Ang Siklab

𝐀𝐍𝐓𝐀𝐁𝐀𝐘 𝐒𝐀 𝐁𝐔𝐇𝐀𝐘: 𝐏𝐑𝐂-𝐎𝐂, 𝐢𝐤𝐢𝐧𝐚𝐬𝐚 𝐚𝐧𝐠 𝐂𝐏𝐑 𝐝𝐚𝐲 𝐬𝐚 𝐂𝐂𝐀

Bilang paggunita sa National CPR Day, ikinasa ng Philippine Red Cross–Olongapo City Chapter (PRC-OC), sa pakikilahok ng Columban College, Inc. – Asinan Campus (CCA), ang Basic Life Support CPR Seminar and Simulation kanina, ika-24 ng Setyembre, sa Convery Hall.

Pinasinayaan ang programa sa pamamagitan ng panalangin na pinangunahan ni Czarina Reyes, pangulo ng Supreme Secondary Learner Government (SSLG), na sinundan ng pag-awit ng Lupang Hinirang at Philippine Red Cross Hymn.

Tinalakay ni G. Daniel Jason M. Fernandez, volunteer, ang pagkakaiba ng heart attack at cardiac arrest, dalawang kondisyong kadalasang napagkakamalang magkapareho sa usapin ng basic life support.

Binigyang-diin din ni Fernandez na hindi sa lahat ng pagkakataon ay kinakailangan ang mouth-to-mouth resuscitation, partikular sa mga sitwasyong maaaring isagawa ang hands-only CPR.

Itinuro rin sa mga kalahok ang wastong proseso ng pagsasagawa ng cardiopulmonary resuscitation (CPR), kabilang ang tamang posisyon ng kamay, bilis at lalim ng chest compressions, gayundin ang mga hakbang na dapat sundin upang makatulong na mapanatili ang sirkulasyon ng dugo habang hinihintay ang karagdagang tulong medikal.

Matapos ang talakayan, isinagawa ang aktuwal na simulation upang mailapat ng mga kalahok ang mga natutuhan sa seminar. Sa pamamagitan nito, naisagawa nila ang wastong pamamaraan ng CPR at iba pang pangunahing hakbang sa basic life support.

Ayon kay G. Dwite Armel B. Alida, EMT, mahalagang matutuhan ng mga kabataan ang basic life support upang maging handa sa mga sitwasyong nangangailangan ng agarang pagtugon.

“Napaka-essential nito [basic life support training] na matutunan ng bawat kabataan kasi ‘di natin alam kung kailan darating ang mga emergencies na ganito,” ani Alida.

Samantala, binigyang-diin ni Czarina na layunin ng programa na magkaroon ng kahit isang indibidwal sa bawat silid-aralan na may sapat na kaalaman sa wastong pagtugon sa mga emergency.

Layunin ng aktibidad na mapalawak ang kaalaman at kahandaan ng mga mag-aaral sa pagtugon sa mga sitwasyong nangangailangan ng agarang first aid at basic life support.

𝐔𝐥𝐚𝐭 𝐧𝐢 𝐀𝐥𝐯𝐢𝐧 𝐒𝐨𝐥𝐢𝐬
𝐌𝐠𝐚 𝐊𝐮𝐡𝐚𝐧𝐠 𝐋𝐚𝐫𝐚𝐰𝐚𝐧 𝐧𝐢 𝐊𝐲𝐥𝐞 𝐙𝐡𝐚𝐧𝐣𝐨 𝐌𝐮𝐞𝐠𝐚

𝐒𝐄𝐓𝐘𝐄𝐌𝐁𝐑𝐄 𝟎𝟖 | 𝐃𝐀𝐊𝐈𝐋𝐀𝐍𝐆 𝐊𝐀𝐏𝐈𝐒𝐓𝐀𝐇𝐀𝐍 𝐍𝐆 𝐊𝐀𝐏𝐀𝐍𝐆𝐀𝐍𝐀𝐊𝐀𝐍 𝐍𝐈 𝐍𝐈𝐍𝐀 𝐌𝐀𝐑𝐈𝐀

Sa pagdiriwang ng iyong kaarawan, tangan namin ang iyong tala na nagsisilbing liwanag sa madilim na karagatan.

Patuloy nawang gabayan ng Inang Mahal ang kaniyang sambayanang Columban para sa isang makabuluhang panuruang taon.

𝐌𝐚𝐥𝐢𝐠𝐚𝐲𝐚𝐧𝐠 𝐊𝐚𝐚𝐫𝐚𝐰𝐚𝐧, 𝐍𝐢𝐧𝐚 𝐌𝐚𝐫𝐢𝐚! 💙✨

𝕬𝖛𝖊 𝕸𝖆𝖗𝖎𝖆, 𝕲𝖗𝖆𝖙𝖎𝖆 𝕻𝖑𝖊𝖓𝖆!

𝐒𝐀 𝐁𝐀𝐖𝐀𝐓 𝐏𝐀𝐆𝐏𝐀𝐏𝐀𝐍𝐈𝐍𝐆𝐀𝐒, 𝐌𝐀𝐘 𝐓𝐀𝐎𝐍𝐆 𝐏𝐀𝐓𝐔𝐋𝐎𝐘 𝐍𝐀 𝐍𝐀𝐆𝐏𝐀𝐏𝐀𝐋𝐀𝐒𝐈𝐊 𝐍𝐆 𝐋𝐈𝐖𝐀𝐍𝐀𝐆 🔥✨

Kahapon, Agosto 27, ang buong pamayanang Columban ay nakiisa sa pagdiriwang ng isang taong hindi lamang humahakbang sa landas ng karunungan, kundi patuloy ding nagbibigay-init at inspirasyon sa mga taong kanyang ginagabayan.

𝗠𝗮𝗹𝗶𝗴𝗮𝘆𝗮𝗻𝗴 𝗞𝗮𝗮𝗿𝗮𝘄𝗮𝗻, 𝗗𝗿. 𝗙𝗿𝗮𝗻𝗰𝗶𝘀 𝗥𝗼𝗯𝗲𝗿𝘁 𝗠. 𝗗𝗲𝗹𝗮 𝗖𝗿𝘂𝘇!

Sa bawat payo, pag-unawa, at suportang inyong ipinagkakaloob, mas lalong nagiging makulay ang paglalakbay ng mga mag-aaral tungo sa kanilang mga pangarap. Ang inyong presensya ay nagsisilbing paalala na ang tunay na edukasyon ay hindi lamang nasusukat sa mga araling naipapasa, kundi sa mga buhay na naaabot at napapalakas.

Mula sa 𝑨𝒏𝒈 𝑺𝒊𝒌𝒍𝒂𝒃, maraming salamat po sa inyong patuloy na pagtangkilik at pagpapalakas sa aming tinig bilang kabataang mamamahayag.

Nawa’y patuloy kayong pagpalain ng Diyos ng lakas, karunungan, at panibagong ningas upang mas marami pang buhay ang inyong maapuyan ng inspirasyon.

Isang masigla, makabuluhan, at maalab na kaarawan po! ❤️‍🔥

— 𝗔𝗻𝗴 𝗦𝗶𝗸𝗹𝗮𝗯 | 𝗢𝗽𝗶𝘀𝘆𝗮𝗹 𝗻𝗮 𝗣𝗮𝗵𝗮𝘆𝗮𝗴𝗮𝗻𝗴 𝗣𝗮𝗻𝗴𝗸𝗮𝗺𝗽𝘂𝘀 𝘀𝗮 𝗙𝗶𝗹𝗶𝗽𝗶𝗻𝗼

[𝐋𝐀𝐓𝐇𝐀𝐋𝐀𝐈𝐍] 𝐒𝐚 𝐋𝐢𝐤𝐨𝐝 𝐍𝐠 𝐌𝐚𝐤𝐚𝐩𝐚𝐧𝐠𝐲𝐚𝐫𝐢𝐡𝐚𝐧𝐠 𝐇𝐢𝐥𝐢𝐧𝐠

May mga panalanging binibigkas nang pabiro.

“Sana tuloy-tuloy ang bagyo.”

“Sana suspended bukas.”

“Sana wala na namang pasok.”

“Sana mag-announce na si Mayor.”

Ngunit nitong mga nakaraang linggo, tila sunod-sunod ding nagpapaalala ang kalangitan na ang bagyo ay hindi lamang kuwento ng kanseladong klase.

Noong unang bahagi ng Hulyo, pumasok sa Philippine Area of Responsibility si Super Typhoon Inday, na sinundan ng Tropical Depression Kiyapo noong Hulyo 22. Lumakas ito bilang tropical storm at nag-landfall noong Hulyo 24, habang pinalakas ang Habagat na nagdulot ng patuloy na pag-ulan sa ilang bahagi ng bansa hanggang Hulyo 27.

Sa isang panig, isa lamang itong hiling para sa dagdag na pahinga — isang umagang walang tumutunog na alarma, walang paggising nang umaga para magplantsa, walang pagsusulit, at walang pagmamadaling pumasok sa paaralan.

Ngunit sa kabilang panig ng parehong ulan, may ibang umaga.

May mga batang hindi naghihintay ng anunsiyo ng suspensyon sa klase, kundi naghihintay ng paghupa ng tubig. May pamilyang hindi nagbibilang ng araw na may pasok, kundi mga gamit na maari pang maisalba. May tahanang hindi na ligtas na silungan. At higit sa lahat, may mga taong ang nais lamang ay matapos na ang bagyo.

Sapagkat hindi pare-pareho ang kinakaharap natin sa kalangitan. Habang ang ilan ay nakatingala sa madilim na ulap at umaasang magtuloy-tuloy ang ulan, may ilan namang nakatingala sa parehong ulap na may pangambang baka muling tumaas ang tubig.

Magkapareho ang kinahaharap nating bagyo, ngunit iba ang dala nitong bigat sa iba. Dito marahil nagiging mapanganib ang isang simpleng hiling — hindi dahil masama ang maghangad ng suspension, bagkus maaari nating makalimutang may buhay na nakataya sa likod ng ating kaginhawaan.

Hindi natin kailangan na ikahiya ang pagnanais na mawalan ng pasok. Hindi rin natin kailangan na magkunwaring hindi tayo napapagod sa pag-aaral. Ngunit bago natin hilingin na “sana tuloy-tuloy ang bagyo,” marahil ay maari muna nating isipin kung kaninong bubong ang kasalukuyang tinatangay ng bagyo.

Para sa iba, kapag may bagyo ay walang pasok. Sa iba naman ay kapag may bagyo ay walang katiyakan. Para sa iba ito ay paglikas, at para sa iba ay may tahanang maaring wala nang balikan.

Hindi lahat ng ulan ay dahilan para magdiwang. Hindi lahat ng suspensyon ay pahinga. At hindi lahat ng kalamidad ay pareho ang kwento sa bawat tahanan. Kaya sa susunod na mabuo sa ating mga labi ang isang hiling para sa isa na namang araw na walang pasok, alalahanin na may mga bagay na hindi nakikita sa loob ng ating silid-aralan.

Sa loob ng ating makapangyarihang hiling, may mga buhay na nakikipagbuno.

At wari, ang tunay na malasakit ay hindi pagtigil sa ating sariling hiling — bagkus ang pag-alala na may ibang taong maaaring magbayad ng halaga nito.

𝑰𝒔𝒊𝒏𝒖𝒍𝒂𝒕 𝒏𝒊 𝑱𝒉𝒂𝒏𝒂 𝑨𝒔𝒉𝒍𝒆𝒚 𝑩𝒂𝒏𝒅𝒊𝒍𝒍𝒐
𝑴𝒈𝒂 𝑮𝒓𝒂𝒑𝒊𝒌𝒐 𝒏𝒊 𝑨𝒍𝒗𝒊𝒏 𝑺𝒐𝒍𝒊𝒔

[𝐊𝐎𝐋𝐔𝐌𝐍] 𝐌𝐢𝐬𝐬𝐢𝐧𝐠 𝐢𝐧 𝐀𝐤-𝐒𝐎𝐍𝐀

Bawat taon, milyon-milyong Pilipino ang nakatutok sa State of the Nation Address (SONA) hindi lamang upang marinig ang mga nagawa ng pamahalaan, kundi upang malaman kung may mga kongkretong kasagutan ba sa mga problemang matagal nang nagpapabigat sa kanilang pamumuhay. Sa panahong patuloy na nararanasan ng marami ang mataas na presyo ng mga bilihin, kakulangan sa de-kalidad na trabaho, kahirapan, at mga sakunang dulot ng kalamidad, higit kailanman ay inaasahan ng publiko ang isang SONA na hindi lamang nagbibigay ng ulat, kundi naglalahad ng malinaw at nasusukat na direksiyon. Kaya naman, sa pagsusuri sa ikalimang SONA ni Pangulong Ferdinand Marcos Jr., mahalagang tanungin hindi lamang kung ano ang mga naipakita ng administrasyon, kundi kung sapat ba ang mga inilahad nitong solusyon upang tugunan ang pinakamahahalagang suliraning panlipunan ng bansa.

Sa ikalimang SONA ni Pangulong Ferdinand Marcos Jr., binigyang-diin ang kampanya laban sa korupsiyon, pagpapatibay ng pambansang seguridad, imprastraktura, at iba't ibang programang pangkabuhayan. Gayunpaman, sa kabila ng mahahalagang paksang ito, kapansin-pansing kulang ang masinsing pagtalakay sa ilang pangunahing isyung panlipunan na patuloy na direktang nakaaapekto sa buhay ng milyun-milyong Pilipino.

Una, bagama't ipinakita ang pag-unlad ng ekonomiya at pagpasok ng mga pamumuhunan, hindi nito lubusang sinagot ang mas mahalagang tanong: Paano mapapabuti ang kalidad ng trabaho? Totoong bumaba ang antas ng kawalan ng trabaho, subalit ayon sa Philippine Statistics Authority (PSA), nasa 12.2% pa rin ang antas ng kakulangan sa trabaho noong Mayo 2026. Nangangahulugan ito na mahigit isa sa bawat sampung manggagawa ang naghahanap pa rin ng dagdag na oras o mas disenteng trabaho dahil hindi sapat ang kanilang kinikita. Kung walang kongkretong hakbang upang makalikha ng mga trabahong may sapat na sahod, seguridad sa trabaho, at oportunidad para sa pag-unlad, mananatiling limitado ang pakinabang ng paglago ng ekonomiya sa karaniwang Pilipino.

Higit pa rito, hindi rin nabigyan ng sapat na pansin ang usapin ng kahirapan. Ayon sa PSA, 15.5% ng mga Pilipino ang nabubuhay pa rin sa ibaba ng pamantayan ng kahirapan, katumbas ng milyun-milyong mamamayang patuloy na nahihirapang matugunan ang kanilang pangunahing pangangailangan. Bagama't binanggit sa SONA ang iba't ibang programang panlipunang proteksiyon, hindi malinaw kung paano sistematikong mababawasan ang kahirapan sa pamamagitan ng pagpapalakas ng agrikultura, pagpapataas ng produktibidad, at paglikha ng mas maraming disenteng trabaho. Ang ayuda ay mahalaga bilang agarang tugon, ngunit hindi ito sapat upang tuluyang maiahon ang mga pamilya sa kahirapan.

Kasunod nito, nanatiling kulang ang pagtalakay sa krisis sa edukasyon. Sa resulta ng Pandaigdigang Pagtataya sa Kasanayan ng mga Mag-aaral (PISA) 2022, nananatiling kabilang ang Pilipinas sa mga bansang may pinakamababang pagganap sa pagbasa, matematika, at agham. Bagama't binanggit ang pagpapatuloy ng mga reporma sa sektor ng edukasyon, hindi naman malinaw kung paano tutugunan ang kakulangan sa mga silid-aralan, g**o, kagamitang pampagkatuto, at ang pagbaba ng antas ng pagkatuto na naranasan ng mga mag-aaral matapos ang pandemya. Kung walang tiyak na layunin at kongkretong hakbang, mananatiling mabagal ang pag-angat ng kalidad ng edukasyon sa bansa.

Samantala, naging matapang ang paninindigan ng Pangulo laban sa korupsiyon sa mga proyekto sa pagkontrol ng pagbaha. Ang utos na imbestigahan at papanagutin ang mga opisyal na sangkot sa katiwalian ay isang hakbang na nararapat lamang. Gayunpaman, ang pananagutan ay simula pa lamang ng tunay na solusyon. Hindi sapat ang pagpapakulong sa mga nagkasala kung wala ring malawakang plano para sa pag-angkop sa pagbabago ng klima, rehabilitasyon ng mga pinagkukunan ng tubig, maayos na pagpaplano ng mga lungsod, at mahigpit na pagpapatupad ng mga batas pangkalikasan. Sa harap ng lumalalang epekto ng pagbabago ng klima, ang bansa ay nangangailangan hindi lamang ng imbestigasyon kundi ng isang pangmatagalang estratehiya upang maiwasan ang paulit-ulit na pagbaha at sakuna.

Sa kabilang banda, nararapat ding kilalanin ang mga positibong bahagi ng SONA. Ang pagbibigay-diin sa laban kontra korupsiyon, seguridad ng bansa, at pagpapatuloy ng mga proyektong pang-imprastraktura ay nagpapakita ng hangarin ng administrasyon na tugunan ang ilang mahahalagang usapin. Gayunpaman, ang mabuting layunin ay hindi awtomatikong katumbas ng sapat na solusyon. Ang tunay na sukatan ng mahusay na pamamahala ay hindi ang dami ng programang inihayag, kundi ang lawak ng pagbabagong nararamdaman ng mga mamamayan sa kanilang araw-araw na pamumuhay.

Dito nagiging makabuluhan ang mensahe ng kartung editoryal. Ang plakard na may salitang "SOLUSYON" ay kumakatawan sa mga pangakong inihahayag sa entablado ng SONA, samantalang ang mga piraso ng palaisipan na nahuhulog ay sumisimbolo sa mga suliraning nananatiling hindi pa nabubuo sa isang malawakang plano. Ipinahihiwatig nito na bagama't may mga inilatag na programa at pangako, may mahahalagang bahagi ng larawan ang nananatiling kulang. Hangga't walang malinaw at magkakaugnay na tugon sa kahirapan, trabaho, edukasyon, at katatagan laban sa epekto ng pagbabago ng klima, mananatiling pira-piraso ang ipinapangakong "solusyon."

Sa huli, ang isang SONA ay hindi dapat masukat sa husay ng retorika o dami ng palakpakan. Mas mahalagang itanong kung ang mga inilahad ba ay may malinaw na layunin, tiyak na mekanismo, sapat na pondo, at nasusukat na kinalabasan. Sapagkat sa isang bansang patuloy na humaharap sa magkakaugnay na suliranin, hindi sapat ang mga pangako. Ang tunay na solusyon ay hindi nasusukat sa mga salitang binibigkas sa podyum, kundi sa mga pagbabagong nararanasan ng bawat Pilipino matapos ang talumpati.

𝑰𝒔𝒊𝒏𝒖𝒍𝒂𝒕 𝒏𝒊 𝑨𝒍𝒗𝒊𝒏 𝑺𝒐𝒍𝒊𝒔
𝑫𝒊𝒃𝒖𝒉𝒐 𝒏𝒊 𝑱𝒊𝒍𝒊𝒂𝒏𝒆 𝑩𝒖𝒆𝒏𝒂𝒗𝒆𝒏𝒕𝒖𝒓𝒂

𝐌𝐚𝐭𝐚𝐭𝐚𝐩𝐚𝐧𝐠. 𝐌𝐚𝐭𝐚𝐭𝐚𝐥𝐢𝐧𝐨. 𝐖𝐚𝐥𝐚𝐧𝐠 𝐭𝐚𝐤𝐨𝐭 𝐤𝐚𝐡𝐢𝐭 𝐤𝐚𝐧𝐢𝐧𝐨.

Para sa iba, ang pagpatak ng Agosto ay bagong bukas, ngunit, para sa mga kabataang puno ng determinasyon at buong lakas na lumaban para makapasok sa Unibersidad ng Pilipinas, ito ay hindi lamang bagong bukas, ito ang magdidikta ng kanilang buhay sa susunod na apat na taon.

Kaya't sa ating mga kapwa Columbanista na buong tapang na humarap sa hamon ng pagiging Iskolar ng Bayan, nawa'y sa susunod na apat na taon, ang mga mirasol ay tumingala, katulad nang kung paano kayo nangarap nang mataas.

𝐏𝐚𝐝𝐚𝐲𝐨𝐧, 𝐦𝐠𝐚 𝐬𝐮𝐬𝐮𝐧𝐨𝐝 𝐧𝐚 𝐈𝐬𝐤𝐨 𝐧𝐠 𝐁𝐚𝐲𝐚𝐧! 🌻

𝑮𝒓𝒂𝒑𝒊𝒌𝒐 𝒏𝒊 𝑨𝒍𝒗𝒊𝒏 𝑺𝒐𝒍𝒊𝒔
𝑪𝒂𝒑𝒕𝒊𝒐𝒏 𝒏𝒊 𝑮𝒊𝒂𝒏 𝑩𝒐𝒓𝒈𝒐𝒏𝒊𝒂

[𝐁𝐀𝐋𝐈𝐓𝐀] 𝐏𝐍𝐏, 𝐂𝐂𝐀 𝐬𝐚𝐧𝐢𝐛-𝐩𝐮𝐰𝐞𝐫𝐬𝐚 𝐬𝐚 𝐩𝐚𝐠𝐩𝐚𝐩𝐚𝐭𝐮𝐩𝐚𝐝 𝐧𝐠 𝐛𝐮𝐥𝐥𝐲𝐢𝐧𝐠 𝐩𝐫𝐞𝐯𝐞𝐧𝐭𝐢𝐨𝐧, 𝐤𝐚𝐥𝐢𝐠𝐭𝐚𝐬𝐚𝐧 𝐬𝐚 𝐩𝐚𝐚𝐫𝐚𝐥𝐚𝐧

Sa pangunguna ng Olongapo City Police Office–Police Station 3, idinaos ang Symposium on Bullying Prevention and School Safety Awareness noong Hulyo 23 sa Convery Hall ng Columban College Inc. - Asinan Campus upang palawakin ang kamalayan ng mga mag-aaral hinggil sa pag-iwas sa bullying at pagpapanatili ng kaligtasan sa loob at labas ng paaralan.

Pinangunahan ni Dr. Francis M. Dela Cruz ang programa bilang punong tagapagdaloy, kasama si Dr. Alysa Mae C. Abella, katuwang na punong-g**o ng paaralan.

Binuksan ang programa sa Entrance of Colors ng Boy Scouts of the Philippines (BSP) at Girl Scouts of the Philippines (GSP), na sinundan ng panalangin sa pangunguna ni Ms. Kimberly Suarez at pag-awit ng Philippine National Anthem at Columban Hymn.

Sa kaniyang mensahe ng pagtanggap, binigyang-diin ni Rev. Fr. Eric E. Dela Cruz ang kahalagahan ng pagkakapantay-pantay, paggalang sa kapwa, at inklusibong kapaligiran bilang saligan ng ligtas na pamayanan sa paaralan.

Ipinakilala naman ang mga tagapagsalita mula sa Olongapo City Police Office–Police Station 3.

Tinalakay ni Police Corporal (PCPL) Julie Ann R. Atacador ang Anti-Bullying, kabilang ang kahulugan, mga uri, at epekto ng bullying sa biktima, nang-aapi, at mga saksi. Ipinaliwanag din niya ang mga nararapat na hakbang sa oras na makaranas o makasaksi ng bullying at ang mga paraan upang maiwasan ito.

Binigyang-diin din niya ang kahalagahan ng pagiging positibong impluwensiya sa kapwa sa pamamagitan ng mensaheng, “Be the reason someone feels safe, respected, and valued—not the reason they are afraid to come to school.” Ipinaalala rin niya ang mahahalagang probisyon ng Republic Act No. 11313 o Safe Spaces Act (Bawal Bastos Law).

“Maging vigilant sa lahat ng oras dahil hindi ninyo alam kung sino ang maaari ninyong pagkatiwalaan sa panahon ngayon,” ani Atacador.

Kasunod nito, ipinakilala ni Police Lieutenant (PLT) Epifanio Galang ang ikalawang tagapagsalita na si Patrolman (PAT) Calvin Kim Bernabe.

Tinalakay ni Bernabe ang mga protocol sa panahon ng active shooting incident. Ipinaliwanag niya ang mga tungkulin ng mga g**o at mag-aaral sa pagpapanatili ng kaligtasan sa oras ng emerhensiya, gayundin ang mga hakbang bago, habang, at matapos ang isang insidente ng pamamaril.

Naging aktibo rin ang mga student leaders sa Open Forum, kung saan naglahad sila ng mga katanungan at paglilinaw kaugnay ng mga paksang tinalakay.

Nagkaloob naman ng mga sertipiko at tokens of appreciation ang Columban College Inc. sa mga tagapagsalita at kinatawan ng Philippine National Police bilang pagkilala sa kanilang naging ambag sa programa.

Sa kaniyang pangwakas na mensahe, nagpahayag ng pasasalamat si Dr. Alysa Mae C. Abella sa Philippine National Police, Health Services Office, mga g**o, BSP, GSP, at mga student leaders na naging katuwang sa pagsasagawa ng symposium.

“Kung sakaling mayroon po kayong nararanasan na may kaugnayan sa bullying, bukas po ang inyong mga adviser, subject teachers, club organization advisers, ang aking opisina, at ang opisina ni Sir Segundo upang tulungan kayo. Huwag po kayong matakot na magsumbong,” ani Abella.

Sa kabuuan, binigyang-diin ng symposium ang kahalagahan ng paggalang sa karapatan ng bawat isa, responsableng paggamit ng social media, at pananatiling mapagmatyag sa mga banta sa seguridad upang maisulong ang isang ligtas at inklusibong kapaligiran sa paaralan.

𝑼𝒍𝒂𝒕 𝒏𝒊𝒏𝒂 𝑳𝒆𝒓𝒊𝒏𝒄𝒆 𝑫𝒆𝒍𝒐𝒔 𝑹𝒆𝒚𝒆𝒔 𝒂𝒕 𝑮𝒊𝒂𝒏 𝑩𝒐𝒓𝒈𝒐𝒏𝒊𝒂
𝑴𝒈𝒂 𝑲𝒖𝒉𝒂𝒏𝒈 𝑳𝒂𝒓𝒂𝒘𝒂𝒏 𝒏𝒊 𝑨𝒍𝒗𝒊𝒏 𝑺𝒐𝒍𝒊𝒔

[𝐁𝐀𝐋𝐈𝐓𝐀] 𝐃𝐞𝐥𝐚 𝐂𝐫𝐮𝐳, 𝐩𝐨𝐫𝐦𝐚𝐥 𝐧𝐚𝐧𝐠 𝐢𝐝𝐢𝐧𝐞𝐤𝐥𝐚𝐫𝐚𝐧𝐠 𝐛𝐚𝐠𝐨𝐧𝐠 𝐩𝐚𝐧𝐠𝐮𝐥𝐨 𝐧𝐠 𝐂𝐂𝐈

Pormal nang nanumpa sa tungkulin si Rev. Fr. Eric Dela Cruz bilang bagong pangulo ng Columban College, Inc. (CCI) matapos ang isinagawang Ritu ng Pagtatalaga kasunod ng banal na misa ngayong Hulyo 23 sa Pandiyosesis na Dambana at Parokya ni San Columban.

Pinangunahan ni Lubhang Kagalang-galang Bartolome G. Santos Jr., Obispo ng Diyosesis ng Iba, ang banal na misa at ang seremonya ng pagtatalaga na nagbigay ng opisyal na pagkilala kay Dela Cruz bilang bagong pinuno ng institusyon.

Dinaluhan ng mga miyembro ng Board of Trustees, administrador, g**o, kawani, at iba pang kinatawan ng kolehiyo ang seremonya bilang pagtanggap sa bagong pangulo.

Matapos ang misa, isinagawa ang Ritu ng Pagtatalaga na nagsimula sa prusisyon ng krusipiho, mga liturhikal na kulay, at watawat ng Columban College, Inc. Sinundan ito ng pagpasok ng Board of Trustees, mga administrador kasama si Dela Cruz.

Pormal na iniharap si Dela Cruz sa obispo ng isa sa mga miyembro ng Board of Trustees sa pamamagitan ng pagbasa ng Decree na nagpapatibay sa kaniyang pagkakahirang bilang pangulo ng kolehiyo.

Bilang huling bahagi ng seremonya, isinabit kay Dela Cruz ang sablay at ipinagkaloob ang institution seal mace, mga sagisag ng awtoridad, pananagutan, at paglilingkod sa pamayanan ng Columban College.

Sa kaniyang talumpati, nagpahayag si Dela Cruz ng pasasalamat sa komunidad ng Columban College sa mainit na pagtanggap at ibinahagi ang kaniyang hangaring higit pang mapaunlad ang institusyon sa pamamagitan ng sama-samang paglilingkod at pamumuno.

𝙐𝙡𝙖𝙩 𝙣𝙞 𝘼𝙡𝙫𝙞𝙣 𝙎𝙤𝙡𝙞𝙨
𝙈𝙜𝙖 𝙇𝙖𝙧𝙖𝙬𝙖𝙣𝙜 𝙆𝙪𝙝𝙖 𝙣𝙞𝙣𝙖 𝙁𝙧𝙖𝙣𝙘𝙞𝙨 𝙍𝙤𝙗𝙚𝙧𝙩 𝘿𝙚𝙡𝙖 𝘾𝙧𝙪𝙯 (𝙏𝙖𝙜𝙖𝙥𝙖𝙮𝙤), 𝙃𝙚𝙡𝙤𝙞𝙨𝙚 𝙏𝙖𝙣, 𝙖𝙩 𝘼𝙡𝙫𝙞𝙣 𝙎𝙤𝙡𝙞𝙨

[𝐁𝐀𝐋𝐈𝐓𝐀] 𝐁𝐚𝐠𝐨𝐧𝐠 𝐦𝐠𝐚 𝐨𝐩𝐢𝐬𝐲𝐚𝐥𝐞𝐬 𝐧𝐠 𝐏𝐓𝐅𝐀, 𝐢𝐧𝐢𝐡𝐚𝐥𝐚𝐥; 𝐄𝐬𝐩𝐨𝐬𝐨, 𝐤𝐢𝐧𝐢𝐥𝐚𝐥𝐚𝐧𝐠 𝐛𝐚𝐠𝐨𝐧𝐠 𝐩𝐚𝐧𝐠𝐮𝐥𝐨

Nahalal ang mga bagong opisyal ng Parents, Teachers, and Friends Association (PTFA) ng Columban College Inc. – Asinan Campus para sa Panuruang Taon 2026–2027 sa isinagawang halalan noong Hulyo 22 sa Convery Hall.

Pinangunahan ni Dr. Francis Robert M. Dela Cruz ang programa bilang tagapagdaloy.

Pinasinayaan naman ni Gng. Judith Edquilane ang panalangin, na sinundan ng pag-awit ng Lupang Hinirang, at Columban Hymn.

Nagbigay din ng kaniyang mensahe ang Katuwang na Punongg**o, Dr. Alyssa Mae Abella na binigyang-diin ang halaga ng partisipasyon ng mga magulang sa mga gawaing pampaaralan.

Bago ang halalan, ibinihagi ng kasalukuyang mga opisyales ang kanilang accomplishment report na nag-ulat sa iba't ibang mga proyektong naisagawa ng naunang administrasyon.

Nahalal bilang pangulo si Jesselyn G. Esposo, kasama sina Maria Concepcion D. Sabeniano bilang bise-presidente, April L. Coll bilang kalihim, Nelly R. Dimarucut bilang ingat-yaman, Bonnivie M. Solis bilang awditor, at sina Dr. Francis Robert M. Dela Cruz at G. Lambert Esconde bilang mga kinatawang g**o.

Ayon kay Esposo, pagbabatayan ng asosasyon ang mga pangunahing pangangailangan ng paaralan at ng mga mag-aaral sa pagpapatupad ng mga proyekto.

“Hindi kami basta-basta gumagastos. Inaalam talaga namin kung ano ang higit na kailangan ng paaralan at ng mga estudyante,” ani Esposo.

Idinagdag ni Esposo na nakahanda ang mga opisyal na gampanan ang kanilang mga tungkulin sa pakikipagtulungan sa paaralan sa kabila ng limitadong bilang ng mga miyembro ng asosasyon.

𝑼𝒍𝒂𝒕 𝒏𝒊 𝑳𝒆𝒓𝒊𝒏𝒄𝒆 𝑵𝒊𝒄𝒐𝒍𝒆 𝒅𝒆𝒍𝒐𝒔 𝑹𝒆𝒚𝒆𝒔
𝙈𝙜𝙖 𝙇𝙖𝙧𝙖𝙬𝙖𝙣𝙜 𝙆𝙪𝙝𝙖 𝙣𝙞 𝘼𝙡𝙫𝙞𝙣 𝙎𝙤𝙡𝙞𝙨

𝐋𝐀𝐓𝐇𝐀𝐋𝐀𝐈𝐍 | 𝐀𝐑𝐀𝐖 𝐍𝐆 𝐊𝐀𝐋𝐀𝐘𝐀𝐀𝐍

𝗛𝗮𝗻𝗴𝗴𝗮𝗻𝗴 𝗦𝗮𝗮𝗻 𝗔𝗮𝗯𝗼𝘁 𝗮𝗻𝗴 𝗦𝗮𝗿𝗮𝗻𝗴𝗴𝗼𝗹𝗮 𝗠𝗼?
ni Alvin Solis

"Matayog ang lipad ng saranggola ni Pepe,
Matayog ang pangarap ng matandang bingi."

Sa paglipad ng saranggola sa bughaw na langit, sumasabay ang gunita ng isang bayang matagal na naghangad ng kalayaan. Sa kasaysayan ng Pilipinas, ang paggapang sa kasarinlan ay hindi naging mabilis ni magaan. Ito ay bunga ng mahigit tatlong siglong kolonyalismong Espanyol, at ng mga sumunod pang yugto ng pananakop at pag-aangkin ng kapangyarihan mula sa ibang dayuhan.

Sa dulo ng mahabang pakikibaka, isang makasaysayang sandali ang naganap noong Hunyo 12, 1898 sa Kawit, Cavite, nang ideklara ang kalayaan ng Pilipinas sa pamumuno ni Emilio Aguinaldo. Ngunit ang tagpong ito, bagama’t makabuluhan, ay hindi naging ganap na wakas ng laban. Sumunod ang Digmaang Pilipino-Amerikano (1899–1902), kung saan libo-libong Pilipino ang nag-alay ng buhay para sa patuloy na hangaring makamit ang tunay na kasarinlan.

"Umihip ang hangin nawala sa paningin,
Sigaw ng kahapon nilamon ng alon."

Sa agos ng panahon, maraming alaala ang unti-unting natatabunan ng bagong karanasan at kasalukuyang hamon. Ngunit ang kasaysayan ay hindi dapat maging anino lamang ng nakaraan. Ito ang ugat ng ating pagkatao bilang isang bansa. Ang paglimot dito ay pagputol sa pinanggagalingan ng ating kamalayan bilang malayang mamamayan.

"Hinuli ang ibon pinagsuot ng pantalon,
Tinali ng pisi hindi na nagsinturon."

Ang imahen ng ibong hindi makalipad ay sumasalamin sa mas malalim na anyo ng kalayaan. Hindi ito natatapos sa pagwawakas ng pananakop. Ito ay nasusukat sa kakayahan ng isang lipunan na bigyan ang mamamayan ng dignidad, pagkakataon, at katarungan. Hanggang sa kasalukuyan, nananatiling hamon ang kahirapan, hindi pantay na oportunidad, at mga sistemikong suliranin na humahadlang sa ganap na diwa ng kalayaan.

"Dumaan ang jeepney at gumuhit pa sa kalye."

Sa bawat bakas ng kalsada, sa bawat galaw ng pang-araw-araw na buhay, nakaukit ang kasaysayan. Ang kasalukuyan ay hindi hiwalay sa nakaraan. Bagkus, ito ay pagpapatuloy. Ang kalayaan, kung gayon, ay hindi lamang alaala ng isang makasaysayang deklarasyon, kundi isang responsibilidad na araw-araw isinasabuhay.

"Kumakaway sa bakod ang anghel na nakatanod,
Sumusuway sa utos puso’y sinusunod."

Sa paggunita ng Araw ng Kalayaan, hindi sapat ang pagwagayway ng watawat o pag-awit ng pambansang awit. Ang tunay na diwa nito ay nakasalalay sa pagpili ng katotohanan kaysa panlilinlang, pakikilahok kaysa pananahimik, at paninindigan kaysa pagwawalang-bahala.

Tulad ng saranggola, ang kalayaan ay nangangailangan ng hangin upang lumipad, ngunit nangangailangan din ng kamay na marunong humawak sa lubid. Kapag binitiwan, ito ay maaaring tangayin ng hangin ng kaguluhan. Ngunit kapag inalagaan at pinatatag, ito ay patuloy na aabot sa mas malawak na himpapawid. Isang himpapawid ng pag-asa, katatagan, at hinaharap.

Sa huli, nananatili ang tanong sa bawat pagtingala sa langit:
𝐇𝐚𝐧𝐠𝐠𝐚𝐧𝐠 𝐬𝐚𝐚𝐧 𝐧𝐚𝐭𝐢𝐧 𝐤𝐚𝐲𝐚𝐧𝐠 𝐩𝐚𝐚𝐛𝐮𝐭𝐢𝐧 𝐚𝐧𝐠 𝐬𝐚𝐫𝐚𝐧𝐠𝐠𝐨𝐥𝐚 𝐧𝐠 𝐚𝐭𝐢𝐧𝐠 𝐤𝐚𝐥𝐚𝐲𝐚𝐚𝐧?

Grapiko ni Alvin Solis