Brand Lab

براند لاب للتسويق الإليكتروني تهنئكم بعيد الأضحى المبارك
أعاده الله علينا وعليكم بالخير واليُمن والبركات
كل عام وأنتم بخير

العميل بيتجاهلك؟!! المشكلة مش في منتجك.
العميل مش بيتجاهلك عشان منتجك وحش أو سعرك غالي…
انت بس مش حاضر في ذهنه طول الوقت.

في التسويق فيه مفهوم مهم اسمه *Mental Availability*، ومعناه ببساطة إن البراند يكون حاضر في ذهن العميل وقت ما يحتاج يشتري. مش كفاية إن العميل يشوفك مرة ويعجب بالبوست أو يعمل لايك ويمشي. الأهم إنك تفضل تظهر له بشكل متكرر وذكي لحد ما اسمك يرتبط في دماغه بنوع المنتج اللي بتبيعه.

وده يفسر ليه صفحات كتير بتنزل محتوى كويس لكن البيع ضعيف. المشكلة مش دايمًا في جودة المحتوى، المشكلة إن العميل شافك لحظة وعدّت. ما اتكوّنش عنده ارتباط واضح بينك وبين احتياجه. لما يحتاج يشتري عجان، شنطة، زيت زيتون، مستحضرات، أو أي منتج، دماغه هتروح تلقائيًا لأول اسم مألوف وواضح بالنسبة له، مش بالضرورة لأفضل سعر أو أحسن منتج.

عشان كده التكرار مش رفاهية، لكنه جزء أساسي من التسويق. بس التكرار الصح مش معناه تنزل نفس البوست كل يوم وتزهّق الناس. التكرار الصح إنك تثبت نفس الرسالة بأشكال مختلفة: مرة فيديو استخدام، مرة رأي عميل، مرة مقارنة، مرة شرح ميزة، مرة عرض، ومرة لقطة حقيقية للمنتج. كده أنت مش بتزعج العميل، أنت بتبني مكان ثابت في ذاكرته.

الناس غالبًا ما بتشتريش من أول ظهور. هي بتلاحظك، بعدين تتعود عليك، بعدين تبدأ تثق، وبعدها تفكر تشتري. ودي رحلة اسمها *Customer Journey*، يعني الطريق اللي بيمشيه العميل من أول مرة يسمع عنك لحد ما ياخد قرار الشراء.

الصفحة اللي تظهر مرة وتختفي بتتنسى بسرعة.
لكن الصفحة اللي تظهر برسالة واضحة ومستمرة، بتتحول من مجرد إعلان عابر لاختيار حاضر في دماغ العميل وقت الشراء..
دلوقتي اكتبلنا محتواك ايه وايه المشكلة اللي بتقابلك مع العملا واحنا هنجاوبك..

#تسويق

عمرك سألت نفسك ليه محتواك بيتشاف بس مفيش حد بيتفاعل معاه وما فيش مبيعات؟.
السر ببساطة إنك بتتكلم عن نفسك وعن إمكانياتك أكتر ما بتتكلم عن العميل نفسه وعن الحل اللي هتقدمهوله.

الحقيقة اللي لازم تقبلها إن العميل مش بيهتم أوي بخبرتك أو إنك "رقم واحد في مجالك" قد ما بيهتم هو هيستفيد إيه وحياته أو شغله هيتغيروا إزاي للأحسن بسببك. كل ما تخلي كلامك بيدور حوالين العميل ومصلحته، كل ما التفاعل وفرص البيع هتزيد بشكل هتلاحظه فوراً..
عشان تظبط المعادلة دي وتعمل محتوى يجيب نتيجة، دايماً ابدأ كلامك بوجع أو مشكلة العميل بيعاني منها أو حتى حاجة نفسه يحققها، وبعدين قدمله الحل..
عشان الصورة توضح أكتر، خلينا نضرب مثال عملي لشركة بتبيع "فلاتر مياه".

الطريقة العادية المملة إنك تكتب: "احنا بنقدم أفضل فلاتر المياه بسبع مراحل أمريكية الصنع وعندنا أفضل فنيين صيانة". (هنا إنت بتتكلم عن نفسك)..
لكن الطريقة اللي بتجيب تفاعل ومبيعات إنك تكتب: "قلقان على صحة ولادك من طعم ولون المية اللي بتنزل من الحنفية؟ متخليش قلقك يطول، ركب فلتر الـ 7 مراحل واطمن إن ولادك بيشربوا مية نقية 100% ومفيدة لصحتهم من غير أي شوائب.. ابعتلنا رسالة دلوقتي وهنجيلك نركبهولك في نفس اليوم".

شفت الفرق في المثال؟ إنت هنا بدأت بمشكلة عند العميل (القلق على صحة ولاده)، واديتله الفايدة الواضحة (مية نقية)، وختمت بطلب تفاعل صريح (ابعتلنا رسالة). جرب تطبق الطريقة دي في البوستات بتاعتك اللي جاية وراقب بنفسك التفاعل هيتغير إزاي..
ولو عايز محتوى جذاب
كلمنا في Brand Lab

#تسويق