The Nation Voice

ချင်းတောင်ပိုင်းတိုက်ပွဲမှာ စစ်ကောင်စီရဲ့တပ်ရင်းမှူး
အဆင့်သေဆုံး၊
မင်းတပ်-ကန်ပက်လက်တိုက်ပွဲတွင် စစ်သုံ့ပန်းနှင့် လက်နက်များစွာသိမ်းဆည်းရမိဟု CPA ပြော

TNV/ဩဂုတ် ၁
အောင်ကြီး

ချင်းပြည်နယ်တောင်ပိုင်း မင်းတပ်နဲ့ ကန်ပက်လက်မြို့နယ်တွေမှာ ဖြစ်ပွားနေတဲ့ တိုက်ပွဲတွေအတွင်း စစ်ကောင်စီဘက်က တပ်ရင်းမှူး ဗိုလ်မှူးကျော်ဆက် အပါအဝင် တပ်မှူးတချို့ သေဆုံးခဲ့ပြီး စစ်သုံ့ပန်းတွေ၊ လက်နက်ခဲယမ်းတွေနဲ့ စစ်အသုံးအဆောင်ပစ္စည်းတွေကို သိမ်းဆည်းရမိခဲ့တယ်လို့ ချင်းပြည်သူ့တပ်မတော် (CPA) က ဩဂုတ်လ ၁ ရက်နေ့မှာ ထုတ်ပြန်ပါတယ်။

CPA ရဲ့ ထုတ်ပြန်ချက်အရ မင်းတပ်နဲ့ ကန်ပက်လက်မြို့နယ်တွေထဲကို ထိုးစစ်ဆင်လာတဲ့ စစ်ကောင်စီစစ်ကြောင်းတွေကို CPA၊ ချင်းညီနောင် (CB)၊ ယောဒေသတပ်ဖွဲ့တွေဖြစ်တဲ့ YA၊ YDF နဲ့ အခြားမဟာမိတ်တော်လှန်ရေးတပ်ဖွဲ့တွေက ဇူလိုင်လကုန်အထိ ဆက်လက်ခုခံတိုက်ခိုက်ခဲ့ပြီး ရန်သူရဲ့ ယာယီအခြေပြုနေရာတွေကိုလည်း တန်ပြန်ထိုးစစ်ဆင် တိုက်ခိုက်နိုင်ခဲ့တယ်လို့ ဆိုပါတယ်။

အဲဒီတိုက်ပွဲတွေအတွင်း စစ်ကောင်စီဘက်က ဗိုလ်မှူးကျော်ဆက်အပါအဝင် တပ်မှူးတချို့ သေဆုံးခဲ့သလို အများအပြား ထိခိုက်ဒဏ်ရာရခဲ့တယ်လို့ CPA က ပြောပါတယ်။ ဒါ့အပြင် စစ်ကောင်စီတပ်သားတွေရဲ့ အလောင်းတွေ၊ လက်နက်ခဲယမ်းမျိုးစုံ၊ ဒရုန်းတွေ၊ ဂျန်မာတွေနဲ့ စစ်အသုံးအဆောင်ပစ္စည်းတွေကို သိမ်းဆည်းရမိခဲ့ပြီး စစ်သုံ့ပန်းတချို့ကိုလည်း ဖမ်းဆီးရမိခဲ့တယ်လို့ ထုတ်ပြန်ထားပါတယ်။

စစ်ကောင်စီတပ်ကနေ ထွက်ပြေးပြီး တော်လှန်ရေးတပ်တွေထံ လက်နက်ချ ပူးပေါင်းလာသူတွေလည်း ရှိခဲ့ပြီး သူတို့ကို လုံခြုံတဲ့နေရာမှာ ထားရှိကာ မိသားစုတွေဆီ ပြန်လည်ပို့ဆောင်ပေးနိုင်ဖို့ စီစဉ်ထားတယ်လို့ CPA က ဆိုပါတယ်။

CPA ရဲ့ အဆိုအရ စစ်ကောင်စီတပ်တွေဟာ စစ်ကြောင်းချီတက်ချိန်မှာ ယောဒေသခံ အသက် ၇၀ အရွယ် အရပ်သားနှစ်ဦးကို လူသားဒိုင်းအဖြစ် ဖမ်းဆီးအသုံးပြုခဲ့ပြီး တော်လှန်ရေးတပ်တွေက အရပ်သားတစ်ဦးကို ကယ်တင်နိုင်ခဲ့ပါတယ်။ ဒါပေမယ့် နောက်ထပ် သက်ကြီးပိုင်းအရပ်သားတစ်ဦးကတော့ စစ်ကောင်စီရဲ့ ပစ်ခတ်သတ်ဖြတ်မှုကြောင့် သေဆုံးခဲ့တယ်လို့လည်း ထုတ်ပြန်ထားပါတယ်။

ဒါ့အပြင် လောင်းရှည်-ဆောလမ်းအတိုင်းနဲ့ ပေါက်-ကျောက်ထု-ထီးလင်းလမ်းပိုင်းကနေ အင်အားဖြည့်ဖို့ ကြိုးစားလာတဲ့ စစ်ကောင်စီစစ်ကြောင်းတွေဟာ ဒေသခံတော်လှန်ရေးတပ်တွေရဲ့ ဖြတ်တောက်ပိတ်ဆို့ တိုက်ခိုက်မှုတွေကြောင့် ထိခိုက်သေဆုံးမှုရှိပြီး ပြန်လည်ဆုတ်ခွါခဲ့ရတယ်လို့ CPAကထုတ်ပြန်ပါတယ်။

သင်းမရွာက စစ်တပ်ပြန်ဆုတ်ချိန် နေအိမ် ၃၅ လုံး ထပ်မံမီးရှို့သွားတယ်လို့ တပ်ရင်း (၆) ပြော

TNV/ဩဂုတ် ၁

မကွေးတိုင်း မြိုင်မြို့နယ် သင်းမရွာမှာ ရက်သတ္တနှစ်ပတ်နီးပါး တပ်စွဲထားတဲ့ စစ်ကောင်စီစစ်ကြောင်းဟာ တော်လှန်ရေးတပ်ဖွဲ့တွေရဲ့ အဆက်မပြတ် ဖိအားပေးတိုက်ခိုက်မှုတွေကြောင့် ဒီနေ့မနက်ပိုင်းမှာ ရွာကနေ ပြန်ဆုတ်သွားခဲ့တယ်လို့ ပခုက္ကူခရိုင် အမှတ် (၆) တပ်ရင်းက
ထုတ်ပြတ်ပါတယ်။

စစ်ကြောင်းပြန်ဆုတ်သွားပြီးနောက် ပခုက္ကူခရိုင် အမှတ် (၆) တပ်ရင်းက သင်းမရွာထဲကို ရှင်းလင်းရေးဝင်ရောက်ခဲ့ပြီး စစ်ကောင်စီတပ်သားတွေ ထွက်ပြေးသွားတဲ့နောက်ကိုလည်း တော်လှန်ရေးတပ်ဖွဲ့တွေ ဆက်ပြီး လိုက်လံတိုက်ခိုက်နေဆဲဖြစ်တယ်လို့ ဆိုပါတယ်။

တပ်ရင်း (၆) ကစစ်ကောင်စီဟာ သင်းမရွာမှာ အခြေချတပ်စွဲဖို့ ရည်ရွယ်ခဲ့ပေမယ့် တော်လှန်ရေးတပ်ဖွဲ့တွေရဲ့ တိုက်ခိုက်မှုတွေကို မခံနိုင်တော့ဘဲ နောက်ဆုံးမှာ ပြန်ဆုတ်ခွာသွားရတာဖြစ်ပြီး ဒါဟာ တော်လှန်ရေးတပ်ဖွဲ့တွေရဲ့ အောင်မြင်မှုတစ်ခုဖြစ်တယ်လို့ ပြောပါတယ်။

သင်းမရွာဟာ မကွေးတိုင်းတော်လှန်ရေးတပ်ဖွဲ့တွေ ထိန်းချုပ်ထားတဲ့ အညာဒူဘိုင်းဒေသ ရေနံမြေနဲ့ ငါးမိုင်ခန့်သာဝေးပါတယ်။

ကွင်းဆင်းစစ်ဆေးချိန်မှာတော့ စစ်ကောင်စီတပ်ဖွဲ့တွေ မထွက်ခွာခင် နေအိမ်အများအပြားကို ထပ်မံမီးရှို့သွားတာ တွေ့ရပြီး အဲဒီအချိန်အထိ မီးတွေ လောင်ကျွမ်းနေဆဲဖြစ်တယ်လို့ သိရပါတယ်။

လက်ရှိ ကွင်းဆင်းတွေ့ရှိချက်အရ နေအိမ် ၃၅ လုံး မီးလောင်ပျက်စီးခဲ့တယ်လို့ ပခုက္ကူခရိုင် အမှတ် (၆) တပ်ရင်းက ထုတ်ပြန်ထားပြီး ဓာတိပုံတွေလည်း ပူးတွဲတင်ပြထားပါတယ်။

ရေနံမှော်နဲ့နီးကပ်တဲ့ သင်းမရွာက စစ်တပ်စစ်ကြောင်း ပြန်ဆုတ်၊ ပြည်သူတွေ သတိထားရှောင်ရှားဖို့ တော်လှန်ရေးအဖွဲ့တွေ သတိပေး

TNV/ဩဂုတ် ၁
အောင်ကြီး

မကွေးတိုင်း မြိုင်မြို့နယ် သင်းမရွာမှာ အခြေချတပ်စွဲထားတဲ့ စစ်ကောင်စီစစ်ကြောင်းဟာ တော်လှန်ရေးတပ်ဖွဲ့တွေရဲ့ ဝိုင်းဝန်းပိတ်ဆို့တိုက်ခိုက်မှုတွေ ကြုံခဲ့ရပြီးနောက် ဩဂုတ်လ ၁ ရက် မနက်ပိုင်းမှာ ရိက္ခာယာဉ်တန်းနဲ့အတူ သင်းမရွာကနေ ပြန်ဆုတ်ခွာပြီး ဘောင့်ဘင်ကျေးရွာဘက်ကို ဝင်ရောက်သွားတယ်လို့ ဒေသတွင်းသတင်းအရင်းအမြစ်တွေက TNV ကို အတည်ပြုပါတယ်။

အဲဒီစစ်ကြောင်းဟာ ဇူလိုင်လ ၂၁ ရက်နေ့လောက်က သင်းမရွာကို ဝင်ရောက်တပ်စွဲခဲ့ပြီး အနီးပတ်ဝန်းကျင်က ကျေးရွာတွေကို လက်နက်ကြီး၊ ဒရုန်းတွေနဲ့ ပစ်ခတ်နေသလို လေကြောင်းကလည်း Mi-35 ရဟတ်ယာဉ်နဲ့ ဂျက်ဖိုက်တာတွေ အသုံးပြုပြီး နေ့စဉ်ဆက်တိုက် လေကြောင်းတိုက်ခိုက်မှုတွေ လုပ်ခဲ့ပါတယ်။

ဒါ့အပြင် သင်းမကျေးရွာက နေအိမ်အများအပြား မီးရှို့ဖျက်ဆီးခံခဲ့ရပြီး ဖမ်းဆီးခံရတဲ့ ပြည်သူတချို့ သတ်ဖြတ်ခံရမှုတွေလည်း ရှိခဲ့တယ်လို့ ဒေသခံတွေက ပြောပါတယ်။

သင်းမရွာဟာ တော်လှန်ရေးတပ်ဖွဲ့တွေ ထိန်းချုပ်ထားတဲ့ ရေနံမှော်တွေနဲ့ ၅ မိုင်လောက်သာ နီးကပ်နေတာကြောင့် ရေနံမှော်တွေကို ထိုးစစ်ဆင်ဝင်ရောက်မယ်လို့ ခန့်မှန်းခဲ့ကြပါတယ်။

ဒါပေမယ့် ဒေသတွင်းသတင်းအရင်းအမြစ်တွေရဲ့ ပြောကြားချက်အရ အဲဒီစစ်ကြောင်းဟာ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် ပြန်ဆုတ်လာတာဖြစ်ပြီး ဆုတ်ခွာတဲ့လမ်းကြောင်းတစ်လျှောက် ကျေးရွာတွေမှာ မီးရှို့ဖျက်ဆီးတာ၊ အရပ်သားတွေအပေါ် အကြမ်းဖက်တာတွေ ဆက်ဖြစ်လာနိုင်တယ်လို့ စိုးရိမ်မှုတွေလည်း ရှိနေပါတယ်။

သင်းမရွာကို စတင်ဝင်ရောက်ချိန်က အင်အား ၈၀၀ လောက်ရှိတဲ့ အဲဒီစစ်ကြောင်းရဲ့ လက်ရှိအင်အားကိုတော့ မသိရသေးပါဘူး။

“ဘောင့်ဘင်ရွာမှာ အထိုင်ချပြီး စစ်ကူစောင့်မယ့်သဘော” လို့ ဒေသတွင်းအခြေအနေကို စောင့်ကြည့်နေသူတစ်ဦးက မှတ်ချက်ပြုပါတယ်။

အဲဒီစစ်ကြောင်းဟာ မြိုင်မြို့နယ်အတွင်း အပြစ်မဲ့ပြည်သူ ၃၀ နီးပါး သေဆုံးခဲ့ရပြီး နေအိမ်ရာပေါင်းများစွာ မီးရှို့ဖျက်ဆီးခံခဲ့ရတဲ့ ဖြစ်စဉ်တွေနဲ့ ဆက်စပ်နေတဲ့ စစ်ကြောင်းဖြစ်တယ်လို့လည်း သိရပါတယ်။

အညာမြေ အရပ်ဖက်လူမှုအဖွဲ့အစည်း (မြိုင်) ကလည်း ပြည်သူတွေအနေနဲ့ စစ်ကြောင်းနဲ့ ထိပ်တိုက်မတွေ့ဆုံရအောင် လမ်းကြောင်းတွေကို ရှောင်ရှားပြီး အထူး
သတိထား သွားလာကြဖို့ အသိပေးထုတ်ပြန်ထားပါတယ်။

အညာဒေသနဲ့ မြေလတ်ဒေသတွေရဲ့ တော်လှန်ရေး အင်အားစုတွေ စုစည်းဖို့လိုအပ်နေပြီလား (အတွေးအမြင်ဆောင်းပါး)

The Nation Voice Journal အတွဲ ၂၊ စာစဉ် ၁၃
တင်အောင်မိုး ရေးသားသည်။

၂၀၂၁ ခုနှစ် စစ်အာဏာသိမ်းပြီးနောက် ပေါ်ထွက်လာတဲ့ စစ်အာဏာရှင်စနစ် ဆန့်ကျင်ရေး၊ စစ်တပ်ကို နိုင်ငံရေးနယ်ပယ်ကနေ အပြီးတိုင်ဖယ်ရှားရေးနဲ့ အခြားသော အာဏာရှင်စနစ်တွေကိုပါ ဆန့်ကျင်တိုက်ဖျက်ရေးနဲ့ လူမှုအဖွဲ့အစည်းတွင်း လူမျိုး၊ ဘာသာ၊ လိင်၊ အသားအရောင်တို့အပေါ် အခြေခံတဲ့ ခွဲခြားဆက်ဆံမှု မရှိဘဲတန်းတူအခွင့်အရေး ရရှိဖို့တွေကို ကြွေးကြော်လာတဲ့ တော်လှန်ရေး လှုပ်ရှားမှုကို “နွေဦးတော်လှန်ရေး” လို့ ယေဘုယျ ခေါင်းစဥ်တပ် ခေါ်ဝေါ်ကြပါတယ်။

နွေဦးတော်လှန်ရေး ဆိုတဲ့အောက်မှာ လက်နက်ကိုင် လမ်းစဥ်၊ လူ့အခွင့်အရေးလှုပ်ရှားမှု နဲ့ လူနည်းစုအခွင့်အရေး လှုပ်ရှားမှုတွေလည်း ပါဝင်နေတာ ဖြစ်ပါတယ်။

နောက်တဆင့်ထပ်ခွဲခြားကြည့်ရင် နွေဦးတော်လှန်ရေးကာလမှာ ပေါ်ထွက်လာတဲ့ လက်နက်ကိုင်တပ်ဖွဲ့တွေ နဲ့ နွေဦးတော်လှန်ရေး မတိုင်ခင်ကတည်းက ရှိနှင့်ပြီး တိုင်းရင်းသားလက်နက်ကိုင်အဖွဲ့တွေ အဖြစ် တွေ့ရမှာဖြစ်ပါတယ်။ မြန်မာနိုင်ငံ လွတ်လပ်ရေး ရပြီးကာစ ကာလကတည်းက တည်ထောင်ခဲ့တဲ့ အဖွဲ့တွေ ရှိသလို ၁၉၆၀ ခုနှစ် နောက်ပိုင်းတွေမှာ ထပ်မံဖွဲ့စည်း ပေါ်ထွက်လာတဲ့ တိုင်းရင်းသားလက်နက်ကိုင် အဖွဲ့တွေလည်း ရှိတာတွေ့ရမှာ ဖြစ်ပါတယ်။

၂၀၂၁ ခုနှစ် စစ်အာဏာသိမ်းပြီးနောက် ဖွဲ့စည်း ပေါ်ထွက်လာတဲ့ PDF တပ်ဖွဲ့လို့ ယေဘုယျအမည် အဖြစ်နဲ့ ခေါ်ဆိုတဲ့ ဗမာလူမျိုးအများစု နေထိုင်ကြတဲ့ ဒေသတွေက PDF တပ်ဖွဲ့တွေ၊ တိုင်းရင်းသားနယ်မြေတွေမှာ နကိုရှိရင်းစွဲ လက်နက်ကိုင်တပ်ဖွဲ့တွေ အချို့သော တိုင်းရင်းသားဒေသတွေမှာ အသစ်ထွက်ပေါ်လာတဲ့ PDF တပ်ဖွဲ့တွေ အားလုံးကို ခြုံငုံပြီး နွေဦးတော်လှန်ရေးလို့ ခေါ်ဆိုကြတာလို့ ဆိုရင် မှားမယ်မထင်ပါ။

၂၀၂၁ ခုနှစ် မတိုင်ခင်ကတည်းက တည်ရှိခဲ့တဲ့ တိုင်းရင်းသား လက်နက်ကိုင် အဖွဲ့တွေ အနေနဲ့က စစ်ရေးအတွေ့အကြုံ၊ အမျိုးသားလွတ်မြောက်ရေး ရည်မှန်းချက်အောက်မှာ စုစည်းထားမှုတွေ အားကောင်းကြတဲ့ အနေအထားဖြစ်ပြီး ဒီတိုင်းရင်းသားဒေသတွေမှာပဲ ၂၀၂၁ စစ်အာဏာသိမ်းပြီးမှ ထပ်မံဖွဲ့စည်းကြတဲ့ တိုင်းရင်းသား PDF တပ်ဖွဲ့တွေ တပ်ရင်းတွေကိုလည်း ၄င်းတို့ရဲ့ သက်တမ်းရင့် တိုင်းရင်းသား လက်နက်ကိုင်တပ်တွေနဲ့ ပူးပေါင်းလုပ်ဆောင်တာ၊ ပေါင်းစည်းတာတွေ အတွက် လုပ်ဆောင်နေကြတာကို တိုင်းရင်းသားဒေသအချို့မှာ တွေ့ရမှာ ဖြစ်ပါတယ်။ သာဓက တရပ် အနေနဲ့ ပြရရင် ကရင်နီပြည် မှာ KNDF နဲ့ အခြားသော PDF လက်နက်ကိုင် တပ်ဖွဲ့တွေ ၂၀၂၁ ခုနှစ် စစ်အာဏာသိမ်းပြီးနောက် ပေါ်ထွက်လာခဲ့ကြပြီး နောက်ပိုင်းမှာ KNDF နဲ့ နကိုရှိနှင့်ပြီး KNPP/KA တို့ ပူးပေါင်း လှုပ်ရှားကြတာ အခြားသော ဒေသအလိုက်ဖွဲ့စည်းတဲ့ PDF တပ်ဖွဲ့တွေကိုပါ ပူးပေါင်းလှုပ်ရှားကြဖို့ စည်းရုံးမှု၊ စုစည်းမှုတွေ ပြီးခဲ့တဲ့နှစ်ပိုင်းတွေမှာ လုပ်ဆောင်လာကြတာ တွေ့ရမှာ ဖြစ်ပါတယ်။

ကရင်နီပြည်အပြင် ချင်းပြည်နယ်မှာလည်း ၂၀၂၁ ခုနှစ်နောက်ပိုင်း ပေါ်ထွက်လာတဲ့ ချင်းကာကွယ်ရေး တပ်ဖွဲ့တွေ အများအပြားရှိကြပြီး နကိုရှိပြီး ဖြစ်တဲ့ CNF/CNA လက်နက်ကိုင် အဖွဲ့နဲ့ ပူးပေါင်းလုပ်ဆောင်တာတွေ ရှိသလို အချို့အဖွဲ့တွေက ချင်းညီနောင် Chin Brotherhood အဖြစ်ဖွဲ့စည်းပြီး သီးခြားလှုပ်ရှားနေတဲ့ သာဓကလည်း ရှိနေတာဖြစ်ပါတယ်။

အခု မကွေး၊ စစ်ကိုင်း၊ မန္တလေး နဲ့ ပဲခူးတိုင်းအနောက်ခြမ်း၊ အရှေ့ခြမ်း စတဲ့ဒေသတွေက ဗမာလူမျိုး PDF တပ်ဖွဲ့တွေ အများအပြား ပေါ်ထွက်လာခဲ့ပြီး အချို့အဖွဲ့တွေရဲ့ သက်တမ်းဟာ ၅ နှစ်ကျော် အထိရှိလာခဲ့ကြတာ ဖြစ်ပါတယ်။ ဒီတိုင်းဒေသ ၄ ခုအနက် ပဲခူးတိုင်းကလွဲပြီး ကျန် တိုင်းဒေသ ၃ ခု မှာ ဖက်ဒရယ်ယူနစ်အစိုးရ/ကြားကာလ အစိုးရတွေ ဖွဲ့စည်းခဲ့တာတွေ့ရပါတယ်။ သို့ပေမယ့် ဖက်ဒရယ်ယူနစ်အစိုးရ/ကြားကာလ အုပ်ချုပ်ရေးကောင်စီတွေ အနေနဲ့ ဒီတိုင်းဒေသထဲမှာ တည်ရှိနေတဲ့ တော်လှန်ရေး လက်နက်ကိုင် တပ်တွေကို စုစည်းမှုတွေမှာတော့ အားနည်းနေသေးတာ တွေ့ရမှာ ဖြစ်ပါတယ်။

မန္တလေးတိုင်းမှာ MDY PDF အနေနဲ့ စုစုစည်းစည်း ပေါ်ထွက်လာခဲ့ပြီး ၂၀၂၅ နှစ်လယ်ပိုင်း နောက်ပိုင်း အာဏာသိမ်းစစ်တပ်ရဲ့ ထိုးစစ်တွေ၊ မဟာမိတ် တိုင်းရင်းသားလက်နက်ကိုင် တပ်ဖြစ်တဲ့ TNLA ရဲ့ အပစ်ရပ် သဘောတူညီချက် လက်မှတ်ထိုးတာတွေ နောက်ပိုင်း အားနည်းသွားတာတွေ့ရပါတယ်။

မကွေး၊ စစ်ကိုင်းတိုင်းတွေမှာတော့ စစ်အာဏာသိမ်းပြီးနောက် မြို့တွေ၊ နယ်တွေအလိုက် ကိုယ်ထူကိုယ်ထ ဖွဲ့စည်းကြတာတွေ၊ NUG အစိုးရရဲ့ ကာကွယ်ရေးဝန်ကြီးဌာန အောက်က ဖွဲ့စည်းကြတဲ့ တော်လှန်ရေး လက်နက်ကိုင်တပ်ဖွဲ့တွေ အများအပြား ပေါ်ထွက်လာခဲ့ကြပြီး ယခုအချိန်ထိ လက်နက်ကိုင် တပ်ပေါင်းစု သို့မဟုတ် မဟာမိတ်အဖွဲ့တွေ အဖြစ် စုစည်းဖို့ အခက်အခဲတွေ ရှိနေဆဲဖြစ်တာကို တွေ့မြင်နေကြရတာပါ။

သီအိုရီအရ၊ အယူအဆအရ စုစည်းရေး၊ တဖွဲ့ထည်းအဖြစ်ပေါင်းစည်းရေး မဟုတ်သည့်တိုင် စစ်ရေးလုပ်ဆောင်မှုတွေမှာ တစုတစည်းထဲ မဟာဗျူဟာတခုထည်းအောက်မှာ လုပ်ဆောင်ကြဖို့အတွက် တွေ့ကြုံခဲ့ရတဲ့ အတွေ့အကြုံနဲ့ လက်ရှိရင်ဆိုင်နေကြရတဲ့ အခြေအနေအရ အရေးတကြီးလိုအပ်နေပြီလို့ ဆိုရမှာဖြစ်ပါတယ်။ တဖက်ကကြည့်ရင်လည်း မြေပြင်မှာ လက်တွေ့ရင်ဆိုင်ကြုံတွေ့ရတဲ့ အခက်အခဲတွေ စိမ်ခေါ်မှုတွေ ရှိနေလိမ့်မယ်ဆိုတာ မှန်းဆကြည့်နိုင်ပေမယ့် အခြေအနေက စုစည်းမှုတရပ်ရှိမှသာ စစ်ရေးအောင်မြင်မှုတွေ ရနိုင်မယ့် အနေအထားလည်း ဖြစ်ပါတယ်။

The Nation Voice Journal ကို စစ်ကိုင်းတိုင်းနဲ့ မကွေးတိုင်းတို့မှာ ပုံနှိပ်ထုတ်ဝေဖြန့်ချိနေပါပြီ။
သတင်းနဲ့ ဆောင်းပါးတွေဖတ်ဖို့ အခုပဲ အခမဲ့ Download ရယူလိုက်ပါ . . .
https://www.mediafire.com/file/c63o09wvn9zpir7/The+Nation+Voice+-+2.13.pdf/file

သတင်းတွေသိရဖို့ မျှဝေပေးပါ . . .

The Nation Voice ကို အစဉ်တစိုက် အားပေးနေကြတဲ့ စာဖတ်ပရိသတ်တစ်ဦးချင်းစီကို အထူးကျေးဇူးတင်ရှိပါတယ်။

တောင်သာမြို့အဝင် စစ်ဆေးရေးဂိတ် ၂ ခုကို တိုက်ခိုက်၊လက်နက် ၂ လက် သိမ်းဆည်းရရှိ

TNV/ ဩဂုတ် ၁
အောင်ကြီး

မန္တလေးတိုင်း၊တောင်သာမြို့အဝင် မန်ကျည်းရိုး စစ်ဆေးရေးဂိတ်နဲ့ ဗိဿနိုးအထိုင်ဂိတ် ၂ ခုကို ဇူလိုင် ၂၈ ရက်နေ့က တိုက်ခိုက်ခဲ့ရာ လက်နက် ၂ လက် သိမ်းဆည်းရရှိခဲ့တယ်လို့ မြင်းခြံခရိုင် အမှတ်(၁)တပ်ရင်းက သတင်းထုတ်ပြန်ပါတယ်။

အဲဒီစစ်ဆေးရေးဂိတ်တွေဟာ ပြည်သူတွေကို ပိုက်ဆံကောက်တဲ့ ဂိတ်တွေဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။

တိုက်ခိုက်မှုအတွင်း မန်ကျည်းရိုးဂိတ်က စစ်ကောင်စီတပ်သားတွေ ထွက်ပြေးသွား တာကြောင့် ဂိတ်စခန်းကိုလည်း မီးရှို့ဖျက်ဆီးနိုင်ခဲ့တယ်လို့ ထုတ်ပြန်ထားပါတယ်။

ဒီတိုက်ခိုက်မှုကို မြင်းခြံခရိုင် အမှတ်(၁၊ ၂၊ ၃၊ ၇၊ ၈) တပ်ရင်းတွေ၊ မြင်းခြံခရိုင် ပကဖ၊ နွားထိုးကြီးမြို့နယ် ပကဖ၊ တောင်သာမြို့နယ် ပကဖနဲ့ စဉ့်ကိုင်မြို့နယ် ပကဖတို့ ပူးပေါင်းဆောင်ရွက်ခဲ့တာဖြစ်ပြီး တိုက်ခိုက်မှုအတွင်း တော်လှန်ရေးရဲဘော် ၁ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။



ဓာတ်ပုံ/ မြင်းခြံခရိုင်အမှတ်(၁)တပ်ရင်းမှ သိမ်းဆည်းရမိသောပစ္စည်းများ၊

မန္တလေးမှာ ဘိန်းဖြူတွေ ဆာလာအိတ်နဲ့ထည့်ပြီးဆိုင်
ကယ်လေးစီးနဲ့သယ်လာသူတွေကိုဖမ်းမိ၊
သိန်းထောင်ချီတန်ဖိုးရှိ ဘိန်းဖြူတွေဆက်တိုက်ဖမ်းမိနေ၊

TNV/ ဩဂုတ် ၁

မန္တလေးတိုင်း အမရပူရမြို့နယ်မှာ ကျပ်သိန်း ၄,၄၀၀ တန်ဖိုးရှိ ဘိန်းဖြူ ၁၇ ဒသမ ၆ ကီလိုကို မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ ဖမ်းဆီးရမိခဲ့တယ်လို့ CCDAC Myanmar က ထုတ်ပြန်ပါတယ်။

ဇူလိုင် ၂၈ ရက် ည ၇ နာရီခွဲခန့်က သတင်းအရ သက်သေတွေနဲ့အတူ အမရပူရမြို့နယ် မင်းတည်းကုန်းကျေးရွာ၊ မြစ်ငယ်–ထုံးဘိုသွားကားလမ်းပေါ်မှာ မြင့်ဦး၊ မျိုးဇော်ဦး (ခ) သာကျော်၊ ရဲထွန်းနဲ့ မောင်ဝင်းတို့ကို ဆိုင်ကယ် ၄ စီးနဲ့အတူ စစ်ဆေးခဲ့တာလို့ ဆိုပါတယ်။

စစ်ဆေးရှာဖွေရာမှာ ဆိုင်ကယ်တွေပေါ် သယ်ဆောင်လာတဲ့ ဆာလာအိတ်တွေအတွင်းကနေ ဘိန်းဖြူ ၁၇ ဒသမ ၆ ကီလို (ဒေသကာလတန်ဖိုး ကျပ်သိန်း ၄,၄၀၀) နဲ့ လက်ကိုင်ဖုန်း ၅ လုံးကို သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဖမ်းဆီးခံရသူ လေးဦးကို မြစ်ငယ်နယ်မြေရဲစခန်းမှာ အမှုဖွင့်အရေးယူထားပြီး ဆက်စပ်ကွင်းဆက်တွေကို ဆက်လက်ဖော်ထုတ်စစ်ဆေးနေတယ်လို့ CCDAC Myanmar က ဆိုပါတယ်။

ပြီးခဲ့တဲ့ ၂၀၂၆ မေလ ၂၂ ရက်နေ့ကပဲ မန္တလေး မဟာအောင်မြေနဲ့ချမ်းမြသာစည်မြို့နယ်တွေမှာ ကျပ်သိန်း ၂,၇၀၀ ကျော်တန်ဖိုးရှိတဲ့ ဘိန်းဖြူတွေဖမ်းမိခဲ့ပါသေးတယ်။

ဒါ့အပြင် ၂၀၂၆ ဧပြီလ ၈ရက်နေ့ကလည်း မန္တလေး ပြည်ကြီးတံခွန်မှာ ငွေ ကျပ်သန်းပေါင်း ၁၅,၀၀၀ ကျော်တန်ဖိုးရှိတဲ့ မူးယစ်ဆေးဝါးတွေ ဖမ်းဆီးရမိတယ်လို့စစ်ကောင်စီက ထုတ်ပြန်ခဲ့ပြီး ဒီထဲမှာ ဘိန်းဖြူ ၅.၅ ကီလိုဂရမ်နဲ့ စိတ်ကြွဆေးပြား ၉၉ သိန်းကျော်ပါဝင်ပါတယ်။

ဘိန်းဖြူ ၁ ကီလိုဂရမ်ကို ဥပဒေအရ ပျှမ်းမျှကျပ်သိန်း ၂၅၀ နှုန်းနဲ့တွက်ချက်တန်ဖိုးဖြတ်လေ့ရှိပြီးမူးယစ်
ဆေးဝါးတွေထဲမှာ စျေးနှုန်းအမြင့်မားဆုံးဖြစ်ပါတယ်။ ဒါကြောင့် ဘိန်းဖြူ ၁၀ ကီလိုဂရမ်ဟာ ကျပ်သိန်း ၂,၅၀၀ ဝန်းကျင် တန်ဖိုးရှိပါတယ်။

မူးယစ်တပ်ဖွဲ့ဟာ WY ကိုတစ်ပြား ၅,၀၀၀၊ ဘိန်းအဆီခဲကို တစ်ကီလို ငွေကျပ် ၂၅သိန်းနှုန်း စသည်ဖြင့် တန်ဖိုးဖြတ်ပါတယ်။ဒါပေမယ့် ဒါဟာ ဥပဒေအရတန်ဖိုးဖြတ်တဲ့ဈေးနှုန်းသာဖြစ်ပြီး ပြင်ပမှာရောင်းဝယ်ရင်တန်ကြေးပိုမြင့်မားလေ့ရှိပါတယ်။

၂၀၂၅ ခုနှစ်အတွင်း မြန်မာနိုင်ငံတစ်ဝန်းမှာ ငွေကျပ် ၁ ဒသမ ၇ ထရီလီယံကျော် (ကျပ် ၁,၇၆၁ ဘီလီယံကျော်) တန်ဖိုးရှိတဲ့ မူးယစ်ဆေးဝါးနဲ့ ဓာတုပစ္စည်းတွေကို ဖမ်းဆီးရမိခဲ့ပါတယ်။ အဲဒီပမာဏဟာ ၂၀၂၄ ခုနှစ်က ဖမ်းဆီးရမိခဲ့တဲ့ ကျပ် ၉၉၈ ဘီလီယံကျော်နဲ့ နှိုင်းယှဉ်ရင် နှစ်ဆနီးပါး မြင့်တက်လာတာ ဖြစ်ပါတယ်။

၂၀၂၅ ခုနှစ်အတွင်း မြန်မာနိုင်ငံတစ်ဝန်းမှာ ဘိန်းဖြူ ဖမ်းဆီးရမိမှုက ကီလိုဂရမ် ထောင်ချီရှိခဲ့ပါတယ်။

ဒါပေမယ့် ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံး (UNODC) ရဲ့ ခန့်မှန်းချက်အရ မြန်မာနိုင်ငံအတွင်း နှစ်စဉ် ဘိန်းဖြူ တန်ချိန် ပျှမ်းမျှ ၁၀၀၀ ကျော်ထုတ်လုပ်နေပြီး ပြည်တွင်းမှာ ၅ ဒသမ ၈ တန်ခန့် သုံးစွဲနေတယ်လို့ဆိုပါတယ်။

အလေးချိန် ၁ တန်မှာ ၁,၀၀၀ ကီလိုဂရမ်ရှိတာကြောင့် ဘိန်းဖြူထုတ်လုပ်မှုအားနဲ့ဖမ်းဆီးရမိမှုဟာ အဆပေါင်းများစွာကွာခြားနေပါတယ်။

ပြည်ပကို တန်ချိန် ၆၅ တန်ကနေ ၁၁၆ တန်အထိ တန်ဖိုးအားဖြင့် အမေရိကန်ဒေါ်လာ ၅၂၅ သန်းကနေ ၉၃၅ သန်းခန့် ရှိတဲ့ ဘိန်းဖြူတွေကို မှောင်ခိုတင်ပို့နေနိုင်တယ်လို့ UNODC က ခန့်မှန်းထားပါတယ်။

ဒါကြောင့် ကမ္ဘာ့နံပါတ် (၁) ဘိန်းထုတ်လုပ်တဲ့နိုင်ငံအဖြစ် ၂၀၂၃ မှာ UNODC ကသတ်မှတ်ခဲ့ပါတယ်။

ဒါပေမယ့်မြန်မာနိုင်ငံမှာ ဖမ်းမိတဲ့မူးယစ်ဆေးဝါး ၈၃ရာခိုင်နှုန်းခန့်ဟာ Synthetic Drugs လို့ခေါ်တဲ့ စိတ်ပြောင်းဆေးဝါးတွေဖြစ်ပြီး မက်သာဖက်တမင်းအနွယ်ဝင် WY၊ ရေခဲ (ice)၊ ကတ်တမင်း (Ketamine) နဲ့ အက်စတေစီ (Ecstasy/E)တို့က အများဆုံးဖြစ်နေပါတယ်။

ဒါ့ကြောင့် ဘိန်းဖြူထုတ်လုပ်မှုအပြင် စိတ်ကြွဆေးပြားထုတ်လုပ်မှုမှာလဲ ကမ္ဘာ့နံပါတ်(၁)အဖြစ် UNODC ကသတ်မှတ်ထားပါတယ်။

စစ်အစိုးရအခြေစိုက်နေပြည်တော်မှာ မိုးများပြီးရေကြီးနေ
အရိုးအထူးကုဆေးရုံ နှင့်နေအိမ်များရေဝင်၊

TNV/ ဩဂုတ်

နေပြည်တော် ပုဗ္ဗသီရိမြို့နယ်နဲ့ ဥတ္တရသီရိမြို့နယ်တို့မှာ မိုးသည်းထန်စွာရွာသွန်းမှုကြောင့် ရေကြီးရေလျှံပြီး လူနေရပ်ကွက်တွေအပြင် အထူးကုဆေးရုံအတွင်းအထိ ရေဝင်ရောက်ခဲ့လို့ မီးသတ်တပ်ဖွဲ့က ကူညီကယ်ဆယ်ရေးလုပ်ငန်း ဆောင်ရွက်ခဲ့ပါတယ်။

ပုဗ္ဗသီရိမြို့နယ်မှာ ဇူလိုင် ၃၁ ရက် ည ၁၀ နာရီ ၁၅ မိနစ်ခန့်က ဂွေ့ကြီးချောင်းရေလျှံလာတာကြောင့် ဆင်ဖြူရှင်ရပ်ကွက်ရှိ စွယ်တော်လမ်း၊ ရန်ကုန်(၁)လမ်း၊ ရန်ကုန်(၂)လမ်းနဲ့ ရန်ကုန်(၃)လမ်းပတ်ဝန်းကျင်က နေအိမ်တွေထဲ ရေဝင်ရောက်ခဲ့ပါတယ်။

မီးသတ်တပ်ဖွဲ့ဝင်နဲ့ အရန်မီးသတ်တပ်ဖွဲ့ဝင်တွေက ရေဘေးသင့်အိမ်ထောင်စုတွေကို ဘေးလွတ်ရာနေရာတွေဆီ ကူညီရွှေ့ပြောင်းပေးခဲ့တယ်လို့ ခရိုင်မီးသတ်ကသတင်းထုတ်ပြန်ပါတယ်။

ဥတ္တရသီရိမြို့နယ်မှာလည်း ဇူလိုင် ၃၁ ရက် ည ၈ နာရီ ၅၀ မိနစ်ခန့်က ဖိုးဆောင်းတောင်က တောင်ကျရေတွေ ဝင်ရောက်လာတာကြောင့် အရိုးရောဂါအထူးကုဆေးရုံအတွင်းရှိ သွေးလှူဆောင်၊ ဓာတ်မှန်ဆောင်နဲ့ ဆက်စပ်ဌာနတွေမှာ ရေဝင်ရောက်မှု ဖြစ်ပွားခဲ့ပါတယ်။

အစိုးရရုံးများစိုက်ရာ နေပြည်တော်မှာ ဇူလိုင် ၂၃ ရက်နေ့ကလည်း မိုးသည်းထန်စွာရွာသွန်းလို့ နေအိမ်အများအပြားပြောင်းရွေ့ခဲ့ရပါတယ်။

အပစ်ရပ်ရေးဆွေးနွေးခဲ့တယ်လို့မင်းအောင်လှိုင်အပြော CNO/CNDF ငြင်းဆို၊
တော်လှန်ရေး ဆက်လက်တိုက်ပွဲဝင်သွားမည်ဟုဆို

TNV/ ဩဂုတ် ၁
အောင်ကြီး

စစ်ခေါင်းဆောင် မင်းအောင်လှိုင်က CNO/CNDF အပါအဝင် တိုင်းရင်းသားလက်နက်ကိုင်အဖွဲ့ (EAO) ၁၃ ဖွဲ့နဲ့ တွေ့ဆုံဆွေးနွေးခဲ့ပြီး အပစ်ရပ်ရေး ဆွေးနွေးမှုတွေရှိခဲ့တယ်လို့ ဇူလိုင်လ ၃၁ နံနက်မှာပြောဆိုခဲ့ပေမယ့်
CNO/CNDF ဘက်ကတော့ ဒီပြောဆိုချက်ကို ငြင်းဆိုလိုက်ပါတယ်။

အဖွဲ့ရဲ့ ပြောခွင့်ရဆလိုင်းတင်မီထွဋ်က CNO/CNDF ဟာ လူမျိုးနွယ်စုတစ်စု ဒါမှမဟုတ် လူပုဂ္ဂိုလ်တစ်ဦးတစ်ယောက်ရဲ့ အကျိုးစီးပွားအတွက် ရပ်တည်နေတဲ့အဖွဲ့မဟုတ်ဘဲ တော်လှန်ရေးအတွက် ရပ်တည်နေတဲ့အဖွဲ့ဖြစ်တယ်လို့ ဆိုပါတယ်။

ဒါ့အပြင် Chin လူမျိုးအားလုံးရဲ့ သဘောတူညီမှု၊ စည်းလုံးညီညွတ်မှုနဲ့ တရားဝင်ပေါ်ပေါက်လာတဲ့ ဆွေးနွေးမှုတွေ မရှိသေးသရွေ့ CNO/CNDF အနေနဲ့ တော်လှန်ရေးကို ဆက်လက်လုပ်ဆောင်သွားမှာဖြစ်တယ်လို့လည်း ပြောပါတယ်။

လက်ရှိ အွန်လိုင်းမှာ ပျံ့နှံ့နေတဲ့ စစ်ကောင်စီနဲ့ဆွေးနွေးတယ်ဆိုတဲ့သတင်းတွေနဲ့ပတ်သက်ပြီးလည်း ပြည်သူတွေ ရှင်းလင်းစွာသိရှိနိုင်ဖို့ မကြာခင် တရားဝင်ထုတ်ပြန်ချက်တစ်စောင် ထုတ်ပြန်သွားမယ်လို့ ဆလိုင်းတင်မီထွဋ်က ဆိုပါတယ်။

CNO/CNDF ဟာ အာရက္ခတပ်တော် AAနဲ့ လက်တွဲတိုက်ပွဲဝင်နေတဲ့ ချင်းညီနောင် (Chin Brotherhood) အဖွဲ့ဝင်ဖြစ်သလို ကြားကာလ ချင်းအမျိုးသားကောင်စီ (ICNCC) ရဲ့ အဖွဲ့ဝင်တစ်ဖွဲ့လည်း ဖြစ်ပါတယ်။

ICNCC နဲ့ Chin Brotherhood နှစ်ဖွဲ့စလုံးဟာ စစ်တပ်နဲ့ ဆွေးနွေးဖို့ အဖွဲ့တွင်း သဘောတူဆုံးဖြတ်ထားတာမျိုး မရှိဘူးလို့ဆုံးဖြတ်ကြွေးကြော်ထားကြတဲ့ အဖွဲ့တွေပါ။

CNO/CNDF ဌာနချုပ်တည်ရှိရာ ချင်းပြည်နယ်မြောက်ပိုင်းဖလမ်းမြို့ကို ချင်းညီနောင်တပ်ဖွဲ့တွေက ၂၀၂၅ ခုနှစ်အတွင်း စစ်တပ်လက်ထဲကနေ သိမ်းပိုက်နိုင်ခဲ့ပေမယ့် ၂၀၂၆ ခုနှစ် ဧပြီလမှာတော့ စစ်တပ်ရဲ့ ထိုးစစ်ဖိအားတွေကြောင့် မြို့ကို ပြန်လည်စွန့်လွှတ်ခဲ့ရပါတယ်။

ပခန်းငယ်က မီးဘေးသင့်စစ်ရှောင်အိမ်ထောင်စု ၁၉၄စုကို မင်းဘူးရင်း ၁ဦးဆောင်ပြီး ကူညီပေးခဲ့

TNV/ ဇူလိုင် ၃၁
သတင်း- ငြိမ်း (TNV)

မကွေးတိုင်း၊ ချောက်မြို့နယ် ပခန်းငယ်ရွာက မီးဘေးသင့်စစ်ရှောင်အိမ်ထောင်စု ၁၉၄စုကို မင်းဘူးခရိုင်အမှတ် ၁တပ်ရင်းက ဦးဆောင်ပြီး “ ပြည်သူမှပြည်သူ ဝေမျှကူ”အစီအစဥ်နဲ့ နှစ်ကြိမ်ကူပေးခဲ့တယ်လို့ ထုတ်ပြန်ထားပါတယ်။

ဇူလိုင်လ ၂၅ရက်မှာ ပခန်းငယ်ရွာကို စစ်ကော်မရှင်က မီးရှို့ခဲ့တာကြောင့် နေအိမ်နဲ့ ရှေးဟောင်းအဆောက်အဦးတွေအပါအဝင် စုစုပေါင်း ၁၀၀ ဝန်းကျင် ပျက်စီးဆုံးရှုံးခဲ့တယ်လို့သိရပါတယ်။

အဲဒါကြောင့် မင်းဘူးခရိုင်အမှတ် ၁တပ်ရင်းက ရဲဘော်တွေဦးဆောင်ပြီး စလင်းမြို့နယ် ရပ်မိ၊ ရပ်မတွေပူးပေါင်းကာ “ပြည်သူမှပြည်သူ ဝေမျှကူ”အစီစဉ်အဖြစ် ဇူလိုင် ၂၆ရက်နဲ့ ၂၈ရက်တို့မှာ ဆန်၊ ဆီ၊ အဝတ်အစား၊ ခြုံစောင်၊ ပန်းကန်ခွက်ယောက်တွေနဲ့ အခြားသော အသုံးအဆောင်ပစ္စည်းများ အလှူခံကာ ပခန်းငယ်ရွာက မီးဘေးသင့်နဲ့ စစ်ဘေးရှောင်အိမ်ထောင်စု ၁၉၄စုကိုပြန်လည်ဝေမျှလှူဒါန်းခဲ့ပြီး ကျန်းမာရေးချို့တဲ့တဲ့ပြည်သူတွေကိုလည်း ဆေးဝါးကုသမှုလုပ်ပေးခဲ့တယ်လို့ ဖော်ပြထားပါတယ်။

ဒါ့အပြင် စစ်ရှောင်ဘုန်းတော်ကြီး တစ်ပါးကိုလည်း ဝါဆိုသင်္ကန်းကပ်လှူပူဇော်ခဲ့ပြီး မင်းဘူးခရိုင်အမှတ် ၁တပ်ရင်းရဲ့ တာဝန်ရှိသူတွေက အားပေးစကားပြောကြားခဲ့တယ်လို့ ဆိုပါတယ်။

အခုလို “ပြည်သူမှပြည်သူ ဝေမျှကူ”အစီအစဉ်မှာ ပါဝင်အားဖြည့်ပေးကြတဲ့ ပြည်သူတွေကို မင်းဘူးခရိုင်အမှတ် ၁တပ်ရင်း ရဲဘော်တွေက ကျေးဇူးတင်တယ်လို့ ထုတ်ပြန်ထားပြီး စစ်ရှောင်နေရာဒေသကွဲပြားနေ‌တဲ့ အိမ်ထောင်စုတွေလည်း ကျန်ရှိနေသေးတာကြောင့် ကျေးရွာ တာဝန်ရှိသူတွေနဲ့ ချိတ်ဆက်လှူဒါန်းနိုင်တယ်လို့လည်း မင်းဘူးခရိုင်အမှတ် ၁ တပ်ရင်းက အသိပေးထားပါတယ်။