة التغييرات في ماتشات معينة وإعطاء الفرص، خصوصاً إن الساعي وأقطاي، رغم قلة الدقايق اللي بياخدوها، إلا إنهم بيثبتوا إنهم لاعيبة كبيرة بثقل فني، وخصوصاً الولد أقطاي، ده طالع وهيعدي أي مهاجم تاني في مصر بإذن الله لو أخد فرصته كاملة واتمنح الثقة.
عموتة يا جماعة محتاج حد يشاور له على اللعيبة "النصّابة" في التشكيل، محتاج حد جامد يقوله: "اللعيبة دي هتدفنك وتغرقنا معاك".. محتاج قامة زي الكابتن وائل جمعة يقعد معاه جلسة مصارحة فنية، بدل ما نستنى لما "تخرب" ونندم ساعتها ساعة لا يندم الندم! فوق يا عموتة، الأهلي مبيستحملش التجارب الطويلة
#الاهلي
#عموته
#كورة

طيب ياصديقي، تعال نبص بضرة فنية أعمق ونقرا السكواد صح بعيداً عن حماس الملاعب ولخبطة السوشيال ميديا:
علي محمود
لمسة حلوة، خفيف وحركة جسمه بتساعده يغير اتجاهه بسرعة وقت الاستحواذ، إمكانيات كبيرة في مركز 8 لكن لازم يشتغل علي 3 حاجات اساسية:
* التمريرات الكاسرة بين الخطوط: محتاج يكسر خطوط المنافس بالتمرير الطولي الحاسم وما يخافش من فقدان الكورة، لأن اللعب العرضي الزيادة بيبطئ الإيقاع وبيخلي التمركز الدفاعي للخصم أسهل بكتير.
* التسديدات: لازم يطور الـ Ball striking من عُدّاد الـ 18 عشان يشكل خطورة حقيقية ويكون ورقة هجومية تضاف لمهامه كـ Box-to-Box.
* الشق الدفاعي والتمركز: لازم عينك تفضل مسمّرة ع الكورة، وقراءة زوايا التمرير عنده تحسن عشان يتفادي التدخلات المتهورة اللي بتجيب إنذارات مجانية تكلف الفريق وسط الماتش.

احمد رضا
دا المعلم بقي، الوحيد في مصر اللي ينفع يلعب دور الريجيستا بإتقان، لاعب رايق بيلعب وهو لابس بدلة. افضل توظيف له جنب مروان عطية عشان مروان بيكسر الهجمات وبيقفل الـ Half-spaces ويشيل الأدوار الدفاعية البحتة، واحمد رضا يتفرغ تماماً لربط الخطوط وتوزيع اللعب بالـ Switches الطويلة وقراءة الملعب هادئاً. ثنائية لازم تكمل وتستمر عشان توازن البناء.

عمر الساعي
الكل بينتقده، وانا بقوله إنه عمل دور تحت المهاجم بوعي تكتيكي كبير معرفش زيزو يعمله طوال ماتشين، اكتر لاعب فرّاك وبيدخل 1 علي 1 ويهاجم المساحة بـ Off-the-ball movement بشكل مابيعملوش غير إمام عاشور. الساعي انظلم كتير من كولر ومن الجمهور، والولد لسة صغير 22 سنة ومضغوط نفسياً وعاوز يثبت نفسه، فطبيعي يبقي عاوز يسجل بسرعة وبیبالغ أحياناً في الفردية. هياخد قرصة ودن من المدرب عشان الـ Decision making، لكن الأكيد بدنياً ممتاز وكواليتي كبير وماينفعش تخسره نهائياً.

معانا مواهب كتير، والاسكواد كواليتي ممتاز في الثلث الهجومي والوسط، لكن العقدة كلها في خط الدفاع والقلب، ومحتاجين ضروري بديل حقيقي لمروان عطية يقدر يشيل الـ 6 لوحده. الجزء الاول من الملعب يعني بناء الهجمة وتأمين التحولات هو اللي محتاج شغل تكتيكي عالي. اتمني الجهاز الفني بقيادة عموته يقدر يفهم لاعيبته اسرع، وهم كمان يفهموه اسرع عشان نشوف منظومة متماسكة..
#الاهلي
#مصر

طيب ياصديقي، خلينا نجيب الحكاية من أولها؛ الفترة اللي فاتت الدنيا كانت مقلوبة وكثافة الأقاويل والتوتر زادت بشكل مبالغ فيه، وكل يوم طالع لنا اجتهادات وأخبار شكل. بس زي متعودنا، في الآخر الأهلي دايماً بينتصر، وكلمة النادي هي اللي بتسري، والاستقرار هو سيد الموقف! 🦅❤️
تجديد عقد إمام عاشور لحد عام 2030 مش مجرد خطوة تعاقدية عادية، دي إعلان رسمي عن استقرار العمود الفقري للفريق للسنوات الجاية كلها. فنياً، إمام هو "رمانة الميزان" واللاعب اللي بيصنع الفارق الحقيقي في وسط الملعب:
قدرته الفريدة على كسر الخطوط بالتحولات الهجومية السريعة وإعطاء عمق هجومي دائم.
الحلول الفردية والزيادة العددية جوه منطقة الجزاء اللي بتفك أي تكتلات دفاعية مقفولة.
الحيوية والضغط العالي اللي بيمنحوا المنظومة سيطرة كاملة في وسط الملعب والدفاع عن هيبة القميص.
الخطوة دي تمت باحترافية شديدة من خلال جلسة جمعت اللاعب مع الدكتور عصام سراج الدين، رئيس قطاع التعاقدات، وبالتنسيق الكامل مع الكابتن وائل جمعة، مدير الكرة. الجلسة دي قفلت كل الأبواب ووضحت النوايا، حيث أكد إمام خلالها على امتنانه المطلق للأهلي وجماهيره العظيمة، ورغبته الأكيدة في استكمال مسيرة البطولات وكتابة التاريخ مع الكيان في السنوات القادمة.
الأهلي دایماً بيعرف كويس أزاي يحافظ على نجومه، وأزاي يوجه بوصلته نحو الاستقرار الفني والإداري مهما كانت الضوضاء حواليه. مبروك لكل الأهلاوية، ومكملين في طريق المجد، ودايماً الأهلي فوق الجميع! 💪
#الاهلي #امام
#كورة

طيب يا صديقي..
استكمالاوللهجص والعجن الموسم اللي فات، والناس دي شكلها ناوية تكمل على اعصابنا! خط الدفاع والمهزلة اللي ورا، والله ما هتشم دوري ولا بطولة واحدة بالدفاع الشوارع ده، أصل الكورة مش بالعافية، ولو كانت بالفهلوة ماكنش حد غلب!

تعالي للباشا النصاب الجديد اللي مفكرها بالتكشير والله صفر تكتيك .. الكورة مابتمشيش كدة ودهوبياكد انك الفاضي والله. نازل بتشكيل كله مجاملات عيني عينك، كريم فؤاد باك شمال وهو غائب من سنتين اروح تحرقه في مكان مش مكانه اصلا ده ينفع يعني ، فين كريم الدبيس عشان حافظ مهام مركزه طب ندتوفيق محمد اللي دكتور عصام سراج خاصه في يوم واحد

وكوكا بيعمل ايه أساسًا في المطلق بقي وازاي دخلنا موسم جديد ومفيش أي تدعيم حقيقي في وسط الملعب بصفقة تعوض بن رمضان اساسا
وزيزو تايه في مركز 10 ليه والعته التكتيكي ده وهو مش بيعرف يعمل واجبات صناعه اللعب اصلا إمكانياته كدة بالنسبة بقي لطاهر دا ابن مين في مصر وهل ماسك علينا فلاشات ولا فيديوهات ولا حاجه اشمعنا هو بيلعب طيب ما تعدل التخبط ده وتخلي زيزو يروح مكانه الناحية اليمين، وعلي محمود أو الشحات يلعبوا في مركز 10 عشان تعدل الملعب إنما أنت بتجامل وعلي حسبنا وده غريب أن دي قناعتك

لو مفكرين الاسكواد ده مع القناعات العقيمة للمدرب وبالميركاتو المضحك ده هنقدر نافس بيراميدز والفرق اللي بتخطط صح، فروحوا اتفرجوا علي كرة يد احسن شوط كامل مفيش في الملعب راجل غير مروان عطية لوحده بيحارب في النص.

لازم تغييرات جذرية الأهلي يخرج بموسم صفري هو الأسوأ في تاريخه، فيروح يعمل 7 صفقات وفترة إعداد في إسبانيا بـ3 ماتشات ، وقبلهم 2 في مصر، عشان ندخل أول ماتش رسمي في الموسم الجديد بنفس تشكيل السنة اللي فاتت بالحرف، باستثناء لعيب واحد يتيم!

لو جبت طفل عنده 7 سنين وسألته: الأهلي خسر الدوري والكلام ده ليه السنة اللي فاتت؟ هيقولك فوراً بسبب الشكل الدفاعي الكارثي. فا إنت تدخل الموسم الجديد بنفس المنظر، وبنفس العناصر، وبنفس البطيء اللي لبسنا في الحيطه لا وايه بقي بتلعب هاي لاين من البجاحه طب مجبتش صفقات دفاعية جديدة ومستخسر تدفع طيب يا سيدي على الأقل غيّر الشكل المذري ده امال انت كنت بتعمل ايه في فتره الاعداد

عايز تلعب بـ محمد هاني ليبرو ثالث مع الاتنين مساكين؟ اعملها، ما هو كده كده دوره الهجومي في التثلث الأخير معدوم، ولو ازمه اوي تلعب بـ ليبرو وسويبر، والله هيكون أرحم ألف مرة من المساحات العبثية دي! زيزو كل ما بينزل على الخط ويحط الكورة على شماله ويعمل العرضية بيقلب الدنيا خطورة؛ رأس ماله كله في العرضيات اللي معندكش ولا باك ولا جناح بيعرف يلعبها صح غيره.

نجومية زيزو كلها أيام الزمالك وهو "جناح صريح". زيزو مش دريبلر، ولا بيعرف يتحرك في زحمة الخطوط، وعمره ما عمل باص واحد بيني خطير ولا عرف يسجل وهو مكتف في العمق. مين الجهبذ اللي اخترع هروب زيزو من مكانه وحطه في مركز 10 يا جدعان
زيزو شكله عايز يعوض موسم الغل اللي فات.. ساعده ولعبه على عدلته ومتصبعهاش عليه وعلينا لا لازم اخترع وابوظ شكل الملعب عشان انا بحب العبث

بن شرقي راجل مفيد وخطير مش هنيجي عليه، بس مزاجنجي وكسول جداً في الأدوار الدفاعية. هيطلعلك كورة شكلها عالمي، ويضيع قصادها 20 هجمة بترقيصة مايعة تتخطف وتترد علينا بمرتدة كارثية. لازم تقعد معاه تفوقه، تخليه يضغط، ميخسرش الكورة بسهولة، ويتعب شوية مع الباك. إحنا مدربين الأهلي نسينا خالص إن في بند اسمه "تطوير اللعيبة فردياً" كله شغال ع الجماعه انت بقي الفردي ولا جماعي ولا نافع معاك حاجه ولا شايفلك تكتيك اصلا بقي

مفيش مدرب كورة في الدنيا يشوف في كوكا مقومات لعيب اساسا مابالك بقي انت بالله رقم 8.. دي قناعة فنية اغرب من الغرابه كوكا لاعب موظف ينفع دكة طوارئ، ميبقاش في الـ 11 أساسي أبداً غير لو الدنيا خربت وكل الأساسيين غابوا

طاهر محمد طاهر بقاله 6 سنين في الأهلي، مكسبش المراهنة ومبيعملش غير "العادي"، وبصراحة الفترة الأخيرة حتى العادي بقى صعب عليه قوي فين الشحات، ولا أقطاي، ولا محمد عبدالله، ولا حتى عمر سيد معوض.. ما يصدقوا ياخدوا الفرصة أو محمود صلاح الجديد اظن اي حد من دول مش هيبقي اسوء من الهطل اللي طاهر بيعمله ومن المتخلف اللي جددله 3سنين اصلا من العبث بتاعنا

وتعال هنا.. مين اللي اختار ياسر رضوان في الجهاز الفني؟ وبناءً على إيه بالظبط وانا مش شايفه له أي بصمه تذكر عمتا يعني لا وايه الراجل عموتة بياخد التعليمات الفنية جوه الماتش من وائل جمعة مدير الكرة، جيل حالي لو معاه اليكس فيرجسون شخصيا والله يعتزل بسببهم ، رايحين تجيبوا ياسر رضوان بس

الموسم لسه في أوله ومفيش أحكام نهائية ولا تشكيك غشيم فيك يا كابتن، بس من حقنا نخاف ونصرخ ونطالب بحلول من بدري؛ مستحيل نتحمل مهزلة توروب تتكرر تاني، ولا نقدر نستحمل نشوف الأهلي بالشكل الباهت ده موسم كامل واللي واضح كدة انت ماشي علي نفس النهج وكمان لسه متعلمتش اصلا ودي كارثه فتره اعداد في الكنافه برضو ومصاريف عوالفاضي
أخرج من الماتش ده متعلِّم وصحح الغلط في اللي جاي.. علي محمود نزل وعرفك أنه لاعب كبير وجعان كورة ومحتاج يشارك أكتر، ومنصف لما ينسجم هيبقى من أهم أعمدة الموسم، وبن جديد لو خد الثقة وطلع طاقته هيبقى وسلم ابو علي جديد عادي والله مش صعبه يعني خالص ، وأفشة شكله مركز ومخيبش ظنك وفيه ثقة متبادلة.. دي إيجابيات واضحة تبني عليها وتساعدك تحط التيم على الطريق الصح والأهم الل ثم العدل ثم العدل
#الاهلي
#مصر
#عموتة

طيب ياصديقي.. هي الناس ماسكة في قلبين الدفاع وخلاص وكأنهم هم اللي شالوا الليلة لوحدهم؟ هو إحنا مشكلتنا النهاردة كانت في قلبين الدفاع أصلاً؟!
تعال نبص بالأرقام وإحصائيات ماتش امبارح على أفراد الخط الخلفي واحد واحد، ونشوف مين اللي كان شايل بجد ومين اللي خاربها

* قلبي الدفاع (الجزار وهادي): الناس طلعت الجزار وهادي هما السبب! طب فين الأرقام؟ الاتنين في الماتش كسبوا تقريباً 100% من الالتحامات الهوائية والأرضية ومفيش أي كورة تعدت منهم بشكل مباشر. الجزار يوم عن التاني بيثبت رجله وبأداء ثابت جداً، وهادي بيحاول يغطي ورا المساحات، ومع ذلك ولا واحد فيهم ليه أي ذنب في الأهداف الساذجة اللي دخلت!

* محمد هاني (الظهير الأيمن): هاني كأداء دفاعي حاول يقفل جبهته، بس الهدف التالت اتلعب في ضهره مرتدة بسبب باص غلط قدام مش منه أصلاً، واللاعب جاله من الطرف ولقى نفسه منفرداً بالمرمي.

* أحمد نبيل كوكا: الهدف الأول لبسناه من تسديدة بعيدة من خارج الـ 18، لكن أصل الكارثة كانت غلطة تمركز وبناء لعب فادحة من كوكا نفسه في تحضير الكورة
* كريم فؤاد: أرقامه وتقييمه في الماتش امبارح كانوا الأسوأ (وصل لتقييم 5.6)، بسبب ركلة الجزاء اللي جت من سذاجة وتسرع (ودي مش أول مرة نلبس ضربة جزاء بسببه بنفس الطريقة)، وفوقها باص غلط قاتل في طلعة الكورة تسبب في مرتدة الهدف التالت.

الجزئية الفنية بقى اللي ناس كتير مطنشاها
مينفعش أصلاً نلعب "هاي لاين" (دفاع متقدم) بالأسماء والقدرات دي في الأفراد أصلاً! المنظومة الدفاعية كلها مكشوفة والضغط العالي بيتعمل غلط، فلما تلعب دفاع متقدم وعندك أخطاء فردية في التمرير والتمركز وتحضير اللعب، الطبيعي تلبس أهداف لو معاك أفضل مدافعين في العالم.

أنا عارف إن مهما شرحت بالأرقام والواقع هيفضلوا مرددين "الجزار وحش" وخلاص. وعموماً، أنا متوقع إن مع عودة ياسر إبراهيم هتبقي الثنائية هي ياسر والجزار، ولو داري قنع المدرب في التمرين هتبقى ثنائية ياسر وداري.
الخلاصة يا صديقي؛ المشكلة مش في الأفراد خالص، المشكلة في التنظيم الدفاعي والمنظومة عموماً اللي محتاجة تظبيط كبير من الجهاز الفني.. وإن شاء الله اللي جاي يكون أفضل!
مستني رايكم
#الاهلي
#مصر

الحسنه الوحيده بتقول أنه في ذكاء عند الراجل ده في تحركاته وأننا قدام مهاجم هيكون كويس جوا سيستم لعب وان كنت مش شايف السيستم ده معوحسين عموته خالص يعني بس بن جديده مهاجم بصراحه

طيب ياصديقي، تعال نبص للعبث الفني بالأرقام والإحصائيات عشان نعرف إحنا بندفن راسنا في الرمال ليه. لما تطلع قناعات المدرب بعد معسكر إعداد طويل إن طاهر محمد طاهر جناح يمين أساسي، والأرقام بتثبت إن نسبة دقته في العرضيات والالتحامات الهجومية لا تليق بنادي بحجم الأهلي، وتيجي تحبس زيزو في "العمق" وتلعب بثنائية عقيمة في وسط الملعب بتخلي معدل التمرير الأمامي يكاد يكون معدوم.. يبقى أنت بتدمر الهجوم بيدك! الكارثة الأكبر إنك لما شوفت زيزو بيروح ناحية اليمين مرتين بس، عمل عرضيتين صح وخلق

فرصتين مححققتين بنسبة نجاح 100% في لقطتهم، ومع ذلك كملت في العناد التكتيكي!
نيجي للناحية التانية والدفاع اللي بقى "شارع"، كريم فؤاد -مع كامل احترامنا لإمكانياته وتاريخه- راجع من غياب وإصابات طويلة مدتها حوالي سنتين، بالأرقام ونسب الفقد، نسبة نجاحه في الارتداد الدفاعي وكسب الثنائيات الأرضية والهوائية ضعيفة جداً، وده بيخلي الجباية الشمال دي ممر إجباري لكل المنافسين، في الوقت اللي عندك فيه ياسر إبراهيم مدافع منتخب مصر بدكة احتياط صلبة ونسب تدخلاّتيه واستخلاصه للكورة كانت من الأعلى في الموسم اللي فات!

أما كوكا على الدايرة فحدث ولا حرج؛ بالأرقام والحرارة في الملعب، نسبة استخلاص الكرات الثانية (Second Balls) عنده تكاد تكون منعدمة، لا بيقطع كور صح، ولا بيطلع بكرة تحت ضغط بنسبة تمرير سليم تتخطى الـ 60%، والمنظومة كلها بتنهار دفاعياً لأن "الدايرة" فاضية تماماً بمعدل مساحات مخيف للمنافسين.

وعن عموتة اللي طالعين يطبلوا له إنه جاي عشان "العصبية والإنضباط على طريقة حسام البدري".. بالأرقام وتاريخه التدريبي، الراجل دا معقِّل فكر التحولات العشوائية ومعدل استحواذه وفرصه الخالقة في مبارياته الكبيرة دايماً في نزول حر. اختيار بالشكل دا من سيد عبد الحفيظ بيؤكد إننا بندور على "تكشيرة" مش على فكر يطور فريق عنده 5 محترفين منهم 3 برة الليلة نهائياً، وينجح يخلي الأجنحة والمنظومة بالطريقة الهزيلة دي.

بلا ميديا بتأثر بلا كلام فاضي، مفيش مدرب بيوقع عشان بوست، إحنا على الأكونت هنا أول ناس دعمنّاه من يوم ما أعلنوا تعيينه، بس الواحد حرفياً بيشد في شعره من الإحصائيات والكوارث الفنية اللي عيني عينك في الملعب! وريأكشن وائل جمعة بين الشوطين كان ترجمة رقمية دقيقة لملامح الكابوس اللي إحنا فيه!

#الاهلي
#مصر

طيب ياصديقي، خليني أشارككم شوية ملاحظات فنية وانطباعات سريعة -مش أحكام نهائية- عن حال الفريق والمواجهة الأخيرة:

لحد آخر لحظة في الماتش كنا ممكن نتعادل، لذلك بشكل عام الأهلي قدم مواجهة جيدة واستفاد جداااا من الماتش. في الشوط التاني وضح إن عموتة بيجرب ويقيم، والنهاردة كان يغير عدد كبير في سبيل إنه يتفرج على لعيبته في احتكاك قوي زي ده

الانطباعات والملاحظات الفنية والتحليلية
* العمود الفقري الغائب: وسط ملعب الأهلي من غير إمام عاشور بيبقى فيه فجوة مرعبة؛ فرق شاسع جداً في سرعة نقل الهجمة وربط الخطوط، وبين البطء اللعين اللي بيعطل المنظومة الهجومية كلها وخصوصا الجوليادور محمد مجدي افشخ احنا في كارثه أنه داخلين 2027 وهو لسه بيلعب اصلا لا وبنشتم في أمام عشان عايز فلوس

* ثانيا ماكينة التدخلات وقطع الكرات: مروان عطية دا أفضل فورمة لاعب في مصر حالياً بلا منازع، لاعب كبير أوي ومش واخد حقه الراجل دا كان بيقابل نص ملعب برشلونة لوحده وبيعمل مجهود خارق في استخلاص الكرات، وصمام إمان حقيقي بيشيل بلاوي ورا يعني تخيل أنه بيعمل اللي عاجز عنه تشاوميني وكامافينجا لاعبين بتمنى الدوري المصري كله حرفيا يعني والله ورغم كدة كان لاعب تقيل قادر يسد ويبقي ليه دور بارز وسطهم

* لغز المساحات والواسطة الكروية: في الوقت اللي الدنيا كلها بتتكلم عن حمزة عبدالكريم والفرصة اللي لازم ياخدها الشباب ونثق في ناشئينا، إحنا في الأهلي لسة بنجامل لاعب منتهي على حساب اتنين من أفضل مواهب مصر آخر 10 سنين! قسماً بالله طاهر ده لاعب بينزل ياخد المساحة دي كلها وحماية فنية غير مبررة ومقعد اتنين ممكن يكونو افيد كتير زي محمد عبدالله وعمر سيد معوض .. وكل كلام الأدوار الدفاعية دا كذب في كذب، والله ما بيدافع، والفكرة أن وتقولي اصل بجرب طيب هو التجربه لازم لاعب منتهي يعني مينفعش تجرب فرده من الاتنين دول اظن مش هيبقى بالسوء بتاع طاهر باشا اللي لابيراوغ و لا.. بيعرف يمرر ولا بيسجل برأسه ولابيعرف يدافع عمتا مش بيعمل حاجة أصلاً لمصلحة مين بنفطس عمر معوض ومحمد عبدالله يعني عشان مين يعني والله وليه بيجدد السنين دي كله طيب نفسي أشوف واحد من الاتنين وتحديداً عمر معوض يمسك الجناح اليمين أساسي نفسي ننضف عينينا بحبه كورة مش اللي بعمله طاهر ده خالص والله تعبان كفايه

وخير دليل الجديد واللي يستاهل يبقي اسمه جناح منصف بقرار واضح إنه لعيب كبير جداا، ودماغه كلها كورة وفهم للتمركزات بين خطوط الخصم هيكسر الدنيا
وزيزو عايز يعمل موسم محترم،
وبن شرقي له أدوار أساسية مؤثرة.
هي دي الناس اللي يتقال عليه وينجات ومعاهم حسين الشحات مينفعش يكون كل دول موجودين وطاهر يلعب في حاجه غلط انت كدة جاي تاكل عيش ومدرب كفته

* أزمة الرواق الأيسر: كريم فؤاد لموصلش للفورمة اللي تخليه يشيل جبهة الأهلي بعد غياب طويل جدا عن الكورة، وهو أصلاً بيفقد كتير من قدراته لما بيلعب شمال وبيطر يدخل جوة بالقدم اليمين، فالدبيس لازم يكمل ظهير أيسر لأنه بيملك الزيادة والحلول للجانب دا. وتوفيق محمد اصلا مش هيبقي عندي اتنين واروح احط كريم عليهمزمش منطق والله يعني

* ثغرات العمق والتشكيل: ثنائية الجزار وهادي ثنائية أشبه بالقنبلة وداري. برجل واحد والله احسن مدافع حاليا في الفرقه اساسا احنا ملط في الدفاعو وفين بقي وا نجم الوديات علي محمود لأن مش منطقي اصلا لاعب عامل أداء ميخدش حتي 5دقايق وكوكا يلعب عليه كل ده يعني والله واقطاي ومتقوليش أن اللي انت نزلتهم دول التشكيل الأساسي هتبقي كارثه بس بما إن الراجل طلع بيجرب فــــ تمام. خط الدفاع بالمنظر الحالي مش هيوصلنا لحاجة على المدى الطويل، يامنعم ياعلي يوسف ودول الحل الوحيد لأننا تاني ملك
* هرم الترتيب الفني: أفشة وأحمد عيد وطاهر ومن علي شاكلتهم بيأكدوا للمرة المليون إن وجودهم مضيعة للوقت وسلبياتهم مضرة للأهلي؛ قفشة لسة بيلعب وترتيبه الفني في أولوية صانع اللعب قبل الصفقات والناس الاحسن فنيا زي علي ورضا والساعي بصراحة لا تعليق، الفريق محتاج مسطرة فنيه مش مجاملات
* نظرة للمستقبل: المدرسة التحفظية مش مبدئي بحب المدرب الجريء، لكن بشكل عام كـــــــ ظهور أول نقدر نقول إن الأهلي قدم مواجهة جيدة واستفاد جداااا من الماتش. الأهم دلوقتي تعمل بداية قوية للدوري، وهنستني نحكم رغم أن الجواب بيبان من عنوانه ولنا في كولر عبرة
وبس كدا، شاركوني آرائكم يا رجالة،
#الاهلي
#برشلونة

طيب ياصديقي، حالة الأهلي واضحة زي الشمس.. الفرقة مش جاهزة خالص، ومفيش أي ذرة إنسجام أو توافق بين أي خط من الخطوط التلاتة!
تشكيل إيه بس دي اختيارات أغرب من الخيال في كل المراكز؛ آه يا عم ما احنا عارفين إننا بنلعب برشلونة وبنواجه نجوم العالم، بس م انت برضه المفروض يبقى ليك شخصية وشكل ملعب واضح، مش منظرنا مقطوع وفاقدين الهوية بالشكل ده! ماتش تقيل وقوي زي ده مايستحملش أبداً إنك تحط لعيبة بعيدة عن الكورة ورتم المباريات بقالها شهور وشهور وتنخر في الفرقة وتقتل أي رتم.

خط وسطك ضايع تملي ومش موزون، ومحتاج لعيب يقف على الكورة ويعرف يخرج بيها بهدوء؛ لا زيزو نافع في مركز 8 ولا مروان ولا كوكا قادرين يعملوا أي استحواذ حقيقي أو تمريرات بين الخطوط تربط الدفاع بالهجوم، والأرقام بتأكد ده لما تلاقي نسبة الاستحواذ في الشارت الأول معدتش 32% ومفيش غير 3 تمريرات صحيحة بس بين الخطوط طوال أول نصف ساعة!
أتمنى يكون الراجل بيجرب بس في الماتش الودي ده وماتكونش دي قناعاته الفنية اللي هنكمل بيها الموسم!

تعال بص معايا بالأرقام والتفاصيل على تشكيل الأهلي في مواجهة برشلونة في كأس خوان غامبر وقراءة فنية سريعة:

• خط الدفاع: دا تقريباً خط الدفاع الأساسي في الموسم، بس الجزار هيكون بداله ياسر إبراهيم.. تمام، نمشيها.

• خط الوسط: كوكا وزيزو! معرفش ليه مش علي محمود، عالأقل ولد يعرف يلعبك كورة شوية ويهدي الرتم. نسبة فقد الكورة في وسط الملعب تخطت 45% في أول 45 دقيقة بس!

• الهجوم: طاهر محمد طاهر.. يعني مش منصّف بقرار حتى؟! معدل نجاح التحاماته الهجومية لا يتعدى 15%، لا هو طاهر، وخد الباب وراك وانت طالع بقى!
أنا فعلاً ماعرفش التشكيل ده المفروض يعمل هجمة ازاي أو يخرج بالكورة إزاي، وخريطة التمرير بتوريك إننا لعبنا 85% كرات طولة مقطوعة بلا أي عنوان.
سيبك بقى من الأداء الجماعي والنتيجة، ما هو أكيد في فارق مستوى مهول وطبيعي ومش دا المهم بالنسبة لي دلوقتي، أنا بس عاوز واحد يفيدني ويقولي: في كام كورة طلعنا بيها على الأرض سليمة من قلبي الدفاع؟! دي مصيبة، انت داخل الموسم مفيش ولا مدافع واحد عندك بيعرف يباصي كورة على الأرض لقدام بدقة تزيد عن 60%! هو في فريق في الدنيا كلها عاوز ينافس ويفوز ببطولة من غير ولا مدافع بيباصي؟! دي الكورة الحديثة قايمة على
الخروج السليم بنسبة نجاح 90% وأنت صفر على الشمال في الحتة دي!

ابقوا تعالوا في نص الموسم بعد ما تخلصوا تطبيل وقولوا "كان عندك حق يا كريم".. دا خط دفاع شوربة، واتفرج على الخورم اللي بيحصل، عمرو الجزار بيتسرق في ضهره للمرة رقم خمسين في ماتشين ورا بعض، ومعدل استخلاص الكورة عنده نزل لـ 20 بس، وحمزة بيسجل الهدف وكأن مفيش دفاع أصلاً

بس بالكلمة والأمانة الفنية وبمقارنة بسيطة بلغة الأرقام.. مع مارسيل كولر كنا أحسن بكتير جداً في الاستحواذ اللي كان بيوصل أحياناً لـ 60%، وكنا أدق في البناء والتمرير والخروج بالكورة من تحت بكتير. الأداء مقلق جداً وأرقام الفريق الدفاعية والهجومية كارثية وبصراحة شكل الفريق غير مبشر بالمرة لو استمررنا بالطريقة دي!

#الاهلي
#برشلونة

طيب ياصديقي، تعال نجيبها على بلاطة وفي الصميم.. عشان جمهور الأهلي فيه فئة بس تخليك تكره الكورة واللي وراها من شوية ناس بتقفل من السوشيال ميديا كلها! يا بني يا حبيبي، مفيش نادي على وجه الأرض يقدر يقعد لاعب غصب عنه ويطلع أعلى قدرات منه، والله عمرها ما حصلت في تاريخ اللعبة.. الكورة دلوقتي بقت "بزنس" و"شغف" مقرون بالراحة النفسية والمالية، لاعب دماغه مش معاك ومش عايز يكمل، لو قعدته هيتحول لمسمار في عجل الفريق!

فـ أنا معايا لاعب بحجم وقيمة إمام عاشور عنده 28 سنة، باقي في عقده سنتين، ومش راضي يجدد وجايله عرض كبير.. أمسك فيه ليه بالزبط؟! ما يغور يا عم أياً كانت قدراته! ما هو لو قعد معاك بالسيف، هيلوي بوزه، هو انت مفكره مراتك مثلاً عشان هيحبك ويتعلق بيك لما تشبط فيه وتدب في الأرض؟! فوقوا بقى!

بص يا معلم، البيع في التوقيت ده زي حكاية بن رمضان ووسام وغيرهم هو الحل العقلاني، وعاوز اعرفك بقاعدة صلبة: رغبة اللاعب فوق راسك وفوق رأس النادي بتاعك وفوق الفيفا كلها، ولو عاندت معاه وفتحت معركة كسر عضم، انت الخسران الوحيد: هتخسر مجهوده، هتخسر الملايين اللي هتيجي من وراء بيعه، وهتكسب قرف ومشاكل بالكوم!

🧠 بس تعالى بقى نتكلم "كورة" وبحتة تكتيكية بحتة.. إزاي ممكن نعوض إمام عاشور باللي موجودين تحت إمرة داهية زي عموتة؟!
دام المدير الفني اللي ماسك هو عموتة، الراجل ده بيموت في الانضباط التكتيكي، والضغط العالي، والتوازن الصارم بين الدفاع والهجوم، وعمره ما بيعتمد على لاعب واحد أو بيخضع لابتزاز حد.. فلسفته قايمة على المنظومة والرجالة اللي بتلعب بروح وعرق مش بالأسامي ولا الدلع!
فقدان لاعب بقدرات إمام عاشور كـ "الـ Box-to-Box" الخارق والـ Runner الشرس اللي بيدخل الـ 18 مش ساهل، لكننا مش مقطوعين من شجرة ولا واقفين على حد.. بص على الكنبة والأسماء اللي معاك زي عمر الساعي وعلي محمود، ودول لو اخدوا الفرصة وتوظيفهم صح تحت إيد عموتة، هيعملوا شغل عالي جداً:

* عمر الساعي (الجوكر الحركي وصانع الحلول): لاعب بيملك "موتور" في رجليه ورؤية ممتازة للتحركات بدون كورة، بيعرف يلعب كـ 8 هجومي أو 10، وعنده القدرة على التوغل في المساحات الشاغرة وضرب خطوط الخصم بتمريرات بينية أو تسديدات صاروخية. تحت إيد عموتة، هيتحول لـ "محطة" ربط مرعبة بإنضباط تكتيكي يخليك تنسى أي لاعب داهن بطيخة صيفي!
* علي محمود (الطاقة البدنية والاندفاع للـ Box): لاعب عنده شراسة وقدرة كبيرة على افتكاك الكورة والتحول السريع. توظيفه في منظومة عموتة اللي بتعتمد على التحولات العكسية والضغط الشرس هيخليه "قطار" في وسط الملعب، بيدي توازن دفاعي كبير وبيسمح للأطراف والظهيرين بالتقدم براحتهم من غير أي خلخلة.

* التوظيف التكتيكي الجماعي: عموتة يقدر يعوض الغياب ده بتعديل المنظومة لتعتمد على كثافة عددية في وسط الملعب، ونقل الواجبات الهجومية للاعبي الأطراف والتحولات المنظمة بدل الاعتماد الكلي على فرديات لاعب واحد.

الخلاصة ياصديقي: النادي الأهلي دائمًا بيكسب بالمنظومة الجماعية مش بالأفراد، وإمام عاشور لاعب كبير وكل حاجة، لكن لو مش عايز يكمل، الباب يفوّت جمل.. ومع أسماء واعدة وطموحة زي عمر الساعي وعلي محمود تحت قيادة عموتة، بيع اللاعب بالرقم الكبير ده هو المكسب الحقيقي فنياً ومالياً، والملعب هو الفيصل!
#الاهلي
#مصر