Barangay RU 92.9 Super Radyo Kalibo

LOOK: BAG-ONG PICKLEBALL, BADMINTON, AG VOLLEYBALL COURTS SA PLAZA IT TANGALAN, GINAUMPISAHAN EON

Ginaumpisahan eon makaron ro konstruksyon it pinakabag-o nga dugang nga pasilidad sa town plaza it Tangalan para sa mga mahilig sa sports.

Suno sa pahayag ni Mayor Gene Fuentes, daya nga proyekto hay bilang sabat sa public demand ag sa mga nagapangutana kon ano ro gina-layout sa andang plaza.

Nasayuran nga ginatukod sa lugar ro daywang ka bag-ong multi-use courts nga sarang magamit para sa paghampang it pickleball, badminton, volleyball, ag iba pang mga aktibidad.

Gindugang pa it mayor nga ro nasambit nga pasilidad hay sangka LGU-funded project nga gintaeana agod mataw-an it nagakaigo nga lugar para sa sports ag kalingawan ro mga pumueuyo.

Padayon ro pag-ubra sa nasambit nga courts ag ginaeauman nga sa indi magbuhay hay pormal eon daya nga mabuksan ag ma-enjoy it publiko.

Photos/Information: Mayor Gene Fuentes/FB

CONG. MARQUEZ, GINADUSO RO PROACTIVE NGA PAGPAHAOM SA KALAMIDAD AG PAGGAMIT IT AI TECHNOLOGY

Nagpanawagan si Aklan First District Representative Jesus "Jess" R. Marquez nga bag-uhon eon ro pamaagi it panggobyerno pag-abot sa pagpahaom sa baha ag kalamidad, ag dapat nga ibase raya sa impormasyon halin sa teknolohiya.

Ginpaabot daya ni Rep. Marquez sa anang privilege speech sa Kamara. Dato nga panawagan hay nag-ugat matapos imaw ma-stranded it waeong oras sa NLEX bangud sa baha. Gintumod nana nga ro mga aberya nga kaparehas kara hay nagatuga it tuman nga perwisyo ag nagapabug-at sa sitwasyon it mga ordinaryong pamilyang Pilipino, eabi eon ro mga mangunguma ag mangingisda.

Suno kana, base sa datos it Philippine Statistics Authority (PSA), nag-abot sa P463 bilyon ro halit tuga it extreme weather events halin ku 2010 hasta 2019, kon siin haeos P290 bilyon kara hay nag-igo sa sektor it agrikultura.

Duyon nga rason nga gin-engganyo nana, bilang Chair it Committee on Science and Technology, ro mas ginpasangkad nga paggamit it Geographic Information Systems (GIS), Artificial Intelligence (AI), ag satellite data kaparehas it ginahimo it Philippine Space Agency (PhilSA) ag DOST-PAGASA agod makahimo it madasig nga flood extent maps ag early warning systems.

Apang ginkadismaya man it mamalidha ro kakueangan sa koordinasyon ag pagiging "fragmented" it mga ahensya it gobyerno nga buyot ro mga nagakasari-saring datos. Do pabalik-balik nga pagka-atrasado ag kakueangan sa madasig nga desisyon it gobyerno hay naga-resulta eamang sa mas mabahoe nga kahalitan imbes nga makasalbar it mga kabuhi ag paeangabuhian.

MODUS NA "RENTA-BENTA" O RENTA-TANGAY IT SAEAKYAN, GINA-IMBESTIGAHAN IT KALIBO PNP

Gina-imbestigahan it Kalibo PNP ro kuno hay "renta-benta" modus it mga saeakyan kung sa siin umabot sa ₱550,000 ro hadale halin sa sangka biktima.

Suno kay Kalibo PNP Chief Police Lieutenant Colonel Jerick Vargas sa pagpakig-angot it GMA Super Radyo Kalibo, nag-eapit kanda ku Setyembre 13 ro sangka indibidwal nga nagahingaeang "Kenneth." Nasayuran kara nga carnap ro habakae nana nga Toyota Avanza ku Setyembre 12 matapos makita sa sangka post sa Facebook nga ginasugid kara nga nirentahan eamang raya.

Habakae ni Kenneth ro saeakyan sa haegang ₱500,000 halin sa nagpakilaeang seller nga si Vincent Capoy Abella, kaibahan ro deed of sale nga may pirma it sangka Dalia Lafuente Sarmiento.

Mag-eowas kara, nagpauna it bayad man si Kenneth it ₱50,000 para sa sambilog pang Avanza nga saeakyan nga ginabaligya man kana.

Samtang, nag-eapit man sa istasyon ro sangka tag iya it car rental. Ginpahayag kara nga ku Setyembre 12 hay ginbalik kana it temprano it nagrenta nga si Angel Abella ro gin-arkila kara nga Toyota Avanza ku Setyembre 11 ag inaywanan ra sa Roxas Avenue.

Kat tan-awon na kara ro anang saeakyan, nakakita imaw it mga dokumentong nakapangaean sa anang kakilaea man nga nagapanag iya it car rental. Dikara na nasayran nga ro unang saeakyan nga nasambit hay ginrentahan eamang man ag ginbaligya.

Ap-at makaron ro ginatutukan sa imbestigasyon ro mag asawang sanday Vincent ag Angel Abella, Dalia Sarmiento, ag sangka eaeaking nakita sa CCTV footage.

Ginapahaum man it mga pulis ro kasong estafa ag carnapping kontra sa mga suspek, samtang ginapadahan man ni PLTCOL Vargas ro publiko nga mag-double check anay sa HPG o LTO bago magbakae it saeakyan.

Car Rental Business sa Aklan, Nabiktima it Modus nga "Renta-Tangay" o Renta-Benta

Ginreklamo it tag-iya it sangka car rental sa Kalibo Aklan ro pagkabiktima it andang negosyo sa modus nga ginatawag nga "renta-tangay" o "renta-benta."

Sa pagpakig-angot it Super Radyo Kalibo sa tag-iya nga si “LEE”, nag-ugat ro insidente kat mag-arkila it daywang adlaw ro sangka kliyente para sa andang bag-ong silver Toyota Avanza (2026 model). Nagbayad pa ro suspek it ₱4,000 para sa renta, ₱300 para sa car wash, ag nagtao pa it ₱1,000 nga tip.

Pero ku Sabado it tungang-gabii, nakabaton si Lee it tawag halin sa kapareho nga car rental owner. Nasayuran nana nga gin-aywan it suspek ro sangka itom nga Avanza nga inarkila man sa ibang kompanya sa may Roxas Avenue.Nagakabaeaka eon ro biktima kat makit-an kara nga idto sa sueod it gin- abandunang saeakyan ro mga kontrata, resibo, ag mga dokumento it anang kaugalingon nga saeakyan.

Sa bulig it Highway Patrol Group (HPG) sa pagpanguna ni Kaibahang Reniel Bartolome, hausoy ro anang silver Avanza nga nakaparada sa may Capitol maeapit sa Post Office .

Nagaguwa sa imbestigasyon nga ginbaligya it sindikato ro ₱1.3 million nga haeaga it Avanza sa biktimang buyer sa haegang ₱550,000 eamang (₱500,000 para sa silver Avanza ag ₱50,000 downpayment para sa itom nga Avanza).

Ginamitan raya it peke nga OR/CR nga gin-ubra ag gin-imprenta it grupo gamit ro mga detalye it saeakyan ni Lee, kung siin ginpaguwa pa nga 2023 model raya.

Madinaeag-on nga habawi ni Lei ro anang unit sa bulig it mga awtoridad ag naibalik kana raya it mga pulis.

Nagpaandam man imaw sa iba pang mga negosyante nga maging madahan, indi eagi magsalig sa mga transaksyon nga pinaagi eamang sa text o call, ag siguraduhon nga i-verify it mayad ro mga dokumento ag pagkatawo it ka-transaksyon.

Samtang nagpasaeamat man ra sa mga kaibahan nga nagapanag iya it car rental sa Aklan sa andang suporta ag bulig kana.

JUST IN: Daywa ka mga benepisyaryo it BBM Scholarship sa Brgy. Camaligan, Batan, ginbalik ro tig-Php20K nga ginbaton kasunod it mga batikos. Kaibahan kara ro unga it sangka kagawad it barangay.

Nakataeana man nga magbalik ku ginbaton nga kwarta ro unga it sangka seaman.