MUZEU DIBER

Në kuadër të aktiviteteve të kampit veror, fëmijët e Qendrës Didaktike “Ivan” vizituan ambientet e muzeut, duke përjetuar një udhëtim interesant nëpër histori dhe kulturë.
Momente të tilla kontribuojnë në zhvillimin e tyre kulturor dhe nxisin dashurinë për dijen dhe historinë.

Patëm kënaqësinë të mirëprisnim në muzeun tonë Nënkryetarin e Bashkisë Librazhd, Gazmir Bahiti, si dhe Kryetarin e Këshillit Bashkiak të Librazhdit, Mitat Biçaku me familjarët e tyre.

Gjatë vizitës, ata u njohën nga afër me historinë, traditat, kulturën dhe trashëgiminë e pasur të trevës sonë, duke vlerësuar rëndësinë e ruajtjes dhe promovimit të këtyre vlerave për brezat e ardhshëm.

Një vizitë e veçantë që na nderoi dhe na dha mundësinë të prezantonim pasuritë kulturore të muzeut tonë.

⚔️ 29 Qershor 1444 | Beteja e Torviollit 🇦🇱

Më 29 qershor 1444, në Dibrën e Poshtme u zhvillua “Beteja e Torviollit”, beteja e parë e ushtrisë arbërore, që u formua pas Lidhjes së Lezhës (2 mars 1444), kundër ushtrisë osmane.

Përballë forcave të shumta osmane të udhëhequra nga Ali Pasha, Skënderbeu tregoi gjenialitetin e tij ushtarak përmes një strategjie moderne për kohën. Duke kombinuar me mjeshtëri këmbësorinë dhe kalorësinë, ai përdori terrenin dhe befasinë si armët e tij kryesore. Ndërsa trupat e Gjon Muzakës dhe Hamza Kastriotit goditën nga prapavija, ndërhyrja e Vrana Kontit siguroi goditjen përfundimtare. Brenda pak orësh, ushtria arbërore korri fitore bindëse që tronditi opinionin e kohës.

Ky triumf shënoi një kthesë të rëndësishme dhe dëshmoi fuqinë e bashkimit. Fitorja në Torvioll forcoi dëshirën e popullit për liri dhe vulosi autoritetin e Skënderbeut, duke hapur rrugën e një qëndrese që frymëzoi Evropën për dekada.

Në kuadër të aktiviteteve të kampit veror, fëmijët e Qendrës “Alfa Omega” vizituan ambientet e muzeut, duke përjetuar një udhëtim interesant nëpër histori dhe kulturë. Me shumë entuziazëm dhe kureshtje, ata zbuluan objekte, ngjarje dhe dëshmi që pasqyrojnë trashëgiminë tonë kulturore.
Vizita u shndërrua në një eksperiencë të pasur mësimore, ku fëmijët mësuan, u argëtuan dhe krijuan kujtime të bukura së bashku. Momente të tilla kontribuojnë në zhvillimin e tyre kulturor dhe nxisin dashurinë për dijen dhe historinë.

Iljaz Pashë Dibra

Iljaz Pashë Dibra (Iljaz Qoku) ishte figurë e dalluar e Lidhjes Shqiptare të Prizrenit. Lindi në Kllobcisht të Dibrës. U bë i njohur me pjesëmarrjen e tij më 1844 në luftën e Gjoricës (Dibër) kundër Hajredin Pashës. Më 1861 udhëhoqi forcat dibrane kundër përpjekjeve malazeze për të shtënë në dorë viset shqiptare të Shkodrës. Iljaz Pashë Dibra ishte një nga nismëtarët e themelimit të Lidhjes Shqiptare të Prizrenit. Më 10 qershor 1878 kryesoi Kuvendin e Përgjithshëm që çoi në themelimin e Lidhjes dhe u zgjodh kryetari i saj. Kryesoi gjithashtu Kuvendin e Dibrës më 1 nëntor 1878 dhe ishte një nga 14 anëtarët e delegacionit që do t’i paraqiste sulltanit kërkesën për autonominë e Shqipërisë.

🇦🇱 10 QERSHOR 1878 – NJË DATË QË HAPI NJË KAPITULL TË RI NË HISTORINË SHQIPTARE 🇦🇱

📜 Prizreni – zemra e një lëvizjeje kombëtare

Më 10 qershor 1878, Prizreni u shndërrua në qendrën kryesore të organizimit të përpjekjeve shqiptare për ruajtjen e trojeve, bashkimin dhe identitetin kombëtar. Në një kohë kur Fuqitë e Mëdha po rishikonin hartën e Ballkanit, një grup patriotësh shqiptarë si Abdyl Frashëri, Ymer Prizreni, Sulejman Vokshi, Haxhi Zeka dhe të tjerë morën nismën për themelimin e Lidhjes Shqiptare të Prizrenit.

Kjo organizatë mbarëkombëtare kishte karakter politik dhe ushtarak, me synimin për të bashkuar viset shqiptare në një njësi administrative autonome brenda Perandorisë Osmane, duke kundërshtuar ndarjen e tyre midis shteteve fqinje. Përmes memorandumeve dhe peticioneve drejtuar Kongresit të Berlinit, si dhe përmes rezistencës së organizuar në terren, shqiptarët afirmuan identitetin e tyre kombëtar dhe politik.

Kjo periudhë përfaqëson një moment themelor të Rilindjes Kombëtare Shqiptare dhe të rrugës drejt pavarësisë, duke theksuar idenë e bashkimit kombëtar mbi ndarjet krahinore.

📚 Teksti: Fjalori enciklopedik i Kosovës - Vëll. II, Akademia e Shkencave dhe e Arteve e Kosovës, Prishtinë, 2018, faqe 975-977.

📚🏛️ Vizitë edukative në muze

Sot patëm kënaqësinë të mirëpresim në ambientet e muzeut nxënësit e klasave të III-ta dhe të IV-ta të Shkollës së Mesme të Bashkuar “Dine Hoxha”,Muhurr .

Gjatë vizitës, fëmijët u njohën me historinë, traditat dhe trashëgiminë kulturore të krahinës sonë, duke parë nga afër objekte që dëshmojnë jetën dhe kulturën e brezave të mëparshëm.

Këto vizita janë një mundësi e vyer për të afruar brezin e ri me historinë dhe identitetin tonë kulturor, duke nxitur kureshtjen dhe dëshirën për të mësuar më shumë rreth së kaluarës.

Fëmijët gjejnë gjithçka në asgjë, ndërsa të rriturit , asgjë në gjithçka !

Gëzuar 1 Qershorin gjithë fëmijëve
Qofshin të shëndetshëm , të mbarë dhe suksese !