AMRT IP

𝗘𝗦𝗧𝗨𝗗𝗔𝗡𝗧𝗘 𝗦𝗧. 𝗝𝗨𝗗𝗘 𝗧𝗛𝗔𝗗𝗘𝗨𝗦 𝗩𝗜𝗦𝗜𝗧𝗔 𝗔𝗠𝗥𝗧.𝗜𝗣 𝗛𝗢𝗗𝗜 𝗔𝗣𝗥𝗘𝗡𝗗𝗘 ISTÓRIA 𝗟𝗨𝗧𝗔 𝗣𝗢𝗩𝗨 𝗧𝗜𝗠𝗢𝗥-𝗟𝗘𝗦𝗧𝗘 NIAN.
‎
𝗗𝗜𝗟𝗜, 𝟬𝟮 𝗦𝗘𝗧𝗘𝗠𝗕𝗥𝗨 𝟮𝟬𝟮𝟲–Espíritu aprendizajen moris nafatin, Estudante na'in 20 husi ST. Jude Thadeus International School hala'o vizita edukativa ida ne'ebé furak mai iha Arkivu & Muzeu Rezisténsia Timorense - AMRT, I.P hodi buka hatene kle'an liu tan istória luta Povu Timor-Leste nian ba ukun rasik an.
‎
‎Iha vizita ne'e, estudante sira akompaña diretamente husi sira nia manorin ne'ebé mai husi País Filipina, Maski mai husi nasaun seluk, maibé sira nia curiosidade atu hatene istória Timor nian bo'ot tebes.
‎
‎Bainhira tama ba iha espozisaun permanente, estudante sira sente kontente no orgullu tebes, Sira bele haree no rona diretamente istória funu nian ne'ebé esplika ho lian klaru husi Sr. Pedro Ribeiro.
‎
‎Momentu ne'ebé marka liu maka bainhira estudante sira haree ho matan rasik objetu istóriku sira ne'ebé preserva ho didi'ak iha muzeu.
‎
‎Objetu sira ne'e hanesan fotografia tempu funu nian, armas ne'ebé uza iha rezisténsia, no replika abrigu Nino Konis Santana ne'ebé sai sinál ba sakrifisiu boot ba rai doben ne'e.
‎
‎Hafoin vizita, estudante sira kontinua tuur hamutuk ho sira nia manorin no akompaña husi Sr. Pedro hodi haree filme dokumentáriu kona-ba rezisténsia, Liuhusi filme ne'e, sira la de'it aprende istória maibé mós sente iha fuan nia valór korajen, unidade, no domin ba patria.
‎
‎Vizita ne'e prova katak jerasaun foun la haluha sira nia abut, hodi aprende istória iha muzeu, sira sei sai protetór ba memória no nafatin valoriza luta liberdade Timor-Leste nian.
‎

𝐀𝐌𝐑𝐓, 𝐈𝐏 𝐒𝐄𝐈 𝐏𝐑𝐈𝐎𝐑𝐈𝐓𝐈𝐙𝐀 𝐈𝐒𝐓𝐎́𝐑𝐈𝐀 𝐍𝐎 𝐋𝐄𝐆𝐀𝐃𝐔 𝐁𝐈𝐒𝐏𝐔 𝐍𝐀𝐈𝐍 𝐇𝐀𝐓 𝐍𝐈𝐀𝐍 𝐈𝐇𝐀 ARKIVU & 𝐌𝐔𝐙𝐄𝐔 𝐑𝐄𝐙𝐈𝐒𝐓É𝐍𝐒𝐈𝐀

𝐃𝐢𝐥𝐢 𝟎𝟏 se𝐭𝐞𝐦𝐛𝐫𝐮 𝟐𝟎𝟐𝟔 Diretór Ezekutivu Muzeu Rezisténsia Timorense, Institutu Públiku (AMRT, IP) 𝐒𝐫. 𝐉𝐨𝐫𝐠𝐞 𝐀𝐥𝐯𝐞𝐬 “ 𝐖𝐞 𝐌𝐨𝐫𝐢𝐬” Tersa-feira ne'e hamutuk ho fusionariu, kargu xefia sira, marka prezensa iha aeroportu Prezidente Nicolau Lobato hamutuk ho governu konstituisional dásia, konfisaun relijioza, estudante, sosiedade sívil no militár konsentra iha Aeroportu Prezidente Nicolau Lobato Comoro hodi simu urnas hosi preladu nain tolu hanesan; Dom Jaime Garcia Goulart, Dom José Joaquim Ribeiro, Monseñor Martinho da Costa Lopes, ne’ebé translada hosi Portugál tránzita iha Bali no kontinua translada ho aviaun Aero Dili mai Dili, Timor-Leste.

Arkivu no Muzeu Rezisténsia Timorense Institutu Públiku nia ekipa Arkivu Audiovizuál deskata hotu iha pontu importante sira durante entidade sira simu restus mortais sadozu nain tolu nian iha aeroportu too kontinua lori ba iha Tasi-tolu hodi hala’o misa hamutuk ho restu mortál saudozu Bispu Dioseze Dili, Dom Alberto Ricardo da Silva.

Ekipa AMRT.IP firme atu salva momentu hotu durante serimonia importante sira tuir sekuénsia ne’ebé governu no igreza prepra ba restus mortais Bispu nain hat nian.

Diretór Ezekutivu AMRT, IP Sr. Jorge Alves “We Moris” informa katak, istória kona-ba luta libertasaun nasionál igreza katólika kontribui signifikante ne’ebé saudozu Bispu nain hat ne’e mos hola parte iha kauza komún povu no nasaun nian. Tanba ne’e AMRT.IP hanesan instituisaun estadu ne’ebé vokasionadu ba prezervasaun istória, arkiva , peskiza no divulgasaun istória ba jersaun foun sira hakarak serivisu ho másimu ho asegura eventu istóriku sira ba futuru jerasaun Timor-Leste

Bispu ka Preladu na'in-tolu ne'ebé translada (lori fila ruin ka restu mortál) husi Portugál mai Timor-Leste mak preladu sira ne'ebé ukun Dioseze Dili iha tempu susar nia laran.
Dom Jaime Garcia Goulart – Bispu Dili dahuluk (1941–1967). Nia mak harii baze pastorál no institusionál Igreja Katólika nian iha Timor-Leste.

Dom José Joaquim Ribeiro – Bispu Dili (1967–1977). Nia kontinua serbisu pastorál iha tempu mudansa polítika boot nian.

Monseñor Martinho da Costa Lopes – Administradór Apostóliku Dioseze Dili (1978–1983). Nia koñesidu tanba ninia aten-barani hodi defende direitus umanus povu Timor nian iha inísiu okupasaun Indonézia.

Loron 1 Setembru 2026, marka momentu importante ba sarani no povu Timorense hodi simu fali saudozu no eroi nasionál nain tolu nia restus mortais ho dignidade.

Restu mortál (ruin) husi preladu na'in-tolu ne'e to'o ofisialmente iha Dili husi Portugál (liu husi Bali). Governu Timor-Leste no Igreja Katólika organiza serimónia boot hodi fó omenajen ba sira-nia sakrifísiu no legadu ba igreja no mós ba narativa libertasaun nasionál.

Hafoin simu iha aereportu urnas hosi preladu nain tolu ne’e translada kedan ho prosesaun ba tasi tolu hodi hodi kontinua ho misa.

Misa ba restu mortais Dom nain 4 ne’e preside diretamente husi Dom Norberto do Amaral, Bispu Dioseze Maliana no akompaña husi Dom Virgílio Cardeal do Carmo da Silva, SDB, Arsebispu Dioseze Dili no Dom Leandro Maria Alves, Bispu Dioseze Baucau.
‎Liu husi ninia homilia, Dom Norberto hatete, Tasi Tolu marka ona istória ba dala 4 Vizita Papa São João Paulo II, Restaurasaun Independénsia, Vizita Papa Francisco, no ohin kontinua ho Misa ba Restu Mortais ba Dom nain 4 ne’ebé maka ulun ba Dioseze Dili hodi haklaken Bíblia Maromak nian no hari’i misaun sira.

‎Misa ne’e rasik partisipa diretamente husi Vise Primeiru-Ministru, Eng. Mariano Asanami Sabino ho membru Governu sira, Eis Prezidente Repúblika, SE. Sr. Taur Matan Ruak, Eis Prezidente Parlamentu Nasionál, SE. Sr. Vicente Guterres, sarani sira no entidade oin-oin.

Tuir ajenda restus mortál saudozu nain hat nian sei halot iha Igreja Katedrál Metropolitana Dili.

Rekorda katak AMRT.IP estabelese iha 2005 ho nia papel atu salva istória luta Rezisténsia Timorense nian hodi sai hanesan patrimoniu istóriku nasionál ba povu no nasaun.

𝗗𝗜𝗥𝗘𝗧𝗢́𝗥 𝗘𝗭𝗘𝗞𝗨𝗧𝗜𝗩𝗨 𝗔𝗠𝗥𝗧.𝗜𝗣 𝗛𝗔𝗠𝗨𝗧𝗨𝗞 𝗛𝗢 𝗙𝗨𝗡𝗦𝗜𝗢𝗡𝗔́𝗥𝗜𝗨 𝗛𝗔𝗟𝗢 𝗥𝗘𝗙𝗟𝗘𝗦𝗔𝗨𝗡 𝗕𝗔 𝗟𝗢𝗥𝗢𝗡 𝗞𝗢𝗡𝗦𝗨𝗟𝗧𝗔 𝗣𝗢𝗣𝗨𝗟𝗔́𝗥 𝗕𝗔 𝗗𝗔𝗟𝗔 𝟮𝟳
‎
‎
‎𝗗𝗜𝗟𝗜, 𝟮𝟵 𝗔𝗚𝗢𝗦𝗧𝗨 𝟮𝟬𝟮𝟲 – Diretór Ezekutivu AMRT.IP, Sr. Jorge Alves "We-Moris" hamutuk ho funsionáriu no kargu xefia sira hala’o reflesaun espesiál hodi komemora Loron Konsulta Populár ba dala 27.
‎
‎Iha reflesaun ne’e, Diretór Ezekutivu hatete, tanba sakrifísiu heroi no martir sira maka ohin ita hotu bele mai hala’o knar iha muzeu.
‎
‎ “𝘏𝘢𝘯𝘦𝘴𝘢𝘯 𝘋𝘪𝘳𝘦𝘵𝘰́𝘳 𝘌𝘻𝘦𝘬𝘶𝘵𝘪𝘷𝘶, 𝘩𝘢’𝘶 𝘩𝘢𝘬𝘢𝘳𝘢𝘬 𝘧𝘰́ 𝘰𝘯𝘳𝘢 𝘯𝘰 𝘨𝘭𝘰́𝘳𝘪𝘢 𝘣𝘢 𝘩𝘦𝘳𝘰𝘪 𝘴𝘪𝘳𝘢 𝘩𝘰𝘵𝘶, 𝘯𝘰 𝘣𝘢 𝘮𝘦𝘮𝘣𝘳𝘶 𝘒𝘰𝘮𝘪𝘵𝘦́ 𝘚𝘦𝘯𝘵𝘳𝘢𝘭 𝘍𝘙𝘌𝘛𝘐𝘓𝘐𝘕 𝘯𝘦’𝘦𝘣𝘦́ 𝘮𝘢𝘵𝘦 𝘪𝘩𝘢 𝘧𝘶𝘯𝘶 𝘪𝘥𝘢 𝘯𝘦’𝘦,”.
‎
‎
‎Nia mós hanoin fali tempu ne’ebé situasaun susar tebes, Frente Klandestina tama-sai uma ho presaun oin-oin maibé nafatin luta ba ukun an.
‎
‎
‎“30 𝘈𝘨𝘰𝘴𝘵𝘶 𝘢𝘵𝘶 𝘪𝘯𝘴𝘱𝘪𝘳𝘢 𝘪𝘵𝘢 𝘩𝘰𝘵𝘶 𝘪𝘩𝘢 𝘮𝘶𝘻𝘦𝘶 𝘢𝘵𝘶 𝘣𝘢𝘯𝘢𝘵𝘪 𝘵𝘶𝘪𝘳 𝘩𝘦𝘳𝘰𝘪 𝘴𝘪𝘳𝘢, 𝘓𝘰𝘳𝘰𝘯 30 𝘈𝘨𝘰𝘴𝘵𝘶 1999 𝘮𝘢𝘬 𝘥𝘦𝘵𝘦𝘳𝘮𝘪𝘯𝘢 𝘥𝘦𝘴𝘵𝘪𝘯𝘶 𝘱𝘰𝘷𝘶 𝘯𝘰 𝘯𝘢𝘴𝘢𝘶𝘯 𝘛𝘪𝘮𝘰𝘳-𝘓𝘦𝘴𝘵𝘦, 𝘛𝘢𝘯𝘣𝘢 𝘯𝘦’𝘦, 𝘮𝘶𝘻𝘦𝘶 𝘩𝘢𝘯𝘦𝘴𝘢𝘯 𝘧𝘢𝘵𝘪𝘯 𝘭𝘶𝘭𝘪𝘬 𝘣𝘢 𝘦𝘮𝘢 𝘩𝘰𝘵𝘶. 𝘍𝘶𝘯𝘴𝘪𝘰𝘯𝘢́𝘳𝘪𝘶 𝘴𝘪𝘳𝘢 𝘩𝘰𝘵𝘶 𝘵𝘦𝘯𝘬𝘦 𝘳𝘦𝘴𝘱𝘦𝘪𝘵𝘶 𝘯𝘰 𝘩𝘢𝘬𝘳𝘶𝘬 𝘣𝘢 𝘷𝘦𝘵𝘦𝘳𝘢𝘯𝘶𝘴 𝘴𝘪𝘳𝘢,”.
‎
‎
‎Diretór Ezekutivu husu ba funsionáriu hotu atu nafatin respeitu veteranus sira iha muzeu, tanba veteranus sira maka sai fator determinante ba realizasaun Konsulta Populár.
‎
‎
‎Iha reflesaun ne’e mós, nia husu atu hametin unidade hodi lori AMRT.IP ba oin, no fó onra no glória ba Prezidente Asembleia Konstituante no Eis Prezidente Repúblika, Dr. Francisco Guterres "Lú-Olo".
‎
‎
‎Sr. We-Moris mós relata durante nia mandatu iha muzeu, konsege ona halo entrevista ho Dr. Marí Alkatiri nune’e mós haruka ona karta dala rua ba Dr. Francisco Guterres Lú-Olo, maibé la konsege halo entrevista to’o Saudozu mate, Aleinde ne’e, konsege halo mós entrevista ba veteranus lubuk ida ona.
‎
‎
‎Nia aumenta tan katak durante mandatu iha muzeu, nia hakarak funsionáriu hotu tenke ba eskola hodi hasa’e rekursu umanu, atu nune’e funsionáriu hotu iha diploma lisensiatura.
‎
‎
‎Reflesaun ne’e partisipa másimu husi funsionáriu AMRT.IP, kargu xefia diretór sira no joven rezisténsia balun hodi konta sira nia istória pasadu.

𝗕𝗼𝗮𝗿𝗱 𝗠𝗲𝗺𝗯𝗲𝗿 𝗻𝗼 𝗦𝗲𝗻𝗶𝗼𝗿 𝗘𝘅𝗲𝗰𝘂𝘁𝗶𝘃𝗲 𝗧𝗲𝗮𝗺 𝗛𝘂𝘀𝗶 𝗠𝗲𝗻𝘇𝗶𝗲𝘀 𝗦𝗰𝗵𝗼𝗼𝗹 𝗼𝗳 𝗛𝗲𝗮𝗹𝘁𝗵 𝗥𝗲𝘀𝗲𝗮𝗿𝗰𝗵 𝗔𝘂𝘀𝘁𝗿𝗮𝗹𝗶𝗮 𝗛𝗮𝗹𝗼 𝗩𝗶𝘇𝗶𝘁𝗮 𝗠𝗮𝗶 𝗘𝘀𝗽𝗼𝘇𝗶𝘀𝗮𝘂𝗻 𝗣𝗲𝗿𝗺𝗮𝗻𝗲𝗻𝘁𝗲 𝗔𝗠𝗥𝗧.𝗜𝗣
‎
‎𝗗𝗶𝗹𝗶, 𝟮𝟵 𝗔𝗴𝗼𝘀𝘁𝘂 𝟮𝟬𝟮𝟲 -Board Member no Senior Executive Team husi Menzies School of Health Research Australia hala’o vizita ofisiál Mai Arkivu no Muzeu Rezisténsia Timorense, I.P. AMRT.IP hodi haree diretamente koleksaun espozisaun permanente nian.
‎
‎Durante vizita ne’e, delegasaun Australianu ne’e observa diretamente objetu funu, koleksaun fotografia, replika Abrigu Nino Konis Santana, no rona esplikasaun kle’an husi funsionáriu AMRT.IP kona-ba signifikadu istoriku husi koleksaun sira ne’e.
‎
‎Enkuantu vizita husi sidadaun Australianu sira ne’e tanba sira hakarak tebes buka hatene liu tan kona-ba istória pasadu Timor-Leste nian, hahú husi Tempu Kolonial Portugál to’o ba tempu Invazaun Indonézia nian.
‎
‎Vizita ne’e hetan guia direta husi Sr. Pedro Ribeiro, funsionáriu AMRT.IP, ne’ebé fó esplikasaun kle’an kona-ba objetu no fotografia sira ne’ebé sai sasin ba luta no sakrifísiu povu Timor-Leste nian ba ukun an.
‎
‎Iha biban ne’e, sidadaun Australianu sira mós husu diretamente kona-ba istória balun ne’ebé sira seidauk komprende ho di’ak.
‎
‎Sr. Pedro Ribeiro mos fó esplikasaun kle’an tanba istória pasadu importante tebes ba sira nia komprensaun kona-ba relasaun entre nasaun rua.
‎
‎Vizita ne’e hatudu katak AMRT.IP la’ós de’it fatin atu konserva memoria, maibé mós sai sentru aprendizajen no diplomásia kultura ba komunidade internasionál.
‎

𝐃𝐈𝐑𝐄𝐓𝐎́𝐑 𝐄𝐙𝐄𝐊𝐔𝐓𝐈𝐕𝐔 𝐀𝐌𝐑𝐓, 𝐈𝐏 𝐒𝐑. 𝐖𝐄 𝐌𝐎𝐑𝐈𝐒 𝐏𝐀𝐑𝐓𝐈𝐒𝐈𝐏𝐀 𝐒𝐄𝐑𝐈𝐌𝐎𝐍𝐈𝐀 𝐀𝐆𝐑𝐀𝐃𝐄𝐒𝐈𝐌𝐄𝐍𝐓𝐔 𝐍𝐄’𝐄𝐁𝐄́ 𝐎𝐅𝐄𝐑𝐄𝐒𝐄 𝐇𝐎𝐒𝐈 𝐄𝐌𝐁𝐀𝐈𝐗𝐀𝐃𝐀 𝐑𝐄𝐏𝐔́𝐁𝐋𝐈𝐊𝐀 𝐏𝐎𝐏𝐔𝐋𝐀𝐑 𝐗𝐈𝐍𝐀

𝐃𝐢́𝐥𝐢, 𝟐𝟖-𝟎𝟖-𝟐𝟎𝟐𝟔, Sexta-feira ne’e, Diretór Ezekutivu AMRT, IP 𝐒𝐫. 𝐉𝐨𝐫𝐠𝐞 𝐀𝐥𝐯𝐞𝐬 “𝐖𝐞 𝐌𝐨𝐫𝐢𝐬” partisipa serímonia agradesimentu ne’ebé oferese hosi governu Repúblika Popular Xina liu -hosi nia Embaixadora Embaixada Xina iha Timor-Leste, 𝐒𝐫𝐚. 𝐖𝐚𝐧𝐠 𝐖𝐞𝐧𝐥𝐢 ámbitu vizita Ministru Defeza Nasionál, Almirante D**g Jun nian Díli.

Serímonia ne’e realiza hanesan forma agradesimentu no apresiasaun ba asisténsia no ospitalidade ne’ebé governu Timor-Leste fó ba Almirante D**g Jun ho nia delegasaun durante estadia iha Díli.

Durante serimonia ne’e, Diretór Ezekutivu Sr. We Moris ho embaixadora Wang Wenli hamutuk ho Diretór sira hosi Minísteriu Defeza, Minísteriu Interior, MNEK, Palasiu Prezidénsia ne’ebé marka prezensa hosi Chefe Casa Cívil Prezidénsia Repúblika no instituisaun relevante sira ne’ebé servisu hamutuk ho embaixada Xina hodi simu Ministru Defeza ho delegasaun.

Serimonia ne’e marka pasu importante ba nasaun rua nia koperasaun tanba bele diskute mós asuntu koperasaun sira ne’ebé governu Xinés oferese ba Timor-Leste inklui explora tan oportunidade koperasaun iha area vital sira no haforsa liu-tan lasu amizade entre nasaun rua.

Serimonia ne’e termina ho Jantar konfraternizasaun ho instituisaun estadu sira ne’ebé fó asístensia ba vizita Ministru Defeza ho delegasaun inklui instituisaun estadu sira ne’ebé Ministru Defeza vizta hanesan AMRT, IP.

𝐄𝐒𝐓𝐔𝐃𝐀𝐍𝐓𝐄 𝐄𝐁𝐂 𝐅𝐎𝐌𝐄𝐍𝐓𝐔 𝐊𝐎𝐍𝐓𝐄𝐍𝐓𝐄 𝐕𝐈𝐙𝐈𝐓𝐀 𝐀𝐌𝐑𝐓, 𝐈𝐏 𝐇𝐀𝐑𝐄𝐄 𝐈𝐒𝐓𝐎́𝐑𝐈𝐀 𝐍𝐎 𝐊𝐎𝐍̃𝐄𝐒𝐄 𝐅𝐈𝐆𝐔𝐑𝐀 𝐏𝐑𝐄𝐙𝐈𝐃𝐄𝐍𝐓𝐄 𝐑𝐄𝐏𝐔́𝐁𝐋𝐈𝐊𝐀 𝐍𝐎 𝐏𝐑𝐈𝐌𝐄𝐈𝐑𝐔-𝐌𝐈𝐍𝐈𝐒𝐓𝐑𝐔 𝟏𝟗𝟕𝟓 𝐓𝐎’𝐎 𝟐𝟎𝟐𝟔

𝐃𝐢́𝐥𝐢, 𝟐𝟖-𝟎𝟖-𝟐𝟎𝟐𝟔, Sexta-feira ne’e, estudante Ensino Básico Central (EBC) Fomento hamutuk 58 akompaña hosi profesór sira vizita mai, Arkivu no Muzeu Rezisténsia Timorense, Institutu Públiku (𝐀𝐌𝐑𝐓, 𝐈𝐏) hodi haree direta istória narativa prosesu luta URA hahú 1975 to’o 1999, fotográfia, objetu funu ne’ebé prezerva iha espozisaun Muzeu Rezisténsia.

Prezensa estudante sira ne’ebé hanesan mós futuru nasaun ida ne’e nian iha Muzeu Rezisténsia hatudu tebes sira nia kuriozidade no vontade atu esplora koñesimentu foun kona-ba istória luta nian ne’ebé aman no inan luta na’in sira kontribuisaun hodi liberta nasaun ne’e.

Kada estudante ho kedas lapizeira no kadernu hodi aponta tutuir bainhira rona espliksaun istória hosi guiadór/a sira kona-ba, estrutura antigu Prezidente Repúblika no Pimeiru-Ministru no akontesimentu trájiku durante prosesu naruk ba luta libertasaun nasionál. Vontade no espíritu badinas buras, lori istória rezisténsia to’o ona iha estudante hirak ne’e nia memoria.

Istória luta tenki kuda iha estudante sira nia hanoin atu kontinua bali nasaun ne’e ba oin no hatene respeitu no valoriza lider, éroi/a no mártir sira ne’ebé oferese moris tomak ba libertasaun nasaun.

𝗘𝘀𝘁𝘂𝗱𝗮𝗻𝘁𝗲 𝗨𝗻iv𝗲𝗿𝘀𝗶𝗱𝗮𝗱𝗲 𝗧𝗮𝘆𝗹𝗼𝗿 𝗠𝗮𝗹𝗮𝘆𝘀𝗶𝗮 𝗡𝗮𝗶𝗻 𝟭𝟲 𝗛𝗮𝗹𝗼 𝗩𝗶𝘇𝗶𝘁𝗮 𝗘𝘀𝘁𝘂𝗱𝘂 𝗜𝘀𝘁𝗼́𝗿𝗶𝗮 𝗶𝗵𝗮 𝗔𝗠𝗥𝗧.𝗜𝗣
‎
‎
‎𝗗𝗶𝗹𝗶, 𝟮𝟳 𝗔𝗴𝗼𝘀𝘁𝘂 𝟮𝟬𝟮𝟲- Estudante husi Universidade Taylor Malaysia hamutuk ema nain 16 hala'o vizita estudu istória Mai iha Arkivu no Muzeu da Resistência Timorense, I.P. -AMRT.IP.
‎
‎Atividade ne'e hanesan parte ida husi programa Universidade Taylor Malaysia nian atu estudante sira bele halo vizita estudu ba nasaun sira seluk hodi haree no aprende direta kona-ba istória mundu nian,Liu-liu ba Istória Timor-Leste hahú husi Tempu Kolonial Portugal to'o mai tempu Invazaun Indonézia nian.
‎
‎Iha vizita ne'e, estudante sira hetan akompaña no guia direta Husi funsionáriu AMRT.IP, Sr. Pedro Ribeiro hodi fó esplikasaun kle'an kona-ba objetu funu, koleksaun fotografia, replika Abrigu Nino Konis Santana, no mós filme rezisténsia ne'ebé iha espozisaun permanente iha AMRT.IP.
‎
‎Atu apoia prosesu aprendizajen, estudante sira ne'e hetan mós akompaña husi sira nia dosente no orientadór husi Universidade Taylor Malaysia.
‎
‎Vizita ne'e la'ós de'it atu aprende istória, maibé mós atu hametin relasaun akadémiku no promove komprensaun entre joven sira husi Malázia ho luta no sakrifísiu povu Timor-Leste nian ba ukun an.
‎

𝐀𝐌𝐑𝐓, 𝐈𝐏 𝐇𝐎 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈́𝐏𝐀𝐋 𝐌𝐀𝐍𝐀𝐓𝐔𝐓𝐔 𝐍𝐎 𝐄𝐑𝐌𝐄𝐑𝐀 𝐄𝐍𝐊𝐎𝐍𝐓𝐑𝐔 𝐊𝐎𝐑𝐃𝐄𝐍𝐀𝐒𝐀𝐔𝐍 𝐁𝐀 𝐏𝐑𝐎𝐉𝐄𝐒𝐀𝐔𝐍 𝐅𝐈𝐋𝐌𝐄 𝐑𝐄𝐙𝐈𝐒𝐓𝐄́𝐍𝐒𝐈𝐀 𝟏𝟗𝟕𝟓 𝐓𝐎’𝐎 𝟏𝟗𝟗𝟗

𝟐𝟕 𝐚𝐠𝐮𝐬𝐭𝐮 𝟐𝟎𝟐𝟔, Arkivu no Muzeu Rezisténsia Timorense, Institutu Públiku, servisu ho Gabinete Primeiru-Ministru halo hela preparasaun tékniku no kordenasaun ho Autoridade munisípal no Autoridade Postu Administrativu sira núne’e bele projeta Filme rezisténsia ba munisípiu hat (4) ne’ebé sai pilotu ba projesaun filme hanesan munisípiu Liquiçá, Ermera, Aileu no Manatutu.

Kabe programa projesaun filme, kuarta-feira ne’e, ekipa rua hosi AMRT, IP hala’o viajen servisu ba Ermera no Manatutu. Ekipa viajen ba Manatutu lidera hosi Xefi-departamentu Komunikasaun Sosiál AMRT, IP Sr. Abel Soares Pinto akompaña hosi Xefi-departamentu Aúdiu realiza enkontru kordenasaun ho Autoridade munisípal Manatutu ne’ebé reprezenta hosi Xefi-gabinete Prezidente Autoridade Sr. Hendrik Soekendro iha edifísiu administrasaun munisípal Manatutu.

Ekipa ida seluk ba Ermera, lidera hosi Xefi Departementu Lojístika, Sr. Efrem Exposto Martins ezekuta ordem serbisu, hala’o viajen servisu hanesan ba munisípiu Ermera hodi konvoka reuniaun kordenada ho Xefe Gabinete Prezidente Autoridade munisípiu Ermera, Sra. Noémia da Conceiҫão de Jesus Xiemens, halo preparasaun ba projesaun filme rezistensia ne’ebé iha tempu badak sei projeta iha munisipíu Ermera.

Sorumutu ne’e Xefi-gabinete Prezidente Autoridade Munisípiu Ermera apresia tebes ho programa ne’e tanba bele lori istória besik liu ba komunidade hodi povu bele koñese no hatene istória lolos kona-ba prosesu luta no bele koñese didiak aswain sira ne’ebé fo sira nia vida hodi sosa independensia.

Nia, kongratula ba Ekipa AMRT.IP tanba bele hakat direta ba munisípiu Ermera hodi halo kordenasaun kona-ba preparasaun ida ne’e, nia reprezenta Prezidente Autoridade Munisípiu Ermera husu, bele karik Primeiru-Ministru Xanana Gusmão hili Munisípiu Ermera ba lansamentu Filme Refere antes lori ba munisípiu seluk.

Iha planu prozesaun filme rezisténsia iha munisípiu Ermera, sei projeta iha postu Administrativu 6 hanesan; postu Atsabe, postu Letefoho, postu Hatulia A no Hatulia B, postu Railaku no postu Ermera Vila.

Enkontru amigavel ne’e, parte rua, diskute asuntu tékniku balun inklui area jeográfia postu administrativu sira, tanba posibilidade filme ne’e sei projeta kobre ba postu hotu ho tárjetu ba foin-sa’e no estudante sira, tanba ne’e enkontru hanesan ínisiu hosi kooperasaun servisu hodi hametin liu tan kordenasaun no komuniksaun hodi fó susesu ba inisiativa ne’ebé mai hosi gabinete Primeiru-Ministru.

AMRT, IP kontinua halo ezersisiu ho forma oi-oin hodi konsensializa no memoriza jerasaun foun atu aprende istória liu-hosi atividade ne’ebé ekipa AMRT, IP hala’o hanesan, loke filme rezisténsia, seminariu, expozisaun istória, sertame materia istória ba estudante sira iha territoriu nasionál.