Horn Insight

ጠበቃ ሙሉጌታ በላይ እና ጠበቃ ሰብለ አሰፋ በቅን ልቦች የሽልማት መርሃ ግብር በአላማ መር ማህበራዊ ሚዲያ ይዘት አቅራቢዎች ዘርፍ እጩ ሆነው ቀረቡ።

ባለሙያዎቹ ማህበራዊ ሚዲያን በመጠቀም ውስብስብ የህግ ጉዳዮችን ለህዝብ ቀለል ባለ መንገድ በማስረዳት፣ ህብረተሰቡ መብትና ግዴታውን እንዲያውቅ በማድረግ እና ፍትህ ተከባሪ እንድትሆን በመስራት ላይ ይገኛሉ።

ይህ የሽልማት ዘርፍ ሀገራዊ እሴትን ጠብቀው ማህበረሰብን የሚጠቅሙ ይዘቶችን ለሚያቀርቡ አካላት የሚሰጥ ሲሆን፣ ለከፍተኛ አሸናፊዎች እንደየደረጃቸው በአጠቃላይ የ100 ግራም ወርቅ ሽልማት ተዘጋጅቷል። በዚህም መሠረት ለ1ኛ ደረጃ 50 ግራም፣ ለ2ኛ ደረጃ 30 ግራም፣ እንዲሁም ለ3ኛ ደረጃ 20 ግራም ወርቅ ይበረከታል።

የህግ እውቀትን በማስፋፋት አዲስ ትውልድ በመቅረጽ ላይ የሚገኙትን እነዚህን ባለሙያዎች ለማበረታታት ህዝቡ በተዘጋጀው የድምፅ መስጫ ሊንክ በኩል ድምፅ እንዲሰጥ ጥሪ ቀርቧል።

በፍኖተ ሰላም በ80 ሺህ ብር በተገዛ በሬ ውስጥ 13.7 ግራም ወርቅ ተገኘ!

በምዕራብ ጎጃም ዞን ፍኖተ ሰላም ከተማ 03 ቀበሌ ለአዲስ ዓመት በዓል ማጠቃለያ በተደረገ የከብት እርድ ወቅት፡ በበሬው ሆድ ውስጥ የወርቅ ቁራጭ መገኘቱ ተገለጸ።

አቶ አንዱአምላክ , አቶ ውለታው እና አቶ በፍትህ ከተባሉ አባላት ጋር በመሆን ለበዓል በ80,000 ብር የተገዛው በሬ ታርዶ በውስጡ የተገኘው ወርቅ በመጀመሪያው የወርቅ ሚዛን የመዘኑት ሰዎች 14 ግራም መሆኑን የገለጹ ሲሆን፡ ለሁለተኛ ጊዜ በሌላ ወርቅ ቤት ሲመዘን ደግሞ 13.7 ግራም ሆኖ ተገኝቷል።

ይህ ያልተጠበቀ ክስተት በከተማው ነዋሪዎችና ማህበራዊ ሚዲያ ተጠቃሚዎች ዘንድ ትልቅ መነጋገሪያ እና ትኩረት ሳቢ አጋጣሚ ሆኗል።

የሀዋሳ ዩኒቨርሲቲ ማህበረሰብ ሬዲዮ በሲዳሙ አፎ ስርጭት በአስቸኳይ እንዲጀምር ጥሪ ቀረበ

የሀዋሳ ዩኒቨርሲቲ ማህበረሰብ ሬዲዮ ኤፍ ኤም 97.7 የሚገኝበትን የአካባቢውን ህዝብ ቋንቋ የሆነውን ሲዳሙ አፎ በስርጭት ፕሮግራሞቹ ውስጥ አካቶ አለመጠቀሙ በህዝቡ ዘንድ ከፍተኛ ቅሬታ መፍጠሩን ጋዜጠኛ ተፈራ ቀንፋቶ አስታወቀ።

ጋዜጠኛው ባወጣው የሂስ ጽሁፍ እንደገለጸው፣ ጣቢያው በሲዳማ ክልል እምብርት ሀዋሳ ከተማ ውስጥ እየሰራ የአካባቢውን ቋንቋ ዘንግቶ መቆየቱ ትልቅ የሙያ እና የማህበረሰብ ተደራሽነት ክፍተት ያለበት መሆኑን አመልክቷል። የማህበረሰብ ሬዲዮ ከተቋቋመበት ዋነኛ አላማ አንዱ የአካባቢውን ህዝብ ባህል፣ ታሪክ እና ቋንቋ መሰረት በማድረግ መረጃ መስጠት ቢሆንም፣ ኤፍ ኤም 97.7 ይህንን መሰረታዊ የመገናኛ ብዙሃን መርህ መጣሱንም አክሎ ገልዟል።

ይህ አሰራር ማህበረሰቡ በሬዲዮ ጣቢያው ላይ ያለው የባለቤትነት ስሜት እንዲቀንስ እና መረጃ የማግኘት መብቱ እንዲገደብ ማድረጉ ተጠቅሷል።

በመሆኑም፡

💫የሀዋሳ ዩኒቨርሲቲ አመራሮች እና የጣቢያው አስተዳዳሪዎች፡ አሰራራቸውን በአስቸኳይ በመገምገም በሲዳሙ አፎ የሚሰጡ ስርጭቶችን እንዲጀምሩ፤

💫የሲዳማ ብሔራዊ ክልላዊ መንግስት እና የኮሙኒኬሽን አካላት፡ ህዝቡ በቋንቋው የመጠቀም መብቱ እንዲከበር አስፈላጊውን ማስተካከያ እንዲያስደርጉ፤

ጋዜጠኛ ተፈራ ቀንፋቶ ጥሪውን አስተላልፏል።

በተጨማሪም ከቅርብ ጊዜ ወዲህ ተቋሙን የሚመሩ አንዳንድ አካላት በአካባቢው ማህበረሰብ ምሁራን፣ አመራሮች እና ኤክስፐርቶች ላይ ያነጣጠረ መድልዎ እና ጥቃት እያደረሱ ነው ተብሎ ቅሬታዎች እየተነሱ መቆየታቸው ይታወሳል።

የግብፅ የውጭ ጉዳይ ሚኒስትር በኢትዮጵያ ላይ ሦስት ቀይ መስመሮች ማስመራቸውን ገለጹ

የግብፅ የውጭ ጉዳይ ሚኒስትር ባድር አብደል አቲ አገራቸው በኢትዮጵያ አቋም ላይ ሦስት ዋና ዋና ቀይ መስመሮች ማስመሯን መናገራቸውን ዘ አረብ ዊክሊ ዘገበ።

ሚኒስትሩ አገራቸው የኢትዮጵያን የመልማት መብት የምታከብር ቢሆንም፣ የግብፅ የውሃ ደህንነት ግን የህልውና ጉዳይ በመሆኑ ሊከበር እንደሚገባ እና በወንዙ ላይ የሚደረጉ የተናጠል እርምጃዎች ተቀባይነት እንደሌላቸው ገልጸዋል።

ሚኒስትሩ ካስቀመጧቸው ቀይ መስመሮች መካከል የመጀመሪያው የአባይ ወንዝ ቁጥጥርን የሚመለከት ሲሆን፣ ኢትዮጵያ በወንዙ ላይ አዳዲስ ግድቦችን በመገንባት የበላይነት ለመያዝ የምታደርገውን እንቅስቃሴ ግብፅ የማትቀበለው መሆኑን አስረድተዋል። ሁለተኛው ደግሞ ኢትዮጵያ ከታላቁ የህዳሴ ግድብ ባሻገር የግድቦች ኔትወርክ ለመዘርጋት የምታደርገው ጥረት በረጅም ጊዜ ውስጥ የወንዙን ፍሰት ሊቀንሰው ወይም ሊያዛባው ስለሚችል፣ በአባይ ወንዝ አስተዳደር ላይ የሚወሰዱ እርምጃዎች በግልጽ እና አስገዳጅ ህግ ላይ የተመሰረቱ መሆን አለባቸው ብለዋል።

በሦስተኛ ደረጃ የተቀመጠው ቀይ መስመር የኢትዮጵያን የባህር በር የመፈለግ እንቅስቃሴ የሚመለከት ነው። እንደ ሚኒስትሩ ማብራሪያ፣ ግብፅ ኢትዮጵያ ለንግድ አገልግሎት ወደቦችን በመጠቀሟ ላይ ተቃውሞ የሌላት ቢሆንም፣ በቀይ ባህር አካባቢ የባህር ሃይል ለማስፈር የምታደርገው ጥረት ከኢኮኖሚ ባለፈ ወታደራዊ አላማ ያለው ነው የሚል ስጋት አላት። የቀይ ባህር እና የሱዌዝ ካናል ደህንነት ለግብፅ ብሄራዊ ደህንነት ወሳኝ በመሆናቸው፣ በቀጣናው ላይ ሌላ ወታደራዊ ሃይል እንዲሰፍር አገራቸው የማትፈልግ መሆኑን አክለው ገልጸዋል።

የአባይ ወንዝ ዋና ምንጭ የሆነችው ኢትዮጵያ በወንዙ ላይ የመልማት መብቷ ለዘመናት በቆዩ የኮሎኒያል ዘመን አድሏዊ ስምምነቶች ታስሮ ከቆየ በኋላ፣ አሁን ላይ የተፈጥሮ ሀብቷን በፍትሃዊ እና ሚዛናዊ መንገድ ለመጠቀም እና ለማልማት በተግባር መተግበር የጀመረች ሲሆን፣ ለግብፅ የውጭ ጉዳይ ሚኒስትር አስተያየትና ለቀረቡት ቀይ መስመሮች የምትሰጠው ይፋዊ ምላሽ ይጠበቃል።

የሐዋሳ ከተማ አስተዳደር ለ160 የልማት ተነሽ ነዋሪዎች የመኖሪያ ቤት ዕጣ አወጣ

የሐዋሳ ከተማ አስተዳደር በቱላ ክፍለ ከተማ ልዩ መንደር ጨፌ ቀበሌ ለኮሪደር ልማት ሥራ ተነሽ ለሆኑ 160 ነዋሪዎች በዛሬው ዕለት የመኖሪያ ቤት ዕጣ ማውጣት መርሃ ግብር አካሂዷል።

በአስተዳደሩ በምክትል ከንቲባ ማዕረግ የከተማና መሰረተ ልማት መምሪያ ኃላፊ ኢንጂነር ቸርነት ፍላቴ እንደገለጹት፤ ከተማ አስተዳደሩ ለዘጠኝ ወራት የቤት ኪራይ ድጎማ ሲያደርግላቸው ለቆዩት የመጀመሪያ ዙር የልማት ተነሽዎች ውሃና መብራት የተሟላላቸው ዘመናዊ ቤቶች ተገንብተው የዕጣ ርክክብ ተደርጎላቸዋል። ቤቶቹ በመንግሥት መመሪያ መሠረት በተመጣጣኝ ኪራይ የሚተዳደሩ ሲሆን፣ በቀጣይ አንድ ሳምንት ውስጥ ሙሉ በሙሉ አልቀው እንደሚረከቡ አስታውቀዋል።

ዕጣ ያወጡ ነዋሪዎች በበኩላቸው አሰራሩ ፍትሐዊ መሆኑን ጠቅሰው ባገኙት ዕድል መደሰታቸውን ገልጸዋል።

ጠቅላይ ሚኒስትር ዐቢይ አሕመድ እና ፕሬዚዳንት ቭላድሚር ፑቲን በነገው ዕለት በሕንድ ይወያያሉ

ጠቅላይ ሚኒስትር ዐቢይ አሕመድ እና የሩሲያው ፕሬዚዳንት ቭላድሚር ፑቲን በነገው ዕለት በሕንድ ተገናኝተው በሁለትዮሽ እና ቀጠናዊ ጉዳዮች ላይ እንደሚመካከሩ ታውቋል።

የሁለቱ ሀገራት መሪዎች ስብሰባ በኢትዮጵያ እና በሩሲያ መካከል ያለውን ዘመናት የተሻገረ ዲፕሎማሲያዊ እና ኢኮኖሚያዊ ግንኙነት የበለጠ ለማጠናከር ያለመ መሆኑ ተገልጿል።

ሰበር ባብ ኤል-መንደብ ከባድ ስጋት ላይ ወደቀ

የየመን ሐውቲዎች አስደናቂ በሆነ ፍጥነት የተለያዩ የሀገሪቱን ስትራቴጂካዊ ቦታዎች በቁጥጥራቸው ስር በማድረግ ላይ ይገኛሉ።

ሃይሎቹ ዓለም አቀፍ የባህር ንግድ መስመር የሆነውን የባብ ኤል-መንደብ (Bab-el-Mandeb) ወሰን ለመዝጋት በጥቂት ርቀት ላይ እንደሚገኙ መረጃዎች ይጠቁማሉ።

በተለይም ዛሬ አዳሩን በከፍተኛ ፍጥነት እና ጥንካሬ ወደ ፊት በመግፋት ላይ መሆናቸው የብዙዎችን ትኩረት ስቧል።

ሐውቲዎች ይፋ እያደረጉት ባለው ተንቀሳቃሽ ምስል (ቪዲዮ) መሠረት፤ በርካታ የየመን የመንግስት ሰራዊት አባላት እጃቸውን እየሰጡ መሆናቸው ታይቷል።

ይህ በከፍተኛ ፍጥነት እየተካሄደ ያለው ወታደራዊ እንቅስቃሴ የአለም አቀፉን ማህበረሰብ ትኩረት እና ስጋት በእጅጉን ስቧል።

የድሮን ትርኢት በአዲስአበባ

የባሕር በር ቁርጥ ነው!

ሀዋሳ ድሮና ዘንድሮ

“ድሮ በበዓላት ወቅት አቅመ-ደካማ የከተማው ነዋሪ የሚያገኘው ድጋፍ ከጎመን አልፎ አይታሰብም ነበር፤ ዘንድሮ ግን ታሪክ ተቀይሯል! የሀዋሳ ነዋሪዎች በበግ ሙከት፣ በምግብ ዘይትና በትላልቅ ቁሳቁሶች ድጋፍ የሚደረግላቸው ሆነዋል።

ለዚህ ትልቅ ለውጥና መልካም አስተዳደር ለሀዋሳ ከተማ ከንቲባ አቶ ጥራቱ በየነ እና ለብልጽግና ፓርቲ ቅርንጫፍ ጽሕፈት ቤት ኃላፊ አቶ ማራዶና ዘለቀ ምስጋና ይግባልን።

የሀዋሳ ነዋሪዎች እንኳን ደስ አላችሁ! እንኳን ለአዲሱ ዓመት አደረሳችሁ፤ እንኳን ሕዝቡን የሚመጥንና የሚበጅ እውነተኛ መሪ አገኛችሁ!”

የዘወትር ተከታያችን፦ ህሩት ፀጋዬ