Prasa

🎵 ප්‍රවීණ ගායක අජිත් මුතුකුමාරණ ‘ඇස යොමන තැනක’ ගීතයෙන් ඉවත් වෙයි

ප්‍රවීණ ගායන ශිල්පී අජිත් මුතුකුමාරණ මහතා සිය ජනප්‍රිය ‘ඇස යොමන තැනක’ ගීතය මින් ඉදිරියට කිසිදු ප්‍රසංගයකදී හෝ වේදිකාවකදී ගායනා නොකිරීමට තීරණය කර තිබේ.

අදාළ ගීතයේ පද රචිකාව විසින් නීතිඥවරයෙකු මාර්ගයෙන් එවන ලද එන්තරවාසියක් මඟින්, ඉදිරියේදී එම ගීතය ගායනා කරන්නේ නම් රුපියල් කෝටියක (රු. මිලියන 10ක) වන්දි මුදලක් ඉල්ලා ඇති බව සඳහන් වේ.

මේ සම්බන්ධයෙන් අදහස් දක්වමින් අජිත් මුතුකුමාරණ මහතා පවසා ඇත්තේ,

«“ඇස යොමන තැනක ගීතයට මට වාරණයක් ඇවිල්ලා තියෙනවා... ඒ ගීතය කියනවනම් කෝටියක මුදලක් එයාට ඕනේ කියලා. ඉතින් මම තීරණය කරනවා ඇස යොමන තැනක ගීතය අදින් පස්සේ ජනගත කරන්නේ නෑ, ගීතය ගායනා කරන්නේ නෑ.”»

යනුවෙනි.

මීට වසර 30කට පමණ පෙර ‘ජෝර්ජ් අයියා’ නම් ශිල්පියා විසින් නිර්මාණය කළ තනුවකට මෙම ගීතයේ පද රචනය සිදු කර ඇති බවත්, මින් ඉදිරියට එම ගීතය සඳහා තම කටහඬ හෝ රූපය භාවිත නොකරන ලෙස තමන් අවධාරණය කර ඇති බවත් ඔහු සඳහන් කර තිබේ.

එමෙන්ම ගීතයේ සම්පූර්ණ අයිතිය අදාළ පාර්ශ්වයට පවරා ඇති බව පවසමින්,

«“අයිතිය දීල ඉවරයි. මට සින්දුව එපා, ඔයා තියාගන්න.”»

යනුවෙන්ද ඔහු ප්‍රකාශ කර ඇත.

🎶 කලාව සහ නිර්මාණ අයිතිය පිළිබඳවද අදහස් දක්වමින්, කලාව හුදෙක් වාණිජ අරමුණු වෙනුවෙන් භාවිත කිරීම සහ මෙවැනි නීතිමය තහංචි හේතුවෙන් අවසානයේදී ජනප්‍රිය නිර්මාණ ප්‍රේක්ෂකයන්ගෙන් ඈත්වී යා හැකි බව ඔහු පෙන්වා දී තිබේ.

ගීතයක ජනප්‍රියත්වය පිටුපස පද රචනය පමණක් නොව, එම ගීතයට ආදරය කරන රසිකයන් සහ ප්‍රසංග සංවිධායකයන්ගේ දායකත්වයද විශාල වශයෙන් පවතින බව ඔහු සඳහන් කර ඇත.

මේ අතර, මෙම තත්ත්වය හමුවේ තම පූර්ණ බුද්ධිමය හිමිකාරිත්වය යටතේ පවතින,

🎵 රහසක් කියයි ඇය
🎵 විලාසිනියේ
🎵 හැඬුවා නුඹ
🎵 පෙර දින සිත බැඳුනා
🎵 සීත උදේ

වැනි ගීත ඉදිරියටත් කිසිදු කතෘභාගයකින් (Royalty) තොරව, ඕනෑම සංගීත කණ්ඩායමකට හෝ ප්‍රසංග සංවිධායකයෙකුට වාදනය කිරීමට සහ ගායනා කිරීමට විවෘත අවසරය ලබා දී ඇති බවද වාර්තා වේ.

එමෙන්ම නව නිර්මාණ සමඟින් ඉදිරියටත් තම ආදරණීය රසිකයන් හමුවීමට සූදානම් බව අජිත් මුතුකුමාරණ මහතා පවසා තිබේ. ❤️🎶