Adithya

බැසිල් අත්අඩංගුවට ගන්නැයි අධිකරණයෙන් CIDයට නියෝගයක් !

සංචාරක ප්‍රවර්ධන කාර්යාංශයේ මුදල් අවභාවිත කිරීමේ සිද්ධියකට අදාළව හිටපු ආර්ථික සංවර්ධන අමාත්‍ය බැසිල් රාජපක්ෂ අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්‍රාත් පසන් අමරසේන අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් ඒකකයට අද (ජුනි 17) නියෝග කළේ ය.

මෙම මුදල් අවභාවිත කිරීමේ සිද්ධියට අදාල නඩුව අද අධිකරණය හමුවේ යළි කැඳවූ අවස්ථාවේදී මහේස්ත්‍රාත්වරයා මෙම නියෝගය නිකුත් කළේ ය.

මෙම සිද්ධියට අදාළව තුන්වන සැකකරු විසින් අපරාධ නඩු විධාන සංග්‍රහයේ 127 වගන්තිය යටතේ රහස් ප්‍රකාශයක් ලබා දීමට කැමැත්ත පළ කළ බව එම සැකකරු වෙනුවෙන් අධිකරණයේ පෙනී සිටි ජනාධිපති නීතීඥ කාලිංග ඉන්දතිස්ස අධිකරණයට දැනුම් දුන්නේ ය.

සංචාරක ප්‍රවර්ධන කාර්යාංශයට 2014 වර්ෂයේදී යොමු කර තිබූ රුපියල් මිලියන 7.8 ක මුදලක් එම කාර්යාංශයේ ප්‍රවර්ධන කටයුතුවලට වැය නොකර, ඌව පළාත් සභා මැතිවරණය වෙනුවෙන් ටී ෂර්ට් 12,000ක් ලබා දී රජයට පාඩු කිරීමේ සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් ඒකකය මෙම සිද්ධිය අධිකරණයට වාර්තා කර තිබිණි.

මෙම සිද්ධියට අදාළව රක්ෂිත බන්ධනාගාරගත කර සිටි එම කාර්යාංශයේ හිටපු කළමනාකාර අධ්‍යක්ෂකවරයා වන රූමි ජවුෆර් නමැත්තා රුපියල් ලක්ෂ 100 බැගින් වූ ශරීර ඇප 2ක් මත මුදා හැරීමටත් සැකකරුගේ විදෙස් ගමන් තහනම් කිරීමටත් මෙහිදී මහේස්ත්‍රාත්වරයා නියෝග කළේ ය.

මෙම සැකකරුවන්ට එරෙහිව පොදු දේපළ පනත යටතේ චෝදනා ගොනු කර ඇති බව විමර්ශන නිලධාරීන් විසින් අධිකරණයට දැනුම් දෙන ලදී.

මෙම සිද්ධියට අදාළව බී වාර්තාවේ දක්වා තිබෙන මූල්‍ය අධ්‍යක්ෂකවරයා සැකකරුවෙක් ලෙස නම් කරන්නේ ද යන්න අපරාධ පරීක්ෂණ දෙපාර්තමේන්තුවෙන් මහේස්ත්‍රාත්වරයා විමසා සිටියේ ය.

එම අවස්ථාවේදී අපරාධ පරීක්‍ෂණ දෙපාර්තමේන්තුව සඳහන් කර සිටියේ, ඒ සම්බන්ධයෙන් තවම නීතිපති උපදෙස් ලැබී නොමැති බව ය.

ඒ අනුව, මහේස්ත්‍රාත්වරයා මෙසේ දැනුම් දුන්නේ ය.

“මෙම සිද්ධියට අදාළ තුන්වැනි සැකකරු වන කළමනාකාර අධ්‍යක්ෂකවරයා සහ බී වාර්තාවේ නම්කර තිබෙන සැකකරු වන මූල්‍ය අධ්‍යක්ෂකවරයා යන දෙදෙනා සිද්ධියට අදාලව පළවැනි සහ තුන්වැනි වවුචර් අත්සන් කර ඇති බවත් නමුත් මෙම සිද්ධියට අදාලව මූල්‍ය අධ්‍යක්ෂකවරයා තවමත් අත්අඩංගුවට ගෙන නොමැති බැවින් තුන්වැනි සැකකරුට ඇප නියම කරනවා.”

ඒ අනුව, මෙම නඩුවේ තුන්වැනි සැකකරු වන කළමනාකාර අධ්‍යක්ෂකවරයා රූමි ජවුෆර් නැමැත්තාට ඇප නියම විය.

සිද්ධියට අදාල නඩුව ලබන ඔක්තෝබර් 14 යළි කැදවීමට නියමිත ය.

සිද්ධියේ දෙවන සැකකරු වන එම කාර්යාංශයේ හිටපු සභාපතිවරයා වූ භාෂ්වර ගුණවර්ධන නමැත්තා මේ වන වට ඇප මත මුදා හැර තිබේ.

පුවත් මූලාශ්‍රය - mawbima.lk

යෝෂිත රාජපක්ෂ අත්අඩංගුවට !

හිටපු ජනපති මහින්ද රාජපක්ෂගේ පුත් යෝෂිත රාජපක්ෂ අල්ලස් කොමිෂම විසින් අද (17) අත්අඩංගුවට ගෙන තිබෙනවා.

ඒ ප්‍රකාශයක් ලබා දීම සඳහා එම කොමිසමට පැමිණි අවස්ථාවේදීයි.

අද (17) උදෑසන ඒ මහතා ශ්‍රී ලංකා නාවික හමුදාවට සහ බ්‍රිතාන්‍ය නාවික හමුදා ඇකඩමියට සම්බන්ධ වීමට අදාළව කෙරෙන විමර්ශනයකට අළාව අල්ලස් කොමිසම කළ දැනුම්දීමකට අනුව අල්ලස් කොමිසම හමුවේ පෙනී සිටියේය.

ඉන් අනතුරුව ඒ මහතාව මෙලෙස අත්අඩංගුවට‌ ගෙන තිබේ.

තෙල් මිල තවත් පහළට !

මාර්තු මාසයේ මුල් භාගයෙන් පසු ලෝක වෙළදපොළේ බොරතෙල් මිලෙහි පහළම අගය අද (17) වාර්තා කර ඇති බවයි විදෙස් මාධ්‍ය වාර්තා කරනවා.

ඒ අනුව බ්‍රෙන්ට් වර්ගයේ තෙල් බැරලයක මිල අද දිනයේ සදහන් වූයේ ඇමෙරිකානු ඩොලර් 78.64ක් ලෙසයි. එමෙන්ම WTI වර්ගයේ තෙල් බැරලයක මිල සටහන් වූයේ ඇමෙරිකානු ඩොලර් 75.63ක් ලෙසයි.

නාවික හමුදා ඇකඩමියට සම්බන්ධ වීමට අදාළව කෙරෙන විමර්ශනයකට යෝෂිත අල්ලස් කොමිසම වෙත !

හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මහතා අද (17) උදෑසන අල්ලස් හෝ දූෂණ විමර්ශන කොමිෂන් සභාව වෙත පැමිණ තිබෙනවා.

ඒ ශ්‍රී ලංකා නාවික හමුදාවට සහ බ්‍රිතාන්‍ය නාවික හමුදා ඇකඩමියට සම්බන්ධ වීමට අදාළව කෙරෙන විමර්ශනයකට ආළව අල්ලස් කොමිසම කළ දැනුම්දීමකට අනුවයි.

2026 ජගත් පරිසර සතිය නිමිත්තෙන් පෞද්ගලික රබර් වගා බිමක් වනාන්තරයක් කල අපූර්ව පුවතක් !

කළුතර දිස්ත්‍රික්කයේ වලල්ලාවිට ප්‍රාදේශීය ලේකම් කොට්ඨාසයට අයත් 849 D බෝගොඩකන්ද ග්‍රාමසේවා වසම තුල පිහිටා ඇති යෝජිත නාවලකන්ද පරිසර සංවේදී කලාපය ලංකාවේ ඉහලම ජෛව විවිධත්වයක් දක්නට ලැබෙන පහතරට තෙත් කලාපය පෝශණය කරන කඳුකර වනාන්තර පද්ධති කිහිපයකින්ම ආවරණය වී ඇති මානව ජනාවාස සහ වගාබිම් සහිත සුවිශේෂි පරිසර පද්ධතියක් වේ.

මෙම සුවිශේෂී පරිසර පද්ධතිය තුල වෙන් වෙන්ව පවතින කුඩා ප්‍රමාණයේ කඳුකර වනාන්තර බිම් කොටස් හතක් මූලික කරගනිමින් 2014 මාර්තු මස 26 දිනැති අංක 1855/25 දරණ ගැසට් පත්‍රය මගින් වන සංරක්ෂණ දෙපාර්තමේන්තුවට අයත් මීගහතැන්න සංරක්ෂිත වනාන්තරය නමින් ප්‍රකාශයට පත්කර ඇත. මෙම පරිසර කලාපය ඉහල ශාක සහ සත්ත්ව විවිධත්වයකින් සමන්විත වන අතර මෙරටට ආවේණික සත්ත්ව හා ශාක විශේෂ විශාල සංඛ්‍යාවක් වාර්තා වී ඇත.

වන සංරක්ෂණ දෙපාර්තමේන්තුව විසින් සංරක්ෂිත වනාන්තර ලෙස ගැසට් කර ඇති වනාන්තර කොටස් මානව ජනාවාස, වගාබිම් සහ අනෙකුත් භූමි භාවිතයන් හේතුවෙන් එකිනෙකින් වෙන්ව පවතින බැවින්, මෙම පරිසර පද්ධතියේ ස්වාභාවික පාරිසරික සම්බන්ධතාව සැලකිය යුතු ලෙස බිඳ වැටී ඇත. එහි ප්‍රතිඵලයක් ලෙස පාරිසරික ක්‍රියාවලීන්ට බාධා එල්ල වීම හේතුවෙන් පරිසර පද්ධතියේ ස්ථායීතාව සහ ඔරොත්තු දීමේ හැකියාව ක්‍රමයෙන් දුර්වල වෙමින් පවතී. වර්තමානයේ මෙම කලාපය අතීතය සමඟ සසඳන විට කෙටි වියළි කාලසීමාවන් තුළ පවා ජල මූලාශ්‍ර වේගයෙන් සිඳී යාම, වන සතුන්ගේ වාසස්ථාන හා ආහාර සම්පත් සීමා වීම හේතුවෙන් ඔවුන් වගාබිම් හා ජනාවාස වෙත වැඩි වශයෙන් පිවිසීම වැනි තත්ත්වයන් නිරීක්ෂණය කළ හැකි අතර, ඒවා පරිසර පද්ධතියේ ස්වාභාවික සම්බන්ධතාව බිඳ වැටීමේ ප්‍රතිවිපාක ලෙස සැලකිය හැකිය.

මෙම කරුණු අවබෝධ වීම නිසාවෙන් නාවලකන්ද සොබා රක්‍ෂණ සංසදයේ සාමාජීකයන් විසින් යෝජිත නාවලකන්ද පරිසර සංවේදී කලාපය තුල විවිධ වූ සංරක්ෂණ ව්‍යාපෘති ක්‍රියාත්මක කරමින් මෙම සුවිශේෂී පරිසර කලාපය සංරක්ෂණය කර රැකගැනීම සඳහා කටයුතු කරමින් සිටී.

නාවලකන්ද සොබා රක්‍ෂණ සංසදයේ සාමාජීකයෙකු වන බලගල ගම්මානයේ පදිංචි චන්දිමාල් ඉන්දික මහතා විසින් මෙම යෝජිත නාවලකන්ද පරිසර සංවේදී කලාපයයේ පාරිසරික සමතුලිතතාවය ක්‍රමක් ක්‍රමයෙන් බිඳ වැටීම ආරම්භ වී ඇති බව වටහා ගනිමින් එය වලක්වා ගැනීම සඳහා ඔහුට හැකි අයුරින් දායකත්වය දැක්වීමට ඔහු ජීවිකාව ගෙන යාම සඳහා ආදායමක් ලබා ගත් පාරම්පරික උරුමයෙන් ඔහුට ලැබුන ඔහුගේ රබර් ඉඩම තවදුරටත් වානිජව සංවර්ධනය නොකර රක්ෂිත වනාන්තරයක් බවට පත්කිරීමට ස්ව කැමැත්ත පල කරන ලදී.

ඔහුගේ එම රබර් වගාකර ඇති ඉඩම දැනට වන සංරක්ෂණ දෙපාර්තමේන්තුවට අයත් වනාන්තර කැබලි දෙකක් වන මීගහතැන්න සංරක්ෂිත වනාන්තරයේ බලගල්ලේ කන්ද සහ බොල්හේන් කන්ද යන වනාන්තර කොටස් දෙකට මැදිව පිහිටා ඇත. මෙම රබර් වගා ඉඩම වනාන්තරයක් ලෙස පවත්වා ගැනීමෙන් මෙම වනාන්තර කැබලි දෙක යා කිරීමටද හැකියාව ඇත. එයට අමතර පසුගිය දිනක නාවලකන්ද වනාන්තර පද්ධතියෙන් සොයාගත් හිනිදුමට පමණක් ස්ථානීය අවේනිකව පැවති ශාක විශේෂයක් වන Henckelia wijesundarae ශාක විශේෂය සහ සජීවී නිදර්ශක සොයා ගැනීමට නොහැකිව තිබූ Strobilanthes rhytisperma යන ශාක විශේෂ දෙකම මෙම භූමිය තුලින් හමුවේ එමනිසා මෙම භූමිය රක්ෂිත ස්භාවයෙන් පවත්වා ගැනීම එම ශාක විශේෂ සංරක්ෂණයටද දායක වේ. තවද බෙන්තර ගංගාව පෝශණය කරනා බලගල දොලෙහි ප්‍රධානතම ජල පෝශක කලාපය තුල පිහිටි භූමියක් නිසාවෙන් මෙම භූමිය රක්ෂිත ස්භාවයෙන් පවත්වා ගැනීම ජලපෝශක කලාපය ස්ථායිව පවත්වා ගැනීමටද දායක වේ.

චන්දිමාල් ඉන්දික මහතා විසින් රක්ෂිත වනාන්තරය බවට පත් කිරීමට ලබා දුන් ඔහුගේ රබර් ඉඩම නාවලකන්ද සොබා රක්‍ෂණ සංසදය විසින් ඩිල්මා සංරක්ෂණ ආයතනයේ ඇන්දාන ජෛව විවිධත්ව මංපෙත (Endane Biodiversity Corridor) ව්‍යාපෘතිය යටතේ ක්‍රියාත්මක වන තර්ජිත ශාක සංරක්ෂණ වැඩසටහනේ සහයෝගයද ඇතිව විද්‍යාත්මක ක්‍රමවේදයන්ට අනුකූලව රක්ෂිත වනාන්තරයක් බවට පත් කිරීමේ ආරම්භක වැඩසටහන ලෙස ප්‍රදේශයේ ජෛව විවිධත්වයට ගැලපෙන්නා වූ ආවේණික සහ දුර්ලභ ශාක විශේෂ වන බෙරලිය, දොරණ, කොරකහ, මැන්ඩෝරා, කළුවර, දුන්, මොර ඇතුළු ශාක විශේෂයන්ට අයත් පැල 250ක් රෝපණය කිරීමේ වැඩසටහනක් වර්ෂ 2026 ජගත් පරිසර සතියට සමගාමීව 2026.06.12 වන දින ක්‍රියාත්ම කරන ලදී.

වලල්ලාවිට ප්‍රාදේශීය සභා සභාපති සුනිල් අබේසිරි මහතාගේ ප්‍රධානත්වයෙන් ක්‍රියාත්මක වූ මෙම පැල සිටුවීමේ වැඩසටහන සදහා වලල්ලාවිට ප්‍රාදේශීය ලේකම් කාර්යාලයේ පරිසර නිලධාරිනී නිසංසලා සඳරේකා මහත්මිය, 849 D බෝගොඩකන්ද ග්‍රාමසේවා වසමේ ග්‍රාම නිලධාරී හසිත තෙන්නකෝන් මහතා ඇතුළු රාජ්‍ය නිලදාරීන් සහ ඩිල්මා සංරක්ෂණ ආයතනයේ ඇන්දාන ජෛව විවිධත්ව මංපෙත ව්‍යාපෘතියේ අමිල පෙරේරා මහතා සහ රුවනි ජයසූරිය මහත්මිය, නාවලකන්ද සොබා රක්‍ෂණ සංසදයේ සාමාජිකයන් ඇතුළු ගම්වාසීන් සහභාගී විය.

වර්තමානයේදී බොහෝ පුද්ගලයන් තම පෞද්ගලික අවශ්‍යතා සහ ආර්ථික වාසි වෙනුවෙන් වනාන්තර හා ස්වාභාවික පරිසරය විනාශ කරමින් කටයුතු කරන පසුබිමක, තම ජීවනෝපාය සඳහා දීර්ඝ කාලයක් දායක වූ රබර් වගා ඉඩමක් ස්වේච්ඡාවෙන් රක්ෂිත වනාන්තරයක් බවට පත් කරමින්, දැනට වෙන්ව පවතින සංරක්ෂිත වනාන්තර කොටස් දෙකක් යා කිරීමට චන්දිමාල් ඉන්දික මහතා ගෙන ඇති මෙම තීරණය මෙම අවස්ථාවට සහභාගී වූ සියලු දෙනාගේ මහත් ඇගයීමට ලක්විය. ස්වකීය ආර්ථික ප්‍රතිලාභවලට වඩා අනාගත පරපුර වෙනුවෙන් පරිසර සංරක්ෂණයට ප්‍රමුඛත්වය ලබාදෙමින් ගෙන ඇති මෙම පියවර, පෞද්ගලික ඉඩම් භාවිතය හරහාද පරිසර සංරක්ෂණයට දායක විය හැකි බවට කදිම ආදර්ශයක් ලෙස ද සැලකේ.

නාවලකන්ද සොබා රක්ෂණ සංසදය විසින් මෙම භූමිය රක්ෂිත වනාන්තරයක් බවට පත් කරමින් යෝජිත නාවලකන්ද පරිසර සංවේදී කලාපය සංරක්ෂණය කර රැකගැනීම සඳහා ඉදිරියටත් කටයුතු කරමින් සිටී.

පාසල් වෑන් රථයක් සහ බස් රථයක් ගැටෙයි – සිසුන් රැසක් රෝහලේ !

මහනුවර – යාපනය A-9 මාර්ගයේ කටුගස්තොට, කලුගල ප්‍රදේශයේදී අද (15) පස්වරු 2ට පමණ පාසල් වෑන් රථයක් හා පෞද්ගලික බස් රථයක් මුහුණට මුහුණ ගැටී තිබෙනවා.

අනතුරින් පාසල් සිසු සිසුවියන් 15 දෙනෙකු හා වෑන් රථයේ රියදුරු තුවාල ලබා කටුගස්තොට ප්‍රාදේශීය රෝහලට හා මහනුවර ජාතික රෝහලට ඇතුළත් කළ බවයි පොලීසිය පවසන්නේ.

පෞද්ගලික බස් රථය මහනුවර දෙසටත් පාසැල් වෑන් රථය ප්‍රතිවිරුද්ධ දෙසටත් ගමන් කරමින් සිට තිබෙනවා.

සිද්ධිය සම්බන්ධයෙන් කටුගස්තොට පොලීසිය වැඩිදුර පරීක්ෂණ පවත්වනු ලබයි.

අලුත උපන් වන අලි පැංචෙක් ජීවිතක්ෂයට 🐘😥

අද රාත්‍රිය සමස්ත ලෝකයටම අතිශය තීරණාත්මක රාත්‍රියක් !

අද රාත්‍රියේ ඉරානයට දැවැන්ත ප්‍රහාරයක් එල්ල කරනවා කියලා අමරිකානු ජනාධිපතිවරයා මීට ස්වල්ප වෙලාවකට කලින් නිවේදනය කරා. ඉරානයේ කාර්ග් දූපත ඇතුළු ප්‍රධාන තෙල් මධ්‍යස්ථාන තම හමුදාව අත්පත් කර ගන්නවා කියලා මේ වෙද්දි නිවේදනය කරලා තියෙනවා.මේක ඉතා දැවැන්ත ප්‍රහාරයක් වේව් කියලා ඔහු සදහන් කරනවා.