COMFREL

សំណើដំឡើងប្រាក់ឈ្នួល​កម្មករកាត់ដេរនៅ​ឆ្នាំ​២០២៧ ឱ្យដល់ ២៥០,៦៦ដុល្លាររបស់សហព័ន្ធសហជីព​នៅកម្ពុជា​​មានហេតុផលត្រឹមត្រូវ​ សមស្របសម្រាប់បរិបទសេដ្ឋកិច្ចកម្ពុជាសព្វថ្ងៃ។ ​នេះ​​តាមសេចក្តីថ្លែងការណ៍របស់ អង្គការClean Clothes Campaign។ សម្រាប់បណ្តាញអង្គការក្រៅរដ្ឋាភិបាលមួយនេះ​ ​​​ប្រាក់ឈ្នួលកម្មករកាត់ដេរ​នៅកម្ពុជា​បច្ចុប្បន្នមានកម្រិតទាប និងមិនអាចឆ្លើយតបការចាយវាយប្រចាំថ្ងៃរបស់កម្មករនោះឡើយ។
ប្រភព RFI Khmer: https://rfi.my/D4Dv.g

លទ្ធផលស្ទង់មតិថវិកាបើកចំហ ឬ Open Budget Survey (OBS) ឆ្នាំ២០២៥ បង្ហាញថា កម្ពុជាទទួលបានពិន្ទុត្រឹម ២លើ១០០ សម្រាប់ការចូលរួមរបស់សាធារណជនក្នុងដំណើរការរៀបចំថវិកា។ ការវាយតម្លៃនេះ ពិនិត្យលើកម្រិតដែលរដ្ឋាភិបាលផ្តល់ឱកាសជាផ្លូវការឱ្យសាធារណជនចូលរួមនៅគ្រប់ដំណាក់កាលនៃដំណើរការថវិកា រួមមានការរៀបចំថវិកាដោយស្ថាប័នប្រតិបត្តិ ការពិនិត្យ និងអនុម័តដោយស្ថាប័ននីតិប្បញ្ញត្តិ ព្រមទាំងការត្រួតពិនិត្យដោយស្ថាប័នសវនកម្មកំពូល។​
ប្រភព WMC: https://shorturl.at/KTl8X

កម្ពុជាកំពុងរៀបចំសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។ នៅចំពោះមុខបណ្តាសហគមន៍អន្តរជាតិ លោក ហ៊ុន ម៉ាណែត​ នាយករដ្ឋមន្ត្រីកម្ពុជា បានបញ្ជាក់ជំហរជាថ្មីថា កម្ពុជាមិនមែនជាទីតាំងសម្រាប់ឲ្យឧក្រិដ្ឋជនប្រព្រឹត្តបទល្មើសឆបោកអនឡាញឡើយ។ តែទន្ទឹមនេះ លោក ហ៊ុន ម៉ាណែត បានទទួលស្គាល់ថា កម្ពុជាបានផុងខ្លួនទៅក្នុង​ឧក្រិដ្ឋកម្មឆបោកអនឡាញ ដោយសារតែកំណើនល្បែងអនឡាញ និងធុរជនដែលគ្មានភាពស្មោះត្រង់ចូលមកវិនិយោគនៅកម្ពុជា។
ប្រភព RFI Khmer: https://rfi.my/D4Pq.g

លោក រ៉ុង ឈុន ទីប្រឹក្សាគណបក្សកម្លាំងជាតិ បានដាក់ពាក្យសុំច្បាប់ទៅតុលាការកំពូលដើម្បីទៅធ្វើបុណ្យភ្ជុំបិណ្ឌនៅស្រុកកំណើតក្នុងស្រុកស្អាងខេត្តកណ្តាលនាពេលខាងមុខ។ សូមរម្លឹកជូនថា លោក រ៉ុង ឈុន ដែលគេស្គាល់ជាអ្នករិះគន់មិនសំចៃមាត់លើបញ្ហាព្រំដែនត្រូវបានតុលាការកំពូលកាត់ទោសដាក់ក្នុងពន្ធនាគាររយៈពេល៤ឆ្នាំ ដោយព្យួរទោស និងហាមដើរចេញពីរង្វង់ទីក្រុងភ្នំពេញ។
ប្រភព RFI Khmer: https://rfi.my/D4Fb.g

រាជរដ្ឋាភិបាលកម្ពុជា បានធ្វើការតវ៉ាជាផ្លូវការយ៉ាងខ្លាំងបន្ថែមទៀត ចំពោះការបន្តរំលោភបំពានជា បន្តបន្ទាប់របស់ថៃ មកលើអធិបតេយ្យ និងបូរណភាពទឹកដីរបស់កម្ពុជា តាមបណ្ដោយព្រំដែន ដែល​ចុង​ក្រោយ​នេះ​ធ្វើឡើង​តាម​រយៈ​យក​ចម្លាក់​ព្រះពុទ្ធ​ស៊ីម៉ងត៍​មកដាក់​នៅ​ភូមិសាស្ត្រ​ស្រុក​អន្លង​វែង​ ដើម្បី​បង្កើត​ស្ថានភាពថ្មី។
ប្រភព ភ្នំពេញប៉ុស្តិ៍៖ https://postkhmer.com/national/news/953465

នាយករដ្ឋមន្ត្រីថៃ លោក អនុធិន ឆានវីរៈគូន ប្រាប់អ្នកកាសែតថា ថៃបានត្រៀមរួចរាល់ដើម្បីតទល់ជាមួយកម្ពុជាលើបញ្ហាព្រំដែន បើសិនជាកម្ពុជាលើកយករឿងនេះទៅនិយាយនៅអង្គការសហប្រជាជាតិ។ លោក អនុធិន បាននិយាយដូចនេះ មុនពេលលោកធ្វើដំណើរទៅចូលរួមមហាសន្និបាតអង្គការសហប្រជាជាតិលើកទី៨១ នៅទីក្រុងញូវយ៉ក សហរដ្ឋអាមេរិក។
ប្រភព RFI Khmer: https://rfi.my/D42v.g

សហរដ្ឋអាម៉េរិកបានដាក់កម្រិតទិដ្ឋាការលើបុគ្គលចំនួន ៣២នាក់ ដែលត្រូវបានចោទប្រកាន់ថាមានជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យាដែលកំណត់គោលដៅលើជនជាតិអាម៉េរិក ដោយពួកគេភាគច្រើនមានទំនាក់ទំនងជាមួយព្រីនស៍គ្រុបដែលជា «បណ្ដាញឧក្រិដ្ឋកម្មឆ្លងដែន»។
ប្រភព Kiripost Khmer: https://shorturl.at/SoHyP

តំបន់ប្រតិបត្តិការសឹករងឧត្តរមានជ័យ អះអាងថា យោធាតាមបណ្ដាកងឯកភាព បានស្នើឱ្យយកថវិកា១២ម៉ឺនរៀល ដែលជារបបហូបប្រចាំខែ របស់យោធិនម្នាក់ ទៅបែងចែកក្នុងអាហារប្រចាំថ្ងៃវិញ។ ដូច្នេះ គ្មានការកាត់ប្រាក់ខែរបស់កងទ័ពឡើយ។
ប្រភព Thmey Thmey: https://thmeythmey.com/detail/162703

មជ្ឈមណ្ឌលពាណិជ្ជកម្មម៉ឺនជ័យ ឬ 8Park គឺជាទីតាំងរបស់ក្រុមឧក្រិដ្ឋជនឆបោកអនឡាញដ៏ធំមួយប្រចាំស្រុកកំចាយមារ ខេត្តព្រៃវែង។ តែក្រោយពីមានការបង្ក្រាបរបស់អាជ្ញាធរកម្ពុជាកាលពីខែកុម្ភៈ ឆ្នាំ ២០២៦ កន្លងទៅមក អតីតទីតាំងឆបោកដែលលាតសន្ធឹងលើផ្ទៃដីប្រមាណ ១២០ហិកតាមួយនេះប្រែជាស្ងាត់ជ្រងំ លែងមានសកម្មភាពឆបោកទៀតឡើយ។ លោក សួន សុម៉ាលីន អភិបាលខេត្តព្រៃវែងបានប្រាប់អ្នកកាសែត​នៅថ្ងៃទី២១ កញ្ញាថា អាជ្ញាធរបានដុតដៃដុតជើងយ៉ាងខ្លាំងដើម្បីបង្ក្រាបទីតាំងឆបោកដ៏ធំមួយនេះពីកណ្តាប់ដៃគ្រប់គ្រងរបស់លោក អៀង សុខលីម និងជនជាតិចិន ២នាក់ ជាមនុស្សជំនិតរបស់លោក ចេន ហ្ស៊ី។
ប្រភព RFI Khmer: https://rfi.my/D48r.g