Samir Wahdat

د کابل ښار د شنو ساحو د ساتنې او د ښاري فساد د مخنیوي په اړه!

د کابل ښاروالۍ مسلکي ټیم هغه هڅې او کړنې چې د ښاري خدمتونو، سړکونو، پلونو، تنظیف، ښاري نظم او د ښار د ښه مدیریت په برخه کې یې ترسره کړې او لا یې هم ترسره کوي، د قدر او ستاینې وړ دي. د ښار د خدمتونو د ښه والي لپاره هر ډول مسلکي، صادقانه او د عامه ګټو پر بنسټ اقدام باید وستایل شي او ملاتړ ترې وشي.

خو له بلې خوا، د کابل ښار په هغو ساحو کې چې د ښاري پلانونو له مخې د شنو ساحو، پارکونو او عامه تفریح لپاره ځانګړې شوې دي، هر ډول غیرضروري بدلون، تجارتي استفاده او د ودانیو جوړولو اجازه د جدي اندېښنې وړ موضوع ده.

په ځانګړې توګه د احمدشاه بابا مېنې په ساحه کې، که رښتیا هم هغه شنې ساحې چې د عامه استفادې، چاپېریال ساتنې او د سیمې د ښکلا لپاره ځانګړې شوې دي، د افرادو یا خصوصي سوداګریزو فعالیتونو لپاره وېشل کېږي او په کې رستورانتونه، دوکانونه او نورې تجارتي ودانۍ جوړېږي، نو دا موضوع باید د ښاروالۍ د اړوندو مسلکي، حقوقي او نظارتي مراجعو له لوري په جدي او بې‌طرفه توګه وڅېړل شي.

شنه ساحه یوازې تشه ځمکه نه ده چې هر وخت د تجارتي استفادې لپاره ځانګړې شي. شنې ساحې د ښار د تنفس، د هوا د کیفیت، د چاپېریال د توازن، د ماشومانو او کورنیو د تفریح او د سالم ښاري ژوند اساسي برخه ده. د نن ورځې په تصمیمونو کې باید د راتلونکو نسلونو اړتیاوې هم په پام کې ونیول شي.

که د شنو ساحو د وېش او تجارتي استفادې لپاره قانوني، تخنیکي او منظور شوی ښاري پلان موجود وي، باید د هغه حقوقي بنسټ او څرنګوالی په واضح او شفاف ډول څرګند شي؛ او که داسې قانوني بنسټ موجود نه وي، نو د عامه شتمنۍ او شنو ساحو په اړه هر ډول پرېکړه باید ودرول شي او موضوع دې د نافذه قوانینو، ښاري پلان او عامه ګټو له مخې وڅېړل شي.

همدارنګه، که د ښاروالۍ د مقام یا کومې بلې ادارې له لوري د شنو ساحو د وېش، اجارې یا تجارتي استفادې اجازه ورکړل شوې وي، باید د دغو پرېکړو حقوقي اساس، منظور شوي پلانونه، د استفادې جوازونه، قراردادونه، د اجارې شرایط او د ترلاسه شویو عوایدو څرنګوالی په شفاف ډول وکتل شي.

د فساد په اړه د هر ډول ادعا په صورت کې باید د اشخاصو پر وړاندې له بې‌ثبوته تورونو څخه ډډه وشي؛ خو که مستند اسناد، قراردادونه، مکتوبونه یا نور شواهد موجود وي، موضوع باید د قانون له مخې په جدي توګه وڅېړل شي او د هر هغه شخص یا چارواکي سره حساب وشي چې د عامه شتمنۍ د شخصي یا غیرقانوني استفادې زمینه یې برابره کړې وي.

احمدشاه بابا مېنه او د کابل نورې سیمې د ټولو ښاریانو ګډه شتمني ده. د ښاروالۍ مسؤلیت یوازې د ښار د تنظیف او ورځنیو خدماتو تر کچې محدود نه دی؛ بلکې د ښاري پلانونو ساتنه، د شنو ساحو خوندي کول، د عامه ملکیتونو صیانت او د ښار د راتلونکي لپاره سالمه او متوازنه پراختیا هم د ښاروالۍ له مهمو مسؤلیتونو څخه ده.

له همدې امله، غوښتنه دا ده چې:

1. د احمدشاه بابا مېنې او د کابل ښار د ټولو شنو ساحو په اړه دې بشپړه حقوقي، تخنیکي او چاپېریالي ارزونه ترسره شي؛
2. هغه ټولې ساحې چې د شنو ساحو، پارکونو او عامه تفریح لپاره ځانګړې شوې دي، دې له غیرضروري تجارتي استفادې څخه خوندي شي؛
3. د شنو ساحو د وېش، اجارې یا د تجارتي ودانیو د جوړولو ټول جوازونه، قراردادونه او اړوند اسناد دې وکتل شي؛
4. که کومه پرېکړه د نافذه قوانینو او منظور شوو ښاري پلانونو خلاف وي، باید لغوه او وضعیت د اصلي پلان مطابق بېرته تنظیم شي؛
5. که د فساد، شخصي ګټې یا د عامه شتمنۍ د غیرقانوني استفادې مستند شواهد موجود وي، موضوع دې د قانون له مخې اړوندو مراجعو ته وړاندې او په شفاف ډول وڅېړل شي؛
6. د ښار د شنو ساحو په اړه دې هره راتلونکې پرېکړه د مسلکي نظر، ښاري پلان، چاپېریالي ارزونې، قانون او عامه ګټو پر بنسټ ترسره شي.

ښار د یوه نسل شخصي ملکیت نه دی؛ تېږه چې پورته کوي هلته به یو غیر مسلکی ناست وی. ښار د ټولو خلکو ګډ امانت دی. د نن ورځې مسؤلین باید داسې پرېکړې وکړي چې سبا د کابل اوسېدونکي د خپلو شنو ساحو د له منځه تلو له امله پښېمانه نه شي.

د ښاري خدمتونو په برخه کې د هرې مثبتې او صادقانه هڅې ملاتړ کوو؛ خو د ښاري پلانونو، شنو ساحو او عامه ملکیتونو د ساتنې په برخه کې باید هېڅ ډول مصلحت، شخصي ګټه او غیرمسلکي پرېکړه د عامه ګټو ځای ونه نیسي.

د کابل د شنو ساحو ساتنه یوازې د ښاروالۍ د یوې ادارې مسؤلیت نه دی؛ دا د ټولو مسؤلو ادارو او د کابل د هر وګړي ګډ مسؤلیت دی.

#سرسبزی
#شاروالۍ
#فساد #مستند #کابل

د افغانستان پر وړاندې د پاکستان شوم او دوه‌مخی سیاست لا هم روان دی؛ خو د دې سیاست اغېزې اوس د هېواد په دواړو غاړو کې، له لر او بر خلکو، د شکایتونو په بڼه څرګندېږي.

خلک ورو ورو دې پایلې ته رسېږي چې د آزاد، خپلواک او اباد افغانستان د جوړولو لپاره باید خپل ملي فکر، شعور او یووالی پیاوړی کړي. د یوه آزاد وطن لپاره بیدار شعور، ملي یووالی او خپلواکه اراده د هر افغان ګډ مسئولیت دی.

د کابل ښاروالۍ د اوسني مدیریت په اړه انتقادي او تحلیلي ارزونه:

د کابل ښاروالۍ اداره، چې باید د ښاري خدمتونو، شفافیت او عادلانه استخدام سمبول وي، دا مهال د جدي پوښتنو او نیوکو سره مخ ده. د اوسني ښاروال د کړنو په اړه ګڼ شمېر اندېښنې شته چې د اسنادو او مشاهداتو پر بنسټ یې یادونه اړینه ده.

لومړی، د کاري فرصتونو د برابرولو په برخه کې څرګند نابرابري لیدل کېږي. راپورونه ښيي چې د کار ډېری زمینه د ښاروال د خپل سمت او محدودې ټولنیزې کړۍ لپاره مساعده شوې، په داسې حال کې چې د هېواد د نورو سیمو وړ او مسلکي کسان له دغو فرصتونو بې‌برخې پاتې دي. دا چاره د ملي عدالت او مساوي حقونو له اصل سره په ټکر کې ده.

دویم، د قراردادونو د ورکړې بهیر د شفافیت له جدي کمښت سره مخ دی. په ګڼو مهمو پروژو او قراردادونو کې د ښاروال د نږدې ملګرو او شخصي اړیکو لرونکو کسانو نومونه تر سترګو کېږي، چې دا وضعیت د فساد، واسطې او اداري سوء استفادې شکونه پیاوړي کوي.

درېیم، په مهمو اداري چوکیو کې د خپلوانو او شخصي ملګرو ګمارنه هغه ستونزه ده چې د ادارې مسلکي توب یې تر پوښتنې لاندې راوستی دی. دا ډول ګمارنې نه یوازې د وړتیا اصل زیانمنوي، بلکې د ادارې دننه د باور فضا هم له منځه وړي.

په پایله کې، یادې کړنې د قانون حاکمیت، اداري شفافیت او عادلانه حکومتولۍ له بنسټیزو اصولو سره په څرګند ډول په تضاد کې دي. اړینه ده چې د کابل ښاروالۍ چارې د یوې خپلواکې او بې‌طرفه ادارې یا هئیت له لوري وڅېړل شي، تر څو حساب ورکونه یقیني او د خلکو باور بېرته ورغول شي.



#استخدام
#ګمارنه
#شاروال

#کار

که انسان په یو مشخص کار تمرکز وکړي او هغه په پوره هڅه، کیفیت او ژمنتیا ترسره کړي، پایله به یې تر هغو ډېره غوره وي چې هر څه نیمګړي او بې‌نظمه ترسره شي.
#کار

عکس: ګوګل

که چیرې یو کس په خپل هېواد کې د خلکو له خوا منتخب شوی وي (که هغه مادورو وي، که د امریکا ولسمشر وي)، نو د بل هېواد له خوا د هغه نیول یا زور کارول عموماً د نړیوالو قوانینو خلاف ګڼل کېږي. دا کار د هېوادونو د حاکمیت سرغړونه بلل کېږي.
امریکا وایي چې نیکولاس مادورو ځکه نه مني چې ټاکنې یې ناعادلانه وې او هغه یې په جرمونو تورن کړی. خو دا خبره لا هم نړیواله لانجه ده، ځکه:
ځینې هېوادونه مادورو ولسمشر مني؛ ځینې یې نه مني که فرض کړو چې بل هېواد د امریکا ولسمشر ونیسي او ووایي چې “موږ هغه نه منو”، نو امریکا او نړۍ به دا کار ظلم او تېری وبولي.
نو اصل خبره دا ده:
• قانون باید پر ټولو یو شان وي
• زور باید د سیاست بدیل نه شي
• ستونزې باید د خبرو، محاکمو، او نړیوالو ادارو له لارې حل شي.
که مادورو له خپلو خلکو سره ستونزې لري، دا د هماغه هېواد داخلي موضوع ده او نور هېوادونه حق نه لري چې په زور د هغه هېواد په چارو کې مداخله وکړي.
#ونزوئلا

#سیاست
#مادورو

#امریکا
#تجاوز
#حمله
#قانون
#نړیوال

د افغانستان مظلوم او مجاهد پروره ولس ته د نوي کال مبارکي وایم.
هیله ده؛ دا نوی کال به د سولې، روغتیا، یووالي او سوکالۍ زیری ولري. موږ باور لرو؛ چې د انجونو تعلیم او د عصري علومو زده کړه د هېواد د روښانه راتلونکې بنسټ دی.
الله دې وکړي چې ټول ماشومان، نجونې او هلکان، د زده کړې له حقه برخمن شي او افغانستان د علم، پرمختګ او هوساینې پر لور روان شي.
نوی کال مو نېکمرغه!
#ټولنه #وطن #دانجونوتعلیم
#زدکړه #تحصیل #سیاست #اسلام
#صحت #علم #مکتب #ښونځې
عکس: ګوګل

«خپل وطن سره بې‌ساري، ژوره او له عقله وتلې مینه هغه احساس دی چې په زړه کې له فخر، قربانۍ او وفادارۍ سره یوځای اوسي. دا مینه د خاورې له بوی، د غرونو له وقاره او د خلکو له دردونو او هیلو سره تړلې ده.»
دا انسان ته ځواک ورکوي چې د وطن د عزت، پرمختګ او سولې لپاره هڅه وکړي او هر وخت پرې ویاړ وکړي.
#وطن
#مینه
#احساس
#افغانستان
#ټولنه
#سوله
#سیاست

«کله نا کله مشران یا واک لرونکي کسان خپل قدرت د خلکو د خدمت پر ځای د ځان لپاره کاروي.»
#مشران
#ټولنه
#قدرت
#ځواک

#خدمت
عکس: سوشل میډیا

«کله چې قانون په ټولو یو شان عملي نه شي، زورور خلک له حساب ورکولو آزاد پاتې کېږي او کمزوري زیان ویني.»
قانون باید ټولو باندې یو شان تطبیق شي.
#قانون
#ټولنه
#حساب

عکس: سوشل میډیا

وېښ شئ مؤمنانو!
دیني علم ډېر ارزښت لري، ځکه هغه اخلاق، نیت او هویت ساتي؛ عصري علم هم ضروري دی، ځکه هغه ځواک، نظم او پرمختګ راولي.
«امت هغه وخت قوي کېږي چې علم یوازې ثواب نه، بلکې مسوولیت وبلل شي؛ او زده کړه یوازې د محراب لپاره نه، بلکې د ژوند د هر میدان لپاره وي.»
نو ؛ اولادونو باندې مو تعلیم وکړئ او د جهالت څخه را بیداره شئ. اسلام خپل شومو هدفونو لپاره مه بدناموئ.