Round Table Restaurant And Bar

भोट हाल्नु अघि पढौ।

ओलीले रटान मारिरहेकाछन् – “सिंहदरबार जलाउने आतङ्ककारी हुन् । बालेन त्यसका मतियार हुन् ।”
अघिल्लो दिन त्यतिका धेरै युवा सहिद भए । चुँ बोल्दैनन् । कसैले सोधे ठाडो जवाफ दिन्छन् – “मैले मारेको हुँ । पुलिसले मारेको हो । मैले किन जिम्मेवारी लिने ?”

ऊ देशको प्रधानमन्त्री थियो । अलिकति पनि जिम्मेवारी लिएन । अलिकति पनि शोक मानेन । अलिकति पनि सहानुभूति प्रकट गरेन । सहिद परिवारसँग माफी समेत मागेन । उसलाई किन भोट हाल्नुहुन्छ ?
अघिल्लो दिन मान्छे नमारेको भए भोलिपल्ट केही जल्दैन थियो । केही हुँदैन थियो । परिवर्तनको लागि आन्दोलन गर्नेलाई हाकाहाकी आतङ्ककारी भन्छ । उसलाई कसरी भोट हाल्नुहुन्छ ?

देशमा पालैपालो भ्रष्टाचार गर्ने ! पालैपालो एक–अर्कालाई बचाउने । “तँ पनि नबोल ! म पनि बोल्दिनँ । यदि बोलिस भने जानेको छु !” भन्ने ओली, देउवा र प्रचण्ड हुन् । यिनलाई फेरि किन भोट हाल्ने ? ललिता निवास किन टुङ्गो लागेन । गिरीबन्धु किन टुङ्गो लागेन । किन पोखरा विमानस्थलको आरोप टुङ्गो लागेन । यस्ता भ्रष्टाचारका सयौँ फाइल छन् । कर्मचारीतन्त्र भ्रष्ट छ । भन्सार, विमानस्थल सेटिङमा चल्छ । देशको गृहमन्त्री दैनिक यति मेरो भागमा पर्नुपर्छ भनेर कर्मचारीसँग घुसको भागी बस्छ । त्यो छानबिन हुँदैन । देशका जनतालाई शरणार्थी बनाएर विदेशमा बेच्न मन्त्री नै लागिपर्छ । अनि यिनीहरूलाई फेरि जिताउने ?

किन हाल्ने फेरि भोट ? किन जिताउने फेरि ?

एक रत्ति जिम्मेवारी नलिने मान्छेलाई झापा ५ का जनताले किन फेरि जिताउँछन् ! जनताले कसरी भोट हाल्छन् । हात काँप्दैन ।
जो सहिद भए तिनको अनुहार सम्झिनुस् । जो घाइते भए तिनको पीडा बुझ्नुहोस् । सहिदको अनुहारसँग आफ्ना छोराछोरी, आफन्त, प्रियजनको अनुहार राखेर हेर्नुहोस् । ओलीलाई भोट हाल्न मन लाग्छ ?
मन लाग्छ ?

हिजो ओली बोल्दै गरेको सुनेको थिएँ – “दमकमा टावर बनाएँ । सुरुङ मार्ग बनाएँ । पूर्व–पश्चिम बाटो ठूलो बनाएँ । हुलाकी मार्ग बनाएँ ।”
यो त उसले बनाउनै पर्छ । यो त उसको जिम्मेवारी हो । छोराछोरीलाई स्कुल पठाउनु बुबाआमाको जिम्मेवारी भएजस्तै ।
देशको प्रधानमन्त्री ऊ थियो । विकास चाहिँ अरुले गर्नुपर्ने हो र ! उहीसँग थियो देशको ढुकुटीको साँचो । अरू कसले बनाउनुपर्ने ? तपाईं–हामीले ?

यो युगमा आएर एउटा सुरुङ मार्ग बनाउँदा जनतालाई इमोशनल ब्ल्याकमेल गर्न मिल्छ देशको पूर्वप्रधानमन्त्रीले ? मिल्छ देशको नेताले ! मिल्छ देशको कथित “बा”ले ! इमोशनल ब्ल्याकमेल गर्न मिल्छ ?

न्युनतम विकाश भएको छ - त्यो विकास पनि दया गरेर गरिदिए जस्तो गर्न मिल्छ । “मलाइ के खाँचो ! मलाइ त सुतेरै खान पुगेकै थियो ! तिमारुकै लागि गरिदिएको हो ।” भन्ने भावको भाषा देशको पूर्व प्रधानमन्त्रीले बोल्न मिल्छ ।
बनाएको कुरा चाहिँ जिम्मा लिने अनि पुलिसले गोली हानेर मान्छे मारेको कुरा चाहिँ जिम्मा नलिने ?

“मेरो हातबाट मरेको होर ! म जिम्मा लऊँ !” भन्ने । त्यसो त धरहरा मज्दुरले बनाएको हो ! भन्नु –“मैले हैन ! मज्दुरले बनाएको हो ।” किन मैले बनाएको भनेको ?
किन ?
किन ?
ए जनता, किन भ्रममा बाँचेको ! आँखा खोल्ने बेला भएको छ । खोल्नुस् आखाँ ।

ए जनता, देशमा परिवर्तन चाहिएको छ । त्यो परिवर्तन तपाईं परिवर्तन भए मात्रै सम्भव छ । छोराछोरी त देश छाडेर टाढा–टाढा गइसके । तँपाई घरमा एक्लै हुनुहुन्छ । छोराछोरीलाइ रहर छ – देश राम्रो भएको हेर्ने । तिनको सपना छ – आफ्नै विकसित देशमा फर्केर आउने र आफ्नै बुबाआमासँग बस्ने ।
छाडिदिनुस् ओलीलाई ! यसपटक परिवर्तनको बाटो रोज्नुहोस् ।