member six

📅 ၂၀၂၆ ခုနှစ်၊ ဇွန်လ ၂၃ ရက်

လားရှိုးတွင် စျေးသွားသည့် အမျိုးသမီးတစ်ဦး တိုက်ခိုက်ခံရပြီး ဆိုင်ကယ်လုယက်ခံရ

ရှမ်းပြည်နယ်မြောက်ပိုင်း လားရှိုးမြို့တွင် စျေးသွားနေသည့် အမျိုးသမီးတစ်ဦးကို အမည်မသိလူတစ်ဦးက ချွန်ထက်သောလက်နက်ဖြင့် တိုက်ခိုက်ပြီး ဆိုင်ကယ်လုယက်သွားခဲ့ကြောင်း ဒေသခံများ၏ ပြောကြားချက်အရ သိရသည်။

ဒေသခံများ၏ အဆိုအရ ဖြစ်စဉ်မှာ ဇွန်လ ၂၂ ရက် နံနက် ၄ နာရီကျော်ခန့်က လားရှိုးမြို့ ရပ်ကွက် (၁) ရှိ လဝကရုံးအဆင်းလမ်းနှင့် ထင်းရှူးမြိုင်အတက်လမ်းအနီးတွင် ဖြစ်ပွားခဲ့ခြင်းဖြစ်သည်။ အဆိုပါ အမျိုးသမီး စီးနင်းလာသည့် ဆိုင်ကယ်ကို လုယူရန် ကြိုးပမ်းစဉ် တိုက်ခိုက်ခံခဲ့ရကြောင်း သိရသည်။

ဖြစ်စဉ်ကြောင့် ထိခိုက်ဒဏ်ရာရရှိသူမှာ လက်တွင် ဒဏ်ရာရရှိခဲ့ပြီး ဆေးရုံတွင် ဆေးကုသမှုခံယူနေကြောင်း သိရသည်။

ဒေသခံတစ်ဦးက လားရှိုးမြို့တွင် လူသတ်မှု၊ လုယက်မှုနှင့် ခိုးဆိုးမှုများ မကြာခဏဖြစ်ပွားနေသဖြင့် ဒေသခံများအနေဖြင့် လုံခြုံရေးအပေါ် စိုးရိမ်ပူပန်နေကြကြောင်း ပြောသည်။

အလားတူ ယခုလအစောပိုင်းကလည်း ဆိုင်ကယ်လုယက်မှုနှင့် ဆက်စပ်သည့် အကြမ်းဖက်မှုတစ်ခု ဖြစ်ပွားခဲ့ပြီး သံသယရှိသူကို နောက်ပိုင်းတွင် ဖမ်းဆီးရမိခဲ့ကြောင်း ဒေသတွင်း သတင်းများတွင် ဖော်ပြထားသည်။
#လားရှိုး #ရှမ်းပြည်နယ် #ဆိုင်ကယ်လုယက်မှု #မှုခင်းသတင်း

🌍 ဥရောပတွင် အပူချိန် ၄၀°C ကျော်မြင့်တက်၊ ပြင်သစ်၌ ကျောင်းပေါင်း ၈၄၅ ကျောင်းပိတ်ထားရပြီး ရထားခရီးစဉ်များ ဖျက်သိမ်း

📅 ဇွန် ၂၃၊ ၂၀၂၆

🌡️ ဥရောပတိုက်ရှိ နိုင်ငံအချို့တွင် ဇွန်လ ၂၁ ရက်မှစတင်၍ နေ့အပူချိန်များ ၄၀ ဒီဂရီစင်တီဂရိတ်အထက်သို့ ဆက်လက်မြင့်တက်နေသဖြင့် ဇွန်လ ၂၂ ရက်တွင် ပြင်သစ်နိုင်ငံ၏ တစ်ဝက်နီးပါးဒေသများကို "အနီရောင်အဆင့် (Red Alert)" အပူလှိုင်းသတိပေးချက် ထုတ်ပြန်ထားရကြောင်း သိရသည်။

📍 ပြင်သစ်နိုင်ငံရှိ ပြည်နယ် ၉၆ ခုအနက် ၄၉ ခုအထိကို အန္တရာယ်အမြင့်ဆုံး "အနီရောင်အဆင့်" သတိပေးချက် ထုတ်ပြန်ထားပြီး အပူလှိုင်း၏ သက်ရောက်မှုကို လျှော့ချနိုင်ရန် အရေးပေါ်အစီအစဉ်များကို အကောင်အထည်ဖော်နေကြသည်။

🏫 အပူချိန်မြင့်တက်မှုကြောင့် နိုင်ငံတစ်ဝန်းရှိ စာသင်ကျောင်း ၈၄၅ ကျောင်းကို ပိတ်ထားရပြီး နောက်ထပ် ကျောင်းပေါင်း ၁,၈၀၀ တွင်လည်း ကျောင်းသားများကို ပုံမှန်ထက်စော၍ အိမ်ပြန်ခွင့်ပေးထားကြောင်း တာဝန်ရှိသူများက ပြောကြားခဲ့သည်။

⚠️ ပြင်သစ်နိုင်ငံသည် ၂၀၀၃ ခုနှစ် ဩဂုတ်လအတွင်း အပူလှိုင်းပြင်းထန်စွာ ကျရောက်ခဲ့ရာ လူပေါင်း ၁၅,၀၀၀ ခန့် သေဆုံးခဲ့ဖူးသဖြင့် ယခုတစ်ကြိမ်တွင် အလားတူဖြစ်ရပ်မျိုး မဖြစ်ပွားစေရန် ကြိုတင်ကာကွယ်ရေး အစီအစဉ်များကို တိုးမြှင့်ဆောင်ရွက်နေသည်။

🚆 အပူချိန် အလွန်မြင့်တက်လာပါက ရထားသံလမ်းများနှင့် လျှပ်စစ်ကေဘယ်ကြိုးများ ပျက်စီးနိုင်သည့် အန္တရာယ်ရှိနေသဖြင့် ပြင်သစ်တွင် ရထားခရီးစဉ်အချို့ကို ဖျက်သိမ်းထားရပြီး အရေးပေါ်အခြေအနေများအတွက် ရထားဌာနက ဝန်ထမ်းအင်အား ထောင်နှင့်ချီ၍ ထပ်မံချထားကြောင်း သိရသည်။

🏥 ထို့ပြင် ကမ္ဘာ့ကျန်းမာရေးအဖွဲ့ (WHO) ဥရောပရုံး၏ ယခုလထုတ်ပြန်ချက်အရ ပြီးခဲ့သည့် ၄ နှစ်အတွင်း ဥရောပနိုင်ငံများ၌ အပူဒဏ်ကြောင့် လူပေါင်း ၂ သိန်းကျော် သေဆုံးခဲ့ပြီး ယင်းသေဆုံးမှုအများစုမှာ ကြိုတင်ကာကွယ်နိုင်သည့် အခြေအနေများဖြစ်ကြောင်း ဖော်ပြထားသည်။

#ဥရောပ #ပြင်သစ် #အပူလှိုင်း #ရာသီဥတု #သတင်း

🚨 ထိုင်းနိုင်ငံ ချွန်ပူရီတွင် ရွှေဆိုင်မှ ရွှေဆွဲကြိုးအစစ်ကို အတုဖြင့်လဲလှယ်ခိုးယူရန် ကြိုးပမ်းသည့် မြန်မာအမျိုးသမီးတစ်ဦး ဖမ်းဆီးခံရ

📅 ဇွန် ၂၃၊ ၂၀၂၆

🇹🇭 ထိုင်းနိုင်ငံ၊ ချွန်ပူရီခရိုင်၊ သီရာချာ (Sri Racha) မြို့နယ်ရှိ ရွှေဆိုင်တစ်ဆိုင်တွင် ရွှေဆွဲကြိုးအစစ်ကို ရွှေအတုဖြင့် လဲလှယ်ခိုးယူရန် ကြိုးပမ်းခဲ့သည်ဟု စွပ်စွဲခံထားရသည့် အသက် ၃၄ နှစ်အရွယ် မြန်မာအမျိုးသမီးတစ်ဦးကို ဇွန်လ ၂၂ ရက်က ထိုင်းရဲတပ်ဖွဲ့က ဖမ်းဆီးထိန်းသိမ်းခဲ့ကြောင်း ထိုင်းသတင်းများအရ သိရသည်။

📍 ဖြစ်စဉ်မှာ ဇွန်လ ၂၂ ရက် ညနေ ၄ နာရီခန့်တွင် အဝေးပြေးလမ်းမကြီး အမှတ် ၃၃၁ အနီးရှိ Pak Ruam ဈေးအတွင်း ဖွင့်လှစ်ထားသည့် Boonchai Yaowarat ရွှေဆိုင်၌ ဖြစ်ပွားခဲ့ခြင်းဖြစ်သည်။

💬 ရွှေဆိုင်ပိုင်ရှင်၏ ပြောကြားချက်အရ အမျိုးသမီးသည် ရွှေဝယ်ယူမည့်သူအဖြစ် ဟန်ဆောင်ဝင်ရောက်လာပြီး အလေးချိန် ၃ ဒသမ ၇၅ ဂရမ်ခန့်ရှိသည့် ရွှေဆွဲကြိုးကို အချိန်အတော်ကြာ ကိုင်တွယ်ကြည့်ရှုခဲ့သည်။

🔄 ထို့နောက် ဆိုင်ပြင်သို့ ခေတ္တထွက်ခွာပြီး ပြန်လည်ရောက်ရှိလာကာ ရွှေဆွဲကြိုးကို ထပ်မံကြည့်ရှုခွင့်တောင်းဆိုခဲ့သည်။ မကြာမီ ငွေသွားထုတ်ပြီး ပြန်လာဝယ်မည်ဟု ပြောဆိုကာ ဆွဲကြိုးကို ပြန်အပ်ခဲ့သော်လည်း စစ်ဆေးရာတွင် မူလရွှေမဟုတ်ဘဲ ရွှေအတုဖြစ်နေကြောင်း တွေ့ရှိခဲ့သည်။

🔍 ဆိုင်ရှင်က သံသယရှိ၍ အမျိုးသမီးကို ပြန်လည်စစ်ဆေးရာ ၎င်းကိုင်ဆောင်ထားသည့် ပစ္စည်းများအတွင်းမှ ဆိုင်ပိုင် ရွှေဆွဲကြိုးအစစ်ကို ပြန်လည်တွေ့ရှိခဲ့ကြောင်း သိရသည်။

🚔 ထို့နောက် ဆိုင်တံခါးကို ပိတ်ထားကာ ရဲတပ်ဖွဲ့ထံ အကြောင်းကြားခဲ့ပြီး လက်ရှိတွင် အဆိုပါ မြန်မာအမျိုးသမီးကို ရွှေထည်ခိုးယူရန် ကြိုးပမ်းမှုဖြင့် ဥပဒေအရ ဆက်လက်အရေးယူဆောင်ရွက်နေကြောင်း သိရသည်။

#ထိုင်းသတင်း #ချွန်ပူရီ #ရွှေဆိုင်

မြန်မာနိုင်ငံကို ငွေကြေးခဝါချမှု အန္တရာယ်မြင့်နိုင်ငံအဖြစ် ဆက်လက်သတ်မှတ်ပြီး အမည်ပျက်စာရင်းတွင် ထပ်မံ ထည့်သွင်းထားဟု FATF က ကြေညာ

ရန်ကုန်၊ ဇွန် ၂၂

မြန်မာနိုင်ငံသည် ငွေကြေးခဝါချမှုတိုက်ဖျက်ရေး (AML) နှင့် အကြမ်းဖက်မှုငွေကြေးထောက်ပံ့မှုတိုက်ဖျက်ရေး (CFT) ကဏ္ဍများတွင် တိုးတက်မှုအချို့ရှိခဲ့သော်လည်း အွန်လိုင်းလိမ်လည်မှုနှင့် ဆိုက်ဘာရာဇဝတ်မှုအန္တရာယ်များ ဆက်လက်မြင့်မားနေသဖြင့် နိုင်ငံတကာ ငွေကြေးဆိုင်ရာ အရေးယူဆောင်ရွက်ရေးအဖွဲ့ (FATF) ၏ အမည်မည်းစာရင်းတွင် ဆက်လက် ထည့်သွင်းလိုက်ကြောင်း FATF က တရားဝင် ကြေညာသည်။

FATF ၏ နောက်ဆုံးအစည်းအဝေးကို ပြီးခဲ့သည့် သီတင်းပတ်အတွင်း ကျင်းပခဲ့ပြီးနောက် မြန်မာ နိုင်ငံကို အမည်မည်းစာရင်းမှ ဖယ်ရှားခြင်းမပြုဘဲ ဆက်လက်ထားရှိမည်ဟု ကြေညာခဲ့ပြီး နိုင်ငံတကာ ငွေကြေးဆိုင်ရာ အရေးယူဆောင်ရွက်ရေးအဖွဲ့ (FATF) က မြန်မာနိုင်ငံကို အရေးယူဆောင်ရွက်ရန် တောင်းဆိုထားသည့် အန္တရာယ်မြင့်နိုင်ငံများ (Black List) စာရင်းတွင် ဆက်လက် ထည့်သွင်းလိုက်ခြင်းဖြစ်သည်။

သို့သော် မြန်မာနိုင်ငံအနေဖြင့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေး (AML/CTF) စနစ်များကို မြှင့်တင်ရန် လုပ်ဆောင်ချက်အချို့ ရှိခဲ့ခြင်းကြောင့် ပိုမိုပြင်းထန်သည့် တန်ပြန်အရေးယူမှုများ (Countermeasures) ပြုလုပ်မည့်အစား ငွေကြေးဆိုင်ရာ ပိုမိုတင်းကျပ်စွာ စိစစ်မှု (Enhanced Due Diligence) ကိုသာ ဆက်လက်ကျင့်သုံးရန် FATF က တောင်းဆိုထားသည်။

ယင်းစနစ်အရ ဘဏ်များနှင့် ငွေကြေးအဖွဲ့အစည်းများသည် မြန်မာနိုင်ငံနှင့် ဆက်စပ်သည့် ဖောက် သည်များ၊ ငွေလွှဲပြောင်းမှုများနှင့် စီးပွားရေးဆက်ဆံမှုများအပေါ် ပိုမိုတင်းကျပ်စွာ စိစစ်ဆောင်ရွက်ရမည်ဖြစ်ပြီး အဆိုပါ အရေးယူမှုမှာ မြန်မာနိုင်ငံနှင့် ငွေကြေးဆက်သွယ်မှုများကို လုံးဝတားမြစ်သည့် အရေးယူမှုအဆင့်သို့ မရောက်သေးပေ။

မြန်မာနိုင်ငံအနေဖြင့် ၂၀၂၀ ပြည့်နှစ်တွင် မဟာဗျူဟာပိုင်းဆိုင်ရာ ချို့ယွင်းချက်များကို ပြုပြင်ဖြေရှင်းရန် ကတိပြုခဲ့သော်လည်း လုပ်ငန်းစီမံချက်များကို အချိန်မီ အကောင်အထည်မဖော်နိုင်ခဲ့ကြောင်း၊ ၂၀၂၂ ခုနှစ်တွင်လည်း တိုးတက်မှုမလုံလောက်သဖြင့် FATF ၏အမည်မည်းစာရင်းသို့ ဆက်လက်ထည့်သွင်းခဲ့ကြောင်း သိရှိရသည်။

FATF ၏ နောက်ဆုံးအစီရင်ခံစာအရ မြန်မာနိုင်ငံသည် ယခုအစီရင်ခံကာလအတွင်း ငွေကြေးထောက်လှမ်းရေးဆိုင်ရာ အချက်အလက်များကို ဥပဒေစိုးမိုးရေးအဖွဲ့များ၏ စုံစမ်းစစ်ဆေးမှုများတွင် ပိုမိုအသုံးပြုလာခြင်း၊ နိုင်ငံတကာပူးပေါင်းဆောင်ရွက်မှုဖြင့် နယ်စပ်ဖြတ်ကျော် ငွေကြေးခဝါချမှုအမှုများကို စုံစမ်းစစ်ဆေးလာခြင်းနှင့် ရာဇဝတ်မှုမှရရှိသည့် ငွေကြေးနှင့် ပိုင်ဆိုင်မှုများကို ပိုမိုသိမ်းဆည်းနိုင်လာခြင်း စသည့် တိုးတက်မှုများရှိကြောင်း အသိအမှတ်ပြုထားသည်။

သို့သော် မြန်မာနိုင်ငံအနေဖြင့် ငွေကြေးထောက်လှမ်းရေးယူနစ်၏ လုပ်ငန်းဆောင်ရွက်နိုင်စွမ်းကို ပိုမိုမြှင့်တင်ရန်၊ ငွေကြေးခဝါချမှုများကို အန္တရာယ်အဆင့်နှင့် ကိုက်ညီစွာ စုံစမ်းစစ်ဆေး တရားစွဲဆိုနိုင်ရန်နှင့် ကျန်ရှိနေသည့် လုပ်ငန်းစီမံချက်များကို အမြန်ဆုံး အကောင်အထည်ဖော်ရန် အရေးပေါ်ဆောင် ရွက်ရန်လိုအပ်ကြောင်း FATF က တိုက်တွန်းထားသည်။

ထို့ပြင် မြန်မာနိုင်ငံအတွင်း အွန်လိုင်းလိမ်လည်မှုနှင့် ဆိုက်ဘာရာဇဝတ်မှုများမှာ ဆက်လက်ကျယ် ပြန့်နေပြီး တရားမဝင်ငွေကြေးစီးဆင်းမှုအန္တရာယ်များကို ဖြစ်ပေါ်စေကြောင်း FATF က သတိပေးထားသည်။

မြန်မာနိုင်ငံက အွန်လိုင်းလိမ်လည်မှုနှင့် လောင်းကစားမှုများကို တိုက်ဖျက်ရန် အမျိုးသားအဆင့်ကော်မတီတစ်ရပ် ဖွဲ့စည်းခြင်းနှင့် ဒေသတွင်း၊ နိုင်ငံတကာပူးပေါင်းဆောင်ရွက်မှုများ တိုးမြှင့်ခြင်းစသည့် လုပ်ဆောင်မှုအချို့ရှိခဲ့သော်လည်း ဆိုက်ဘာလိမ်လည်မှုနှင့် ဆက်စပ်သည့် တရားမဝင်ငွေကြေးအန္တရာယ်များကို ထိရောက်စွာ ကိုင်တွယ်ဖြေရှင်းရန် လိုအပ်နေသေးကြောင်း FATF က ထောက် ပြထားသည်။

FATF အနေဖြင့် လူကုန်ကူးမှုနှင့် ရာဇဝတ်ဂိုဏ်းများ၏ အမြတ်ထုတ်ခံရသူများအပေါ် အထူးဂရုပြု၍ အဆိုပါ တရားမဝင်လုပ်ငန်းများကို တိုက်ဖျက်ရန် မြန်မာနိုင်ငံနှင့် ဆက်လက်ပူးပေါင်းဆောင်ရွက်သွားမည်ဟု ဆိုသည်။

FATF က မြန်မာနိုင်ငံသည် သတ်မှတ်ထားသည့် လုပ်ငန်းစီမံချက်အားလုံးကို ပြီးပြည့်စုံစွာ အကောင် အထည်ဖော်နိုင်သည့်အချိန်အထိ အမည်မည်းစာရင်းတွင် ဆက်လက်ရှိနေမည်ဖြစ်ကြောင်း ပြောကြားထားသည်။

အဆိုပါ ထုတ်ပြန်ချက်မတိုင်မီ တစ်ပတ်ခန့်ကလည်း တရုတ်သမ္မတ ရှီကျင့်ဖျင်က ပေကျင်းတွင် မြန်မာတာဝန်ရှိသူများနှင့် တွေ့ဆုံစဉ် အွန်လိုင်းလောင်းကစားနှင့် နယ်စပ်ဖြတ်ကျော်ရာဇဝတ်မှုများကို ဆက်လက်နှိမ်နင်းရန် မြန်မာနိုင်ငံကို တိုက်တွန်းထားသည်။

ဖူးခက်တွင် မြန်မာလုပ်သား ၆၂ ဦးနှင့် တရုတ်နိုင်ငံသား ၁၆ ဦး ဖမ်းဆီး၊ မဲဆောက်တွင်လည်း မြန်မာ ၄ ဦး ထပ်မံဖမ်းဆီးခံရ

ထိုင်းနိုင်ငံ ဖူးခက်ခရိုင်ရှိ အဆင့်မြင့်အိမ်ရာ ဆောက်လုပ်ရေးစီမံကိန်းတစ်ခုကို ထိုင်းအာဏာပိုင်များ ဝင်ရောက်စစ်ဆေးရာ တရားမဝင် အလုပ်လုပ်ကိုင်နေသည့် မြန်မာလုပ်သား ၆၂ ဦးနှင့် ဗီဇာအမျိုးအစား မမှန်ကန်ဘဲ အလုပ်လုပ်နေသည့် တရုတ်နိုင်ငံသား ၁၆ ဦးကို ဖမ်းဆီးခဲ့ကြောင်း ထိုင်းအာဏာပိုင်များက ထုတ်ပြန်သည်။

ဒေသခံများ၏ တိုင်ကြားချက်အရ ဇွန် ၁၈ ရက်တွင် ဖူးခက်ခရိုင် ချန်းသလေးဒေသရှိ စီမံကိန်းကို ထိုင်းအမှတ် (၄) စစ်ဒေသဌာနချုပ် ဦးဆောင်သည့် ပူးပေါင်းအဖွဲ့က စစ်ဆေးခဲ့ပြီး ဖမ်းဆီးမှုများ ပြုလုပ်ခဲ့ခြင်းဖြစ်သည်။

ဖမ်းဆီးခံရသည့် မြန်မာလုပ်သားများကို တရားမဝင် နေထိုင်အလုပ်လုပ်ကိုင်မှုဖြင့်၊ တရုတ်နိုင်ငံသား ၁၆ ဦးကို ဗီဇာစည်းကမ်းချိုးဖောက်၍ အလုပ်လုပ်ကိုင်မှုဖြင့် အရေးယူနိုင်ရန် ချန်းသလေးရဲစခန်းသို့ လွှဲပြောင်းထားပြီး၊ တရားရုံး၏ စီရင်ချက်ပြီးနောက် သက်ဆိုင်ရာနိုင်ငံများသို့ ပြန်လည်နှင်ထုတ်သွားမည်ဟု သိရသည်။

ထို့အပြင် တာ့ခ်ခရိုင် မဲဆောက်မြို့နယ်ရှိ Ban Huai Hin Fon ပူးတွဲစစ်ဆေးရေးဂိတ်တွင်လည်း တရားဝင် အထောက်အထားမရှိဘဲ ထိုင်းနိုင်ငံသို့ ဝင်ရောက်လာသည့် အသက် ၃၀ မှ ၄၂ နှစ်ကြား မြန်မာနိုင်ငံသား အမျိုးသား ၄ ဦးကို ဇွန် ၂၂ ရက်က ဖမ်းဆီးခဲ့ကြောင်း တာ့ခ်ခရိုင် လူဝင်မှုကြီးကြပ်ရေးဌာနက ထုတ်ပြန်သည်။

အဆိုပါ ၄ ဦးကို တရားမဝင် နိုင်ငံအတွင်း ဝင်ရောက်နေထိုင်မှုဖြင့် အမှုဖွင့်ထားပြီး ဥပဒေလုပ်ထုံးလုပ်နည်းများအတိုင်း ဆက်လက်ဆောင်ရွက်ကာ မြန်မာနိုင်ငံသို့ ပြန်လည်ပို့ဆောင်ရန် လူဝင်မှုကြီးကြပ်ရေး ထိန်းသိမ်းရေးစခန်းသို့ လွှဲပြောင်းထားကြောင်း သိရသည်။

ရန်ကုန်-မန္တလေးအမြန်လမ်းတွင် အဝေးပြေးယာဉ် ၂ စီးတိုက်မှုဖြစ်၊ ၃ ဦးသေဆုံး

ရန်ကုန်-မန္တလေးအမြန်လမ်း ရန်ကုန်သို့အသွားဘက် မိုင်တိုင် ၁၁၇/၇ ဖာလုံတွင် ဇွန် ၂၂ ရက် နံနက် ၃ နာရီခန့်က ရတနာဖြိုး Express နှင့် ရွှေမန္တလာ Express အဝေးပြေးယာဉ် ၂ စီး တိုက်မိခဲ့ရာ အမျိုးသား ၃ ဦး သေဆုံးပြီး ၄ ဦး ဒဏ်ရာရရှိခဲ့ကြောင်း သိရသည်။

မီးသတ်တပ်ဖွဲ့၏ ထုတ်ပြန်ချက်အရ ယာဉ်ပေါ်ပါ အမျိုးသား ၆ ဦးနှင့် ကိုရင် ၁ ပါးအနက် အမျိုးသား ၃ ဦးမှာ အခင်းဖြစ်နေရာတွင် သေဆုံးခဲ့ပြီး ကျန်အမျိုးသား ၃ ဦးနှင့် ကိုရင် ၁ ပါးကို ကယ်ဆယ်၍ ဆေးရုံသို့ ပို့ဆောင်ခဲ့သည်။

ယာဉ်တိုက်မှုကြောင့် အမြန်လမ်း မိုင်တိုင် ၁၁၇/၇ မှ ၁၁၉/၀ အထိ ၂ မိုင်ခန့် ယာဉ်ကြောပိတ်ဆို့ခဲ့ပြီး အဝေးပြေးယာဉ်များ လမ်းပေါ်တွင် အချိန်ကြာမြင့်စွာ စောင့်ဆိုင်းခဲ့ရကြောင်း သိရသည်။

အဝေးပြေးယာဉ်မောင်းတစ်ဦးက အချို့ယာဉ်လိုင်းများသည် အရှိန်မြင့်မောင်းနှင်ခြင်းနှင့် အချင်းချင်း ယှဉ်ပြိုင်မောင်းနှင်လေ့ရှိခြင်းကြောင့် ယာဉ်တိုက်မှုများ မကြာခဏ ဖြစ်ပွားနေကြောင်း ပြောဆိုခဲ့သည်။ ထို့ပြင် မိုးရွာသွန်းမှုကြောင့် လမ်းချောနေသည့် အခြေအနေကလည်း ယာဉ်မတော်တဆမှု ဖြစ်နိုင်ခြေကို ပိုမိုမြင့်တက်စေခဲ့ကြောင်း ခရီးသည်တစ်ဦးက ပြောသည်။

၂၀၂၅ ခုနှစ်အတွင်း ရန်ကုန်-မန္တလေးအမြန်လမ်းပေါ်၌ ယာဉ်တိုက်မှုပေါင်း ၁၆၀ ကျော် ဖြစ်ပွားခဲ့ပြီး သေဆုံးသူ ၅၀ ဦးနှင့် ဒဏ်ရာရရှိသူ ၁၉၂ ဦး ရှိခဲ့ကြောင်း သက်ဆိုင်ရာဌာန၏ စာရင်းများတွင် ဖော်ပြထားသည်။

ချင်းရိုင် ဆောက်လက်စ ရထားဥမင်တွင် ငြမ်းပြိုကျ၊ မြန်မာလုပ်သား ၁ ဦးအပါအဝင် ၂ ဦး သေဆုံး

ထိုင်းနိုင်ငံ မြောက်ပိုင်း ချင်းရိုင်ခရိုင် အတွင်း ဆောက်လုပ်ဆဲ ရထားဥမင်လိုဏ်ခေါင်းတစ်ခုတွင် ငြမ်းပြိုကျမှု ဖြစ်ပွားခဲ့ရာ အလုပ်သမား ၂ ဦး သေဆုံးပြီး ၇ ဦး ဒဏ်ရာရရှိခဲ့ကြောင်း ထိုင်းအာဏာပိုင်များက ထုတ်ပြန်ထားသည်။

သေဆုံးသူများအနက် မြန်မာနိုင်ငံသား ကိုတူး လည်း ပါဝင်ကြောင်း သိရပြီး အဆိုပါ မတော်တဆမှုသည် ဒန်ချိုင်–ချင်းရိုင်–ချန်ခေါင် (Den Chai–Chiang Rai–Chiang Khong) မီးရထားလမ်း စီမံကိန်းရှိ ဆောက်လုပ်ဆဲ ဥမင်လိုဏ်ခေါင်းတွင် ဖြစ်ပွားခဲ့ခြင်းဖြစ်သည်။

ပြည်ပတွင် အလုပ်လုပ်ကိုင်နေကြသော မြန်မာလုပ်သားများ၏ လုပ်ငန်းခွင်လုံခြုံရေးနှင့် အခွင့်အရေးများကို ပိုမိုကာကွယ်ပေးနိုင်ရန် သက်ဆိုင်ရာ တာဝန်ရှိသူများနှင့် အလုပ်ရှင်များအနေဖြင့် လုံခြုံရေးစံနှုန်းများကို တင်းကျပ်စွာ လိုက်နာဆောင်ရွက်ရန် လိုအပ်ကြောင်း ထင်မြင်ယူဆရသည်။

သေဆုံးသွားသူများအတွက် ဝမ်းနည်းကြောင်း မှတ်တမ်းတင်အပ်ပြီး၊ ဒဏ်ရာရရှိသူများလည်း အမြန်ဆုံး ပြန်လည်သက်သာလာစေရန် ဆုတောင်းအပ်ပါသည်။

#ထိုင်း #ချင်းရိုင် #မြန်မာလုပ်သား #လုပ်ငန်းခွင်လုံခြုံရေး #မတော်တဆမှု

ရွှေပြည်သာရှိ DeFacto အိတ်ချုပ်စက်ရုံတွင် အလုပ်သမား ၂၀၀ ကျော် လုပ်ခတိုးမြှင့်ရေး ဆန္ဒပြ

ရန်ကုန်တိုင်း၊ ရွှေပြည်သာမြို့နယ် ဝါးတရာစက်မှုဇုန်ရှိ တူရကီအခြေစိုက် DeFacto အမှတ်တံဆိပ်အတွက် အဓိကထုတ်လုပ်နေသည့် Myanmar Chaofa Leatherware Limited အိတ်ချုပ်စက်ရုံမှ အလုပ်သမား ၂၀၀ ကျော်သည် လုပ်ခတိုးမြှင့်ပေးရန် ဇွန်လ ၁၈ ရက်မှစ၍ ဆန္ဒပြတောင်းဆိုနေကြောင်း သွေးစည်းညီညွတ်သော သမဂ္ဂများအဖွဲ့ချုပ် (STUM) က ထုတ်ပြန်ထားသည်။

အလုပ်သမားများ၏ အဓိကတောင်းဆိုချက်များမှာ စက်မြင့်၊ စက်နိမ့် အလုပ်သမားများအား နေ့ကြေး ၁၂,၀၀၀ ကျပ် တန်းတူသတ်မှတ်ပေးရန်၊ အချိန်ပိုကြေးကို ၂,၀၀၀ ကျပ်မှ ၃,၀၀၀ ကျပ်သို့ တိုးမြှင့်ပေးရန်၊ ရက်မှန်ကြေးကို ၃၀,၀၀၀ ကျပ်မှ ၅၀,၀၀၀ ကျပ်သို့ တိုးပေးရန်နှင့် ဆန္ဒပြနေသည့် အလုပ်သမားများအပေါ် ဖယ်ရီ၊ အိမ်သာနှင့် သောက်ရေ ဝန်ဆောင်မှုများ မဖြတ်တောက်ရန်တို့ ဖြစ်သည်။

STUM ၏ ပြောကြားချက်အရ ရွှေပြည်သာမြို့နယ် အလုပ်သမားဝန်ကြီးဌာနမှ တာဝန်ရှိသူများသည် စက်ရုံအတွင်း ဝင်ရောက်ညှိနှိုင်းရာတွင် အလုပ်ရှင်ဘက်ကိုသာ အလေးပေးဆောင်ရွက်ခဲ့ပြီး အလုပ်သမားအဖွဲ့အစည်းများကို အသိအမှတ်မပြုသည့်အပြင် အလုပ်ရှင်၏ ယာဉ်ဖြင့် သွားလာခဲ့ကြောင်းလည်း စွပ်စွဲထားသည်။

ထို့ကြောင့် ညှိနှိုင်းဆောင်ရွက်မှုများကို စောင့်ကြည့်မှတ်တမ်းတင်သွားမည်ဟု STUM က ပြောဆိုထားသည်။

ထို့အပြင် အလုပ်သမား ၉၀၀ ကျော်ရှိသည့် အဆိုပါစက်ရုံတွင် ည ၇ နာရီ၊ ည ၉ နာရီအထိ အချိန်ပိုများသာမက တစ်ညလုံးဆက်တိုက် (All Night) နှင့် မိုးလင်းပေါက် (All In) အချိန်ပိုများကို အလုပ်သမား ၁၀၀ ခန့်အား ဖိအားပေးခိုင်းစေကြောင်း တိုင်ကြားမှုများလည်း ရှိနေသည်ဟု STUM က ယခင်က ထုတ်ပြန်ထားသည်။

လက်ရှိအချိန်တွင် အလုပ်ရှင်ဘက် သို့မဟုတ် သက်ဆိုင်ရာ အလုပ်သမားရေးရာ အာဏာပိုင်များ၏ တုံ့ပြန်ချက်ကို သီးခြားအတည်ပြု ထုတ်ပြန်ထားခြင်း မတွေ့ရသေးပါ။

အောင်မင်္ဂလာအဝေးပြေးဝင်းအတွင်း ခရီးသည်များကို ခြိမ်းခြောက်ငွေညှစ်နေသည့် လူမိုက်ဂိုဏ်းဝင် ၉ ဦး ဖမ်းဆီးခံရ

ရန်ကုန်မြို့၊ မင်္ဂလာဒုံမြို့နယ်ရှိ အောင်မင်္ဂလာအဝေးပြေးယာဉ်ရပ်နားစခန်းအတွင်း ခရီးသည်များကို ခြိမ်းခြောက်ငွေညှစ်ခြင်း၊ အငှားယာဉ်မောင်းများထံမှ ဆက်ကြေးကောက်ခံခြင်းများ ပြုလုပ်နေသည်ဟု စွပ်စွဲခံထားရသည့် လူခေါ်ပွဲစား လူမိုက်ဂိုဏ်းဝင် ၉ ဦးကို ဓားရှည်နှင့် ဓားမြှောင်များအပါအဝင် လက်နက်များဖြင့် ဖမ်းဆီးရမိခဲ့ကြောင်း သိရသည်။

အဆိုပါ ဖမ်းဆီးမှုများကို ဇွန်လ ၁၆ ရက်မှ ၁၉ ရက်အတွင်း ကွင်းဆက်လိုက်လံစုံစမ်းကာ ဆောင်ရွက်ခဲ့ခြင်းဖြစ်သည်။

ဇွန်လ ၁၉ ရက်တွင် အဝေးပြေးကားဝင်းအတွင်း ခရီးသွားအမျိုးသမီးတစ်ဦးထံမှ လက်ကိုင်ဖုန်းနှင့် ငွေကြေးများ လုယက်ယူဆောင်ထွက်ပြေးခဲ့သည်ဟု ဆိုထားသည့် သိုက်ထွန်းနှင့် အသေးလေးတို့ကို မင်္ဂလာဒုံ ဇေကမ္ဘာစက်မှုဇုန်အနီးတွင် ဓား ၄ ချောင်းနှင့်အတူ ဖမ်းဆီးရမိခဲ့ကြောင်း သိရသည်။

ထို့အပြင် မြောက်ဥက္ကလာပမြို့နယ်၌ ဓားသယ်ဆောင်လာသည့် လူခေါ်ပွဲစားတစ်ဦးနှင့် မင်္ဂလာဒုံမြို့နယ်အတွင်းရှိ အခြားလူခေါ်ပွဲစား ၆ ဦးကိုလည်း ဓားရှည်နှင့် ဓားမြှောင်များ ကိုင်ဆောင်ထားစဉ် ထပ်မံဖမ်းဆီးရမိခဲ့ကြောင်း ဖော်ပြထားသည်။

အောင်မင်္ဂလာကားဝင်းအတွင်း နေထိုင်သူတစ်ဦးကလည်း ဖမ်းဆီးခံရသူများသည် လွယ်အိတ်အတွင်း ဓားများထည့်သွင်းသယ်ဆောင်လေ့ရှိပြီး ကားဝင်းအတွင်း ယင်းကဲ့သို့သော လူမိုက်အဖွဲ့များ ဆက်လက်ရှိနေသေးကြောင်း ပြောဆိုထားသည်။

ဒေသခံများနှင့် ယာဉ်မောင်းအသိုင်းအဝိုင်း၏ ပြောကြားချက်အရ အဆိုပါအဖွဲ့များသည် အဝေးပြေးကားဝင်းအတွင်း နယ်မြေခွဲကာ အငှားယာဉ်မောင်းများထံမှ ဆက်ကြေးကောက်ခံခြင်း၊ ခရီးသည်များကို ခြိမ်းခြောက်၍ သတ်မှတ်ထားသည့် ယာဉ်ခနှုန်းထားထက် ပိုမိုတောင်းခံခြင်းများ ပြုလုပ်လေ့ရှိကြောင်း သိရသည်။

ထို့ပြင် လူမိုက်ဂိုဏ်းများသည် ကားဝင်းအတွင်း လှုပ်ရှားနိုင်ရန် တာဝန်ကျ လုံခြုံရေးတပ်ဖွဲ့ဝင်အချို့အား ပုံမှန်ငွေပေးကာ အကာအကွယ်ရယူနေသည်ဟု ဒေသခံများက ပြောဆိုသော်လည်း ယင်းစွပ်စွဲချက်ကို သက်ဆိုင်ရာတာဝန်ရှိသူများက အတည်ပြုထုတ်ပြန်ထားခြင်း မရှိသေးပေ။

မော်လမြိုင်တွင် လွှတ်တော်လုံခြုံရေးရဲတပ်သားကို ရေလုပ်သားအဖြစ် ရောင်းစားရန် ကြိုးပမ်းခဲ့သည့် ပျူစောထီး ၃ ဦး ဖမ်းဆီးခံရ

မွန်ပြည်နယ်၊ မော်လမြိုင်မြို့တွင် ပြည်နယ်လွှတ်တော် လုံခြုံရေးတာဝန်ထမ်းဆောင်နေသည့် ရဲတပ်သားတစ်ဦးကို ရေလုပ်သားအဖြစ် ရောင်းစားရန် အတင်းအဓမ္မ ဖမ်းဆီးခေါ်ဆောင်ခဲ့သည်ဟု စွပ်စွဲခံရသည့် စစ်တပ်လက်အောက်ခံ ပျူစောထီး ၃ ဦးကို ရဲတပ်ဖွဲ့က ဖမ်းဆီးထားကြောင်း သိရသည်။

ဖြစ်စဉ်မှာ ဇွန်လ ၁၉ ရက် ညနေပိုင်းက မော်လမြိုင်မြို့ရှိ နဂါးမောက်စေတီတော်သို့ ဘုရားဖူးသွားရောက်ခဲ့သည့် ရဲတပ်သား ဇော်မင်းထွန်းအား အမျိုးသား ၃ ဦးက “ဗိုလ်မှူး” ဟု အမည်ခံကာ နားရင်းရိုက်ပြီး အတင်းအဓမ္မ ဖမ်းဆီးချုပ်နှောင်၍ ဆိုင်ကယ် ၂ စီးဖြင့် ကျိုက္ခမီမြို့သို့ ခေါ်ဆောင်သွားခဲ့ခြင်းဖြစ်သည်။

ထို့နောက် ရေလုပ်သားပွဲစားတစ်ဦး၏ နေအိမ်သို့ ပို့ဆောင်ကာ စရံငွေ ကျပ် ၁၂ သိန်း ထုတ်ပေးရန် တောင်းခံခိုင်းခဲ့သော်လည်း ပွဲစားက အခြေအနေမမှန်ကြောင်း သတိပြုမိ၍ ရဲတပ်သားအား ကျိုက္ခမီရဲစခန်းသို့ သွားရောက်ရန် အကြံပြုခဲ့ရာမှ ဖြစ်စဉ် ပေါ်ပေါက်လာခဲ့သည်။

ကျိုက္ခမီနယ်မြေရဲစခန်းမှ ရဲတပ်ဖွဲ့ဝင်များက သွားရောက်စစ်ဆေးဖမ်းဆီးရာ အသက် ၅၁ နှစ်အရွယ် တင်သန်း၊ အသက် ၄၆ နှစ်အရွယ် တင်မင်းထွဋ်နှင့် အသက် ၃၈ နှစ်အရွယ် ဖြိုးကိုကိုတို့ကို ဖမ်းဆီးရမိခဲ့ပြီး၊ ၎င်းတို့မှာ တပ်သားသစ်စုဆောင်းရေးတာဝန် ယူထားသည့် ပျူစောထီးများဖြစ်ကြောင်း သိရသည်။

ဖမ်းဆီးစဉ် Honda Click 125 ဆိုင်ကယ်တစ်စီး၊ Honda Wave 110 ဆိုင်ကယ်တစ်စီးနှင့် တပ်သားသစ်စုဆောင်းရေးတာဝန် (အကူ) စိစစ်ရေးကတ်ပြားတစ်ခုကိုလည်း သိမ်းဆည်းရမိခဲ့ကြောင်း သိရသည်။

လက်ရှိတွင် ဖမ်းဆီးခံထားရသူ ၃ ဦးကို ကျိုက္ခမီနယ်မြေရဲစခန်း၌ ထိန်းသိမ်းထားပြီး လူကုန်ကူးမှုတားဆီးနှိမ်နင်းရေးရဲတပ်ဖွဲ့နှင့် ပူးပေါင်းကာ ဥပဒေအရ ဆက်လက်စစ်ဆေးအရေးယူနေကြောင်း သိရသည်။