Hunza News

پاک چین سرحد Mintika pass پر تاریخ میں پہلی بار مشترکہ مشقیں

تاریخ میں پہلی بار پاک چین سرحد پر Mintika پاس، سطحِ سمندر سے تقریباً 4,600 میٹر کی بلندی پر چینی فوج اور گلگت بلتستان پولیس کی خنجراب سیکیورٹی پولیس (KSP) کے مابین مشترکہ سرحدی مشقوں کا انعقاد کیا گیا۔

خنجراب سیکیورٹی پولیس کے جوانوں نے مسلسل دو روز تک دشوار گزار پہاڑی راستوں سے سفر کرتے ہوئے Mintika سرحدی مقام پر پہنچ کر مشترکہ سرحدی مشقوں میں حصہ لیا۔ ان مشقوں کا مقصد بلند ترین اور دشوار گزار سرحدی علاقوں میں باہمی رابطے، پیشہ ورانہ مہارت اور سرحدی سیکیورٹی سے متعلق عملی صلاحیتوں کو مزید مؤثر بنانا تھا۔

اس موقع پر چینی فوج کی جانب سے خنجراب سیکیورٹی پولیس کے جوانوں کے اعزاز میں پرتکلف ضیافت کا اہتمام کیا گیا۔ چینی فوج کی جانب سے مختلف اقسام کے ہتھیاروں اور دفاعی سازوسامان کی نمائش بھی کی گئی، جبکہ باہمی خیرسگالی اور دوستانہ تعلقات کے فروغ کے لیے پولیس جوانوں میں تحائف بھی تقسیم کیے گئے۔

یہ مشترکہ سرگرمی دونوں ممالک کے سیکیورٹی اداروں کے درمیان باہمی تعاون، پیشہ ورانہ روابط اور دوطرفہ دوستانہ تعلقات کی عکاس ہے۔

ہنزہ کے قابل اور ایماندار افسران کو نظرانداز کرنا ناقابلِ قبول ہے، ظہور کریم ایڈووکیٹ

ضلع ہنزہ میں قابل، تجربہ کار اور ایماندار مقامی افسران کو مسلسل نظرانداز کرکے ایسے افسران کی تعیناتی، جن کی کارکردگی اور ساکھ پر عوامی سطح پر سوالات اٹھتے رہے ہیں، انتہائی تشویشناک امر ہے۔ ہنزہ کے عوام یہ سوال کرنے میں حق بجانب ہیں کہ آخر ہنزہ کی انتظامی اور ترقیاتی ضروریات کے لیے مقامی طور پر دستیاب قابل افسران کو ترجیح کیوں نہیں دی جاتی؟

ایس ڈی پی او ہنزہ کی اچانک تبدیلی اور منتخب نمائندے کی جانب سے افسر کی تعیناتی کے مطالبے پر عملدرآمد نہ ہونا بھی عوامی تشویش کا باعث ہے۔ ایسے انتظامی فیصلوں سے عوام میں یہ تاثر پیدا ہوتا ہے کہ ہنزہ کے جائز مطالبات اور عوامی نمائندگی کو اہمیت نہیں دی جا رہی۔

گلگت بلتستان کے مختلف اضلاع سے ایسے افسران کو ہنزہ میں تعینات کرنا، جن کی کارکردگی پر عوامی اعتراضات موجود ہوں، قابلِ تشویش ہے۔ حکومت کو چاہیے کہ افسران کی تعیناتی میں میرٹ، دیانت داری، تجربے اور مقامی حالات سے واقفیت کو بنیادی معیار بنائے۔

ہم وزیرِ اعلیٰ گلگت بلتستان اور آئی جی گلگت بلتستان سے پُرزور مطالبہ کرتے ہیں کہ ضلع ہنزہ میں قابل، دیانتدار اور فرض شناس افسران کو تعینات کیا جائے، جبکہ انتظامی فیصلوں میں عوامی نمائندوں اور عوامی مفاد کو بھی مناسب اہمیت دی جائے۔

ہنزہ کے عوام کو شفاف، غیرجانبدار اور مؤثر انتظامیہ کا حق حاصل ہے، اور اس حق کے تحفظ کے لیے ہر آئینی و قانونی فورم پر آواز بلند کی جائے گی۔

الیکشن قریب آتے ہی درجنوں امیدوار ہنزہ سے الیکشن لڑنے آ جاتے ہیں، مگر ہنزہ کے حقیقی مسائل پر بات کرنے سے ڈرتے ہیں۔ عوام کو ایسے موسمی امیدواروں سے جواب مانگنا ہوگا

ظہور کریم ایڈووکیٹ
سابقہ صدر پی پی پی ہنزہ و سابقہ امیدوار جی بی ایل اے، حلقہ 6 ضلع ہنزہ

ہنزہ: 20 سال سے قبضہ شدہ زمین واگزار، بیوہ خاتون کو مالکانہ حقوق مل گئے

التت ہنزہ: نائب تحصیلدار علی آباد ہنزہ نے کارروائی کرتے ہوئے 20 سال سے غیر قانونی طور پر قبضہ شدہ زمین واگزار کروا دی۔

ذرائع کے مطابق چند افراد نے ایک بیوہ خاتون کی زمین پر گزشتہ 20 سال سے غیر قانونی قبضہ کر رکھا تھا، جسے انتظامیہ نے واگزار کروا کر متاثرہ خاتون کو مالکانہ حقوق فراہم کر دیے۔

ہنزہ: عطا آباد جھیل کے اطراف صفائی مہم کا آغاز
ڈپٹی کمشنر ہنزہ فیاض احمد کی خصوصی ہدایات کی روشنی میں عطا آباد جھیل اور اس کے اطراف کو صاف ستھرا، خوبصورت اور ماحول دوست رکھنے کے لیے صفائی مہم کا باقاعدہ آغاز کر دیا گیا۔
صفائی مہم اسسٹنٹ کمشنر گوجال اور متعلقہ مجسٹریٹ کی زیرِ قیادت بوٹ ایسوسی ایشن، مقامی رضاکاروں اور دیگر متعلقہ افراد کے تعاون سے شروع کی گئی، جس کے دوران عطا آباد جھیل کے اطراف موجود کچرے کو جمع کرکے مناسب طریقے سے ٹھکانے لگانے کے اقدامات کیے گئے۔
اس موقع پر شرکاء نے اس عزم کا اظہار کیا کہ عطا آباد جھیل جیسے اہم سیاحتی مقام کی خوبصورتی اور قدرتی ماحول کو برقرار رکھنے کے لیے صفائی کا عمل مستقل بنیادوں پر جاری رکھا جائے گا۔ مقامی بوٹ آپریٹرز، رضاکاروں اور سیاحتی شعبے سے وابستہ افراد پر بھی زور دیا گیا کہ وہ جھیل اور اس کے اطراف صفائی کا خصوصی خیال رکھیں اور سیاحوں میں بھی صاف اور محفوظ ماحول کے حوالے سے شعور اجاگر کریں۔
انتظامیہ کی جانب سے عوام، مقامی کمیونٹی، بوٹ ایسوسی ایشن، ہوٹل مالکان، سیاحوں اور رضاکاروں سے اپیل کی گئی کہ وہ عطا آباد جھیل کو صاف رکھنے میں اپنا کردار ادا کریں اور کچرا مقررہ مقامات پر ڈالیں۔