THUNA

തുണയുടെ സേവന പ്രവർത്തനങ്ങൾക്ക് ആലപ്പുഴ പൗരാവലിയുടെ പിന്തുണയും കരുത്തും ഉണ്ടാകുമെന്ന് ബിജെപി ദക്ഷിണ മേഖല അധ്യക്ഷൻ ശ്രീ കെ. സോമൻ. സാമൂഹ്യ പ്രതിബദ്ധതയോടെ തുണ ചെയ്യുന്ന കാര്യങ്ങൾ ആലപ്പുഴയ്ക്ക് മുതൽ കൂട്ടാണ്. ഇത്തരം പ്രവർത്തനങ്ങൾ കൂടുതൽ കരുത്തോടെ ചെയ്യാൻ തുണയുടെ ഭാരവാഹികൾക്ക് കഴിയട്ടെ എന്നും അദ്ദേഹം ആശംസിച്ചു. നിർധന കുടുംബങ്ങൾക്ക് വഴിയോര കടകൾ നൽകുന്ന ചടങ്ങിൽ ആശംസാ പ്രസംഗം നടത്തുകയായിരുന്നു അദ്ദേഹം.

മതവും രാഷ്ട്രീയവും പറഞ്ഞ് സമൂഹം ചേരി തിരിഞ്ഞ് നിൽക്കുമ്പോൾ തുണ ചാരിറ്റബിൾ സൊസൈറ്റി ചെയ്യുന്ന പ്രവർത്തനങ്ങൾ സമൂഹത്തിന് വെളിച്ചം പകരുന്നതാണെന്ന് സംഹതി ഇന്ത്യാ ഡയറക്ടർ റവ ഫാദർ ആൻ്റണി ജേക്കബ് അഭിപ്രായപ്പെട്ടു. തുണയുടെ പ്രവർത്തനം മാതൃകാപരമാണ്. ഇന്ന് തുണ കൊളുത്തിയ 10 ദീപങ്ങൾ ആയിരമായി മാറട്ടെ എന്ന് അദ്ദേഹം ആശീർവദിച്ചു. നിർധന കുടുംബങ്ങൾക്ക് തുണ സൊസൈറ്റി വഴിയോര കടകൾ വിതരണം ചെയ്യുന്ന ചടങ്ങിൽ അനുഗ്രഹ പ്രഭാഷണം നടത്തുകയായിരുന്നു ഫാദർ ആൻ്റണി ജേക്കബ്.

സഹജീവികൾക്ക് ചെയ്യുന്ന സഹായമാണ് യഥാർത്ഥ ഈശ്വര ആരാധനയെന്ന് വേദാമൃതാനന്ദ പുരി സ്വാമികൾ. തിരിച്ചൊന്നും പ്രതീക്ഷിക്കാതെ ചെയ്യുന്ന കർമ്മം യജ്ഞമാണ്. ആ അർഥത്തിൽ തുണ സൊസൈറ്റി ചെയ്യുന്ന നിസ്വാർത്ഥ സേവനം യജ്ഞമാണെന്നും അദ്ദേഹം പറഞ്ഞു. മത രാഷ്ട്രീയ പരിഗണനകൾ നോക്കാതെ ഇനിയും കൂടുതൽ സേവനം ചെയ്യാൻ തുണയ്ക്ക് കഴിയട്ടെ എന്നും അദ്ദേഹം ആശീർവദിച്ചു. നിർധന കുടുംബങ്ങൾക്ക് വഴിയോരക്കടകൾ വിതരണം ചെയ്യുന്ന ചടങ്ങിൽ അനുഗ്രഹ പ്രഭാഷണം നടത്തുകയായിരുന്നു സ്വാമികൾ.

സഹജീവികൾക്ക് തുണയാവുകയാണ് ഓരോരുത്തരുടെയും ജീവിത ലക്ഷ്യമെന്ന് പ്രശസ്ത ചലച്ചിത്ര താരവും തിരക്കഥാകൃത്തുമായ വിഷ്ണു ഉണ്ണികൃഷ്ണൻ. ആത്മാർത്ഥമായ പരിശ്രമം ഒരിക്കലും പരാജയമാകില്ല എന്നതിന് തൻ്റെ ജീവിതം തന്നെ ഉദാഹരണമാണ്. താത്കാലിക തിരിച്ചടികൾ കണ്ട് പിന്തിരിഞ്ഞ് പോയാൽ വിജയം നേടാനാവില്ല. തുണ ചാരിറ്റബിൾ സൊസൈറ്റി ഏറ്റെടുത്ത ദൗത്യം എല്ലാവർക്കും മാതൃകയാണെന്നും അദ്ദേഹം കൂട്ടിച്ചേർത്തു. തുണ ചാരിറ്റബിൾ സൊസൈറ്റി 1000 പേർക്ക് സൗജന്യമായി നൽകുന്ന അപകട ഇൻഷുറൻസ് വിതരണത്തിൻ്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.

സ്ത്രീകളുടെ വികസനമല്ല സ്ത്രീകൾ നയിക്കുന്ന വികസനമാണ് നരേന്ദ്ര മോദി സർക്കാർ ലക്ഷ്യമിടുന്നതെന്ന് കേന്ദ്ര വിദേശകാര്യ സഹമന്ത്രി ശ്രീ വി. മുരളീധരൻ. രാജ്യപുരോഗതിക്ക് ആവശ്യം സ്ത്രീകളുടെ പുരോഗതി ആണ്. സ്ത്രീകൾ സ്വയം പര്യാപ്തരായാൽ മാത്രമേ രാജ്യം ആത്മനിർഭർ ഭാരത് എന്ന ലക്ഷ്യം കൈവരിക്കൂ. മോദി സർക്കാർ നടപ്പിലാക്കുന്ന പദ്ധതികൾ എല്ലാം തന്നെ സ്ത്രീ ശാക്തീകരണം ലക്ഷ്യമിട്ടാണ്. രാജ്യത്തിന്റെ ഈ ലക്ഷ്യം കൈവരിക്കാൻ തുണ ചാരിറ്റബിൾ സൊസൈറ്റി നടത്തുന്ന പ്രവർത്തനനങ്ങൾ സഹായകരമാകുമെന്നും അദ്ദേഹം പറഞ്ഞു. നിർധനരായ വീട്ടമ്മമാർക്ക് തുണ ചാരിറ്റബിൾ സൊസൈറ്റി നൽകുന്ന വഴിയോരക്കടകളുടെ വിതരണം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

തുണ ചാരിറ്റബിൾ സൊസൈറ്റി നാളിതുവരെ ഏറ്റെടുത്തിട്ടുള്ളതിൽ വെച്ച് ഏറ്റവും വലിയ പദ്ധതി ഇന്ന് യാഥാർത്ഥ്യമായി. കേന്ദ്ര സർക്കാർ സ്ഥാപനമായ കൊച്ചിൻ ഷിപ്പ് യാർഡിൻ്റെ സഹകരണത്തോടെ ആലപ്പുഴയിലെ 10 അമ്മമാർക്ക് വഴിയോരക്കടകൾ വിതരണം ചെയ്തു. കേന്ദ്ര വിദേശകാര്യ സഹമന്ത്രി ശ്രീ വി മുരളീധരനാണ് ചടങ്ങ് ഉദ്ഘാടനം ചെയ്തത്. പ്രശസ്ത ചലച്ചിത്ര താരം വിഷ്ണു ഉണ്ണികൃഷ്ണൻ മുഖ്യാതിഥി ആയിരുന്നു. സൗജന്യ ഇൻഷുറൻസ് വിതരണത്തിൻ്റെ ഉദ്ഘാടനവും വിഷ്ണു നിർവഹിച്ചു.

മാതാ അമൃതാനന്ദമയി മഠത്തിലെ സംപൂജ്യ സ്വാമി വേദാമൃതാനന്ദ പുരി, സംഹതി ഇന്ത്യാ ഡയറക്ടർ റവ ഫാദർ ആൻ്റണി ജേക്കബ് എന്നിവർ അനുഗ്രഹ പ്രഭാഷണം നടത്തി. ബിജെപി ദക്ഷിണ മേഖല അധ്യക്ഷൻ ശ്രീ കെ. സോമൻ, ജില്ലാ പ്രസിഡൻ്റ് എം വി ഗോപകുമാർ, തുണ സൊസൈറ്റി പ്രസിഡൻ്റ് ജി.വിനോദ് കുമാർ, ഖജാൻജി ഹരികൃഷ്ണ ഭാരതി, ബിജെപി സംസ്ഥാന കൗൺസിൽ അംഗം ആർ. ഉണ്ണികൃഷ്ണൻ, നഗരസഭാ കൗൺസിലർ മനു ഉപേന്ദ്രൻ എന്നിവർ സംസാരിച്ചു.

ഒരു ലക്ഷം രൂപയോളമാണ് ഓരോ കടയുടെയും നിർമ്മാണ ചിലവ്. ഗ്യാസ് സ്റ്റൗ, ബാറ്ററി, ചാർജർ, വെള്ളം എടുക്കാനുള്ള സംവിധാനം, വാഷ് ബേസിൻ, വെള്ളം ടാങ്ക്, യൂണിഫോം ഇവയെല്ലാം ഉൾപ്പെടെയാണ് കട.
കണ്ടുമടുത്ത വഴിയോര കടകളിൽ നിന്നും ഏറെ വ്യത്യസ്തവും സ്ത്രീ സൗഹൃദവും ആണ് തുണയുടെ കടകൾ. ആലപ്പുഴയുടെ വഴിയോരങ്ങളിൽ ടി കമ്പനി എന്ന പേരിലായിരിക്കും ഈ കടകൾ പ്രവർത്തിക്കുന്നത്. ആലപ്പുഴ വഴി പോകുമ്പോൾ ടീ കമ്പനിയിൽ കയറാൻ മറക്കല്ലേ....

നന്ദി ശ്രീ. വി മുരളീധരൻ, തുണയോട് ചേർന്ന് നിന്നതിന്, ഞങ്ങളുടെ ക്ഷണം സ്വീകരിച്ചതിന്.

പരമാവധി ആൾക്കാർ എത്തുക

പ്രിയമുള്ളവരേ
തുണ ഏറ്റെടുത്ത ഏറ്റവും വലിയ ദൗത്യം സഫലമാവുകയാണ്. സ്ത്രീ ശാക്തീകരണം ലക്ഷ്യമാക്കി 'തുണ' ആലപ്പുഴ നിയോജക മണ്ഡലത്തിലെ നിർധന കുടുംബങ്ങൾക്ക് വഴിയോരക്കടകൾ സൗജന്യമായി നൽകുന്നു. ആദ്യ ഘട്ടം 10 കുടുംബങ്ങൾക്ക് ഇതിൻ്റെ പ്രയോജനം കിട്ടും. കണ്ടു മടുത്ത വഴിയോരക്കടകളിൽ നിന്ന് ഏറെ വ്യത്യസ്തമാണ് തുണ നൽകുന്ന കടകൾ. സ്ത്രീ സൗഹൃദമായ കടകൾ ഡിസൈനിലും വേറിട്ട് നിൽക്കുന്നു. ഉടൻ പ്രവർത്തന സജ്ജമായ കടകളാണ് നൽകുന്നത്. വൈദ്യുതി, അടുപ്പ്, പാത്രങ്ങൾ, വാഷ് ബേസിൻ, കുടിവെള്ള - മലിന ജല ടാങ്ക് എന്നിവ ഉൾപ്പടെ കടയിൽ തയ്യാറാക്കിയിട്ടുണ്ട്.

'ടീ കമ്പനി' എന്ന പേരിലാണ് തുണയുടെ കടകൾ നിങ്ങൾക്ക് കാണാനാവുക. ഒരു ലക്ഷത്തോളം രൂപയാണ് ഒരു കടയുടെ ചെലവ്. കേന്ദ്ര സർക്കാർ സ്ഥാപനമായ കൊച്ചിൻ ഷിപ്പ് യാർഡിൻ്റെ സഹായത്തോടെയാണ് പദ്ധതി നടപ്പാക്കുന്നത്.

കടകളുടെ വിതരണോദ്ഘാടനം ജൂലൈ 6 ന് രാവിലെ 10 മണിക്ക് ബഹുമാനപ്പെട്ട കേന്ദ്ര വിദേശകാര്യ സഹമന്ത്രി ശ്രീ. വി മുരളീധരൻ നിർവഹിക്കും. പ്രശസ്ത ചലച്ചിത്ര താരം പ്രിയപ്പെട്ട വിഷ്ണു ഉണ്ണികൃഷ്ണൻ മുഖ്യാതിഥി ആയിരിക്കും. ആലപ്പുഴ തത്തംപള്ളി സി.വൈ.എം.എ ഹാളിൽ ആണ് പരിപാടി. എല്ലാവരെയും ക്ഷണിക്കുന്നു.

മൂല്യങ്ങളാണ് ജീവിത വിജയം തീരുമാനിക്കുന്നത് - മധു.എസ്, നായർ ........
ഉന്നത വിദ്യാഭ്യാസമല്ല മൂല്യങ്ങളാണ് ജീവിത വിജയം തീരുമാനിക്കുന്നത് എന്ന് കൊച്ചിൻ ഷിപ്പിയാർഡ് ചെയർമാനും മാനേജിങ് ഡയറക്ടറുമായ മധു.എസ്. നായർ പറഞ്ഞു. സത്യസന്ധതയാണ് ജീവിതത്തിലെ ഏറ്റവും വലിയ കൈമുതൽ. എത്ര വലിയ വിദ്യാഭ്യാസം നേടിയാലും സത്യസന്ധത കൈവിട്ടാൽ അതുകൊണ്ട് യാതൊരുവിധ പ്രയോജനവും ഇല്ല. അതുകൊണ്ടു തന്നെ വിദ്യാഭ്യാസത്തോടൊപ്പം മൂല്യങ്ങൾ കാത്തുസൂക്ഷിക്കുവാനും കുട്ടികൾ ശ്രദ്ധിക്കണമെന്ന് അദ്ദേഹം കൂട്ടിച്ചേർത്തു.

തുണ ചാരിറ്റബിൾ സൊസൈറ്റി സംഘടിപ്പിച്ച വിജയഭേരി 2023 ആലപ്പുഴയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

പ്രസിദ്ധ ചലച്ചിത്ര താരം ശിവദ മുഖ്യ അതിഥി ആയി. രക്ഷിതാക്കളുടെ കഷ്ടപ്പാടുകളെപ്പറ്റി ബോധ്യമുള്ളവരായി കുട്ടികൾ മാറണമെന്ന് ശിവദ പറഞ്ഞു. മാതാപിതാക്കളുടെ പല സ്വപ്നങ്ങളും മാറ്റിവെച്ചാണ് അവർ കുട്ടികളുടെ നന്മയ്ക്കായി പ്രവർത്തിക്കുന്നത് , ലോകത്ത് എവിടെ പോയാലും ഇത് മറക്കരുതെന്നും ശിവദ പറഞ്ഞു .

ആരോഗ്യമേഖലയിലെ സ്തുത്യർഹമായ സേവനത്തിനുള്ള വൈദ്യ ചൂഡാമണി പുരസ്കാരം ഡോ. പി. രാജീവിന് മധു.എസ്, നായരും കാർഷിക മേഖലയിലെ പ്രവർത്തനത്തിനുള്ള കർഷക ചൂഢാമണി പുരസ്കാരം ജീമോൻ തമ്പുരാൻ പറമ്പിനു സുപ്രസിദ്ധ സിനിമാ താരം ശിവദയും നൽകി.

തുണ ചാരിറ്റബിൾ സൊസൈറ്റി എക്സിക്യൂട്ടീവ് ഡയറക്ടർ സന്ദീപ് വാചസ്പതി അധ്യക്ഷത വഹിച്ചു.

മയക്കുമരുന്നിനെതിരെയുള്ള പോരാട്ടത്തിനു ബോധവൽക്കരണ ക്ലാസുകൾ വഴി നേതൃത്വം നൽകിയ മനോജ് കൃഷ്‌ണേശ്വരി , ലോക ബോഡി ബിൽഡിംഗ് ചാമ്പ്യൻ ഷിപ്പിന് അർഹത നേടിയ ആദ്യ മലയാളി എ.കെ.അമലിനെയും ആദരിച്ചു.

തുണ ചാരിറ്റബിൾ സൊസൈറ്റി ചെയർമാൻ ജി. വിനോദ് കുമാർ , നഗര സഭ കൗൺസിലർ മനു ഉപേന്ദ്രൻ, ആർ. ഉണ്ണികൃഷ്ണൻ എന്നിവർ സംസാരിച്ചു.