WMCC

ታራሚዎች በምህረት የተፈቱት የሀገራዊ ምክክሩን ውጤት በፍቅር ለመጀመር ነው - ጠቅላይ ሚኒስትር ዐቢይ (ዶ/ር)

አዲስ አበባ፣ መስከረም 1፣ 2019 (ኤፍ ኤም ሲ) በመቶ የሚቆጠሩ ታራሚዎች በምህረት የተፈቱት የሀገራዊ ምክክሩን ውጤት በፍቅር፣ በይቅርታ እና በሰላም ለመጀመር ነው አሉ ጠቅላይ ሚኒስትር ዐቢይ አሕመድ (ዶ/ር)፡፡

ጠቅላይ ሚኒስትሩ የ2019 አዲስ ዓመትን አስመልክተው ባስተላለፉት የእንኳን አደረሳችሁ መልዕክት÷ ሀገራዊ ምክክራችን ገደ መልካም መሆኑን በምክክሩ ብቻ ሳይሆን በውጤቱም እያሳየ ነው ብለዋል።

በአዲስ ዓመት ዋዜማ በመቶ የሚቆጠሩ ታራሚዎች መንግሥት በምሕረት እንዲፈቱ አድርጓል ያሉት ጠቅላይ ሚኒስትሩ÷ ይሄንን ያደረገበት ዓላማ የሀገራዊ ምክክሩን ውጤት በፍቅር፣ በይቅርታና በሰላም ለመጀመር መሆኑን ጠቁመዋል፡፡

ወደ ሀገራዊ ምክክር የመጡ ልዩ ልዩ ወገኖች በአንድም በሌላም ስሕተት የታሠሩ ወገኖች በይቅርታ እና በሕግ አግባብ እንዲፈቱ ጠይቀው እንደነበር አስታውሰው፣ መንግሥት ጥያቄውን ተቀብሎ በሂደቱ የተስማሙትን መፍታቱን ገልፀዋል፡፡

የምክክሩም ዓላማ ኢትዮጵያውያን እንዲነጋገሩ እና የተግባቡባቸውን የመፍትሔ ሐሳቦች እንዲያቀርቡ መሆኑን ጠቅሰው መንግሥትም ለምክክሩ ሐሳቦች ትግበራ ያለውን ቁርጠኝነት በዚህ የይቅርታ ሂደት ማሳየት መጀመሩን ተናግረዋል።

በዚህ የይቅርታ ሂደት የተፈቱ ወገኖች በሀገራዊ ምክክር ምክረ ሐሳቦች ላይ አዎንታዊ ሚና ይጫወታሉ ተብሎ እንደሚታመን እንዲሁም ካለፈው መንገድ በመማር የወደፊቱን መንገድ የሰላምና የዴሞክራሲ እንደሚያደርጉ ያላቸውን እምነት ገልጸዋል፡፡

ማኅበረሰቡም እነዚህ ወገኖች በሀገር ሰላምና ልማት የበኩላቸውን አስተዋጽዖ እንዲያደርጉ ማገዝና መምከር እንዳለበት መልዕክታቸውን አስተላልፈዋል፡፡

መነጋገር፣ መከራከርና መፎካከር ሲቻል ግጭትና ጦርነት አዋጪ አይደለም ያሉት ጠቅላይ ሚኒስትሩ÷ የብዕርና የሐሳብ ጊዜ እንጂ የጠመንጃ እና የጉልበት ጊዜ ማለፉን በመግለጽ የኢትዮጵያ የዘመን መጽሐፍ ካሁን በኋላ የጠመንጃና የጉልበት ታሪክን አይመዘግብም ብለዋል።

በቀጣይም የፖለቲካ ምኅዳሩ ሰፍቶ የተለያዩ ዕሳቤዎችንና አካሄዶችን በብሔራዊ ጥቅም አስተሣሥረን የምንጓዝበት ዓመት ይሆናል ሲሉ ተናግረዋል።

ከድሮን ትዕይንትነት ባሻገር

አዲስ አበባ፣ መስከረም 1፣ 2019 (ኤፍ ኤም ሲ) በአዲሱ ዓመት ዋዜማ የአዲስ አበባ ሰማይ በአስደናቂ የድሮን እና የርችት ትዕይንት ደምቆ አድሯል።

በመዲናዋ በተካሄደው ልዩ የአዲስ ዓመት አቀባበል 3 ሺህ ድሮኖች ሰማዩን በኅብረ ቀለም በማስጌጥ የሀገሪቱን ታሪክ፣ ልማት እና የተስፋ መንገድ የሚያሳይ በአየር ላይ የተሳለ ምስል በድንቅ ቅንጅት አስመልክተዋል።

ይህ በአፍሪካ በግንባር ቀደምነት ከሚጠቀሱ የድሮን ትዕይንቶች መካከል የሆነው ትዕይንቱ ከዘመን መለወጫ ዋዜማ ማድመቂያነት ባለፈ አንድምታው ብዙ ነው።

ትዕይንቱ ኢትዮጵያ በዘመናዊ ቴክኖሎጂ እና በፈጠራ ዘርፍ እያሳየች ያለችውን ፈጣን ዕድገት የሚያበስር ትልቅ ማሳያ ሆኖ ያለፈ ሲሆን ድሮኖቹ በአየር ላይ በመብረር የተለያዩ ሀገራዊ መልዕክቶችን በደመቀ ሁኔታ ስለው አሳይተዋል።

እንዲህ ዓይነቱ ዘመናዊ የአቪዬሽን ልህቀትና ቴክኖሎጂ ከኢትዮጵያ አዲስ ዓመት አቀባበል ባህል ጋር መዋሐዱ ሀገሪቱ በቴክኖሎጂ የታገዘ የብልጽግና እና የሉዓላዊነት ጉዞ ላይ መሆኗን የሚያመለክት ነው።

ትዕይንቱ የሀገር ውስጥ ተመልካቾችን ልብ ከመማረኩ ባሻገር በአፍሪካ እና በዓለም አቀፍ ደረጃም የብዙዎችን ትኩረት የሳበ ሆኖ አልፏል።

የዚህ ዓመት የዘመን መለወጫ ዋዜማ የድሮን ትዕይንት በታሪክ ማኅደር ውስጥ በጉልህ የሚመዘገብ አዲስ አህጉራዊ ምዕራፍ ሆኗል።

ኢትዮጵያ በአዲሱ ዓመት በሲቪል እና ዲጂታል ቴክኖሎጂ መስክ በአፍሪካ ጠንካራ አቅም እና ተስፋ እንዳላት ለዓለም ያበሰረችበት ታሪካዊ ክስተት ነው።

በአብረሃም አበራ

ታላቁ የኢትዮጵያ ሕዳሴ ግድብ የአፍሪካ አንድነት ኃይል ነው - ታይም አፍሪካ መፅሔት

አዲስ አበባ፣ መስከረም 1፣ 2019 (ኤፍ ኤም ሲ) ታላቁ የኢትዮጵያ ሕዳሴ ግድብ የሀይድሮ ኤሌክትሪክ ፕሮጄክት ብቻ ሳይሆን የአፍሪካ አንድነት ኃይል ነው አለ የታይም አፍሪካ መፅሔት፡፡

መፅሔቱ ታላቁ የኢትዮጵያ ህዳሴ ግድብን አስመልከቶ ባወጣው ሀተታ÷ ግድቡ በዘመናችን ካሉ ታላላቅ የአፍሪካ ታሪኮች አንዱ እና የአፍሪካውያን የጋራ ሀብት መሆኑን ጠቅሷል፡፡

በአባይ ወንዝ ላይ የተገነባው ይህ ፕሮጄክት በአፍሪካ ትልቁ የውሃ ኃይል ማመንጫ ጣቢያ መሆኑን እንዲሁም አፍሪካ ከገነባቻቸው ታላላቅ የመሰረተ ልማት ፕሮጄክቶች አንዱ መሆኑን አብራርቷል፡፡

ግድቡ 5 ሺህ ሜጋ ዋት ኃይል የማመንጨት አቅም እንዳለው በመግለፅ ይህም ለኢትዮጵያ ኢኮኖሚ እድገት ተግዳሮት የሆነውን የኃይል አቅርቦት ችግር በመፍታት ለንግድ ሥራዎች፣ ለማኑፋክቸሪንግ እና ለኢንዱስትሪ ዘርፎች በቂ ኃይል ለማቅረብ ያግዛል ብሏል፡፡

የሀይድሮ ኤሌክትሪክ ግድቡ የኢትዮጵያን የኃይል ዘርፍ እየለወጠ እና የኢንዱስትሪ ልማትን እየደገፈ እንደሚገኝ በመጠቆም ግድቡ ከኢትዮጵያ አልፎ የምስራቅ አፍሪካ ሀገራትን በኃይል አቅርቦት እያስተሳሰረ ይገኛልም ነው ያለው፡፡

በዚህም ታላቁ የኢትዮጵያ ሕዳሴ ግድብ የሀይድሮ ኤሌክትሪክ ፕሮጄክት ብቻ ሳይሆን አፍሪካውያን በመሰረተ ልማት ዘርፍ እንዲተሳሰሩ ያደረገ የአፍሪካ አንድነት ኃይል መሆኑን አስረድቷል፡፡

የአፍሪካውያን ግዙፍ ፕሮጄክቶች ቀደም ሲል በዓለም አቀፍ የፋይናንስ ተቋማት ወይም ኢንቨስተሮች ብድር ይገነቡ እንደነበር በማስታወስ ታላቁ የኢትዮጵያ ሕዳሴ ግድብ ግን ይህን ታሪክ በመቀየር በራስ አቅም መገንባቱን ገልጿል፡፡

በዚህም ግድቡ አፍሪካውያን በራሳቸው አቅም ታላላቅ ፕሮጄክቶችን መገንባት እንደሚችሉ እንዲሁም አፍሪካውያን በውጭ የፖለቲካ ተፅዕኖ ሳይገቱ የተፈጥሮ ሀብታቸውን ማልማት እንደሚችሉ ያሳዩበት መሆኑን ነው መጽሔቱ ያብራራው፡፡

ግድቡ ከሀይድሮ ኤሌክትሪክ ግድብነት ባለፈ ትልቅ ትርጉም ያለው እንደሆነ እና ታላቁ በአፍሪካ ቀንድና በአባይ ተፋሰስ ሀገራት መካከል ያለውን የጂኦ ፖለቲካ ግንኙነት ሙሉ በሙሉ የቀየረ ሜጋ ፕሮጀክት ነው ብሏል።

በሚኪያስ አየለ

በ3 ሺህ ድሮኖች የደመቀው የዋዜማ ምሽት፡ በራስ አቅም ወደ ቴክኖሎጂ ከፍታ

አዲስ አበባ፣ መስከረም 1፣ 2019 (ኤፍ ኤም ሲ) ዘመኑ የቴክኖሎጂ እና የፈጠራ ውድድር የገነነበት ነው። ሀገራት ከሰለጠነ የሰው ኃይል ባለቤትነት እስከ ዲጂታል ሽግግር አዳዲስ ከፍታዎችን ለመቆናጠጥ በእሽቅድድም ላይ ናቸው፡፡

በዚህ ዓለም አቀፍ ነባራዊ ሁኔታ ውስጥ ኢትዮጵያ ባለፉት ጥቂት ዓመታት በመደመር መንግሥት እሳቤ በቴክኖሎጂው መስክ እያመጣች ያለችው ለውጥ እና እያስመዘገበችው ያለው ድል አበረታች ነው፡፡

በተለይም በራስ አቅም እና በሀገር ውስጥ ባለሙያዎች ታግዞ በአዲስ ዓመት ዋዜማ የተካሄደው ግዙፉ የ3 ሺህ ድሮኖች ትርዒት የዚህ ሰፊ የቴክኖሎጂ ጉዞ ማሳያ ነው፡፡

በዋዜማው የተከናወነው አስደናቂ ሁነት የውጭ ባለሙያዎችን እና ቴክኖሎጂዎችን ብቻ ጥገኝነት በመከተል የተደረገ ሳይሆን ኢትዮጵያ ባለፉት ዓመታት በትምህርት፣ በሳይንስና በፈጠራ ዘርፍ ማልማት የቻለችውን የሰው ኃይል ብቃት መጠቀሟን በግልጽ ያሳየ ትልቅ ምዕራፍ ነው።

ወጣት ኢትዮጵያውያን መሐንዲሶች እና ባለሙያዎች የድሮኖቹን የበረራ ስልተ ቀመር፣ የቁጥጥር ሥርዓት እና ሌሎች አሰራሮችን በራሳቸው እውቀትና ትጋት ማቀናጀት ችለዋል።

ይህ ስኬታማ የድሮን ትርዒት ሀገሪቱ ለቴክኖሎጂ ዘርፍ የሰጠችው ትኩረት ፍሬ ማፍራት መጀመሩን ብቻ ሳይሆን ኢትዮጵያውያን ለታላላቅ የዲጂታል ፈጠራዎች ዝግጁ መሆናቸውን ጭምር የሚያሳይ ነው፡፡

ይህ የሰው ኃይል ልማት ከዘመኑ ቴክኖሎጂ ጋር ተጣጥሞ መጓዙ ሀገሪቱ በቴክኖሎጂው ዓለም ያላትን ሉዓላዊነትና በራስ መተማመን ከፍ አድርጎታል።

የአዲስ ዓመት መባቻን በማስመልከት በአዲስ አበባ ሰማይ ላይ የተከናወነው ይህ የ3 ሺህ ድሮኖች ትርዒት የከተማዋን ሌሊት ውብና ማራኪ ከማድረጉ ባለፈ አዲስ ዓመትን አብሳሪ መልዕክቶች የተላለፉበት ነበር፡፡

ድሮኖቹ በአንድነት በመቀናጀት በሰማይ ላይ የፈጠሯቸው የተለያዩ ባህላዊ፣ ታሪካዊ እና አዳዲስ ሀገራዊ መልዕክቶችን አዘል ቅርጾች ኢትዮጵያ በቴክኖሎጂ ዘርፍ አስደናቂ እመርታ እያሳየች መሆኑን የሚያረጋግጡ ናቸው፡፡

ይህ ትርዒት የኪነ ጥበብ እና የሳይንስ ውህደት ምን ያህል ማራኪ ሊሆን እንደሚችል ያሳየ፣ የኢትዮጵያን አዲስ ብሩህ ተስፋ እና የዕድገት ጎዳና በሰማይ ላይ በደማቅ ብርሃን የጻፈ ነው።

በርካታ ነዋሪዎች እና እንግዶች በአንድነት በመሆን የአዲስ ዓመትን ፅንሰ ሀሳብ ከቴክኖሎጂ ከፍታ ጋር አገናዝበው ተመልክተውበታል።

በራስ አቅም የተከናወነው ይህ የድሮን ትርዒት የአንድ ምሽት ድምቀት ብቻ ሳይሆን የኢትዮጵያ የዲጂታል ትራንስፎርሜሽን ጉዞ ምን ያህል ርቀት መጓዙን የሚያሳይ ቋሚ ምስክር ነው።

የኢኮኖሚው ዋና ማዕቀፍ እየሆነ የመጣው ቴክኖሎጂ እንደ ግብርና፣ ጤና፣ ቱሪዝም እና ደህንነት ባሉ መሰረታዊ ዘርፎችም የሀገር ውስጥ አቅምን በመጠቀም ዘላቂ መፍትሄዎችን ለማምጣት ትልቅ መነሳሳትን ይፈጥራል።

በአዲስ ዓመት ዋዜማ የታየው ይህ ስኬት ኢትዮጵያ ችግሮቿን በራሷ አቅም እየፈታች፣ በዓለም አቀፍ ደረጃም ተወዳዳሪና አዲስ ታሪክ መጻፍ የሚችሉ ልጆቿን ይዛ ወደ አዲስ የዕድገት ምዕራፍ እየተሸጋገረች መሆኗን ያረጋግጣል፡፡

የነገዋ ኢትዮጵያ የቴክኖሎጂ ከፍታ ከዚህም በላይ የላቀ እንደሚሆን እና ሌሎች በዘርፉ እየተከናወኑ የሚገኙ ሥራዎች ተጠናክረው መቀጠላቸውንም አመላካች ነው፡፡

በመላኩ ገድፍ

የተሳለጠ ሎጂስቲክስ ግዙፍ ኢኮኖሚና ብዙ ሕዝብ ላላት ኢትዮጵያ ወሳኝ ሚና አለው - ጠቅላይ ሚኒስትር ዐቢይ (ዶ/ር)

አዲስ አበባ፣ መስከረም 1፣ 2019 (ኤፍ ኤም ሲ) ዘመኑን የዋጀ ሎጂስቲክስ ግዙፍ ኢኮኖሚ እና ብዙ ሕዝብ ላላት ኢትዮጵያ ወሳኝ ሚና ይጫወታል አሉ ጠቅላይ ሚኒስትር ዐቢይ አሕመድ (ዶ/ር)፡፡

ጠቅላይ ሚኒስትር ዐቢይ (ዶ/ር) የሞጆ ሎጂስቲክስ ማዕከል ምረቃ ላይ ባደረጉት ንግግር ÷ ሎጂስቲክስ ለአንድ ሀገር ኢኮኖሚያዊ እድገት ከፍተኛ አቅም የሚፈጥር መሆኑን ገልፀዋል፡፡

ሎጂስቲክስ የባሕር በር ፣ ትራንስፖርትን፣ የአየር መዳረሻን፣ የባቡር መስመርንና የወደብ አገልግሎትን የሚያጠቃልል መሆኑን ጠቁመው ÷ የወጭ እና ገቢ እቃዎችን ለማሳለጥ ከፍተኛ አስተዋፅኦ ያበረክታል ብለዋል፡፡

እንደ ኢትዮጵያ በማደግ ላይ ላሉ እንዲሁም ከፍተኛ ሕዝብ እና ግዙፍ ኢኮኖሚ ላላቸው ሀገራት ሎጂስቲክስ የማይተካ ሚና እንደሚጫወት አስረድተዋል፡፡

የሞጆ ደረቅ ወደብ የኢትዮጵያን አንድ አስረኛ የሎጂስቲክ አገልግሎት የሚሸፍን ነው ያሉት ጠቅላይ ሚኒስትሩ÷ ፕሮጀክቱ ባለፉት ዓመታት ኢትዮጵያ ለምታስገባቸው እቃዎች መነሻና መዳረሻ ሆኖ ማገልገሉን አንስተዋል፡፡

የሞጆ ሎጂስቲክስ ማዕከል የኮንቴይነር የመያዝ አቅም ከ500 ሺህ ወደ 1 ሚሊየን ማደግ መቻሉን ጠቅሰው ÷ ይህም የወጭ እና ገቢ እቃዎችን እንቅስቃሴ ለማሳለጥ ተጨማሪ አቅም ይፈጥራል ነው ያሉት፡፡

የሎጂስቲክስ አገልግሎት ችግር ለኢትዮጵያ ኢኮኖሚ እድገት ማነቆ ሆኖ መቆየቱን በማንሳት፣ የሞጆ ሎጂስቲክስ ማዕከል እነዚህን ችግሮች እንደሚፈታ አስገንዝበዋል።

ኢትዮጵያ በአየር ትራንስፖርት የአፍሪካ መዳረሻ ማዕከል ለመሆን የጀመረችው ሥራ የተሟላ እንዲሆን የሞጆ እንዲሁም ሌሎች የደረቅ ወደቦች ከፍተኛ አስተዋፅኦ እንዳላቸው አብራርተዋል፡፡

ዘመኑን የዋጀና የተሳለጠ የሎጂስቲክስ አገልግሎት የኢትዮጵያን የኢኮኖሚ እድገት ይበልጥ እንደሚያጠናክርም አመልክተዋል፡፡

በትዕግስት ግዛቸው

ለ2019 ዓ.ም አዲስ ዓመት ዋዜማ የቀረበው የድሮን ትርዒት በምስል፦

የአፍሪካ ኅብረት እና ኢጋድ ለኢትዮጵያ ህዝብና መንግሥት ለአዲሱ ዓመት የእንኳን አደረሳችሁ መልዕክት አስተላለፉ

አዲስ አበባ፣ መስከረም 1፣ 2019 (ኤፍ ኤም ሲ) የአፍሪካ ኅብረት እና ኢጋድ ለኢትዮጵያ ህዝብና መንግሥት ለአዲሱ ዓመት የእንኳን አደረሳችሁ መልዕክት አስተላልፈዋል፡፡

የአፍሪካ ኅብረት ኮሚሽን ሊቀመንበር ማህሙድ አሊ ዩሱፍ፣ የኢትዮጵያን አዲስ ዓመት ምክንያት በማድረግ ባስተላለፉት የእንኳን አደረሳችሁ መልዕክት ለኢትዮጵያ መንግሥት እና ሕዝብ የሰላም ምኞታቸውን ገልጸዋል።

በአዲሱ ዓመት ለኢትዮጵያ ሕዝብ ሰላምን፣ አንድነትን እና ብልጽግናን የተመኙት ሊቀመንበሩ፣ የአፍሪካ ኅብረት ኮሚሽን የተባበረች፣ ሰላማዊ እና የበለጸገች አፍሪካን እውን ለማድረግ ከአጋር አካላት ጋር ተባብሮ ለመሥራት ያለውን ቁርጠኝነት አረጋግጠዋል።

እንዲሁም ኢትዮጵያ ለአፍሪካ አንድነት፣ ነጻነት እና ለአህጉሪቱ የጋራ ዓላማዎች ያበረከተችውን ታሪካዊ አስተዋጽኦ አድንቀዋል።

በተመሳሳይ የምሥራቅ አፍሪካ በይነ መንግሥታት ድርጅት (ኢጋድ) ለኢትዮጵያ መንግሥት እና ህዘብ አዲሱ ዓመት የሰላም እና የፍቅር እንዲሆን ተመኝቷል፡፡

ብርሃናማው ቀን መስከረም አንድ

አዲስ አበባ፣ መስከረም 1፣ 2019 (ኤፍ ኤም ሲ) ዛሬ መስከረም አንድ ነው፡፡ አንድ የምንለው ግን ለቀን መቁጠሪያ ብቻ አይደለም፤ ለአዲስ ጅምር ለአዲስ ተስፋ ለአዲስ ስኬትም ነው።

ዛሬ በሀገራችን አራቱም ማዕዘን የደስታና የአዲስ ተስፋ ስሜት ሰፍኗል፤ ህዝቡ በባህል አልባሳት አጊጧል፤ መስኩ አደይ አበባ ለብሷል።

ማለዳ በየሰፈሩ የእንቁጣጣሽ ተናፋቂ ዜማ ይሰማል በለመለመ ቀጤማ በተጎዘጎዙ ቤቶች ውስጥ የተቆላ ቡና መዓዛ ያውዳል።

ከየደጃፉ የሚደመጡት ቆየት ያሉ እንዲሁም አዳዲስ የበዓል ዘፈኖች ትውልድን በሚያስተስር የጋራ ትዝታ አስረው ስሜትን ሰቅዘው ይዘው ይመጣሉ።

አበባየሆሽ እያሉ ለሚጨፍሩ ልጃገረዶች ጎረቤቶችም ስጦታ እና እውነተኛ ፈገግታ ያካፍላል። ይህም ትልቁ የሰው ልጅ ሀብት ፍቅር መሆኑን ያስታውሰናል።

ዛሬ በሮች ሁሉ ክፍት ናቸው። የተራራቁ ወዳጆች ይጠያየቃሉ ልጆች የአባቶችንና የእናቶችን ጉልበት ስመው ምርቃት ይቀበላሉ፤ ማዕድ ቀርቦ ይቋደሳሉ የአዲስ ዘመን ምኞታቸውንም በአሜን ያሳርጋሉ፡፡

የኢትዮጵያውያንን በዓል አከባበር ልዩ የሚያደርገው የመረዳዳት እና የደስታ ተካፋይነት መንፈስ ከጥንት ህዝቡ የተጋመደበት መሆኑ ነው፡፡

በኢትዮጵያውያን የማህበረሰብ ህይወት ባህል መሰረት፤ ዛሬ የትኛውም ጎረቤት ማዕዱ ባዶ ሆኖ እንዳያድር ሁሉም በአቅሙ ይተጋገዛል።

ይህ መልካም እሴት እንዲህ ባለ የበዓላት ወቅት ብቻ ሳይሆን በአዘቦቱም በሰፊው ህዝብ ዘንድ ባህል ሆኖ ከትላንት እስከ ዛሬ የኢትዮጵያውያን መገለጫ መሆኑን ማሳያ ነው።

የመደመር መንግሥትም ማዕድ በማጋራት፣ ስጦታዎችን በማበርከት እና ለተቸገሩ እጁን ዘርግቶ አለኝታነቱን በማሳየት አርአያነት ያለው የማዕድ ማጋራት ተግባር እየፈጸመ ይገኛል፡፡

በዛሬው እለትም እንደወትሮው ሁሉ በበዓል ያለውን ተካፍሎ በመተሳሰብ ማሳለፍ ከሚጋራው ማዕድም በላይ፤ የኢትዮጵያውያንን የመተሳሰብና የአብሮነት መንፈስ የሚያጎናጽፍ የመልካምነት መገለጫ ነው፡፡

ይህ አዲስ ዓመትም በይቅርታ በአንድነት እና በጋራ ርዕይ የድካማችንን ፍሬ የምንበላበት ይሁንልን፤ ሰላም እና ፍቅርን ያብዛልን።

መልካም አዲስ ዓመት!

በምሕረት ደምሴ

ከንቲባ አዳነች አቤቤ የአዲስ ዓመት በዓልን በማስመልከት ማዕድ አጋሩ

አዲስ አበባ፣ መስከረም 1፣ 2019 (ኤፍ ኤም ሲ) የአዲስ አበባ ከተማ ከንቲባ አዳነች አቤቤ የአዲስ ዓመት በዓልን በማስመልከት በመዲናዋ በሚገኙ በ30ዎቹም የምገባ ማዕከላት ማዕድ አጋርተዋል፡፡

ከንቲባ አዳነች አቤቤ በማህበራዊ ትስስር ገጻቸው ባስተላለፉት መልዕክት አዲሱን ዓመት ስንቀበል እንኳን ለአዲስ ዓመት በሰላምና በጤና አደረሳችሁ ብለን ለወገኖቻችን ያለንን አክብሮት እና ፍቅር በመግለጽ ነው ብለዋል፡፡

አዲሱ ዓመት የፍቅር፣ የሰላም፣ የደስታ፣ የበለጠ የምንደጋገፍበትና ሰርተን የምንበለጽግበት የስኬት ዓመት እንዲሆን ሲሉም የመልካም ምኞት መልዕክታቸውን አስተላልፈዋል፡፡