Frontier Digital

خیبر پختونخوا کا خوبصورت علاقہ نتھیاگلی اہم تفریحی مقام کی حیثیت رکھتا ہے، جہاں واقع 'مکشپوری ٹاپ' کی سیر کے لیے لوگ بڑی تعداد میں رخ کر رہے ہیں۔ تقریباً 10 ہزار فٹ کی بلندی پر واقع اس چوٹی تک پہنچنے کے لیے انتہائی دشوار گزار اور سرسبز پہاڑی راستوں سے گزرنا پڑتا ہے۔ تمام تر دشواریوں کے باوجود قدرتی حسن اور پرفضا مقام سے لطف اندوز ہونے کے لیے کوہ پیمائی اور تفریح کے شوقین افراد کی بڑی تعداد یہاں پہنچتی ہے۔

خیبر پختونخوا کے عوام اس وقت مہنگائی، بے روزگاری، شدید غربت، بدامنی اور بنیادی سہولیات کی عدم دستیابی جیسے سنگین بحرانوں سے دوچار ہیں۔ سیاسی کشمکش اور مسلسل جلسے جلوسوں کے ماحول میں عام شہریوں کی جانب سے تشویش کا اظہار کیا جا رہا ہے کہ محض نعرے بازی اور سیاسی بیانیے عوام کے بنیادی مسائل کا حل نہیں ہیں۔ صوبے کے روزمرہ متاثرین کا کہنا ہے کہ سیاست سے بالاتر ہو کر حکومت کو روزگار کی فراہمی، صحت و تعلیم کے نظام کی بہتری اور امن و امان کی بحالی پر توجہ دینی چاہیے۔ عوام کا بنیادی سوال یہی ہے کہ مسلسل سیاسی بحران کے درمیان ان کے روزمرہ کے حقیقی مسائل پر عملدرآمد کب شروع ہوگا۔

ڈیرہ اسماعیل خان میں گومل یونیورسٹی کے پنشنرز پنشنز اور واجبات کی عدم ادائیگی پر جی پی او چوک میں سراپا احتجاج ہیں۔ فرنٹیئر ڈیجیٹل سے گفتگو کرتے ہوئے مظاہرین نے موقف اختیار کیا کہ ایک طرف انصاف کی فراہمی کا دعویٰ کیا جا رہا ہے تو دوسری جانب سالہا سال خدمت کرنے والے ریٹائرڈ ملازمین اپنے بنیادی حقوق سے محروم ہیں۔ پنشنرز نے وزیراعلیٰ خیبر پختونخوا اور صوبائی وزیر اعلیٰ تعلیم مینا خان آفریدی سے فوری مداخلت اور مطالبات کی منظوری کا مطالبہ کیا ہے۔ مظاہرین کا کہنا ہے کہ جب تک واجبات کی مکمل ادائیگی نہیں کی جاتی، جی پی او چوک میں احتجاجی کیمپ جاری رہے گا۔

سابق گورنر خیبرپختونخوا اقبال ظفر جھگڑا نے فرنٹئیر ڈیجیٹل سے گفتگو کرتے ہوئے نئے پولیس ایکٹ پر تحفظات کا اظہار کیا۔ انہوں نے وزیراعلیٰ خیبرپختونخوا کی سندھ اور پنجاب میں سیاسی سرگرمیوں پر بھی سوال اٹھاتے ہوئے کہا کہ کیا وہ دونوں صوبوں سے فارغ ہو کر ہی اپنے صوبے پر توجہ دیں گے؟

پاکستان تحریک انصاف کے مسلسل جلسے جلوسوں اور احتجاج کے باعث وفاقی دارالحکومت اسلام آباد کے شہری شدید پریشان ہیں۔ انتظامیہ کی جانب سے کنٹینرز لگا کر مرکزی شاہراہوں اور داخلی راستوں کو بند کرنے سے شہریوں کی روزمرہ کی نقل و حرکت سخت متاثر ہو رہی ہے۔ سڑکوں کی بندش کے باعث دکانداروں کے کاروبار، دفاتر جانے والے ملازمین کی آمدورفت اور طلبہ کا تعلیمی حرج ہو رہا ہے، جبکہ ایمرجنسی کی صورت میں ہسپتالوں تک رسائی بھی انتہائی دشوار ہو چکی ہے۔