MASAY

معلاباليش كان غالطة بصح تبانلي بلي حنا الحائكات اكثر وحايد ندعمو بعضانا 🤭 منشوفش بلي نعتبرو بغضانا منافسات و …..
بالنسبة ليا ديما ندعم لي في نفس مجالي اكثر و نفرح كي نلقا وحدة خدمتها ملاحة و مبدعة 🥳 نديرلهم 💜 نخليلهم تعليق عادي جدا و في لخر الرزق على ربي 🤲🏻
بصح كاين فئة مستفزة هادوك لي يتابعوك غير باه يسرقو افكارك منشوراتك هدرتك اسعارك و ميبانوش حتى ميديرولكش جام و لا لقطة 🤷🏻‍♀️ و لا لي يدخلو يحطو خدمتهم في تعليقات و انتي اصلا حاطة خدمتك 🤦🏻‍♀️🤦🏻‍♀️ هادي الفئة لا تمثلنا

حنا الحائكات كيوت من لخر 😌🫶🏻💜
تتفقو و لا ما تتفقو ؟؟؟

ممكن تبانلكم حوايج تافهة بصح صح راهم اهم حاجة 👌🏻 و كون تبعوهم تشوفو الفرق ✅

اول و اهم حاجة هي اختيار الكروشي لي رح تخدمي بيه و الخيط 🧶 تشري حوايج غالطين يصعبولك التعلم و تستغرقي وقت اطول بالمقابل اذا عرفتي تختاري رح يجيك التعلم سهل 🙂

ثاني حاجة الصبر لازم تصبرو مش لازم تصلحو الحاجة من اول مرة 😒😒 حلو و عاودو حتان تصلحلكم

و لازم كل يوم تخدمو حتى سطر معليش مش نهار تخيطي و عشرة لا 🤦🏻‍♀️ كيفاه رح توالف يدك و تتقني خدمتك ؟؟

و اخر حاجة متروحوش تخدمو حوايج كبار و تتحمسو ابداو بحوايج صغيرة و ساهلة برك هك حتى كي تجيكم ملاحة تتحمسو و تخدمو ما احسن 🥰
بالتوفيق للجميع 🫶🏻 اي سؤال خليولي في التعليقات 😊

ملاحظة: لي تحب حاجة تخلي كمنتار نجاوب اجابة جماعية و راني نحاول نفيدكم 😊 شكرا لتفهمكم 🙏🏻

تحبي الكروشي و ابداعاتو ؟؟؟
تحبي تتعلميه و معرفتيش ؟؟
تحوسي على نصائح ؟؟
تحوسي وين تتعلميه في مدة قصيرة اونلاين و لا حضوري؟؟
ديريلي متابعة لصفحتي و مرحبا بيك في عالمي 🥳 عالم الكروشي المميز مع ماساي وين نشارك معاكم ابداعاتي و ابداع متدرباتي و نمدلكم نصائح تسهل عليكم البداية في رحلة تعلمكم و ياسر مواضيع اخرى 😍🥰
#حائكات #كروشيه

ابداعاتي 🤭🤎
تحبو تعرفو وش من نوع خيط نستعمل ؟؟؟
'
#كروشيه #ابداعات #مشروعي

للمرة الألف نجاوبكم على هاد السؤال تع وش نشري و كيفاه نبدا لي كل ما نحطو وحدة متشوفو و منلقاكمش مهتمين 🤦🏻‍♀️
نصيحة برك اذا نتي شفتي حاجة استفدتي منها ديري على الأقل جام و كمنتار باه ناس تستفاد معاك و باه كي نزيد نحط حاجة تفيدكم تخرجلكم متكونوش انانيين 🥹
تكملو هك عن قريب تولي ابسط معلومة بالصوارد ههههه لانكم مشكم ممتنين للمعلومات المجانية و كلمة طيبة مش رح تنقص منكم والو بالعكس تخليكم تستقبلو اكثر 🥰🥰 كان عليا انا عندي دوراتي المدفوعة ناس تخلصني و تزيد تدعيلي و تشكرني الحمدلله🤲🏻🤲🏻 حبيت نعاونكم برك بلي نقدر عليه 😊
نرجعو لموضوعنا حطيتلكم اللوازم نلقا تفاعل نحطلكم كيفاه تبداو مع انو حطيت قبل و رح نزيد نحطلكم طريقة التسعير و انواع الخيوط و ياسر معلومات تفيدكم بصح كي منلقاش تشجيع نحس روحي نضيع في وقتي و وحدة ما راهي مهتمة اصلا وعلاه نكمل ؟؟؟؟

سامحوني لازم نهدر على هاد الحاجة ⬇️⬇️

عبالكم بلي مرات في نهار واحد يجيني20 ميساج يسقسيو نفس السؤال؟
والأجمل؟ السؤال نكون جاوبت عليه أصلًا في منشور ولا شرحتو في فيديو، ولا هضرت عليه أكثر من مرة 😂

و كي منجاوبش نولي مشني ملاحة 🙂 نسيتو بلي رانا عندنا خدمتنا و عندنا حياتنا و انشغالاتنا مشنا قاعدين للتلفون نهار كامل كون نتبعكم و الله منحبس من كتبية نولي كي البيغاء نعاود في نفس الهدرة

انا هدرت لأنو كاين لي معجبهمش الحال و المشكلة هي تكون باعتة لالف وحدة مش غير ليا انا هههههه مالا كي انتي باهتة لالف وحدة افهمي بلي انا تانا الف وحدة باعتتلي كيفك 🙂🤯 كونو متفهمين سبحان الله مش تبقاو تلومو في الناس كل واحد و ظروفو و كل واحد كيفاه يشوف فاها انتم تشوفو بلي حنا باخلينكم و اشرار و حنا نشوفو بلي انتم تفسدو علينا في خدمتنا

ربي عيشكم قولولي عندي الحق و لا لا عبالي مش رح تفهمني غير لي تعاني كيفي 🙂🙂 مع انو و الله كي يكون عندي وقت و نلقا ميساج نجاوب عادي نقول معليش مدامني قاعدة و ديما نندم وحدة جاوبتها بالتفصيل الممل و قاتلة روحي ننصح فاها و حالة في فوكال تخيلو شافت ميساج و مجاوبتش و قداه من مرة يديروهالي لقطة ادي و كاين لي تبلوكيني 🤦🏻‍♀️🤦🏻‍♀️كاين لي تقلي شكرا و تروح كشغل بلا مزيتي على الأقل شكرا ربي يحفظك اختي طولي فاها شوي مش انا كاتبتلك جرنال و انتي تكتبيلي كلمة 😭😭😭😭😭 حابين الساهل ادخلو دورات في شهر تتعلمو كلش و لا عولو على رواحكم و اتعبو كيما تعبنا واحد ما لقاها واجدة و وقتنا مكاين حتى حاجة بلا مقابل من لخر

عبالي هضرت ياسر الله غالب تعبوني لازم نفرغ قلبي وليت نشوف السؤال تع كيفاه نبدا نهبل 😂😂😂 نغزل خلاه منو وليت 😭😭و روحو شوفو تعليقات لي يسقسيوني كل نجاوبهم على نوعية خيط رقم كروشي حوايج باينة بصح باه نفهمك من لول كيفاه تبداي نحط منشور مرة وحدة للجميع فقط ادا لي نقدر عليه 💜 و شكرا على تفهمكم مع انو عبالي غير انا لي رح نشوفو المنشور ادا ههههه المهم فرغت قلبي

و بعد المنشور هادا دك نزيد نحطلكم الاجابة على السؤال تع ميفاه نبدا و دك تشوفو بلي واحد مراح يشوفو من ناس لي تحوس عليه 😌 دك نعود كل يومين نبارطاجيه نسهلها على الجدد باه ميهبطوش التحت خلاه يحوسو عليه زيدو قولو بخيلة 😒😒

نحكيلكم على بداياتي كي حليت صفحة 😭😭
كنت اكثر حاجة نستعمل تيكتوك و فيسبوك كنت في بداياتي بعد ما تعلمت و الصراحة مع انو الكروشي وقت هاداك مكانش معروف (اصلا على هادي اخترتو لانو حاجة مميزة ) بصح كنت نستقبل طلبيات ما شاء الله و أكيد كنت نبارطاجي نهار و ليل باه نقدر نجيب كومند 🤷🏻‍♀️ كانت عندي مشكلة في التفاعل و في ليزابوني مكنتش نعرف وش ندير كب ما نحط حاجة نشوفها غير انا ههههههه خاصة في التكتوك جامي جبت مشاهدات اكثر من 100 😅 و نتفكر وحد نهار حطيت فيديو على 12 تع ليل و رقدت نضت صباح لقيتو وصل الف متتخيلوش الفرحة تيعي دقيقتها 😭😭😭😭 كشغل زاد رجعلي الأمل و تشجعت باه نكمل 😭😭 مع انو الف برك بضح كان بالنسبة ليا رقم كبير خلاه وقتها 🥳🥳 و الحمدلله درك كيما في الصورة لي تشوفو فاها فيدياواتي اللايك برك يوصل للآلاف و المشاهدات لمئة الف 🤯 اكيد مش الفيدياوات كل رح يطلعو و الحاجة هادي عادية و ان شاء الله نوصل لارقام اكبر 😍😍💜
و انتم احكيولي تجاربكم كيفاه كانت ؟؟؟؟ فشلتو و لا كملتو ؟؟؟؟

نصيحة في التسعير ✅
لي متعرفش دير تسعير لخدمتها لازم تتعلم اي ساهلة يعني مشها علم كبير تحسبي سلعتك و وقتك و ديري الفايدة 🤷🏻‍♀️ لانو غلطة كبيرة لي تبقاو تسقسيو في لي يخدمو كيفكم بقداه و تروحو ديرو نفس السعر و لا زعما تنقصو عليه باه يشريو عليكم انتوما 🤦🏻‍♀️🤦🏻‍♀️
خاصة لي يبداو جدد تكون مزالت حتى متعرفش انواع الخيوط اي حاجة تخدمها بالصوف و تروح تسقسي وحدة محترفة السعر تعها عدى حسب الجودة لي تقدم فاها و تروح دير نفس السعر تنقص شوي عليه و تقلك مكانش لي يشري 🙂
و لا العكس تانا وحدة خدمتها تهبل عندها خبرة تعاند على الناس لي مطيحين بقيمة خدمتهم المهم يبيعو و دير كيفهم 😭
افهمو راهو كل واحد عندو تسعير خاص بيه متعاندوش بعضاكم
و ياسر لي يبعتولي يقولولي هادي بقداه نحسبها نقلها على حسب السلعة و وقتك ميعجبهمش الحال و انا صح منقدرش ندير تسعير في بلاصتك معلابالي لا بوش خدمتي لا قداه درت فاها وقت انا باه نسعر خدمتي ندير ورقة و ستيلو و هي تقلي اعطيني بقداه نحسبها
تقولولي منين نتعلمو كاين اليوتيوب كاين دورات كاين انا ههههها لي كي نلقا تفاعل نديرلكم منشور بالتفصيل وش الفايدة نحط و واحد ميستفاد نحس روحي نتعب باطل 😊
المهم قولولي انتم كيفاه تسعرو خدمتكم؟؟؟؟؟ نفيدو بعضانا و اذا طريقتك غالطة نصححلك 👌🏻
و متنساوش ديرولي ابوني حائكاتي 🫶🏻💜