Raval Update

રાવલ નગરપાલિકાની SBM શાખા દ્વારા ઘન કચરા વ્યવસ્થાપન નિયમો-2026 અંગે સફાઈ કર્મીઓ માટે તાલીમ કાર્યક્રમ યોજાયો હતો. કાર્યક્રમમાં નગરપાલિકાના પ્રમુખ, ઉપપ્રમુખ, સદસ્યો તેમજ નગરપાલિકા સ્ટાફ ઉપસ્થિત રહ્યા હતા. તાલીમ દરમિયાન સ્વચ્છતા અને કચરાના યોગ્ય વ્યવસ્થાપન અંગે માર્ગદર્શન આપવામાં આવ્યું હતું. તાલીમ પૂર્ણ થયા બાદ સફાઈ કર્મીઓને ચા-નાસ્તો કરાવવામાં આવ્યો હતો.

ગોરાણામાં નવજીવન વિદ્યાલયનો અનોખો પ્રવેશોત્સવ

ગોરાણા સ્થિત શ્રી નવજીવન ઉચ્ચતર વિદ્યાલયમાં “પ્રગતિનો પ્રવેશોત્સવ-2026” ઉત્સાહભેર ઉજવાયો. કાર્યક્રમ દરમિયાન બાલવાટિકા, આંગણવાડી, ધોરણ-1, ધોરણ-9 અને ધોરણ-11માં નવા વિદ્યાર્થીઓને પ્રવેશ અપાવી શૈક્ષણિક કીટનું વિતરણ કરવામાં આવ્યું. બાળકોના ઉત્સાહ વધારવા માટે હાથી અને સસલાના મસ્કોટ ખાસ આકર્ષણ બન્યા હતા. ઉપસ્થિત મહાનુભાવોએ શિક્ષણના મહત્વ અંગે માર્ગદર્શન આપ્યું.

દેવભૂમિ દ્વારકા ભાજપના પૂર્વ જિલ્લા પ્રમુખ ખીમભાઈ જોગલનું નિધન; રાજકીય અને સામાજિક વર્તુળોમાં શોકની લાગણી પ્રસરી

મૂળ મેવાસા ગામના વતની અને દેવભૂમિ દ્વારકા જિલ્લા ભાજપના પૂર્વ પ્રમુખ ખીમભાઈ જોગલના નિધનના સમાચારથી સમગ્ર પંથકમાં શોકની લાગણી પ્રસરી છે. જાહેર જીવનમાં સક્રિય રહી તેમણે સંગઠન અને સમાજ માટે મહત્વપૂર્ણ યોગદાન આપ્યું હતું.

ભગવાન તેમના આત્માને ચિરશાંતિ અર્પે તથા પરિવારજનોને આ દુઃખ સહન કરવાની શક્તિ આપે તેવી પ્રાર્થના. 🙏

ગોરાણા અને આસપાસના વિસ્તારોમાં બે દિવસ 11 કલાક વીજ કાપ

ચામુંડા JGY ગોરાણા ગામ, ચારણઆઈ AG વાડી વિસ્તાર તથા પંચકોશી વાડી વિસ્તારમાં આવતી કાલે અને તા. 26ના રોજ સવારે 7 વાગ્યાથી સાંજે 6 વાગ્યા સુધી વીજ પુરવઠો બંધ રહેશે. વીજ વિભાગ દ્વારા હાથ ધરાનારી કામગીરીને કારણે આ વિસ્તારોમાં 11 કલાકનો વીજ કાપ રહેશે. નાગરિકોને જરૂરી આયોજન અગાઉથી કરી લેવા અપીલ કરવામાં આવી છે.

હનુમાનધારમાં ભવ્ય શાળા પ્રવેશોત્સવ, 150થી વધુ બાળકોનો પ્રવેશ

પ્રગતિનો પ્રવેશોત્સવ-2026 અંતર્ગત હનુમાનધાર તાલુકા શાળા ખાતે ત્રણ શાળાઓ અને ચાર આંગણવાડીઓનો સંયુક્ત કાર્યક્રમ યોજાયો હતો. જિલ્લા યુવા વિકાસ અધિકારી હાથલિયા સાહેબની ઉપસ્થિતિમાં બાલવાટિકામાં આશરે 110 તથા ધોરણ-1માં 40 જેટલા દીકરા-દીકરીઓને પ્રવેશ અપાયો હતો. નવા વિદ્યાર્થીઓનું ઉષ્માભેર સ્વાગત કરી શિક્ષણયાત્રાની શુભ શરૂઆત કરાવવામાં આવી હતી.

મારુતિનગર પ્રાથમિક શાળા, રાવલમાં પ્રવેશોત્સવની ઉજવણી; 110% પ્રવેશ નોંધાયો

રાવલ ખાતે બાળકિલ્લોલ નગરી, મારુતિનગર પ્રાથમિક શાળામાં શાળા પ્રવેશોત્સવ – પ્રગતિનો પ્રવેશોત્સવ 2026ની ઉત્સાહભેર ઉજવણી કરવામાં આવી હતી. કાર્યક્રમ દરમિયાન બાલવાટિકામાં 26 અને આંગણવાડીમાં 2 બાળકોનો મંગલ પ્રવેશ કરાવવામાં આવ્યો હતો, જ્યારે અભ્યાસથી દૂર રહેલા 7 બાળકોને પુનઃપ્રવેશ અપાવવામાં આવ્યો હતો.

શાળાએ આ વર્ષે 110 ટકા પ્રવેશ હાંસલ કરી નોંધપાત્ર સિદ્ધિ મેળવી છે. કાર્યક્રમમાં ટ્રાફિક સુરક્ષા અંગે જાગૃતિ ફેલાવવામાં આવી હતી અને ઉપસ્થિત મહાનુભાવોએ શિક્ષણના મહત્વ અંગે માર્ગદર્શન આપ્યું હતું.

🚨 કલ્યાણપુરમાં ACBની કાર્યવાહી

કલ્યાણપુર તાલુકા પંચાયત કચેરીમાં ફરજ બજાવતા એક જુનિયર ક્લાર્કને રૂ. 3,000ની કથિત લાંચ સ્વીકારવાના આરોપસર ACB દ્વારા ઝડપી લેવામાં આવ્યા હોવાની માહિતી સામે આવી છે.

ઘટના અંગે વધુ તપાસ હાથ ધરવામાં આવી રહી છે. તપાસ પૂર્ણ ન થાય ત્યાં સુધી તમામ વિગતો પ્રાથમિક માહિતીના આધારે છે.

ગોરાણા, દૂધિયા અને નગડીયા વાડી વિસ્તારના વીજ ગ્રાહકો માટે મહત્વની સૂચના

આવતી કાલે સવારે 7 વાગ્યાથી સાંજે 6 વાગ્યા સુધી ગોરાણા, દૂધિયા અને નગડીયા વાડી વિસ્તારમાં વીજ પુરવઠો બંધ રહેશે.

વીજ વિભાગ દ્વારા MVCCની મહત્વપૂર્ણ કામગીરી હાથ ધરવામાં આવનાર હોવાથી ચામુંડા JGY, ગોરાણા AG અને દૂધિયા AG ફીડર હેઠળના વિસ્તારોમાં વીજ કાપ રહેશે.

👉 વિસ્તારના રહેવાસીઓને જરૂરી કામકાજ અને વીજ ઉપકરણોની વ્યવસ્થા અગાઉથી કરી લેવા વિનંતી.

⚡ કામગીરી પૂર્ણ થતાં વીજ પુરવઠો પૂર્વ સૂચના વિના શરૂ કરવામાં આવી શકે છે.

📢 વધુ સ્થાનિક સમાચાર અને મહત્વની જાણકારી માટે Raval Update સાથે જોડાયેલા રહો.