Eng.nasser ouda

توضيح هام وإبراء ذمة مهنية ومالية امام الجميع
لعملي السابق في مركز صيانة ايطالي معروف
السلام عليكم ورحمة الله وبركاته
في بداية الامر انا هحكي لحضراتكم مشكلة بقالها حوالي سنة ولسة مكملة ولكن هحاول اختصر قدر الإمكان
انا ناصر عوده مهندس ميكانيكا (مهنيا وعلميا وليس اكاديميا) مدير مركز صيانة سيارات ايطالي معروف في 45 الدولي .. ولكن سابقا كنت المهندس المسؤول ومدير مركز صيانة ايطالي معروف في فترة تواجده في نادي الصيد ومرحلة انتقاله الى ابيس السابعة
بداية القصة في المركز القديم في نادي الصيد صاحب المركز سلمني المكان وسافر المكان كان كله كاميرات وكنت بتابع معاه اول بأول مع تدوين ادق التفاصيل في دفتر خاص المهم
كان في قرار ازالة لكامل المنطقة وكان المركز و مصنع اخر هما اللي فضلوا والباقي كله اتزال فكان بيحصل مشاكل كتير وانذارات بالاخلاء ومحاضر وللأسف انا كنت المسؤول والمؤتمن الوحيد فانا اللي كنت بتصدر لكل ده واتأذيت جدا وعاد بالضرر عليا وعلى اسرتي وهو يعلم ذلك تماما اخر انذار جه كان في مده محدده للإخلاء ١٥ يوم
فضلت احذره كتير انا واخرين بأن لازم ننقل قبل الميعاد وهو يقول انه هيتصرف وانه عامل ترتيبات معينة وان المكان مش هيتزال.. في خلال الوقت ده كان طالب مني اشوفله مكان او ارض كنت يوميا بلف على اراضي واصور واتفاوض وهو طبعا.. مسافر
لحد ما استقرينا ع الارض وزوجته دفعت العربون في ابيس السابعة (موقع مركزه الجديد) طب يلا ننقل لا استنى .. ها.. لا استنى.. لحد ما المدة خلصت والدولة اخدت اجراءاتها وجم لتنفيذ القرار وانا وجميع العمالة والبضاعة في المكان يهديكم يرضيكم صاحبها مش موجود.. مفيش فايده المهم الوقت ده كان جت زوجته وبعض قرايبهم يقفوا معانا جيبت عربيات واللي قدرنا ننقله اتنقل للأرض التانية لان المسؤولين رفضوا يدونا مهلة لاننا تم ابلاغنا مسبقا اكتر من مره بالازالة فالنقل اخد حوالي من يومين ل ٣ في الشارع طبعا كلهم مشيوا وفضلت انا والعمالة مش بنروح بيوتنا حفاظا ع البضاعة اللي تعتبر في الشارع وزوجته كانت بتقعد اليوم كامل للمتابعة وتروح بالليل وهكذا... ع الطرف التاني في ابيس الاستقرار المبدأي اخد حوالي من اسبوعين ل ٣ ارض غير مجهزه مفيش غير هانجر بس البضاعة كانت في الشارع كنت عامل للعمالة شيفتات مع وجودي طبعا بحيث نبقى ٢٤ ساعة منتبهين ومفيش حاجه تانية تتسرق كنا بنقول لنفسنا يكفي خسارته في كل اللي حصل
في كل المشاكل دي انا كنت مسؤول اني اقبض واقبض الصنايعية واطلع مصروف لبيته هو فانا كل اللي كان بييجي كنت بطلعه للصنايعية ولبيته واخد ما يكفي بيتي فقط... ٤ شهور مقبضتش فيهم قبضي مراعاة لظروفه وهو يعلم والصنايعية تشهد على ده
واخيرا رجع من السفر بعد معاناة ارجع الحقنا من فضلك ومبيرجعش لمدة
ابتدى يبني في المكان واحده واحده تاني والموضوع طول لانه ممعهوش سيولة.. فالوقت ده انا بيعت شقتي علشان انقل لشقة معينة ومحصلش نصيب وقعدت في شقة حمايا وعفشي في شقة تانية خاصة بأخو زوجتي ولكن مكانتش جاهزه للمعيشة فبقى معايا مبلغ وهو عارف... طلب مني مبالغ ع فترات مرة لتسديد مبلغ من حق الارض ومرة لتسديد مبلغ للحداد وغيره.. قولتله ان اللي معايا فلوس شقتي وان بمجرد ظهور شقة مناسبة هحتاجهم اكد عليا ان وقت ما احتاجهم حيرجعهم ومعايا صور جميع التحويلات الاجمالي وصل الي ما يقارب ٢٩٠ الف
ظهرت شقة مناسبة جدا بعد ٤ شهور من اقراضه الفلوس فجيت طالبته بيهم فالرد انه مفيش سيولة ومش عارف يتصرف المهم كان لازم اخد الشقة لان طبعا الوضع كان صعب بلغته اني هبيع دهب علشان اقدر اكمل تمن الشقة ع اساس اني استرد فلوس الدهب ده بقيمته بعدين مع عدم علمي بحرمانية الموضوع فضل ع فلوسي علشان تكمل تمن الشقة بعد بيع الدهب ١٠٠ الف هو اتصرف وجابهم
واتبقى عنده حوالي ١٩٠ الف
عطاني ٩٠٠٠٠ ٣ في ٥ في ٢ وهكذا وطبعا كل اللي كان بييجي كان بيروح
كل ده وانا معاه في الشغل مسيبتهوش قولتله انا جالي مولودة ومحتاج ان مرتبي يزيد علشان مسؤولياتي زادت فضل يماطل اسبوع في التاني.. التالت قولتله انا هفضل معاك لحد ما تلاقي حد تاني وانا حدور ع شغل برضه بالفعل ربنا كرم على طول في المكان اللي انا فيه واستمريت في المطالبة بحقي
قولتله ال ١٠٠ اللي فاضله حاخدهم بقيمة الدهب وقت ما بيعت فضل يقول ازاي ومش ازاي وكده ربا انا مش حديهملك كده لو حتاخدهم ١٠٠ زي ما هما حديهملك انا كنت مصمم لحد ما سألت في الازهر وعرفت ان فعلا ده ربا وانا حقيقي مكنتش اعرف فرجعت قولتله انت صح وانا عايز ال ١٠٠ حقي فقط
فضلت الحجج اصل مفيش اصل مش معايا ولما عرف اني برضه نزلت مركز ايطالي اتهمني بإني ع تواصل مع العملاء بتوعه وطالبني بأخذ شريحة التليفون الخاص بيا مقابل انه يرجعلي فلوسي علشان ماخدش العملاء بتوعه وطبعا دي حاجه غير منطقية على الاطلاق لإن الحمدلله انا معروف جدا والناس عارفة انا مين وخبرتي ايه وعيلتي مين فانا قولت مااااشي خد الشريحة مش فارقة معايا
يلا هات الفلوس بقى مفيش... ويدخل ناس تحكم بيننا وانا دخلت ناس من طرفي ونعمل قعدات ويكلم اصحاب المركز اللي انا فيه ويشكك فيا ويشكك في شغلي وفي مهارتي وفي امانتي انا مش هقول بعد كل اللي عملته كده كده انا عملت لله واللي عنده مبيروحش وعند الله تجتمع الخصوم
من الناس اللي اتدخلت الحداد اللي مصنع حديد المركز لانه بيعتبره زي والده بقيت اتعامل معاه هو لاني رفضت التعامل مع صاحب المركز بعد اللي قاله عني واللي عمله
فضل يقولي اصله مضغوط والظروف سامحه لله وهو نفسه اتصل بيا وقاللي متزعلش من اللي انا فيه وهكذا قولتله ماشي مفيش مشكلة اصل انا عايز فلوسي... اكلم الحاج الحداد اللي كبرتله اكتر من مره يقولي طيب حوله الخط حاضر هحوله اروحله يلا نحول الخط لا اصل مش فاضي دلوقتي مش مهم بعدين وهكذا... الفلوس طيب معلش واحده واحده اصل ممعهوش
اخدت ٤٠ الف ٧ في ٥ وهكذا وبرضه كله راح
قولت خلاص كل ما احتكم عليه هما ال ٦٠ الف اللي فضلوا معاه وعندي بنتين منهم رضيعة محتاجهم كاملين.. بعدها الحاج الحداد كلمني قاللي روح قابله في فرع كارفور حوله الخط وهيديك ٧ من اللي عليه قولتله ماشي روحتله
لقيته بيكلمني قدام الناس بنبرة غير لائقة وطريقة سيئة جدا تفتقر للإحترام قولتله انت متكلمنيش باللهجة دي ده حقي وسيبته ومشيت الاقيه باعتلي ع الواتس اب نفس اليوم الصبح رسالة طويلة عريضة مكنتش شوفتها قبل ما اروحله لاني استأذنت من شغلي وروحتله كلها تجاوزات لفظية في حقي فرديت بالرد المناسب
كلمني الحاج الحداد يقولي انا شوفت اللي باعتينه لبعض وخلاص فلوسك عندي بس حوله الخط وفضل يحاول يقعدنا تاني نتصالح واخد فلوسي انا رفضت الصلح انا مش عايز اكتر من اني اخد حقي ومش عايز اعرف البني ادم ده تاني
الحاج الحداد كلم احد من معارفي حضر معانا القعدات سابقا واتفق معاه نتقابل كلنا في كارفور اخد الفلوس كاملة واحول الخط روحت انا واللي من طرفي في الميعاد نكلمهم مجوش اصل احنا مستنينكم في ابيس علشان تصفوا الامور قام اللي معايا كلمه يا حاج احنا مش اتفقنا وقولنا هنتقابل هنا ونخلص رد بكلام مغاير للي حصل فالراجل المحترم اللي معايا قاله كلام فيما معناه انهم مش بيلتزموا بالإتفاقات واننا هناخد جميع الاجراءات ضده
محتاج رأيكم بما يرضي الله + جميع ما يثبت ان هذا حصل معايا سواء تحويلات-شات-مكالمات-شهود وهكذا
وده الجزء الاول من القصة والخاص بمشكلتي انا فقط
انتظروا باقي اجزاء قصة صاحب المركز والحقوق المعلقة لناس تانية غيري وكل كلامي بالدلائل والإثباتات

قال عمر بن الخطاب رضي الله عنه : «ما أُبالي على أي حال أصبحت؛ على ما أحب، أو على ما أكره؛ لأني لا أدري، الخير فيما أُحب أو فيما أَكره؟» ❤️