samar.hatem_official

أكتر حاجة ممكن تبوّظ علاقة أولادك بأمهم… إنك كأب تحاول تكسبهم عليها !! ✋

وده مش هيتوقف علي سوء العلاقه بالام بس للاسف!

في أب بيكون شايف إن وقوفه جنب أولاده ضد أمهم نوع من الحب والاحتواء:

“معلش سيبيهم
“متزعقيش لهم
“أنا هخليهم يعملوا اللي هم عايزينه
“خلاص أنا موافق، ماتكبريش الموضوع

مرة… واتنين… وعشرة.

ومع الوقت، الطفل بيبدأ يكتشف إن فيه طريق أسهل:

لو ماما رفضت → أروح لبابا
لو ماما حطت حدود → بابا يشيلها
لو ماما عاقبتني → بابا ينقذني

النتيجه طبعاً = طفل غير مسؤل في العموم❌

غير ان الأب من غير ما يقصد، بيعلّم ابنه إن احترام ماما اختياري طالما بابا موجود

والمشكلة مش بس إن الطفل هيبطل يسمع كلامها…

المشكلة إنه ممكن يبدأ يشوف أمه على إنها الطرف

“الشديد” اللي لازم يتحايل عليه، والأب هو الطرف اللي ممكن يكسر أي قاعدة

وده مع الوقت بيعمل صراع حقيقي جوه البيت:

أم بتحاول تربي… وأب بيحاول يكسب

والطفل في النص بيتعلم يستغل الخلاف بدل ما يتعلم احترام القواعد

⚠️ مش مطلوب من الأب إنه يوافق الأم في كل حاجة

ممكن جدًا تقول لها:

“أنا مش متفق معاكي

لكن تقولها بينك وبينها، مش قدام الطفل.

ولو شايف إن العقاب شديد، ناقشها بعدين

ولو شايف إن القرار غلط، اتفقوا على قرار تاني

⛔️لكن قدام أولادكم لازم يفضل فيه رسالة واضحة:

“ماما وبابا ممكن يختلفوا… لكن مش هتعرفوا

تستخدموا اختلافهم ضد بعض ✔️

، لان ده والله هيتقلب علي تربيه الأولاد ف العموم

تخيل حضرتك لو في يوم جالك سفر واضطريت ف يوم

من الايام انك تسابيهم بالشهور مثلا .. الاولاد ممكن تضيع

وأمهم للأسف مش هتبقي ليها اي سيطره عليهم !!!

الطفل مش محتاج أب يكسبه على حساب أمه

محتاج أب يحبه ويحترم أمه ويعلّمه إن الحب مش معناه

إننا نكسر القواعد علشان نرضي بعض❤️

_«ابني بيسرق و اكتشفت إنه حرامي!»

من الاستشارات المتكرره معايا واللي أهالي كتير للأسف

بتخاف جدااا وبتحتار فيها!

وعشان كده محتاجة أقول حاجة مهمة جدًا:

مش كل طفل أخد حاجة مش بتاعته يبقى عنده مشكلة سرقة… ومش كل طفل سرق مرة يبقى «حرامي».

إحنا كمتخصصين ما بنحكمش على الطفل من موقف واحد، لكن بنبص على

سنه، وفهمه لمعنى الملكية، وتكرار السلوك، وسببه،

واستجابته للتوجيه.

👶 أولًا: إمتى ممكن يكون ده طبيعي؟

الطفل الصغير جدًا ممكن ياخد حاجة لأنها لفتت انتباهه

أو عجبته، من غير ما يكون عنده الفهم الكامل لمعنى:

«دي بتاعتي ودي بتاعت غيري، ومينفعش آخدها من غير إذنه».

وفهم الأطفال للملكية والفرق بين الأخذ المسموح والأخذ غير المسموح بيتطور تدريجيًا مع العمر. وتشير مصادر متخصصة إلى أن الطفل عادةً يبدأ في فهم أن أخذ شيء يخص شخصًا آخر خطأ في مرحلة تقارب 3–5 سنوات، مع استمرار تطور هذا الفهم بعد ذلك. (AACAP)

فمثلًا:

طفل صغير شاف لعبة عند أخوه وأخدها → مش معنى كده إنه حرامي.

طفل أخذ قلم من المدرسة لأنه عجبه → محتاج يتعلم إن الحاجة دي مش بتاعته وإن لازم يستأذن، مش محتاج يسمع «إنت حرامي».

🧠 طيب لو الطفل أكبر؟

هنا الموضوع محتاج نفهم ليه أخذ الحاجة؟

لأن السرقة عند الأطفال الأكبر سنًا ممكن يكون وراها أسباب مختلفة، مثل:

• عايز حاجة ومش قادر يطلبها
• بيحاول يلفت الانتباه
• بيحاول يثبت نفسه قدام أصحابه أو يندمج معاهم
• بيشعر إن أخوه مفضل عليه فيحاول «يعادل» الوضع
• غضبان أو بيحاول يعاقب شخص بطريقة غير مباشرة
• عنده احتياج أو مشكلة عاطفية مش عارف يعبر عنها

وعشان كده السؤال الأهم مش:

❌ «إزاي ابني بقى حرامي؟»

لكن:

✅ «إيه اللي دفع ابني يعمل كده؟»

🚨 إمتى أبدأ أقلق وأطلب تقييم متخصص؟

لما السلوك يتكرر بشكل واضح ومستمر، خصوصًا بعد ما الطفل يكون فاهم إن أخذ ممتلكات الآخرين بدون إذن غلط

وكمان لو:

🔴 الطفل بيكرر السرقة رغم التوجيه والتعامل الصحيح

🔴 بيأخذ أشياء من الآخرين بشكل متعمد ومستمر

🔴 مش بيظهر أي اهتمام بتأثير سلوكه على الآخرين

🔴 السرقة مصاحبة لكذب متكرر أو عدوان أو تكسير أو سلوكيات مقلقة أخرى

🔴 السلوك بدأ يسبب مشاكل كبيرة في البيت أو المدرسة أو علاقاته

🔴 أو الأم بتلاحظ إن السرقة جزء من مجموعة أكبر من المشكلات السلوكية أو الانفعالية

في الحالات دي إحنا مش بنقول فورًا إن الطفل «حرامي» أو إن عنده اضطراب معين، لكن يستحق تقييمًا نفسيًا/سلوكيًا لمعرفة السبب الحقيقي وراء السلوك

❤️ والأهم: إزاي أتعامل؟

لو اكتشفتي إن ابنك أخذ حاجة مش بتاعته:

❌ ما تقوليش: «إنت حرامي».

❌ ما تفضحيهوش قدام إخوته أو الناس.

❌ ما تتوقعيش منه إنه «هيطلع حرامي» بسبب موقف.

لكن قولي بهدوء:

«أنا بحبك، لكن اللي عملته غلط. الحاجة دي مش بتاعتنا، ومينفعش ناخد حاجة من غير إذن صاحبها.»

وبعدين خليه يرجع الحاجة أو يصلح الخطأ بطريقة مناسبة لسنه.

لأن هدفنا مش إن الطفل يخاف منك…

هدفنا إنه يفهم الصح من الغلط، ويتعلم الأمانة، ويتحمل مسؤولية تصرفه

وأفتكري دايمًا:

في فرق كبير بين طفل «عمل سلوك غلط»
وطفل «هو نفسه هوالغلط »

إحنا بنعدل السلوك

مش بنحط وصمة على شخصية الطفل❤️

ولو ابنك بيسرق بشكل متكرر، ما تستنيش لحد ما المشكلة تكبر… اسألي الأول: «إيه السبب؟» قبل ما تسألي: «إزاي أعاقبه؟»

طفلك بيتحول لشخص تاني قبل النوم؟ 🫪

يجري
يطلب أكل ويقولك جعان
يفتكر لعبة
يرفض ينام
ويبدأ يختبر كل القواعد!

أحيانًا المشكلة مش «دلع» ولا «عناد»

بس لو فهمنا ما وراء السلوك هنفهم السلوك نفسه ليه بيعمله

الاطفال بتشوف إن الانتقال من نشاط ممتع إلى النوم صعب وفكره ان متعه اليوم خلصت لحد هنا فكره رخمه بالنسبه ليهم

جربي قبل ماينام روتين ثابت:
مثلا

🧸 لعب هادئ
🛁 تجهيز للنوم
📖 قصة قصيرة
🌙 إضاءة هادئة
😴 نوم

ومهم جدًا:

ما نستناش لحد ما الطفل ينهار من التعب عشان نقول «يلا نام» وعلي حسب الوقت اللي هيتعب فيه

🎯 الروتين المسبق بيقلل المقاومة لأنه بيخلّي الطفل عارف إيه اللي جاي ومخه مستعد ان معاد النوم جه

- لو انتي أم وبتشتغلي ومضطره تخرجي من البيت وخصوصاً في الأجازه

فلو سمحت ركزي في الكلمتين دول ❌❌

- ماينفعش نهائي تسيبي أولادك في البيت مع وجود( أنترنت )
اقسم بالله دي مصيبه كبري ⁉️

كميه الحالات اللي بشوفها بين الاطفال اللي انتشر فيها الزنا والشذوذ للأسف

مكلملوش ١٠ و١٢ سنه كترت جدااااا

وكل ده بسبب فضول الاطفال والملل ، بتبدأ بالفضول ولأسف بتنتهي بحاجه صعبه جداا

فرجاااااء :

- يكفي وجود فون مش اسمارت فون للأطمئنان فقط

- ممنوع وجود شاشه اسمارت فيها انترنت ممكن يتفرجوا علي كارتون علي التي في العادي

- لو معاه سمارت فون يبقي تفصلي النت قبل ما تنزلي من البيت

- لو بتسيبي أولادك وبيقعدوا مع بعض وقت طويل ف البيت لازم كاميرات في البيت

- كلمي اولادك كتيييير عن ربنا وازرعي فيهم الدين وان ربنا رقيب عليهم وشايفهم ديماً حتي لو انتي مش شيفاهم

- اتصلي بيهم كل شويه أطمني عليهم وتابعيهم

- أشغليهم بمهام مفيده وانتي بره البيت ويلتزموا بيها وهيبقي في مكافأه لو خلصوها وعقاب لو ماخلصتش

مثلا( حفظ قران- ترتيب شقه- خياطه ….)

- يلعبوا رياضه مفيده بيحبوها 💪

- واخيراً ازرعي فيهم ديماً الثقه ، أنا واثقه فيكو انا عارفه انكو محترمين ومتربيين كويس وبتحبوا ربنا ومش هتشوفوا ولا هتعملوا حاجه غلط حتي لو انا مش معاك

* للأسف اللي مش هيحط عينه ف وسط راسه في الزمن ده أولاده هتضيع 💔

ملحوظه : الكلام ده بيطبق في الاجازه والدراسه ✅

حملوهم وألعبوا مع أطفالكم 🫶🥳

من الاستشارات اللي بقابلها والام بتبقي متاثره جداا ❤️

ان حد من اولادها يقولولها

علي فكره بءا يا ماما.. أنا بكرهك!"

جملة كفيلة إنها توجع قلب أي أم... خصوصًا لو قالتها بعد ما أخدتي الموبايل، أو رفضتي طلب، أو التزمتي بقانون في البيت 🤗

بس عايزاكي تعرفي حاجة مهمة جدًا:

مش كل مرة ابنك يزعل منك تبقي غلطانة...ومش كل مرة يحبك فيها يبقى انتي صح.

أوقات كتير الطفل بيكون مبسوط جدًا من الشخص اللي بيسيبه يعمل كل اللي هو عايزه...لكن ده مش معناه إن ده الأفضل ليه.

لما تحددي وقت للموبايل،أو تمنعي السهر،أو تصري على المذاكرة،أو تطلبي منه يحترم قواعد البيت...

فأنتِ مش بتضايقيه، أنتِ بتعلميه مهارات هتخدمه طول عمره
:الالتزام، وضبط النفس، وتحمل المسؤولية.

والحقيقة اللي يمكن تطمنك:

ان الأطفال مش بيغضبوا من الحدود...هم بيغضبوا لأن الحدود منعتهم من حاجة كانوا عايزينها في اللحظة دي.

يعني لما يقول:"أنا بكرهك"

غالبًا المقصود:"أنا متضايق جدًا لأنك ما وافقتيش على اللي أنا عايزه."

مش:"أنتِ أم وحشة."

فلو ابنك زعل منك لأنكِ حطيتي قانون صحي أو التزمتي بقرار تربوي صح...ما تجلديش نفسك، وما تحسيش بالذنب.

لأن دور الأم مش إنها تكسب رضا أولادها وتخليهم طول الوقت مبسوطيين

وبالمناسبه (الحياه عموماً مش هتبقي جميله طول الوقت وسهله)

دورك إنك تربي أطفال يقدروا يعيشوا الحياة بشكل صحي ومتوازن،
حتى لو غضبوا منها شوية وهي بتعمل كده. ❤️

افتكري دايمًا:
مش مطلوب من أولادك يقولوا إنكِ ألطف أم في العالم...

المهم لما يكبروا يقولوا:"أمي كانت بتتعب عشان تعلمنا الالتزام وشكل الحياه الحقيقيه 🙏💕

كل عيد وانتم بخير وانتم إلي الله أقرب 😍

… لاتنسوني بصالح دعواتكم 💕