Latif Ranjish

پہلے تو میں شوریدہ صداؤں کی خبر لوں
پھر شہر کی گستاخ ہواؤں کی خبر لوں

اے خلوتِ جانانِ جہاں دیکھ لوں تم کو
یوں فکر کی نادیدہ خلاؤں کی خبر لوں

اک بار ذرا حالت دل مجھ پہ عیاں ہو
فرصت سے پھر ان کہنہَ بلاؤں کی خبر لوں

اک دھوپ ہے محشر سی میرے سر پہ ابھی تک
ایسے میں بھلا کیسے میں چھاؤں کی خبر لوں

اے مرگِ جہاں ایک ذرا اور ٹھہر جا
پہلے میں طبیبوں کی، دواؤں کی خبر لوں

یہ کارِ جہاں بھی تو میرے سر ہے کہ، رنجش!
ان سرکش و عیاش خداؤں کی خبر لوں

#رنجش

سیلاب خوں سے سارا بدن زیرِ آب ہے
حیرت ہے پھر بھی ایسے میں اس دل کو تاب ہے

اک پردۂِ انا ہے جو حائل ہے درمیاں
اس پار دیکھئے تو صنم بے نقاب ہے

آمد سے اس جناب کی روشن ہوا جہاں
اس کی جبین ہے کہ کوئی آفتاب ہے

جو تجھ کو دیکھ لے وہی قسمت کا ہے دھنی
جو تجھ سے آ ملا ہے وہی کامیاب ہے

یہ چشمِ نارسا ہے بس اس کی تلاش میں
دل تو ہر اک گھڑی بحضورِ جناب ہے

قلبِ سلیم ساقی ہے، اور دل ہے میکدہ
سوزِ جگر پیالہ ہے آنسو شراب ہے

اک بار جو گیا وہ گیا کام کاج سے
ساقی تمہاری بزم کا نشہ عزاب ہے

رنجش اب ایک ایک قدم پھونک پھونک کر
راہِ وفا کٹھن ہے بہت پیچ و تاب ہے

#رنجش

#اردو
#فارسی
#شاعری

تازہ منقبت

میں غدیری ہوں میرا پیر علی ہے جانی
میرا رتبہ میری توقیر علی ہے جانی

ضربت خیبر خندق ہو کہ ہو بدر حنین
جس سے لگتی ہے وہ شمشیر علی ہے جانی

وہ جو بیداری میں معراج پہ دکھلایا گیا
خواب احمد کی وہ تعبیر علی ہے جانی

بائے بسمل بھی وہی تقطہِ با بھی ہے وہی
سورۂِ حمد کی تفسیر علی ہے جانی

جو نبوت سے امامت کو ملا دیتی ہے
مرضیِ حق کی وہ زنجیر علی ہے جانی

ورنہ میں اور سخن! میل نہیں تھا کوئی
میرے اشعار کی تاثیر علی ہے جانی

#رنجش

ڈاکٹر تاجور علی تاج کی یہ تصنیف An English Anthology of Classical Shina Poetry
گلگت بلتستان کے 21 ممتاز شینا شعراء کے کلاسیکل کلام کا انگریزی میں منظوم ترجمہ ہے، جس میں انہوں نے لفظی ترجمے کی بجائے شاعرانہ حسن، روح اور جمالیات کو برقرار رکھتے ہوئے انگریزی شعری اصولوں کے مطابق ترجمہ کیا ہے۔ 335 صفحات پر مشتمل اس کتاب میں شامل تمام شعراء کی شاعری دہائیوں سے مقبول ہے، اور مصنف نے واضح کیا ہے کہ کلاسیکل شاعری کے معیارات پر پورا اترنے والے شعرا ہی اس زمرے میں شامل کیے گئے ہیں۔

یہ کتاب شینا زبان و ادب کے عالمی سطح پر تعارف اور تحفظ کے لیے ایک اہم سنگِ میل ہے، یہ کام مقامی ثقافتی ورثے کو بین الاقوامی قارئین تک پہنچانے کا قابلِ قدر کارنامہ ہے، جس کی نئی نسل کو اپنی زبانوں اور تہذیب پر تحقیق کرنے کی ترغیب دینی چاہیے۔

*اور مجھے اس بات کی خوشی اور ایک طرح کا فخر بھی محسوس ہو رہا ہے کہ اس بیش قیمتی کتاب میں اور ان غظیم شعرا کی فہرست میں مجھ فقیر کو بھی شامل کیا گیا ہے
یہ میرے لئے اب تک کا سب سے بڑا اعزاز ہے*

Dr Tajwar Ali Associate professor College of Liberal Arts, Qilu Institute of Technology
آپ ایک ڈاکٹر ہیں جو کہ چائنا میں ایسوسی ایٹ پروفیسر ہیں
یہ کتاب اس امر کی زندہ مثال ہے کہ آپ حضرات کی اس دھرتی یہاں کی ثقافت زبان اور تہذیب سے بے پناہ محبت کی زندہ مثال ہے
آپ جیسے بیٹے ہی ہیں جو کہ ہمیں اور ہماری زبان رہتی دنیا تک زندہ رکھنے کا کارنامہ سرانجام دے سکتے ہیں

خامشی کی صدا خدا کی صدا
گونجتی ہے سدا خدا کی صدا

ہاں وہی ہے جو مجھ میں بولتا ہے
میری حمد و ثنا خدا کی صدا

دل جو یہ لا الہ کہتا ہے
ہے یہی با خدا خدا کی صدا

لہنِ منصور سے ابھرتی رہی
بے دھڑک برملا خدا کی صدا

یہ غزل بھی تو ہے اسی غزل
بعد از قافیہ خدا کی صدا

#رنجش