Dr.Moataz Rashad

بشري سااااارة لكل طلاب مسار الطب وعلوم الحياة 😉 😍

☑️ منهج الرياضيات للصف الثاني الثانوي (البكالوريا) مسار الطب وعلوم الحياه نزل...
ودي أول ملاحظاتي بعد ما شوفته ، بكل حيادية مزايده . 👇

📌 أول حاجة...
المنهج قوي، وواضح جدًا إنه مركز بشكل كبير على الجبر.

وما تنسوش إني كنت قايل لكم من فترة إن المنهج الجديد هيكون مركز على الجبر والتفاضل. 😄

الجبر موجود فعلًا وبقوة... لكن التفاضل مش موجود، ودي بصراحة الحاجة الوحيدة اللي مستغربها ومش فاهم سببها لحد دلوقتي لان بحكم اني بشرح رياضة للكليات الطبيه كلها اغلبها تفاضل .

📌 ثاني حاجة...
فيه أجزاء كتير جدًا الطالب درسها بالفعل في السنوات السابقة، ودي نقطة ممتازة جدا وهتخلي الماده ممتعه وسهله اكتر

وبرضه دي من الحاجات اللي كنت دايمًا بقولها لكم... إن المنهج الجديد هيكون جزء كبير منه مبني على اللي الطالب أخده قبل كده، علشان يبقى بيكمل على أساس موجود، مش بيبدأ من الصفر.

وعشان كده، أي طالب كان بيذاكر أول بأول وبيفهم، هيلاقي المنهج أسهل بكتير مما الناس متخيلة.

📌 أكتر حاجة عجبتني هي توزيع المنهج.

بصراحة من أفضل توزيعات المناهج اللي شوفتها. التدرج ممتاز، وكل درس بيخدم اللي بعده، وده هيخلي الطالب فاهم هو بيتعلم إيه، وليه بيتعلمه، بدل الحفظ وخلاص.

📌 المنهج محتاج شغل بضمير.

مش هيعتمد على الحفظ السريع أو المختصرات فقط، لكنه محتاج فهم وتدريب وحل، وده في رأيي شيء إيجابي.

📌 ملحوظة مهمة...
رغم إن المنهج طويل، فهو في رأيي سهل وسهل جدا ، لأن ترتيبه منطقي، وفيه أجزاء كتير الطالب شافها قبل كده، فالموضوع مش مرعب زي ما بعض الناس متخيلة.

📌 ولو أنت طالب ولسه محتار... أختار رياضة ولا فيزياء؟

بالنسبة لي انا ... رياضة طبعًا. 😄
ليه؟
لأن منهج الرياضيات، في رأيي، ممكن يخلص شرح ومراجعة وحل بشكل ممتاز خلال حوالي 6 شهور. بالكتييير اوي ده لو مشينا ع الهادي وركز في كلمه شرح ومراجعه مش شرح بس
وفي اللي هيقول لسه منهج الفيزياء منزلش اصلا.؟ هقولك حصل بس مهما كان منهج الفيزياء عمره ما هيكون أسهل من الرياضه
لان بكل بساطه الرياضه اغلبها انت درستها قبل كده وعندك فكره اما الفيزياء صباح الفل انت هتدرس منهج تانيه ثانوي وتالته ثانوي النظام القديم في ماده واحده
غير كده، الرياضيات مادة واضحة جدًا... يا أبيض يا أسود. ✅

وفي النهاية... انتظرو مني تفاصيل أكتر الايام اللي جاية 😉 😉 ❤️