Apna Yasin

عوامی شکایات کا فوری نوٹس لیتے ہوئے اسسٹنٹ کمشنر یاسین، سہرش رحمت نے فوڈ ڈیپارٹمنٹ کے عملے کے ہمراہ یاسین بازار کا مفصل دورہ کیا۔انہوں نے مختلف دکانوں پر چھاپے مار کر غیر معیاری اور مضرِ صحت پاپڑ فروخت کرنے والوں کے خلاف کارروائی کی۔دورانِ کارروائی بھاری مقدار میں ناقص پاپڑ برآمد ہوئے، جنہیں موقع پر ہی تلف کر کے جلا دیا گیا۔اس اقدام کا مقصد عوام، بالخصوص بچوں کی صحت اور خوراک کے معیار کو یقینی بنانا ہے۔اسسٹنٹ کمشنر نے تمام دکانداروں کو سخت ہدایت کی کہ آئندہ غیر معیاری اشیاء کی فروخت سے مکمل اجتناب کیا جائے۔انہوں نے واضح کیا کہ دوبارہ خلاف ورزی کی صورت میں سخت قانونی کارروائی کے ساتھ ساتھ بھاری جرمانے بھی عائد کیے جائیں گے۔

گلگت بلتستان: دیامر، چلاس میں امن اور ترقی کے لیے گرینڈ جرگے کا انعقاد

جرگے میں کمانڈر ایف سی این اے، سکیورٹی اداروں کے سربراہان، مقامی عمائدین، علمائے کرام اور ضلعی انتظامیہ کے نمائندوں نے شرکت کی۔

جرگے میں خطے کی مجموعی سیکیورٹی صورتحال اور ترقیاتی منصوبوں پر تفصیلی تبادلۂ خیال کیا گیا، جن میں دیامر بھاشا ڈیم کی بروقت تکمیل کو خطے کی معاشی ترقی کے لیے کلیدی منصوبہ قرار دیا گیا۔

تعلیم کے شعبے میں بہتری اور تعلیمی سہولیات میں اضافے پر بھی زور دیا گیا۔

کمانڈر ایف سی این اے نے واضح کیا کہ دیامر کے امن پسند عوام کے تعاون سے دہشت گردی اور شرپسندی کا مکمل خاتمہ کیا جائے گا۔

انہوں نے کہا کہ پاک فوج ہمیشہ عوام کے ساتھ کھڑی ہے اور خطے کے امن و استحکام کے لیے بھرپور کردار ادا کرتی رہے گی۔

اس موقع پر شرکاء کا کہنا تھا کہ پاک فوج اور خصوصاً کمانڈر ایف سی این اے نے اپنے دورِ تعیناتی کے دوران دیامر میں امن، استحکام اور ترقی کے لیے اہم کردار ادا کیا، جس کے لیے یہاں کے مقامی عمائدین، علمائے کرام اور عوامی نمائندے انکے بے حد مشکور ہیں ۔

شرکاء نے اس عزم کا اعادہ کیا کہ مستقبل میں بھی دیامر کے امن، اتحاد اور پائیدار ترقی کے لیے باہمی تعاون اور رابطے کا سلسلہ جاری رکھا جائے گا۔

گلگت: وزیر اعلیٰ گلگت بلتستان امجد حسین سے سیکٹر کمانڈر ایس سی او کرنل کاشف ملاقات کررہے ہیں

گلگت بلتستان میں سرکاری ملازمین کی چھٹیوں پر پابندی۔
گلگت بلتستان حکومت نے انتظامی امور اور عوامی خدمات کی مؤثر فراہمی کو یقینی بنانے کے لیے سرکاری ملازمین کی تمام اقسام کی چھٹیوں پر فوری طور پر ایک ماہ کے لیے پابندی عائد کر دی ہے۔
تاہم طبی، مطالعاتی اور زچگی کی چھٹی اس پابندی سے مستثنیٰ ہوں گی، جو متعلقہ قواعد و ضوابط اور مجاز اتھارٹی کی منظوری سے مشروط ہوں گی۔

گلگت : وزیر اعلی گلگت بلتستان امجد حسین 16 میگاواٹ نلتر پاور پراجیکٹ اور سولر پراجیکٹس کے حوالے سے منعقدہ اعلی سطحی اجلاس کی صدارت کر رہے ہیں۔

چائینہ میں بین الاقوامی انڈر 16 فٹبال چیمپئن شپ میں نمایاں کامیابی حاصل کرنے کے بعد گلگت پڑی بنگلہ سے تعلق رکھنے والے زیدان شاہ نواز نے اسلام آباد میں وزیراعلیٰ گلگت بلتستان امجد حسین ایڈوکیٹ سے ملاقات کی۔ اس موقع پر وزیراعلیٰ گلگت بلتستان نے علاقے کا نام روشن کرنے اور ٹورنامنٹ کا بیسٹ ڈیفینڈر اعزاز حاصل کرنے پر مبارکباد پیش کی اور انہیں شیلڈ بھی پیش کی۔ وزیراعلیٰ گلگت بلتستان نے کہا کہ زیدان شاہ نواز نئی نسل کےلئے مشعل راہ ہے صحت مندانہ سرگرمیوں میں حصہ لینے سے نوجوان زہنی طور پر مستحکم ہوجاتے ہیں۔

وزیراعظم محمد شہباز شریف نے نیویارک میں اقوام متحدہ کی جنرل اسمبلی کے 81ویں اجلاس کے موقع پر عزت مآب پرنس رحیم آغا خان پنجم سے ملاقات کی۔
وزیراعظم نے پرنس رحیم آغا خان پنجم کا پرتپاک خیرمقدم کیا اور رواں سال کے اوائل میں آغا خان کے دورۂ پاکستان کے دوران ہونے والی اپنی ملاقات کو خوشگوار الفاظ میں یاد کیا۔
وزیراعظم نے پاکستان کے ساتھ دیرینہ دوستانہ اور مثبت تعلقات کو مستحکم رکھنے کے لیے پرنس رحیم آغا خان کے عزم کو سراہتے ہوئے امن، استحکام اور ترقی کے مشترکہ مقاصد کے حصول کے لیے ان کے ساتھ قریبی تعاون جاری رکھنے کے عزم کا اعادہ کیا۔
وزیراعظم نے پاکستان کی سماجی و اقتصادی ترقی میں بالخصوص اسماعیلی برادری کی دیرینہ خدمات کو سراہا اور معاشرے کے لیے خدمت اور شہری شمولیت کی اس کی قابلِ قدر روایت کو اجاگر کیا۔
وزیراعظم نے اے-کے۔ڈی-این (AKDN)سے وابستہ اداروں کی مالیاتی شمولیت، سیاحت کے فروغ، ثقافتی ورثے کے تحفظ اور مقامی آبادی کی شمولیت سے معاشی خودمختاری کے فروغ کے لیے گراں قدر خدمات کو بھی سراہا۔