Hamara Quetta

"زیارت کا دھرنا اب لواحقین کا نہیں، سیاست کا دھرنا بن چکا ہے"

کوئٹہ: وزیراعلیٰ بلوچستان کے ترجمان نور محمد دومٹر نے کہا ہے کہ زیارت واقعے پر جاری دھرنا اپنے اصل مقصد سے ہٹ چکا ہے اور اب یہ متاثرہ خاندانوں کے بجائے سیاسی مفادات کا پلیٹ فارم بنتا جا رہا ہے۔ ان کا کہنا تھا کہ لواحقین پس منظر میں چلے گئے ہیں جبکہ مختلف سیاسی عناصر دھرنے کو اپنے بیانیے اور سیاست چمکانے کے لیے استعمال کر رہے ہیں۔

نور محمد دومٹر نے کہا کہ حکومت واقعے کی شفاف، غیرجانبدار اور مکمل تحقیقات کر رہی ہے۔ اگر تحقیقات میں کسی بھی ادارے کا کوئی اہلکار، چاہے اس کا تعلق ایف سی، پولیس یا کسی اور سرکاری ادارے سے ہو، غفلت یا ملوث ہونے کا ذمہ دار ثابت ہوا تو اس کے خلاف بلاامتیاز اور قانون کے مطابق کارروائی کی جائے گی۔

انہوں نے کہا کہ اس سانحے کو سیاسی پوائنٹ اسکورنگ اور ریاستی اداروں کے خلاف نفرت انگیز بیانیہ بنانے کے لیے استعمال کرنے کے بجائے توجہ متاثرہ خاندانوں کو انصاف دلانے پر ہونی چاہیے۔ حکومت کی اولین ترجیح شہداء کے لواحقین کو انصاف فراہم کرنا، حقائق سامنے لانا اور ذمہ داروں کو قانون کے کٹہرے میں لانا ہے۔

ہنہ اوڑک میں حملہ: شہری اپنی مدد آپ کے تحت مزاحمت پر مجبور، پانچ زخمی ہسپتال منتقل، سینیٹر منظور کاکڑ نے حکومت کو آڑے ہاتھوں لے لیا

مانیٹرینگ ڈیسک


کوئٹہ: کوئٹہ کے کے علاقے ہنہ اوڑک میں اتوار کی شام سے جاری مسلح حملے کے بعد علاقے میں شدید کشیدگی برقرار ہے۔

مقامی ذرائع کے مطابق کالعدم تنظیم تحریک طالبان پاکستان (ٹی ٹی پی) سے وابستہ مسلح افراد نے علاقے میں حملہ کیا، جس کے نتیجے میں کم از کم پانچ افراد زخمی ہوئے ہیں، جنہیں فوری طور پر قریبی ہسپتال منتقل کر دیا گیا ہے۔ زخمیوں کی حالت کے بارے میں سرکاری سطح پر کوئی تفصیلات جاری نہیں کی گئیں۔

ذرائع کا کہنا ہے کہ حملے کے بعد علاقے کے شہری اپنی مدد آپ کے تحت دفاع پر مجبور ہیں اور مقامی لوگ مسلح افراد کا مقابلہ کر رہے ہیں، جبکہ پولیس اور دیگر قانون نافذ کرنے والے اداروں کی مؤثر موجودگی نہ ہونے کے برابر بتائی جا رہی ہے۔

مقامی افراد کے مطابق یہ جھڑپیں اتوار کی شام سے مسلسل جاری ہیں اور کئی گھنٹے گزرنے کے باوجود صورتحال مکمل طور پر قابو میں نہیں آ سکی۔
علاقہ مکینوں کا کہنا ہے کہ حملے کے فوراً بعد متعلقہ حکام کو اطلاع دی گئی، تاہم بروقت کارروائی نہ ہونے کے باعث شہریوں کو خود ہی اپنے علاقوں کی حفاظت کرنا پڑ رہی ہے۔

ان کے مطابق خوف و ہراس کی فضا برقرار ہے اور خواتین، بچے اور بزرگ شدید اضطراب کا شکار ہیں۔

دوسری جانب سینیٹر منظور کاکڑ نے واقعے پر شدید ردعمل دیتے ہوئے حکومت کی کارکردگی پر سخت سوالات اٹھائے ہیں۔

انہوں نے اپنے بیان میں کہا: "ہنہ اوڑک میں کالعدم تنظیم ٹی ٹی پی کا حملہ، پانچ افراد زخمی، حکومت غائب، عوام دہشت گردوں کے رحم و کرم پر چھوڑ دیے گئے ہیں۔"

سینیٹر منظور کاکڑ نے مزید کہا کہ اگر شہریوں کو اپنی جان و مال کے تحفظ کے لیے خود ہی ہتھیار اٹھانا پڑیں تو یہ ریاستی رٹ اور امن و امان کی صورتحال پر ایک بڑا سوالیہ نشان ہے۔

ان کا کہنا تھا کہ حکومت اور متعلقہ اداروں کی ذمہ داری ہے کہ وہ متاثرہ علاقے میں فوری طور پر سکیورٹی فورسز تعینات کریں، زخمیوں کو بہترین طبی سہولیات فراہم کریں اور حملے میں ملوث عناصر کے خلاف مؤثر کارروائی کریں۔

واضح رہے کہ واقعے سے متعلق سرکاری حکام کی جانب سے تاحال کوئی باضابطہ بیان جاری نہیں کیا گیا، جبکہ حملے کی نوعیت، حملہ آوروں کی تعداد اور نقصانات کی مکمل تفصیلات بھی سرکاری طور پر سامنے نہیں آئی ہیں۔

اس لیے بعض معلومات مقامی ذرائع اور عینی شاہدین کے بیانات پر مبنی ہیں، جن کی آزادانہ تصدیق ہونا ابھی باقی ہے۔

کوئٹہ: ہاشم نورزئی قتل کیس میں پولیس نے مقتول کے قریبی دوست کی گرفتاری کا دعویٰ کیا ہے۔

پولیس کے مطابق گرفتار ملزم نہ صرف مقتول کا قریبی ساتھی تھا بلکہ قتل کے بعد تعزیت اور فاتحہ خوانی میں بھی شریک ہوتا رہا۔

اس پیش رفت کے بعد سوشل میڈیا پر حکومت اور سیکیورٹی فورسز کے خلاف گردش کرنے والے غیر مصدقہ دعوؤں پر نئی بحث چھڑ گئی ہے۔

مبصرین کا کہنا ہے کہ حساس نوعیت کے مقدمات میں تفتیش مکمل ہونے سے پہلے غیر مصدقہ معلومات یا الزامات پھیلانے سے گریز کرنا چاہیے، جبکہ پولیس کا کہنا ہے کہ کیس کی مزید تحقیقات جاری ہیں اور تمام حقائق قانون کے مطابق سامنے لائے جائیں گے۔