Colombo Urban Digests

ඉන්දියාවේ අගමදාබාත් 2036 ඔලිම්පික් සිහිනය.

​2036 ගිම්හාන ඔලිම්පික් උළෙලේ සත්කාරකත්වය දිනා ගැනීම සඳහා ලෝකයේ ප්‍රධාන රටවල් සහ නගර අතර දැවැන්ත තරගයක් නිර්මාණය වී ඇති අතර, ඉන්දියාවේ ගුජරාට් ප්‍රාන්තයේ අගමදාබාත් සහ ගාන්ධිනගර් නගර මුල් කරගත් සූදානම සඳහා ඇස්තමේන්තුගත අයවැය ඉන්දියානු රුපියල් කෝටි 34,700 සිට 64,000 දක්වා (ඇමරිකානු ඩොලර් බිලියන 7.5ක් පමණ) අගයක් ගනී. නරේන්ද්‍ර මෝදි ක්‍රීඩාංගණය ප්‍රධාන මධ්‍යස්ථානය ලෙස යොදාගනිමින් ඉන්දියාව ඉදිරිපත් වී සිටින අතර, 2029 වසරේ පැවැත්වෙන ලෝක පොලිස් සහ ගිනි නිවන ක්‍රීඩා උළෙල (World Police and Fire Games) මෙන්ම ඉදිරි පොදුරාජ්‍ය මණ්ඩලීය ක්‍රීඩා උළෙල වැනි ප්‍රධාන ජාත්‍යන්තර තරගාවලි රැසක් අගමදාබාත් හිදී සංවිධානය කිරීමට නියමිත වීම හරහා ඔලිම්පික් සත්කාරකත්වය සඳහා අවශ්‍ය පූර්ව සූදානම පෙන්නුම් කරයි.

මේ අතර, 2022 පාපන්දු ලෝක කුසලාන අත්දැකීම් සහිත කටාර්හි දෝහා නගරය, තුර්කියේ ඉස්තාන්බුල්, ඉන්දුනීසියාවේ නුසන්ත්‍රා සහ චිලී හි සැන්ටියාගෝ වැනි ප්‍රධාන නගරද මෙම සත්කාරක සටනේ දැඩි පෙරමුණේ සිටී. ජාත්‍යන්තර ඔලිම්පික් කමිටුව (IOC) විසින් 2036 සත්කාරක නගරය තෝරාගැනීමේ අවසන් තීරණය 2029 වසරේදී නිල වශයෙන් ප්‍රකාශයට පත් කිරීමට නියමිත පසුබිමක, දකුණු ආසියානු කලාපයට ප්‍රථම වතාවට ඔලිම්පික් සත්කාරකත්වය රැගෙන ඒමේ අරමුණින් ඉන්දියාව බිලියන ගණනක ආයෝජන සමඟින් තම යටිතල පහසුකම් සංවර්ධනය කරමින් සිටී.

​

සියවසකට වරක් ශ්‍රී ලංකාවෙන් පහළ වන අතිවිශිෂ්ට හෙල්ල විසි කිරීමේ ජාතික ශූරයෙකු වන රුමේශ් තරංග , මෑතකදී ජාත්‍යන්තර තරගාවලි සහ ලෝක මලල ක්‍රීඩා ශූරතා නියෝජනය කරමින් ලබාගත් විශිෂ්ට ජයග්‍රහණ සහ වාර්තාගත දස්කම් හේතුවෙන් මේ වන විට ලෝක මට්ටමේ තරු ක්‍රීඩකයෙකු බවට පත්ව අවසන් ය. කෙසේ වෙතත්, හංගේරියාවේ පැවති තරගාවලියකින් පසු දිවයිනට නැවත පැමිණෙමින් සිටියදී, ඔහු ගමන් ගත් ටර්කිෂ් එයාර්ලයින්ස් (Turkish Airlines) ගුවන් යානයේ නොසැලකිලිමත් භාණ්ඩ හැසිරවීම නිසා ඔහුගේ වටිනා තරගකාරී හෙල්ල දැඩි ලෙස හානි වී බිඳී යාම ලෝක ක්‍රීඩා පිටියේ දැඩි කතාබහකට ලක් විය. මෙම අසාධාරණය ලෝකයේ ප්‍රධාන පෙළේ සියලුම මාධ්‍ය සහ සමාජ මාධ්‍ය දැඩි ලෙස හෙළා දකිමින් වාර්තා කිරීමත් සමඟ ඔහුගේ නම ජාත්‍යන්තර මට්ටමින් වඩාත් කතාබහට ලක් වි මේ වන විටත් ලෝක මට්ටමේ තරුවක් වී අවසන්ය.

ශ්‍රී ලංකාවේ ධජය යටතේ පියාසර කිරීමට එන අලුත්ම ගුවන් සේවය 'OCERA' .

"Ocean Era" සංකල්පයෙන් බිඳී ආ OCERA, ඉන්දියාව, මැදපෙරදිග සහ අසියානු කලාපය ශ්‍රී ලංකාව සමඟ යා කිරීමට අපේක්ෂා කරන අතර, ගුවන් සේවා ක්ෂේත්‍රයේ අත්දැකීම් ඇති ප්‍රධාන විධායක නිලධාරිනී ඉන්දියානු ජාතික රීනා අබ්දුල්රහ්මාන් (Reena Abdulrahman) යටතේ ක්‍රියාත්මක වන මෙම ව්‍යාපෘතියේ මූලික කටයුතු සම්පූර්ණයෙන්ම නිමකර ඇති අතර. කොළඹ ප්‍රධාන මධ්‍යස්ථානය කරගනිමින් චෙන්නායි, කොචි, යාපනය, ක්වාලාලම්පූර්, මාලේ සහ රියාද් ඇතුළු කලාපීය ගමනාන්ත 20 කට අධික සංඛ්‍යාවක් වෙත ගමන් කිරීමට නියමිත අතර, ඉන්ධන කාර්යක්ෂමතාව ඉහළ නැංවීම සඳහා එයාර්බස් ඒ220 වැනි නවීනතම ගුවන් යානා යොදා ගනී. 2027 වසර මුල් භාගයේදී පළමු ගුවන් ගමන සිදු කරනු ඇත.

මෝටර් රථ වෙළඳපොළේ පෙරළියක් කළ BYD (Build Your Dreams) සමාගම, දැන් විදුලි බස් රථ සහ භාණ්ඩ ප්‍රවාහන ට්‍රක් රථ වැනි වාණිජ බර වාහන අංශයෙන්ද ගෝලීය වශයෙන් දැවැන්ත ආධිපත්‍යයක් ගොඩනඟමින් සිටී. මෙම වසරේ මුල් මාස 8 තුළ වාණිජ වාහන 46,184ක් අලෙවි කරමින් 21.3%ක සුවිශේෂී වර්ධනයක් වාර්තා කර ඇති ඔවුන්, යුරෝපා සංගමයේ විදුලි බස් වෙළඳපොළ තුළ 11.2%ක මෙන්ම යුරෝපය පුරා බස් රථ 5,000කට අධික සංඛ්‍යාවක් ක්‍රියාත්මක කරමින් තම බලය තහවුරු කර ඇත. දකුණු ඇමරිකාව වැනි කලාපවල සමහර නගරවල විදුලි බස් වෙළඳපොළෙන් 99%ක දැවැන්ත කොටසක් හිමිකර ගැනීමට ද BYD සමත්ව තිබේ.

​සාම්ප්‍රදායික ඩීසල් වාහන වෙනුවට BYD විදුලි බර වාහන භාවිත කිරීම හරහා ව්‍යාපාරිකයන්ට මෙහෙයුම් සහ ඉන්ධන පිරිවැය 30% සිට 40% දක්වා ප්‍රමාණයකින් විශාල ලෙස අඩු කර ගැනීමට හැකි වී ඇති අතර, නවීන Blade Battery තාක්ෂණය නිසා වාහන නඩත්තු වියදම් සහ අක්‍රිය කාලය ද අවම වේ. ලෝකයේ කාබන් ලකුණ (Carbon Footprint) අඩු කරමින් හරිත ප්‍රවාහන විප්ලවයකට මගපෙන්වන මෙම නවීන තාක්ෂණය, ඉදිරියේදී මෙරට ප්‍රවාහන ක්ෂේත්‍රයට ද විශාල වාසිදායක වෙනසක් ගෙන එනු ඇතැයි අපේක්ෂා කෙරේ.

​

ගෝලීය විදුලි වාහන වෙළඳපොළට අලුතෙන්ම එක්වෙමින් ටොයෝටා හි අලුත්ම Toyota bZ මාලාව මේ වන විට අලෙවි වාර්තා පිහිටුවමින් චීන EV රථ සමඟ කරට කර සටනක පෙරමුණ ගෙන සිටියි.

වැඩිම ඉල්ලුමක් සහිත ​Toyota bZ මාදිලිය එක් ආරෝපණයකින් සැතපුම් 314ක ධාවන පරාසයක් සහ $34,900ක ආකර්ෂණීය ආරම්භක මිලකින් යුත් මෙම රථය, ඇමරිකානු වෙළඳපොළ තුළ පමණක් ඒකක 22,500කට වඩා අලෙවි වෙමින්, සමාගමේ ප්‍රසිද්ධ Land Cruiser සහ Sequoia වැනි දැවැන්තයන්ද අභිබවා යමින් විකුණුම් වාර්තා පිහිටුවා ඇත. අලුත් කරන ලද බැටරි තාක්ෂණය, වේගවත් ආරෝපණ පහසුකම් මෙන්ම ලොව පුරා ටොයෝටා සතු අසමසම විශ්වසනීයත්වය නිසා චීන EV රථවලටත් වඩා පාරිභෝගිකයන් මේ සඳහා වැඩි නැඹුරුවක් දැක්වීමට පටන් ගෙන ඇති බවක් පෙනේ.

​

මෙගාවොට් 350 ක 'සහස්ධනවි' විදුලි බලාගාර ව්‍යාපෘතිය සමඟ කෙරවලපිටිය මෙරට ප්‍රධානම බලශක්ති මධ්‍යස්ථානය බවට පත්වෙයි!

​ශ්‍රී ලංකාවේ බලශක්ති ක්ෂේත්‍රයේ තවත් සුවිශේෂී සන්ධිස්ථානයක් සනිටුහන් කරමින්, කෙරවලපිටිය කර්මාන්ත කලාපයේ මෙගාවොට් 350ක ඒකාබද්ධ චක්‍රීය විදුලි බලාගාරයක් (Combined Cycle Power Plant) ඉදි කිරීම සඳහා ශ්‍රී ලංකා ආයෝජන මණ්ඩලය (BOI) සහ සහස්ධනවි (Sahasdhanavi Ltd) සමාගම අතර ඩොලර් මිලියන 291.19ක සැලකිය යුතු විශාල ආයෝජන මුදලක් සහිත ගිවිසුම පසුගිය දින අත්සන් කරන ලදී.

​BOOT ක්‍රමවේදය යටතේ මාස 42ක් ඇතුළත නිම කිරීමට අපේක්ෂිත මෙම ව්‍යාපෘතිය අදියර දෙකක් යටතේ ක්‍රියාත්මක වන අතර, ආරම්භයේදී ඩීසල් මඟින් ක්‍රියාත්මක වුවද ඉදිරියේදී පිරිසිදු ද්‍රවීකරණය කරන ලද ස්වාභාවික වායු (RLNG) වෙත සම්පූර්ණයෙන්ම පරිවර්තනය කෙරේ.
​ව්‍යාපෘතිය පූර්ණ ධාරිතාවෙන් ක්‍රියාත්මක වන විට නව රැකියා අවස්ථා 1,147ක් බිහිවන අතර, දැනට පවතින 'සොබධනවි' (MW 350) සහ 'යුගධනවි' (MW 300) බලාගාර සමඟ මෙම අලුත් 'සහස්ධනවි' (MW 350) බලාගාරයත් එක්වීමෙන් කෙරවලපිටිය බලශක්ති මධ්‍යස්ථානයේ සමස්ත ධාරිතාව මෙගාවොට් 1,000ක (1 GW) සීමාව ඉක්මවා යයි. ඒ අනුව තනි බලාගාරයක් ලෙස නොරොච්චෝලේ විශාල වුවත්, කෙරවලපිටිය සමස්ත මධ්‍යස්ථානයක් ලෙස මෙරට ප්‍රධානම බලශක්ති මර්ස්ථානය බවට පත්වෙමින් බලශක්තියෙන් ස්වයංපෝෂිත ශ්‍රී ලංකාවක් කරා රැගෙන යනු ඇත.

​

වසර 38කට පසු සිදු වූ ඉන්දීය ආරක්ෂක අමාත්‍ය රාජ්නාත් සිංගේ ශ්‍රී ලංකා සංචාරය සහ ඊට සමගාමීව කොළඹ වරායට පැමිණි ඉන්දියාවේ අති නවීන සතුරු රේඩාර්වලට හසු නොවන (Stealth) තාක්ෂණයෙන් යුත් 'INS Udaygiri' (අයි.එන්.එස්. උදයගිරි) යුධ නැව, කලාපීය භූ-දේශපාලනික ක්‍රීඩාවේ අතිශය තීරණාත්මක සංදිස්ථානයක් සනිටුහන් කරයි. මීට පෙර මෙරටට එවැනි ඉන්දීය ආරක්ෂක ප්‍රධානියෙක් පැමිණ තිබුණේ 1988 වසරේ K.C. Pant මහතා විසිනි. සාමාන්‍යයෙන් ඉන්දීය ආරක්ෂක අමාත්‍යවරයා වෙනත් රටක නිල සංචාරයක් කිරීම ඉතා විරල අවස්ථාවක් වේ. මෙම ඓතිහාසික සංචාරයේ කේන්ද්‍රස්ථානයක් බවට පත්ව ඇති 'INS Udaygiri' නැවේ පැමිණීම හුදෙක් සාමාන්‍ය ද්විපාර්ශ්වික මිත්‍රත්ව සංචාරයක් හෝ නාවික නැවැත්වීමක් නොවේ; එය ඉන්දු-පැසිෆික් කලාපයේ චීන බලපෑම මැඩපැවැත්වීම සඳහා සීග්‍ර ආර්ථිකයක් සහ බලයක් නතුකර ගනිමින් යන ඉන්දියාව සිය 'MAHASAGAR' දැක්ම හරහා ශ්‍රී ලංකාවේ ආරක්ෂක යාන්ත්‍රණය තම උපායමාර්ගික ග්‍රහණයට නතු කරගැනීමේ උවමනාව නිරූපණයක් බව පැහැදිලිය.

රෙඩාර් වලට හසු නොවන​ ඉන්දියාවේ දේශීයව නිෂ්පාදිත මෙම ක්ෂණික ප්‍රහාරක නැව (Guided-missile Frigate), සුපර්සොනික් 'බ්‍රමෝස්' (BrahMos) කෲස් මිසයිල, ගුවන් ප්‍රහාර මැඩවත්වන මිසයිල පද්ධති සහ අතිසංවේදී MF-STAR AESA රේඩාර්වලින් සමන්විතය. මෙම අති නවීන නැව කොළඹට පැමිණීමත් සමඟ, ශ්‍රී ලංකා නාවික හා ගුවන් හමුදාවල භාවිත වන 'Indra MK-2' රේඩාර් උපකරණ සහ 'සයුර' නෞකාවට අවශ්‍ය අමතර කොටස් ලබාදීම සිදුවිය විශේෂයෙන්ම, මෙම නැවේ අණදෙන නිලධාරියා ලෙස කටයුතු කරන්නේ මීට පෙර කොළඹ ඉන්දීය මහකොමසාරිස් කාර්යාලයේ ආරක්ෂක උපදේශකවරයා ලෙස සේවය කළ කැප්ටන් විකාස් සූද් (Captain Vikas Sood) වීම සුවිශේෂී වේ.

​චීනය සහ ඉන්දියාව අතර උග්‍ර වන මෙම බල අරගල උගුලේ සිරවී සිටින ශ්‍රී ලංකාවට, 'INS Udaygiri' වැනි අති නවීන යුධ නෞකා මෙරටට පැමිණීම සහ ආරක්ෂක ගිවිසුම් හරහා තම ස්වෛරීභාවය සහ ජාතික ආරක්ෂාව පරදුවට තැබීමෙන් තොරව මෙම කලාපීය දාදු කැටය සාර්ථකව ක්‍රීඩා කළ හැකි වේවිද?.

​

ඉන්දියාවේ විදේශ සංචිත ප්‍රමාණය (Forex Reserves) ඩොලර් බිලියන 729.33ක් දක්වා ඉහළ යමින් ඓතිහාසික වාර්තාවක් පිහිටුවා ඇත. එක් සතියකදී ඩොලර් බිලියන 12.42ක දැවැන්ත වර්ධනයක් පෙන්නුම් කර ඇති මෙම සංචිත ලෙස විදේශ මුදල් වත්කම් (FCA) ඩොලර් බිලියන 591.33ක්, රන් සංචිත ඩොලර් බිලියන 114.21ක්, විශේෂ ගැනුම් හිමිකම් (SDRs) ඩොලර් බිලියන 18.85ක් සහ IMF සංචිත ඩොලර් බිලියන 4.92ක් ඇතුළත් වේ.

​ගෝලීය වශයෙන් චීනය (ඩොලර් ට්‍රිලියන 3.4), ජපානය (ඩොලර් ට්‍රිලියන 1.4), ස්විට්සර්ලන්තය (ඩොලර් බිලියන 910) සහ රුසියාවට (ඩොලර් බිලියන 759) පසුව ලැයිස්තුවේ පස්වන ස්ථානය හිමිකරගෙන සිටින ඉන්දියාව, මේ වන විට ඉදිරියෙන් සිටි තායිවානය ($602 bn) සහ සෞදි අරාබිය ($495 bn) අභිබවා ගොස් ඇත. ඉන්දීය මහ බැංකු අධ්‍යක්ෂ සංජේ මල්හෝත්‍රා සහ මුදල් ඇමති නිර්මලා සීතාමන්ගේ මූල්‍ය මෙහෙයවීම සහ ප්‍රතිපත්ති යටතේ මෙම ජයග්‍රහණය අත්කර ගෙන තිබේ.

ශ්‍රී ලංකාව දැඩි ආර්ථික අර්බුදයකට මුහුණ දුන් අවස්ථාවේදී, ඉන්දියාවේ සාර්ථකම මුදල් ඇමතිවරයෙක් ලෙස සැලකෙන නිර්මලා සීතාමන්ගේ සහභාගීත්වය සහ ඍජු මඟපෙන්වීම යටතේ ඩොලර් බිලියන 4කට ආසන්න (ඇමරිකානු ඩොලර් බිලියන 4ක) දැවැන්ත මූල්‍ය ආධාර පැකේජයක් සහ ණය ප්‍රතිව්‍යුහ ගතකරණය සඳහා සහාය දෙමින් ශ්‍රී ලංකාවට පෞද්ගලිකව මැදිහත් වෙමින් උදව් කරන ලදී.

​

ජෝන් කීල්ස් ප්‍රොපර්ටිස් (John Keells Properties) වෙතින් කොළඹ 02, වොක්ෂෝ වීදියේ ඉදිකරන "Vauxhall DSTRCT" සුපිරි නිවාස ව්‍යාපෘතිය. මහල් 60 කින් සමන්විත මෙම අති දැවැන්ත ව්‍යාපෘතිය,එළිදක්වා ඉදිකිරීමටත් පෙර මාස තුනක් වැනි කෙටි කාලයක් තුළ මහල් නිවාස 300 කට අධික ප්‍රමාණයක් අළෙවි කරමින් ශ්‍රී ලංකා රියල් එස්ටේට් ඉතිහාසයේ නව සටහනක් තබා තිබෙනවා.

කොළඹ ප්‍රධාන ව්‍යාපාරික හා ජීවන රටා මධ්‍යස්ථාන වෙත පහසුවෙන් ළඟාවිය හැකි පරිදි පිහිටා ඇති 1, 2, 3 සහ 4 සහිත කාමරවලින් සමන්විත සුපිරි නිවාස රැසක් මෙහි අන්තර්ගත වේ. ස්මාර්ට් නිවාස තාක්ෂණය, විවේකී අවකාශයන් සහ ඉහළම මට්ටමේ ජීවන රටා පහසුකම්වලින් පූර්ණ මෙම ව්‍යාපෘතිය සඳහා දේශීය හා විදේශීය ගැනුම්කරුවන්ගෙන් ලැබී ඇති ඉහළ ප්‍රතිචාරය, ජෝන් කීල්ස් properties මගින් පෙර ඉදිකරන ලද දැවැන්ත ව්‍යාපෘතිවල සාර්ථකත්වයේ ප්‍රතිඵලයක් වෙයි.

සංගීත ප්‍රසංග ආර්ථිකය (Concert Economy) අද වන විට ලෝකයේ වේගයෙන්ම වර්ධනය වන බිලියන් ඩොලර් කර්මාන්තයක් බවට පත්වෙමින්, සාම්ප්‍රදායික සංචාරක ව්‍යාපාරයේ සීමාවන් වෙනස් කර ඇත. වාර්තාවන්ට අනුව, 2025 දී ඇමරිකානු ඩොලර් බිලියන 535.4 ක් වූ ගෝලීය සජීවී විනෝදාස්වාද වෙළඳපොළ 2034 වන විට ඩොලර් බිලියන 859ක් දක්වා ඉහළ යනු ඇතැයි අපේක්ෂා කෙරෙන අතර, සංගීත සංචාරක ව්‍යාපාරය (Music Tourism) පමණක් 2033 වන විට ඩොලර් බිලියන 330.1ක දැවැන්ත අගයක් කරා ළඟා වනු ඇතැයි පුරෝකථනය කර ඇත.

​අද ලෝකය පුරා සංචාරක සහ විනෝදාස්වාද ක්ෂේත්‍රයේ සිදුවන දැවැන්තම පෙරළිය වන්නේ භෞතික භාණ්ඩ මිලදී ගැනීමට වඩා මතකයන් සහ අද්විතීය අත්දැකීම් (Experiences) මිලදී ගැනීම සඳහා Gen Z (ජෙන් ඉසෙඩ්) සහ මිලේනියල් තරුණ පරම්පරාව දක්වන අසීමිත නැඹුරුවයි. මෙහි ආර්ථික බලය ලෝකයට මනාව පෙන්වා දුන් කදිම උදාහරණය වන්නේ ටේලර් ස්විෆ්ට්ගේ (Taylor Swift) 'The Eras Tour' ප්‍රසංග මාලාවයි. මහාද්වීප ගණනාවක ප්‍රසංග 149කින් සමන්විත වූ මෙම දැවැන්ත සංචාරය ඉතිහාසයේ ප්‍රථම වතාවට දළ බොක්ස් ඔෆිස් ආදායමෙන් ඩොලර් බිලියන 2.2ක් ඉක්මවා ගිය අතර, ඩෙන්වර් නගරයේ පැවති ප්‍රසංග දෙකක් පමණක් එරට දළ දේශීය නිෂ්පාදිතයට ඩොලර් මිලියන 140ක සෘජු දායකත්වයක් ලබා දුන්නේය. සිංගප්පූරුව වැනි ආසියාතික රටවල් මෙම සංචාරයේ ප්‍රධාන කලාපීය නැවතුම්පළක් බවට පත්වීම හරහා සිය සංචාරක ආදායම දිනකින් ඩොලර් මිලියන 350ත් 400ත් අතර ප්‍රමාණයකින් ඉහළ නංවා ගත් අතර, බියොන්සේගේ 'Renaissance World Tour' ප්‍රසංගය ස්වීඩනයේ ස්ටොක්හෝම් නගරයෙන් ආරම්භ වූ අවස්ථාවේදී ලෝකයේ විවිධ රටවලින් පැමිණි දහස් සංඛ්‍යාත රසිකයන් එකවර හෝටල් කාමර වෙන් කර ගැනීම නිසා එරට ජාතික උද්ධමන අනුපාතයට පවා කෙටි කාලීනව දැවැන්ත අන්දමින් බලපෑමක් එල්ල විය.

​ආසියාතික කලාපය තුළද මෙම ප්‍රසංග ආර්ථිකය අතිශයින් සාර්ථක වෙමින් පවතින අතර, 2024 වසරේදී ඉන්දියාවේ සංවිධානාත්මක සජීවී ඉසව් අංශය ඩොලර් බිලියන 1.2ක් ඉක්මවා ගියේය. මෑතකදී අහමදාබාද් නගරයේ පැවති Coldplay ප්‍රසංගය දින දෙකක් තුළ නරඹන්නන් 222,000ක් ආකර්ෂණය කර ගනිමින් ඩොලර් මිලියන 76.9ක මුළු ආර්ථික බලපෑමක් ඇති කළ අතර, එහිදී සහභාගී වූවන්ගෙන් 86%ක්ම වෙනත් නගරවලින් පැමිණි සංචාරකයින් වීම මඟින් රජයට ලැබුණු GST බදු ආදායම පමණක් ඩොලර් මිලියන 8.6කි. එපමණක් නොව, ලෝක ප්‍රසිද්ධ විද්‍යුත් නර්තන සංගීත (EDM) උළෙලක් වන Tomorrowland වැනි දැවැන්ත සැණකෙළි වාර්ෂිකව ලක්ෂ සංඛ්‍යාත ජාත්‍යන්තර සංචාරකයින් (Global Ravers) පිරිසක් එක්රැස් කරමින් සත්කාරක රටවල සංචාරක ආර්ථිකයට, ගුවන් සේවාවලට සහ හෝටල් කර්මාන්තයට බිලියන ගණනක අදායමක් එකතු කරන ප්‍රධානතම ගෝලීය සංචාරක සන්නාමයක් බවට පත්ව ඇත. Ed Sheeran, Bryan Adams සහ Travis Scott සංචාර ද මීට කදිම උදාහරණ වේ.

​මෙම ගෝලීය ප්‍රවණතාවයෙන් ශ්‍රී ලංකාවට උදා කරගත හැකි ආර්ථික විභවය සැලකිය යුතු අගයකි. අපේ රට සතුව අනර්ඝ ආගන්තුක සත්කාරක පදනමක්, සංචාරක හිතකාමී භූගෝලීය පිහිටීමක් මෙන්ම කොළඹ නගරය කේන්ද්‍ර කරගත් නවීන නගර සංවර්ධන ව්‍යාපෘති (Port City Colombo, City of Dreams Sri Lanka,Lotus Tower වැනි ) පිහිටා තිබීම මෙයට කදිම ශක්තියකි.
​මෑතකාලීනව ශ්‍රී ලංකාව තුළද මෙම සජීවී විනෝදාස්වාද සහ සංගීත ප්‍රසංග ප්‍රවණතාවේ ප්‍රබල පිබිදීමක් දැකගත හැක. Alan Walker සහ DJ Snake වැනි ලෝක ප්‍රසිද්ධ ජාත්‍යන්තර මට්ටමේ (A-Listers) විද්‍යුත් නර්තන සංගීත (EDM) කලාකරුවන් මෙරටට පැමිණීම, Magic! වැනි ජාත්‍යන්තර සංගීත කණ්ඩායම්වල සහභාගීත්වයෙන් පැවැත්වුණු ප්‍රසංග සඳහා ලැබුණු අතිශය ඉහළ ප්‍රතිචාරය මෙරට තුළ සජීවී විනෝදාස්වාද වෙළඳපොළක් සඳහා ඇති සැබෑ ඉල්ලුම මනාව තහවුරු කරමින් පෙන්වා දෙන්නේ දකුණු ආසියාතික කලාපයේ ප්‍රධාන ප්‍රසංග හා සැණකෙළි මධ්‍යස්ථානයක් (Regional Entertainment Hub) බවට පත් කර ගැනීමට අපට කදිම අඩිතාලමක් දැනටමත් ලැබී ඇති බවයි.

🖋️Colombo Urban Digests