Dr. Ajaz Rahi

https://archive.org/details/tarikh-e-khattati/mode/2up

تاریخ خطاطی ( Tārikh E Khattāti) : Free Download, Borrow, and Streaming : Internet Archive تاریخ خطاطی (Tārikh-e-Khattāti)

https://www.scribd.com/document/1025318996/Mayray-Baad

Mayray Baad Dr. Ajaz Rahi: A Luminary of Urdu Letters and Cultural Thought Dr. Ajaz Rahi was a towering presence in the world of Urdu literature an erudite scholar, prolific writer, and devoted educator whose contributions enriched both literary and academic landscapes. Born on April 5, 1942, in Peshawar, Pakis...

https://youtu.be/4k09Tqlx9Vw

Bashir Hussain Nazim on Dr. Ajaz Rahi اعجاز راہی: شخصیت اور فن کا سنگمبشیر حسین ناظم نے نظم کے آغاز میں ہی اعجاز راہی کو "گلستانِ محبت کی کلی" اور "مروت کی ڈلی" قرار دے کر ان کی شخصیت کے اخلاقی پ...

اعجاز راہی کی یاد میں
(3 مئی 2006ء کو اسلام آباد میں تادیب انٹرنیشنل کے زیرِ اہتمام منعقدہ ریفرنس میں پڑھا گیا)
تحریر: منشا یاد
میرے مرحوم والد صاحب، اپنی ساری اولاد کے اسلام آباد اور لاہور میں مقیم ہونے اور آخری عمر کی بیماریوں کے باوجود، گاؤں میں رہنے کو ترجیح دیتے تھے۔ ہم انہیں زبردستی اپنے کشادہ، خوبصورت اور فرنشڈ گھروں میں لاتے، کاروں میں گھماتے پھرتے، مری، دامنِ کوہ اور دیگر خوبصورت مقامات کی سیر کراتے اور ہماری بیویاں طرح طرح کے پکوانوں سے ان کی خاطرتواضع کرتیں، مگر وہ چولہے پر چڑھنے والی مرغی یا کسی سدھائے ہوئے کبوتر کی طرح بار بار گاؤں کی بوسیدہ چھت پر جا بیٹھتے۔ انہیں اس بات کی فکر موت سے بھی زیادہ رہتی تھی کہ ایک دن وہ اپنے بیٹے بیٹیوں کو سخت مشکل میں ڈال دیں گے۔ وہ سوچتے کہ سب اپنے ضروری کاموں میں مصروف ہوں گے کہ اچانک گاؤں سے کوئی خبر آجائے گی اور انہیں دو ڈھائی سو میل کا سفر اچانک کرنا پڑے گا۔ پھر وہ خود ہی ڈھارس بندھا لیتے کہ کوئی بات نہیں، سب کے پاس اپنی گاڑیاں ہیں اور ایک ہی دن کی تو بات ہے۔
ہم ان کی باتوں کو مذاق سمجھتے رہے، مگر اب جب میرا بیٹا عامر شکیل امریکہ میں ہے، تو میں سوچنے پر مجبور ہوں۔ میں اگرچہ منہ سے نہیں کہتا کہ مجھ پر دیہاتی بے تکلفی کی جگہ شہری تہذیب کا ملمع چڑھ گیا ہے، مگر دل میں یہ خو ضرور پیدا ہو گیا ہے کہ ایک دن میں اپنے بیٹے کو مشکل میں ڈال دوں گا اور اس بے چارے کو اپنے کتنے ہی ضروری کام اور اپائنٹمنٹس منسوخ کر کے اچانک پاکستان آنا پڑے گا۔ چند روز پہلے میں نے اس المناک ڈرامے کی ایک جھلک دیکھ لی تھی اور اعجاز راہی کی صورت میں اپنی موت اور بیٹے کی امریکہ سے آمد کا منظر مشاہدہ کر لیا تھا۔
اعجاز راہی کا جنازہ اٹھانے کے بعد ان کا جسدِ خاکی قبرستان میں ان کے بیٹے شکیل کے انتظار میں رکھا گیا تھا اور مجھے یقین تھا کہ ان کی بند آنکھیں کسی دوسری دنیا میں جا کر کھل گئی ہوں گی اور وہ بے تابی سے شکیل کا انتظار کر رہی ہوں گی۔ یہ بھی دلچسپ اتفاق ہے کہ میرے بیٹے کا نام بھی شکیل ہے۔ مجھے بار بار خیال آ رہا تھا کہ اس کی تو کسی ایئر لائن میں جان پہچان بھی نہیں ہے۔ اس ٹھنڈی اور اداس رات کا منظر میرے لیے دوہرے صدمے کا باعث بنا: ایک اپنے عزیز اور پرانے ساتھی کی موت کا صدمہ اور دوسرا اپنی میت پر بیٹے کے بروقت نہ پہنچ سکنے کا۔
اعجاز راہی سے میری پہلی ملاقات تو مجھے یاد نہیں، لیکن میرا اندازہ ہے کہ یہ رشید امجد کے ذریعے 1960ء یا اس کے فوراً بعد ہوئی تھی، جب میں مری میں کچھ عرصہ گزار کر دوبارہ راولپنڈی آیا تھا۔ میرے مری جانے تک رشید امجد ابھی اختر رشید تھا اور افسانے سے اس کی دلچسپی صرف پڑھنے سننے تک محدود تھی۔ جب میں واپس آیا اور اس سے بزمِ میر میں ملاقات ہوئی تو اس نے افسانے لکھنا شروع کر دیے تھے۔ یہ دیکھ کر مجھے خوشگوار حیرت ہوئی، کیونکہ ہم ایک ہی محکمے میں ساتھ کام کر چکے تھے اور وہ میرے درجن بھر ابتدائی افسانے، جو 'شمع' اور 'عکس نو' میں شائع ہو چکے تھے، پڑھ چکا تھا۔ میں اسے نجی طور پر تعلیم جاری رکھنے کا مشورہ بھی دیتا رہتا تھا، جس پر بعد میں نہ صرف اس نے بلکہ ایس اے ناز اور خود میں نے بھی عمل کیا۔
مجھے زندگی بھر حسرت رہی کہ وہ اس سلسلے میں اور افسانہ نگاری سے اپنی ابتدائی دلچسپی کے بارے میں میرا کوئی حوالہ دیتا اور میرا بھی اعجاز راہی کی طرح ذکر کرتا۔ مگر اپنی خودنوشت میں تو اس نے یہ کہہ کر جھگڑا ہی ختم کر دیا ہے کہ اسے میرے افسانے کیسے پسند آ سکتے تھے! کیوں بھائی، اس وقت آپ نے کون سی پی ایچ ڈی کر لی تھی اور کافکا کو پڑھ لیا تھا؟ خیر، یہ تو جملہ معترضہ تھا۔
جب میری اعجاز راہی سے ملاقات ہوئی تو وہ جی ٹی ایس میں ملازم تھے اور رشید امجد کے ساتھ ادبی محفلوں میں آیا جایا کرتے تھے۔ میں سمجھتا ہوں کہ مرحوم راہی کا یہی اعجاز تھا کہ وہ کبھی کسی قسم کے احساسِ کمتری میں مبتلا نہیں ہوئے اور نہ ہی اپنی ماضی کی حیثیت پر شرمسار ہوئے۔ بلکہ وہ اس پر بجا طور پر فخر کرتے تھے کہ انہوں نے اپنی محنت سے ترقی کی اور علم و ادب کی منزلیں طے کر کے معاشرے میں ایک بلند مقام حاصل کیا ہے۔ انہوں نے کئی بار خواہش ظاہر کی کہ ہم چند پرانے دوست ان کے ہاں جمع ہو کر پرانی یادوں کو تازہ کریں اور انہیں ریکارڈ کر لیں۔ ایسی ہی کچھ یادیں انہوں نے اس ادبی خط میں بھی محفوظ کی تھیں جو انہوں نے رشید امجد کو اس کی پچاسویں سالگرہ کے موقع پر لکھا تھا۔
میری ان سے ابتدائی ملاقاتیں تھوڑے تھوڑے وقفے سے ہوتی رہیں، کیونکہ وہ یونین لیڈر تھے اور ان کی سرگرمیاں مختلف نوعیت کی تھیں۔ پھر وہ کہیں اور چلے گئے، مگر ہم ہر ہفتے 'لکھنے والوں کی انجمن' میں ملتے رہتے، جس کی ایک شاخ میں نے اسلام آباد میں قائم کر دی تھی، اور بعد میں حلقۂ اربابِ ذوق میں بھی ملاقاتیں ہوتی رہیں۔ ہم سب ایک دوسرے کو پسند کرتے تھے اور ایک دوسرے کی صحبت میں زیادہ سے زیادہ وقت گزارنا چاہتے تھے۔ میرے ہاں وہ رات بھر ریڈیو پروگرام کی ریکارڈنگ کے دوران، اپنے ذاتی دکھوں کو چھپانے کے لیے، خوب غزلیں اور گیت سنتے رہتے۔ ان کی ریٹائرمنٹ سے پہلے، پی آئی اے کے اسلام آباد والے دفتر میں ہماری کئی ملاقاتیں ہوئیں۔ میں انہیں 'شب خون' کا شمارہ دینے جاتا، کبھی وہ میرے ہاں رسالہ لینے آ جاتے اور ہم دیر تک گپ شپ کرتے رہتے، جسے ہماری ٹی ہاؤس کی اصطلاح میں 'منافقت کرنا' کہتے ہیں۔
آخری عمر میں پہنچ کر انہیں اس بات کا شدید احساس تھا کہ انہوں نے اپنا بہت کچھ رشید امجد پر نچھاور کر دیا ہے۔ یہاں تک کہ اپنے حصے کے بہت سے افسانے بھی نہیں لکھے اور ایک کتاب کے بعد افسانہ نگاری کا کام انہیں سونپ دیا تھا، اور رشید امجد کی مدح سرائی میں 'فنا فی الرشید' ہو گئے تھے۔ مگر رشید امجد کی طرف سے انہیں وہ پذیرائی نہیں ملی جو ملنی چاہیے تھی۔ وہ رشید امجد کی شان میں کبھی کبھار کچھ گستاخیاں بھی کر بیٹھتے کہ وہ بہت سیانا ہے، پائینز اور سرور کامران والے منافقت کے سمندر کی وہیل مچھلی ہے، مگر کیا کریں، میرا یار ہے۔ رشید امجد کی پچاسویں سالگرہ کے موقع پر اپنے خط میں بھی انہوں نے کچھ ایسی ہی دبی دبی شکایتیں کی تھیں، مثلاً:
"یوں بھی ساری اچھی چیزیں تم اپنے لیے رکھنے کے عادی ہو۔"
"پھر تم سالہا سال کہانیاں لکھتے رہے اور میں تمہیں داد دیتا رہا۔ گھنٹوں ایک ایک کہانی پر غور کرتے، تم دوبارہ لکھتے اور پھر رکھ لیتے۔ سالہا سال تم لکھنے اور میں تمہیں داد دینے میں اس قدر منہمک ہو گئے کہ دونوں کو یاد نہ رہا کہ مجھے بھی کہانی لکھنی ہے۔ اور جب یاد آیا تو اس وقت تمہارا قد 6 فٹ 1 انچ ہو چکا تھا اور میرا 5 فٹ 11 انچ پر ہی رک گیا تھا۔"
یوں تو میرے سمیت ہمارے گروپ کے سبھی لوگ سیلف میڈ اور محنتی تھےرشید امجد، اعجاز راہی، مظہر الاسلام اور احمد داؤد۔ سرور کامران شاید پہلے سے بنا بنایا تھا، لیکن محنت اور عظمت کی سب سے روشن مثال اعجاز راہی تھے، جنہوں نے کئی ملازمتیں بدلیں، بار بار صفر سے شروع کیا، بہت سے امتحانات پاس کیے، ایم اے اور پی ایچ ڈی کے علاوہ بی اے، ایل ایل بھی کر ڈالا۔ افریقہ، ایشیا، امریکہ اور یورپ کی مختلف زبانوں سے ان کے تراجم کا کام دیکھ کر حیرت ہوتی ہے کہ انہوں نے کس قدر استعداد حاصل کر لی تھی۔ انہوں نے 7 نوبل انعام یافتہ ادیبوں پر تنقید و تحقیق کا کام کیا اور اردو افسانے میں علامت نگاری پر بہت اہم اور شاید سب سے بھرپور کتاب تصنیف کی۔ ان کے افسانوں کا مجموعہ 'تیسری ہجرت' مقامی افسانہ نگاروں میں سب سے پہلا مجموعہ تھا۔
وہ ایک اچھے شاعر بھی تھے اور 'بے برکت دعائیں' کے نام سے ان کا خوبصورت شعری مجموعہ شائع ہوا تھا۔ انہوں نے 'شام ڈھلے' اور 'معتوب' کے نام سے دو ناول بھی لکھے، ان کا تیسرا ناول 'خواہشوں کے جزیرے' بھی مکمل ہو چکا تھا۔ وہ کبھی کبھار افسانہ بھی لکھ لیتے تھے، ان کے افسانوں کا دوسرا مجموعہ 'قیدی شاخ' زیرِ طبع تھا، مگر ان کا زیادہ رجحان اب تنقید و تحقیق کی طرف ہو گیا تھا۔ ان کی تنقیدی کتابوں میں 'اظہار'، 'اردو افسانے میں علامت نگاری'، 'اردو افسانے میں اسلوب کا آہنگ' وغیرہ شامل ہیں۔ انہوں نے تنقید و تحقیق سے متعلق بہت سی تکنیکی کتابیں بھی لکھیں، جیسے 'تاریخ خطاطی'، 'دست شناسی'، 'ادراک ماورائے حسیات'، 'اصولِ تنقید'، 'تحقیق اور اصول'، 'وضع اصطلاحات'، 'اردو زبان میں ترجمہ کے مسائل'، 'املا اور رموزِ اوقاف' وغیرہ۔
اعجاز راہی کی زیرِ طبع کتابوں میں ناول اور افسانوی مجموعہ کے علاوہ 'بیسویں صدی کے نوبل انعام یافتہ ادیب'، 'اردو افسانے کی ایک صدی' اور 'جدید تنقید کے چار ستون' جیسی اہم ترین کتابیں شامل ہیں۔
موجودہ دور کے حالات اور نفسا نفسی کے کلچر کو دیکھ کر میں نے کچھ عرصے سے دوستوں کے معاملے میں محتاط رویہ اختیار کر لیا ہے اور مولانا الطاف حسین حالی کی اس بات پر بہت دیر سے عمل شروع کیا ہے کہ "بڑھاؤ نہ آپس میں ملت زیادہ، مبادا کہ ہو جائے نفرت زیادہ"۔ اتنی عمر گزارنے کے بعد اب سمجھ میں آیا ہے کہ جن دوستوں کو آپ عزیز رکھتے ہیں، ان سے تھوڑا فاصلہ ضروری ہے، ورنہ وہی دوست جو آپ کی تعریف میں زمین و آسمان کے قلابے ملاتے نہیں تھکتے اور آپ کی ہر غم اور خوشی میں شریک ہوتے ہیں، وہ آہستہ آہستہ پنجابی زبان والے 'شریک' کا روپ دھار لیتے ہیں اور آپ کی جڑیں کاٹنے لگتے ہیں۔ لیکن ایک زمانے میں ہم سب ایک دوسرے سے کتنے مخلص تھے، اس کا اندازہ ایک چھوٹے سے واقعے سے لگائیے۔
اعجاز راہی کی رحلت پر مجھے ڈاکٹر ایم آئی حسین (خالدہ حسین کے شوہر) کی تعزیتی ای میل موصول ہوئی تو میں سوچ میں پڑ گیا کہ انہوں نے اہل خانہ یا دیگر دوستوں کی بجائے مجھ سے اظہارِ تعزیت کیوں کیا ہے؟ پھر مجھے 1984ء کا وہ واقعہ یاد آ گیا جب اعجاز راہی کو جبری ریٹائرمنٹ دے دی گئی تھی اور وہ بے روزگاری کی چکی میں پس رہے تھے۔ ہم سب دوست اپنی اپنی جگہ ان کی ملازمت کے لیے کوشاں تھے۔ ڈاکٹر ایم آئی حسین ان دنوں نیشنل بک فاؤنڈیشن کے ڈائریکٹر جنرل تھے۔ محترم فتح محمد ملک اور میرے ان سے اچھے تعلقات تھے، چنانچہ ہم دونوں نے باری باری ان سے اعجاز راہی کی ملازمت کے لیے سفارش کی۔ مشکل یہ تھی کہ اعجاز راہی زیرِ عتاب تھے اور انہیں سرکاری ملازمت دینا رسک لینے کے مترادف تھا، اس لیے ڈاکٹر ایم آئی حسین تامل کر رہے تھے۔
انہی دنوں میں بیمار پڑ گیا اور پولی کلینک میں ایک ماہ کے لیے داخل رہا۔ ایک روز جب مجھے بائی پاس کے لیے آپریشن تھیٹر لے جایا جا رہا تھا، ڈاکٹر صاحب میری مزاج پرسی کے لیے آئے اور اس بات سے بہت متاثر ہوئے کہ آپریشن تھیٹر جاتے ہوئے میں نے ان سے اپنے لیے دعا کی بجائے اعجاز راہی کی ملازمت کا وعدہ لینے پر اصرار کیا۔ وہ بڑے دھڑلے کے افسر اور مخلص دوست تھے، انہوں نے مجھے اطمینان دلایا اور اپنا وعدہ نبھایا۔ غالباً ڈاکٹر ایم آئی حسین نے اعجاز راہی سے میرے انہی پرخلوص تعلقات کی بنا پر مجھے تعزیتی پیغام بھجوایا۔ ان کا ایک بار پھر شکریہ۔
ضمیر جعفری صاحب نے ایک بار کہا تھا کہ جب میں نے اعجاز راہی کو پہلی بار حلقے میں تنقید کرتے دیکھا تو ایسا محسوس ہوا جیسے غصے میں بھرا ہوا کوئی پٹھان درخت پر کلہاڑا چلا رہا ہو اور اسے پتہ نہ چلے کہ درخت کب کا گر چکا ہے۔ لیکن اعجاز راہی تو کلہاڑا چلاتے چلاتے خود درخت بن گئے۔ ان پر زمانے نے بہت کلہاڑے چلائے مگر وہ ہمیشہ ثابت قدم رہے۔ ہم سب دوستوں میں صرف وہی ایک تھے جنہوں نے قید و بند کی صعوبتیں جھیلی تھیں اور اسی میں یہ جرأت تھی کہ فوجی آمریت کے دور میں مزاحمتی افسانوں پر مشتمل 'گواہی' جیسا مجموعہ مرتب کر کے شائع کریں اور اس گواہی کا اعلان کریں جو سچے ادیب اپنے اپنے عہد میں دیتے آئے ہیں۔ مجھے یاد ہے میں اور رشید امجد اتنے ڈرے ہوئے تھے کہ ہر روز ایک دوسرے سے پوچھتے کہ کوئی پوچھ گچھ کرنے تو نہیں آیا؟ مگر اعجاز کو کوئی پریشانی نہیں تھی۔
اعجاز راہی تھوڑے زود رنج بھی تھے اور جہاں زیادہ پیار ہو، وہاں ناراضی بھی جلدی ہو جاتی ہے۔ میرے ساتھ تو کبھی خفگی نہیں ہوئی، مگر ایک بار ڈاکٹر ایوب مرزا کی وجہ سے ان کی رشید امجد سے سخت ناراضی ہو گئی۔ اس جلتی پر بہت سے دوستوں نے تیل ڈالنا ضروری سمجھا اور یہ سلسلہ بڑھتے بڑھتے کئی مہینوں تک پھیل گیا۔ وہ دونوں میرے پرانے دوست اور ساتھی تھے۔ میں نے ایک روز کسی تقریب کے بہانے انہیں اپنے گھر بلایا۔ دونوں نے آنے کا وعدہ کرنے سے پہلے یہ اطمینان کرنا چاہا کہ ان کا ایک دوسرے سے سامنا نہ ہو۔ میں نے دونوں کو اکیلے میں یقین دلایا کہ صرف اسی کو مدعو کیا گیا ہے۔
پہلے رشید آیا، میں نے اسے دوسرے مہمانوں کے ساتھ بٹھایا اور گیٹ پر نظر رکھی۔ جیسے ہی اعجاز آئے، میں باہر نکلا، انہیں گیراج میں لے گیا اور اپنی سوزوکی کے ڈبے میں بٹھا دیا۔ پھر میں رشید کو بلا لایا اور اسے ڈبے کے اندر دھکیل کر خود ڈرائیونگ سیٹ پر بیٹھ گیا۔ میں نے کہا، "تم دونوں میرے سامنے ایک دوسرے سے لڑو، جھگڑو، ایک دوسرے کو برا بھلا کہہ کر غصہ نکال لو، مگر جب تک تم دونوں گلے نہیں ملتے، نہ میں دروازہ کھولوں گا اور نہ ہی تمہیں کھانا ملے گا۔" انہوں نے ایسا ہی کیا۔ خوب لڑے، جھگڑے، ایک دوسرے پر الزام تراشیاں کیں۔ پتہ چلا کہ اعجاز راہی کو رشید امجد کے ہاں پاؤں کی دعوت تھی، جس میں وہ اپنے ساتھ ڈاکٹر ایوب مرزا کو بھی لے گئے کیونکہ وہ دونوں کے مشترکہ دوست تھے۔ اس پر رشید امجد نے کہہ دیا کہ فوارہ چوک میں بہت لوگ ہوتے ہیں، وہاں سے کچھ اور ساتھ لے آتے۔ اس بات پر وہ بھڑک اٹھے اور ایوب مرزا کو بغل میں دبائے وہاں سے روٹھ کر چل پڑے۔
بات یہاں ختم ہو جاتی تو خیر تھی، مگر ستم یہ ہوا کہ رشید امجد ان کے پیچھے آیا۔ وہ سمجھے منانے آ رہا ہے، مگر اس نے ان کے پیچھے زور سے دروازہ بند کر دیا۔ مجھے اندازہ ہو گیا کہ سارا جھگڑا دروازہ زور سے بند کرنے کا ہی تھا۔ میں نے کہا، "یار، گرو دوارے کا وہ دروازہ لوہے کا ہے، آہستہ بند کرو تو بھی ایسا لگتا ہے جیسے زور سے بند کیا گیا ہو۔ جانے دو۔" اندر مہمان پریشان ہو رہے تھے کہ میزبان سمیت یہ لوگ کہاں گئے اور یہ لڑنے بولنے کی آوازیں کہاں سے آ رہی ہیں۔ لیکن آخرکار ان دونوں کی صلح ہو گئی۔
اعجاز راہی کا حلقۂ اربابِ ذوق سے پرانا اور گہرا تعلق تھا، خواہ وہ حلقہ اسلام آباد کا ہو، پنڈی کا یا نیویارک کا۔ انہوں نے ہر جگہ بہت مثبت اور فعال کردار ادا کیا۔ دو برس پہلے جب میں نیویارک کے حلقے میں پہنچا تو وہاں ہر طرف اعجاز راہی کا طوطی بول رہا تھا۔ جوہر میر سے تو ان کی بہت گہری دوستی تھی۔ اشرف میاں، جاوید پاشا اور نصرت انور سب ان کے گن گاتے تھے، بلکہ اب حسن عباس رضا بھی ان میں شامل ہو گئے تھے۔ اعجاز راہی میں بے شمار خوبیاں تھیں، لیکن یہ خوبی ان سب پر بھاری تھی کہ وہ کبھی جھوٹ اور تصنع سے کام نہیں لیتے تھے، کسی سے حسد نہیں کرتے تھے۔ وہ اندر اور باہر سے یکساں روشن اور پاکیزہ تھے۔ بے حد محبت کرنے والے، مہمان نواز اور دوسروں کے کام آنے والے انسان تھے۔
مجھے یاد آ رہا ہے، دو سال پہلے کی بات ہے۔ میری چھوٹی بہن کا جدہ، سعودی عرب میں انتقال ہو گیا۔ اس کا تابوت پی آئی اے کے ذریعے اسلام آباد پہنچ رہا تھا اور ہمیں اسے فوراً گاؤں لے کر جانا تھا۔ خیال تھا کہ ایئرپورٹ پر ہی نمازِ جنازہ پڑھ لی جائے تاکہ یہاں کے عزیز رشتہ دار بھی شامل ہو سکیں، لیکن ان دنوں سیکیورٹی کے باعث ایئرپورٹ اتھارٹیز اس کی اجازت نہیں دے رہی تھیں۔ میں نے فون پر اعجاز راہی کو اطلاع دی اور مدد طلب کی۔ اگلی صبح وہ نہ صرف ہم سب سے پہلے خود ایئرپورٹ پر موجود تھے، بلکہ میرے ایک ایک عزیز کو گلے لگا کر تعزیت کا اظہار کرتے رہے اور ہمیں گاؤں روانہ کرنے کے بعد ہی وہاں سے لوٹے۔
ایک بار مجھے ان کی ایک لیڈرانہ تقریر سننے کا بھی اتفاق ہوا۔ میں ان دنوں سی ڈی اے میں پی آر او تھا اور سی ڈی اے کی یونین کا کوئی بہت بڑا اجتماع تھا جس میں سیاستدان اور دوسرے محکموں کے یونین لیڈران بھی شریک تھے۔ جب اعجاز راہی بطور مزدور لیڈر مائیک پر آئے تو ان کا جوش و جذبہ دیکھ کر اور ان کی تقریر سن کر مجھے اندازہ ہو گیا کہ وہ کیوں زیرِ عتاب رہتے ہیں اور کیوں انہیں بار بار نوکری سے برخاست کیا جاتا ہے۔ وہ ایک روشن خیال اور ترقی پسندانہ سوچ کے حامل پابند عہد ادیب تھے۔ اور میں سمجھتا ہوں کہ ہر وہ شخص جس نے زندگی کے دکھ اٹھائے ہوں، آگے بڑھنے کے لیے ٹھوکریں کھائی ہوں اور جسے عملی جدوجہد کرنا پڑی ہو، وہ اسی طرح روشن خیال، انسان دوست اور ترقی پسندانہ نظریات کا حامل ہوتا ہے، جیسا کہ اعجاز راہی تھے۔
اللہ تعالیٰ انہیں اپنے جوارِ رحمت میں جگہ دے اور ان کے اہل خانہ اور عزیز و اقارب کو صبرِ جمیل عطا فرمائے۔ میں سمجھتا ہوں کہ اعجاز راہی اپنی خوبصورت شخصیت اور حسنِ سلوک کی وجہ سے عزیزوں اور دوستوں کے دلوں میں ہی نہیں، بلکہ اپنی بیش بہا تصانیف کی بدولت علم و ادب کی دنیا میں بھی ہمیشہ زندہ رہیں گے۔