Akha Newcreation Studio

kalizaq-aq. kali nawq-eu lafkhoer ur-eu mae
26-07-2026 คริสเตียนคือพระคริสต์ในตัวคุณ

“Zaftaq-euq heujeq, yawshaef khanqsaer arnavni sanr-eu garkawv, Miqyaer, aqcawq tsawrjeuq tsawrca-euq ghanrcae jawr-eu aqyawf maf-anr bi siqnya mawf-eu mae. Zaftaq-euq jeq heu-aq, Kali, nawmaf-euq lafkhoer jawr-eu mirnae, nawmaf, yawshaef khanqsaer za’ni noeqtmqduq pyeuf-eu mae.”
‭‭(Gawrlawrsaer‬ ‭1‬:‭27‬)

Sanqpaq Yeqsur Aqyawf yawshaef khanqsaer za-euq nar-aq, yawshawr saflar saevdav lef-awr aqdui naeq-aer jawrle-euq mae, Kalizaq-aq, Miqyaer lafnyir paw jawr-awr nawq-anr cawba-eu maqngeur-a, Aefkhawf nawq-eu lafkhoer jawrluf-eu kali-aq, daef-eu jeq pyeuf-awr, aqdir pyeuf-eu kali nawq-eu saflar lafkhoer ur-eu jeq pyeuf mae,

Nawq-eu buq-ir-eu jeq-aq, kali-euq lafkhoer ur-eu mae, Tsawrhaq tiqghaq kali-euq lafkhoer jawrnar-aq…laer aertaq-euq mae, (2Gawrliqtu 5:17) kalizaq-aq, kali nawq-eu lafkhoer ur-eu mae, nawq-eu daefzir lafkhoer kali byaqhaw naeq-eu mae, Aqyawf-eu yawshaef khanqsaer hawr-eu aqyawf-eu arghaer bi mawr-eu mae, Sanqpaq Yeqsur aer-eu, “Ngar, Aqda-euq lafkhoer jawr-awr, Aqda, ngaq-euq lafkhoer jawr-eu mae laer nawr maqjan-eu le lor? Ngar, nawmaf-anr aernaeq-eu dawqdeuq-aq, ngaq-euq aryaq zmq-awr aer-eu maqngeur. Aerkhawf, ngaq-euq lafkhoer jawr-eu Aqda, aqyawf-euq gar heudeuq mrluf-eu mae. Ngar, Aqda-euq lafkhoer jawr-awr, Aqda, ngaq-euq lafkhoer jawr mae laer jan-awq. Maqngeur nar-aq, gar khoerdeuq-euq baqda’nae taef-aer khawf ngaq-anr jan-awq.”laer aertaq-euq mae (‭‭Yorhaq‬ ‭14‬:‭10‬-‭11‬)

Khoer-aq, nymq-mr pyeufluf-eu nawq-eu daefzir mae, Aqda Miqyaer nawq-eu lafkhoer jawrluf-eu mae, Miqyaer-euq daef-eu jeq, yawshaef khanqsaer, hawr-eu tsaq-awr dawr-eu jeq nawq-eu pawnae dovle-eu mae, zanr-aq, lafnyir paw jawr-eu Miqyaer-anr bi siqnya-eu taef mae. Aerkhawf kalizaq-aq, kali nawq-eu lafkhoer bidaef-eu mae, kali nawq-eu lafkhoer daefluf-eu mae, Teumirnae aqmyanluf heujeq nae nawq-eu cardawq hawr-eu Nawr dzardziv-awr noeqkeuv-eu jeq bipyeuf-awq,

Shir-eu jeq, nar-eu gawr-eu jeq, ghaq baq-eu jeq, hawr-eu coqdzae-eu jeq, nawq-eu daefzir lafkhoer maqjav-a, Aqjeqmirnae aernar-aq, kali nawq-eu lafkhoer jawr-eu mirnae nawq-anr Miqyaer lof-aer bidur-eu mae, kali nawq-eu lafkhoer laer aer-eu dawqtsuif-aq, nawq-eu lafkhoer ur-eu ghaqler-eu jeq, nawq-eu lafkhoer ur-eu khaqduq ni ghae-eu jeq, hawr-eu nawq-eu lafkhoer ur-eu ghaq khav-eu jeq-anr aermawf-eu mae, kali nawq-eu lafkhoer laer aer-eu-aq, nawq-eu daefzir lafkhoer ur-eu yawshaef khanqsaer, gardzaq garkawv-anr urlanr nya-eu jeq, hawr-eu naef saqdaq, naef yawjawf, siqbuir lanma, hawr-eu shir-eu jeq-anr uvlanr-eu gar aermawf-eu mae! Haleluya?

Heu-aq Kalizaq mae, Khoer-aq nawq-eu lafkhoer ur-eu Miqyaer byaqhaw naeq-eu jeq pyeuf mae, Miqyaer-euq daef-eu jeq nawq-eu daefzir pawnae byaqdov-eu mae, Miqyaer guiqlanq-anr jaceuq ma,

mr-eu jan-eu dawq
Byankuf-eu lafkhoer, ghaq khav-eu lafkhoer, hawr-eu yawshaef khanqsaer lafkhoer nae kali ngaq-eu daefzir lafkhoer jawrluf-eu mae, Teumirnae Ngar, khaqduq ni ghae-eu lafkhoer, Miqyaer-euq zaqsiq tsawrganr, ghaqler-eu jeq, hawr-eu uvlanr-eu lafkhoer yawdaef daef-eu ma, naef saqdaq-anr ghaqler-euq ma, naef yawjawf deuq, shiqbuiq lanma, hawr-eu shir-eu jeq-anr ghaqler-euq ma, nawq-eu daef-eu jeq Ngaqmaf-eu daefzir-anr dovlar-awr, ngamaf-eu daefzir pawnae byaqdovlef-eu mae, Aqmeq

Heugar guilanq nya-eu
Gaqlaqtiv 2:20/ Yorhaq 14:20/ Lormav 8:10

Nawq-eu lafkhoer pawnae Baoq pyaeqdov-awq
24-07-2026 จงปลดปล่อยฤทธิ์อำนาจจากภายใน

“Muiq-eu Saflar taef-aer daef-eu jeq bif-eu ghaq pyeuf-eu mae. Shiqshaq-aq, tiqjeq-iq gardanr maqtsoeq-a. Ngaq nae nawmaf-anr aernaeq-euq dawq-aq, saflar hawr-eu daef-eu jeq pyeuf-eu mae.”
(‭‭Yorhaq‬ ‭6‬:‭63‬)

Nawr, tsawrhaq yawshuif pyeuflar-euq nar-aq, Nawr, lafnyir pawnae Baoq nuideuq maqpar loq-eu mae, Nawr, loq-eu Boaq dawqtawvluf khoer Nawr-eu mawrdo lafkhoer ur-eu mae, Nawr yawshawr saflar za-euq mar-aq, Nawr kharngeur-eu jeq-anr lavpar nya-eu zanqler paq-aer ghae-eu Baoq za-euq mae, Baoq heu-aq, (Yawkov 5:16) lafkhoer aertaq-euq khoer mae, Miqyaer nawq-anr bi’mr mawf-eu jeq khoer-aq, nawq-eu lafkhoer pawnae aqmyanluf Baoq bi pyaeqdov mawf-eu mae,

dzeurlaf ngae Ngar, huiq-eu yawbui janr-eu laer laeqhmq luf ngae ngar Miqyaer-anr baoq biflanq naeq laer shar-euq ma, Aerkhawf Miqyaer ngaq-eu saflar lafkhoer heulof-aer aer-eu mae, Nawr, ya’janr-eu jeq-aq, Nawr javluf-awr, nawq-eu lafkhoer ur-eu baoq khoer ya pyaeqdov-eu mae laer aer-eu mae, Khoernar-aq, Ngar Miqyaer-anr narhaq-euq, Ngar aqjox-aer pyaeqdov nya-eu la? Miqyaer aerkhof laf-eu” Khoer-aq. Nawr jan-eu lafkhoer nae mr-eu jeq mae” khoer mirnae ngar tiqpov taef-aer ghovshaw-euq ma

Khoer ngaemir ngar dawqmaeq maeqluf ngae, Ngaq-eu lafkhoer nae ircuf lawrgawv lof-aer yoerdov lef-eu Miqyaer-euq baoq-anr siqlar nya, khoergar naenar-aq, mqdmr lof-aer ghae-eu juqkhoeq. yaqkhoe martaq-euq mirtsa nae dovlar-awr, jawrduq khoertsanr byanle taq-euq mae, khoer-aq, Miqyaer-euq yawshaef khanqsaer mae, juqkhoeq khoer aqyawf maf-anr zawcaev ngae aqyawfmaf gur-eu mae, jawrduq khoertsanr jawr-eu nar-eu gawr-eu tsawrhaq khawf taqler-euq mae, Miqyaer guiqlanq-anr jaceuq ma

Aernaeq mawf-eu aqyaer huiq-eu jeq-aq, Baoq khoer mq khoertav nae oeka-awr, jawrduq khoertsanr byanle-euq maqngeur-a, Aerkhawf ngaq-eu lafkhoer nae dovle-euq mae, Aqjeqmirnae aernar-aq, “daef-eu jeq bif-eu ircuf lawrgawv aqyawf-eu lafkhoer nae yoerdovlef taef-a, laer Sanqpaq Yeqsur aer-eu mae, Aqyawf aqyawf-anr jan-awr yawshawr saflar za-euq tsawrhaq deuq-anr aerkeuv luf-eu mae, iqnan yawshawr saflar aqyawf khoerghaq nawq-eu lafkhoer jawrluf-eu mae,

Nawq nae ngaeqdovlef-euq dawq khoer-aq, yawshawr saflar byan-eu dawq mae, Khoer-aq Baoq byan-eu mae, dawq khoer-aq, daefluf-awr, lavsav taq-eu jeq, puirpyaeq-euq jeq, hawr-eu zanqler paq-aer ghae-eu jeq bi dovlar-eu mae, Teumirnae lafnyir pawnae tiqjeq nav bi dovlar-eu laer taqdawq, nawq-eu jan-eu dawq nae. nawq-eu lafkhoer ur-eu baoq pyaeqdov lef-awq, daef-eu jeq-anr ngaeqkeuv-awq, lavsav taq-eu jeq-anr ngaeqkeuv-awq, kakhof-eu jeq-anr ngaeqkeuv-awq, nawq-eu lafkhoer ur-eu daef-eu jeq bif-eu ircuf lawrgawv nae. nawq-eu dawqpae jawr-eu tsawrhaq-anr bi lavpar-awq. Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, ngamaf-eu lafkhoer ur-eu zanqler paq-aer ghae-eu Baoq gharduq guiqlanq huiqma, guiqlanq yawdzanr hawr-eu yawshaef khanqsaer ngamaf-eu lafkhoer yoerdov lef-awr, aqcawq-anr lavsav taq-awr, guiqlanq bif-eu uqtaf ghaq bif-eu mae, iqnan ngamaf aqcawq-eu daefzir lavpar-eu gharduq Miqyaer-euq ghaq hawr-eu Miqyaer-euq zaqsiq tsawrganr lafkhoer nae mr-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Yorhaq 7:38-39/ Lurkaf 17: 21/ 2Gawrliqtu 4:7

Nawq-eu lafkhoer ur-eu tsaqtsov-eu jeq
23-07-2026 การเจิมของพระคริสต์ในตัวคุณ

“Miqyaer, Naqzaqlaer tsawrhaq Yeqsur-anr Yawshawr Saflar hawr-eu baoq nae tsaqtsov-euq mae….
‭‭(Ghaqkhaer‬ ‭10‬:‭38‬)

Kali-euq lafkhoer Miqyaer nae aqdui-anr kurtaq-euq jeq, lafshawq, hawr-eu guiqlanq yawdzanr, beugar-eu mae,
Aerkhawf yawshawr saflar aqyawf tiqghaq-anr nae oe-euq tsaqtsov-eu jeq mae, Nawr yawshawr saflar za-euq nar-aq, Nawr Kali-euq tsaqtsov-eu jeq za-eu mae. Nawr teunav maqtser huiq-eu tsaqtsov-eu jeq-anr maqloq-a, Nawq nae zalaf-euq tsaqtsov-eu jeq khoer-aq, Sanqpaq Yeqsur-anr Kali bipyeuf-lar-euq mae, Khoer-aq, yawshawr saflar mae

(Ghaqkhaer 10:38) lafkhoer Sanqpaq Yeqsur-anr Yawshawr Saflar hawr-eu baoq nae tsaqtsov-euq ngalaer mawrlar-eu mae, Heugar aermawf-eu heu-aq, tsaqtsov-eu heu 2jeq jav-a. laer aermawf-eu maqngeur-a, yawshawr saflar nae tsaqtsov-eu jeq za-eu-aq, Baoq nae tsaqtsov-euq jeq zaq-euq gar khawf aermawf-eu mae,


(‭‭Ghaqkhaer‬ ‭1‬:‭8‬) lafkhoer Sanqpaq Yeqsur aer-eu “Aerkhawf, Yawshawr Saflar, nawmaf-euq khoertav zafkale ngae, nawmaf baoq za taef-a. laer aer-eu mae, Baoq-aq, yawshawr saflar naeq-aer oe-eu mae, yawshawr saflar nawq-eu lafkhoer urlar nar-aq, Nawr khawf Miqyaer-anr nae oe-euq mqtav-euq lafshawq za-euq mae, Nawr-aq Miqyaer gharduq bimr-eu laer bi tserdov taq-euq mae

Yawshawr saflar pawnae nymq-mr Nawr, yawtsaq yawdawr dawq hawr-eu mqtav mirkhanq-eu gargawv nafshuir ni ghovshaw lar-euq mae, Nawr-aq tsawrhaqzaq-eu zaqsiq tsawrganr taf-aer dzaeq-eu hawkhaeq-anr nae hawnya lar-euq mae, Aqjeqmirnae aernar-aq, Nawr yawshawr saflar-euq zaqsiq tsawrganr ‘anr-eu mae, Nawr-aq zanqler paq-aer daef-awr zanqler paq-aer ghae-eu Miqyaer-euq gar bimr-eu laer ghaq zataq-euq mae,

Nawr, Kali-euq yawshaef khanqsaer hawr-eu tsaq-awr dawr-eu lafkhoer yawdaef daef-eu gharduq yawshawr saflar nawq-anr sheuqghae-awr, ghaq bif luf-eu uqtaf nawq-anr laeqhmq luf-eu mae, Miqyaer nae nawq-anr khaerdar taq-euq jeq mr-awq, yawqnan navluf yawshawr saflar nawq-eu lafkhoer jawr-awr gar mrluf mae, laer noeqkeuv-awr nae yawdaef daef-awq


Ngamaf-anr Gaqdui dui-eu Aqda Miqyaer-or, Ngamaf-anr yawshawr saflar hawr-eu Baoq nae tsaqtsov naeqlaf-euq mirnae guiqlanq huiqma, yawshawr saflar ngamaf-eu lafkhoer jawr-awr gar mrluf-eu gar ngamaf noeqkeuv-eu ma, Ngamaf Miqyaer nae khaerdar taq-euq jeq mr-eu gharduq guiqlanq yawdzanr tiqbyan ni zataq-euq ma, Miqayer-euq yawshaef khanqsaer dovlar-eu mae, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Ghaqkhaer 1:8/ Lurkaf 24:49/ 1Yorhaq 2:20

Daef-eu jeq bif-eu ircuf lawrgawv
21-07-2026 แม่น้ำที่มีน้ำดำรงชีวิต

“Yawbui bui-eu arsaqsaq ngae nan-aq, huiqdzaeq-eu nan mae. Yeqsur gawqyawf yawf-awr, tersar yawkhav-aer heulof-aer aer-eu mae, “Ircuf kharmaef-eu tsawrhaq, ngar jawr-eu gar lar-awr dawrlar-awq. Ngaq-anr jan-eu tsawrhaq-aq, Yaerbof boftaq-euq lof-aer, ‘Aqyawf-euq nuima-anr nae daef-eu jeq bif-eu ircuf lawrgawv yoerdovlef taef-a.’ ” Yeqsur heulof-aer aer-eu-aq, aqyawf-anr jan-eu tsawrhaq deuq aqkar muiq-eu Saflar za-eu gar aermawf-eu mae. Aqjeq mirnae aqkar za-eu laer aernar-aq, Yeqsur yawshaef khanqsaer maqza-euq siq mirnae, aqyawf maf-anr Yawshawr Saflar maq bifdan-aq siq.”
‭‭(Yorhaq‬ ‭7‬:‭37‬-‭39‬)

Nawr, marjawv ni ghovshaw nya-eu gharduq Sanqpaq Yeqsur nae ‘aer-euq dawq heudawq-anr yawmuiq-aer ya povtser haw-eu mae, Sanqpaq Yeqsur aer-eu ”Ngaq-anr jan-eu tsawrhaq-aq” Yaerbof boftaq-euq lof-aer…laer aertaq-euq mae, Sanqpaq Yeqsur aermawf-eu jeq khoer-aq, Nawr yaerbof-anr boftaq-euq lof-aer aqyawf-anr jan nar-aq, laer aermawf-eu mae, daef-eu jeq bif-eu ircuf lawrgawv nawq-eu lafkhoer nae yoerdov lef-eu mae, Khoer-aq, nawq-eu uqmav lafkhoer nae mae

Daef-eu jeq bif-eu ircuf lawrgawv khoer aqjeq la? Khoer-aq, yawshawr saflar Boaq bifnaeq-euq dawq mae, yawshawr saflar nae panmaeq naeq-euq daef-eu jeq bif-eu dawq pyeuf mae, Sanqpaq Yeqsur nae aertaq-euq lof-aer Ngaq nae nawmaf-anr aernaeq-euq dawq-aq, saflar hawr-eu daef-eu jeq pyeuf-eu mae laer aer-eu mae( Yorhaq 6:63) Heu-aq, aqdui nae gui-eu deuvzaq 39 anr,daef-eu jeq bif-eu ircuf lawrgawv hawr-eu yawshawr saflar-anr aertaq-euq gar nae tsaf-eu mae
“Yeqsur heulof-aer aer-eu-aq, aqyawf-anr jan-eu tsawrhaq deuq aqkar muiq-eu Saflar za-eu gar aermawf-eu mae. laer aertaq-euq mae

Teumirnae yawshawr saflar-aq, nawq nae jan-eu lafkhoer ngaeq-euq dawq pawnae yoerdov lef-eu mae, nawq-eu dawq-aq, daef-eu jeq bif-eu mae, Nawr khar ‘ir-eu gar, khar yamawr-eu tsawrhaq-anr Baoq hawr-eu yawshawr saflar nae gar ya’mr-eu mae, tsawrhaq-eu daefzir lafkhoer laqkhaq caer-eu jeq, lavsav taq-eu jeq, hawr-eu tsaqler dzoerler-eu jeq bi keuvle-eu ghaq mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, daef-eu jeq bif-eu ircuf lawrgawv ngamaf-eu lafkhoer nae yoerdov lef-eu mirnae guiqlanq huiqma, Ngamaf-eu dawq-aq saflar hawr-eu daef-eu jeq pyeuf-eu mae, Nawq-nar narhaq geuf tsawrhaq-eu daefzir lafkhoer laqkhaq caer-eu jeq, lavsav taq-eu jeq, hawr-eu tsaqler dzoerler-eu jeq bi keuvle-eu mae, Ngamaf-aq yawshawr saflar hawr-eu daef-eu zanr lafkhoer nae yawdaef daef-eu ma, ngamaf-aq daef-eu jeq bif-eu ghaq pyeuf-awr ngamaf-eu jawrkhanq-anr Miqyaer-euq tsaq-awr dawr-eu jeq, yawshaef khanqsaer hawr-eu Miqyaer-euq guiqlanq yawdzanr byaqdov-eu tsawrhaq ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Irsaqyar 12:3/ Dawqdaq 18:4/ Yorhaq 6;63/ Yorhaq 7:37-38

Daef-eu jeq bif-eu saflar
20-07-2026 วิญญาณที่ให้ชีวิต

“Khoerlof-aer durni, Yaerbof-euq lafkhoer boftaq-euq, “Tsawrhaq yawbae ghaq pyeuf-eu Aqdaq-aq, daef-eu tsawrhaq pyeuflar-euq mae.” Arsaq saq-eu Aqdaq ghaq-aq, daef-eu jeq bif-eu saflar pyeuflar-euq mae.”
(‭‭1 Gawrliqtu‬ ‭15‬:‭45‬)

2Gawrliqtu 15 lafkhoer ghaqkhaer Pawrluv mawrlar-eu paw pyeuf-eu jeq hawr-eu saflar paw-euq pyeuf-eu jeq, mirtsaq-eu pyeuf-eu jeq, hawr-eu mq-eu pyeuf-eu jeq, aqdaq yawbae ghaq hawr-eu aqdaq nyiqghaq tiqghaq-eu garkawv aertaq-euq mae, Aqyawf heulof-awr aer-eu mae, Aqdaq yawbae ghaq-aq, daef-eu tsawrhaq pyeuflar-euq mae…Khoer-aq, Eqdeq yarkmr-anr jawr-eu Aqdaq-anr aermawf-eu mae,
Khoerngae Miqyaer narmaer lafkhoer daef-eu saflar baw’anr naeqngae tsawrhaq khoerghaq yawdaef daeflar-euq mae, laer aertaq-euq mae
(Aqdanq bae-eu 2:7)

Aerkhawf Sanqpaq Yeqsur Aqdaq nyiqghaq tiqghaq hawr-eu aqsaq saq-eu Aqdaq ghaq-aq, daef-eu jeq bif-eu saflar pyeuf-eu mae, Nawr khawf aqyawf lof-awr daefle-euq mae, maq daefpov maq daefpar ghaq-euq tsawrhaq deuq-aq, Aqdaq yawbae ghaq lof-aer daefle-euq mae, mirtsaq shaqjaev-anr nae taev-euq tsawrhaq, Aqyawfmaf-aq daef-eu tsawrhaq pyeuf-eu taefmae, Teubaqda mirnae aqyawfmaf yawqha-eu nuikhanr nae hawr-eu mirtsaq-eu khoertav jav-eu maerjuir juir-eu jeq nae bi sheuqghae-eu mae

Aerkhawf mq khoertav-euq Sanqpaq Yeqsur-aq, aqdui aqyawf-anr nae oe-euq ma, Aqyawf-aq, daef-eu jeq bif-eu saflar pyeuf mae, Aqjeqmirnae aernar-aq mirtsaq-eu khoertav aqdui khawf yeqsur lof-aer pyeufluf-eu ma laer aertaq-euq mae (1Yorhaq 4:17) Sanqpaq Yeqsur aqyawf daef-eu jeq bif-eu ghaq pyeuf-eu mirnae. Nawr khawf daefpov daefpar ghaq-euq nar-aq, daef-eu jeq bif-eu ghaq pyeuflar-euq mae, Nawr-aq, yawshawr saflar-euq zanr hawr-eu daef-eu zanr lafkhoer nae yawdaef daef-eu mae, Nawr-aq, Miqyaer-euq gaq-eu jeq, Baoq, hawr-eu Miqyaer-euq saevdzeuf byaqdov-eu tsawrhaq mae

(‭‭1 Gawrliqtu‬ ‭15‬:‭47) lafkhoer
“ Tsawrhaq Yawbae ghaq-aq, mirtsaq shaqjaev-anr nae pyeufdov lar-awr mirtsaq-anr taf-eu mae. Nyiq ghaq tiqghaq-aq, mq-anr nae oe-euq mae.”laer aertaq-euq mae, Khoernar-aq deuvzaq 48 anr paraer taq-euq “Mirtsaq-anr taf-eu tsawrhaq-aq, mirtsaq-euq shaqjaev-anr nae pyeufdov lar-euq ghaq-anr dur-eu mae. Mq-anr taf-eu tsawrhaq-aq, mq-anr nae oe-euq ghaq-anr dur-eu mae. laer aertaq-euq mae, Heu-aq. aqdir pyeuf-eu yawtsaq yawdawq jeqmae, nymq-mr aqdui yeqsur lof-aer dur-eu ma, aqdui-aq mq-anr taf-eu zaqmiq zayo pyeufma

Sanqpaq Yeqsur nawq-anr mirtsaq-anr nae oe-euq maqngeur-a, laer aer-eu gar ghovshaw dzaeqlar-eu mae (Yorhaq 15:19) Nawr-aq, Miqyaer-anr nae oe-euq mae, (Yorhaq 4:4) Nawr daefle-euq duq-aq, Miqyaer mae, Nawq-eu dawq-aq, Sanqpaq Yeqsur-euq dawq lof-aer dur-eu mae, Khoer-aq daef-eu jeq bif-eu saflar pyeuf-eu mae,(Yorhaq6:63)lafkhoer … Ngaq nae nawmaf-anr aernaeq-euq dawq-aq, saflar hawr-eu daef-eu jeq pyeuf-eu mae. laer aertaq-euq mae,
Baoq byan-eu dawq-eu lafkhoer nae Nawr-aq, yawshawr saflar-euq daef-eu jeq shaqtsaf-eu tsawrhaq mae, Nawr-aq, mirtsaq-anr taf-eu daef-eu jeq pyeuf-eu maqngeur-a, Aefkhawf mq-anr taf-eu daef-eu jeq pyeuf-eu mae, Miqyaer guiqlanq-anr jaceuq ma!


Ngamaf-anr Gaqdui dui-eu Aqda Miqyaer-or, Kali-euq lafkhoer Ngamaf pyeuf-eu jeq-anr panmaeq naeqlaf-euq mirnae guiqlanq huiqma, Ngamaf-aq arsaq saq-eu Aqdaq ghaq-anr durni daefle-awr daef-eu jeq bif-eu saflar ma, guiqlanq yawdzanr hawr-eu Baoq byan-eu ma, yawshawr saflar nae sheuqghae-eu pawnae ngamaf yawqhaq-euq jawrkhanq-anr daef-eu jeq shaqtsaf-eu tsawrhaq ma, Ngamaf yawqha mq-anr nae daefle-euq gar noeqkeuv-eu mirnae yawqgar navluf Miqyaer-euq tsaq-awr dawr-eu jeq, yawshaef khanqsaer hawr-eu gaq-eu jeq, byaqdov naeq-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
1Yorhaq 4:17/ 2Gawrliqtu 5:17/ Pirlirpiv 3:20

Jan-eu lafkhoer nae pyeufler nya-eu mae
18-07-2026 มันจะเกิดขึ้นโดยความเชื่อ

“Haeqsher-eq, ngar, nawmaf-anr zaftaq-euq tiq jeq aernaeq nyar. Aqdui dawqtawvluf yashir-eu maqngeur-a. Aerkhawf, aqdui dawqtawv luf-anr lavpar naeqlaf taef-a.”
(‭‭1 Gawrliqtu‬ ‭15‬:‭51‬)

Heu-aq, Zansanr-euq nuinoeq nae aertaq-euq garnae beugar-eu mae, Miqyaer-euq yaerbof yawqghaq navluf yashir-a laer aertaq-euq maqngeur-a, aqdui nae gui-euq yaerbof ardeuv-anr tiqpov parhaw-awq, yawshawr saflar zaftaq-euq jeq heu ghaqkhaer pawrluv pawnae panmaeq naeq-euq mae, aqdui yawqghaq navluf yashir-eu maqngeur-a, Aefkhawf yawqghaq navluf pi lavpar-eu mae,

Aermawf-eu nar, kalizaq-eu armur tiqsaev shir-eu jeq-anr maqya tanrpuq ni mq khoertav bi ciqdav lef-eu mae, khoer-aq, aqdui-euq saev mae, Aqjeqmirnae aernar-aq, aqdui panmaeq naeq-euq heu-anr jan-awr nae yawdaef daef-eu mirnae mae, heu-aq. Kalizaq armur bi ciqdav lef-eu laer kur-eu mae, aqdui-euq jan-eu jeq-eu baqda nae pyeuflar-eu mae, maqjan-eu lafkhoer maq pyeuflar nya-a, Ernov laer kur-eu ghaq-eu daefzir-anr nae hawgeuf-awq, (‭Heqbyaer‬ ‭11‬:‭5‬)
“Ernov jan-eu mirnae, shir-eu jeq-anr maqya mawrni bi sheuqdav-euq mae, “Miqyaer nae, aqyawf-anr sheuqkhof-euq mirnae, aqyawf-anr tiqghaq-iq maq povmawr nya-aq. Miqyaer, aqyawf-anr maq sheuqkhof-euq minav-aer, aqyawf, Miqyaer nuikhanr shirni daef-euq mae laer sarkir jav-eu mae.”laer aertaq-euq mae
Jan-eu jeq maq’anr nar-aq tiqghaq nae-iq Miqyaer nuikhanr shirni maqjanr nya-a, (Heqbyaer 11:6)
Ernov jan-eu lafkhoer nae Miqayer naeq-aer yawdaef daef-euq mirnae Miqyaer nae aqyawf-anr sheuqkhof-euq mae, (Ardanq bae-eu 5:24) Khoerlof-aer durni ghawqmyanr maqghae-aer kalizaq armur deuq khawf jan-eu baqda nae mirtsaq khoertav nae bi ciqdav lef-eu mae,
Ghawqmyanr maqghae-aer Sanqpaq Miqyaer jan-eu lafkhoer nae yawdaef daef-awr aqyawf ghofle-eu gar dawqluf-eu tsawrhaq deuq-anr sheuqlaq le-eu mae,

Heulof-aer noeqtmq-eu jeq heu-aq, byaqdov lef-eu jan-eu jeq pyeufmae, uqduq tanqnymr nymrma-euq ghovkhaeq-anr hawqsar sarluf-awr Pawrluv hawr-eu Yorhaq-anr hawtsov taq-awr tiqjeq paq zama laer noeqtmq taq-euq lof-aer durni lof-eu jeq pyeufmae, aqdui-euq myavnuiv Miqyaer-anr ya hawtsov taq-eu mae, Aqyawf ghofle-eu gar yadawq-eu mae,
(‭‭Heqbyaer‬ ‭9‬:‭28‬)
…Aqyawf nyiq pov tiqpov dovle ngae, iqbax naeq-aer tiqjeq-iq maqpar taf-aer, aqyawf-anr lofluf-eu tsawrhaq deuq-anr bibuq-ir-eu laer oe-eu mae. laer aertaq-euq dawq-anr noeqkeuv-awq

Teubaqda mirnae aqyawf-eu lafkhoer zifdan ni daef-awq, yawqnan navluf Nawr-aq, arsaq saq-eu aryamq lafkhoer jawrluf ma laer noeqkeuv-awr nae yawdaef daef-awq, bi ciqdav lef-eu gar noeqtmq-awr nae yawdaef daef-awq, Miqyaer guiqlanq-anr jaceuq ma

mr-eu jan-eu jeq
Ngar-aq Sanqpaq Miqayer ghofle-eu gar noeqtmq taq-awr nae yawdaef daef-eu ma, Ngar-aq jan-eu lafkhoer yawdaef daef-awr Miqyaer nuikhanr shirni daef-eu ma, Ngaq-eu daefzir-aq, Miqyaer-euq yaerdawq nae bi lavmuiq luf-eu ma, Ngar-aq zifdan ni ghae-awr nuighaq maqbaq-eu uqtaf Miqyaer gar mr-eu paw byankuf-eu ma, Ngar-aq Sanqpaq Miqyaer ghofle-eu gar lof-eu lafkhoer tsaq-awr dawr-eu lafkhoer hawr-eu yaerdawq-eu yawshaef lafkhoer yawdaef daef-eu ma, Aqmeq

Heugar guilanq nya-eu mae
Heqbyaer 11:5-6/ 1Tersaqlorniv 4:16-17/ Pirlirpiv 3:20-21

Aqdir pyeuf-eu Miqyaer-euq gaq-eu jeq
17-07-2026 แก่นแท้แห่งความรักของพระเจ้า

“…Ngaq-anr mawr-euq tsawrhaq-aq, Aqda-anr mawr-euq mae….
(‭‭Yorhaq‬ ‭14‬:‭9‬)

Tsawrhaqzaq “Gaq-eu” laer aer-eu heudawq aqdir pyeuf-eu dawqtsuif-anr maq ghovshaw nya-eu garnae
tiqzir sair tiqzir zmqka lef-euq mae, Heqlaqsar” dawq-anr nae nar-aq, (Aqkaqpeq) laer mae, Gaq-eu laer aer-eu heudawq-aq, Sanqpaq Yeqsur maq daefle-euq minav-aer zmqluf-eu mae, Aerkhawf tsawrhaqzaq-eu nuinoeq-aq. aqdir pyeuf-eu Miqayer-euq gaq-eu jeq-anr maq ghovshaw haw-aq

Sanqpaq Yeqsur-aq, gaq-eu laer aer-eu dawqtsuif bifnaeq-euq mae, Nawr Sanqpaq Yeqsu-anr mawrnar-aq, Nawr gaq-eu jeq-anr mawrmae, Aqyawf nae mr-euq khoer Miqayer-euq gaq-eu jeq byaqdov-eu jeq pyeuf mae, “Miqyaer-aq, gaq-eu jeq pyeufmae laer yaerbof lafkhoer aertaq-euq mae, (1Yorhaq 4:8) gaq-eu jeq khoer shiqshaq pyeuf-eu Sanqpaq Yeqsur-euq lafkhoer jawrluf-eu mae, (Lurkaf 4:16-21)lafkhoer aertaq-euq lof-aer. Aqyawf uqduq tanqnymr-anr dawqmaeq maeqngae, khoer-aq, Miqyaer-euq gaq-eu jeq byaq dovlef-eu jeq pyeuf-eu mae,

Aqyawf Irsaqyar nae boftaq-euq sanqbof artaf gui-awr aer-eu, iqnan nawmaf-eu naqbawr nae ya’gaq-euq yaerdawq heu pyeufler-euq mae, laer aer-eu mae, Aqyawf nae mr-euq gar mawrlar-eu mae, kakhof naeq-eu, lavsav-awr mirtsaq zaq-anr gaq-eu jeq bifnaeq-euq mae, Khoernar-aq Sanqpaq Yeqsur aqyawf heudeuq parmr-euq mae, nar-eu gawr-eu tsawrhaq-anr lavtaq-awr, myavbaef baef-eu tsawrhaq-anr pandanr naeq-awr, tsawrhaq armaf deuq-anr bidzaq bidawr-euq uqtaf shir-euq tsawrhaq-anr bi ghofdaef lar-euq mae, Khoer-aq Miqyaer-euq gaq-eu jeq byaqdov-eu jeq mae

(‭‭Maqtaeq‬ ‭14‬:‭14‬)
“Yeqsur, lawq-anr nae dovlar ngae, tsawrhaq armaf mafma-anr ya’mawr-awr, aqyawf maf-anr ghawqshaq gaq-awr nae, aqyawf maf-euq lafkhoer nar-awr gawr-eu tsawrhaq deuq-anr lavtaq naeq-euq mae.”laer aertaq-euq mae, Aqyawf-eu ghawqshaq gaq-eu jeq-aq, aqyawf maf-anr lavtaq naeq-euq mae, gaq-eu nuima-aq, aqyawf-eu lafkhoer aryaer huiqdui dui-eu jeq pyeufmae

‭‭(Maqtaeq‬ ‭23‬:‭37‬) aqyawf yeqlursaqlaeq -anr ngaeqkeuv-eu mae, Aqyawf aqyawf-eu tsawrhaq deuq-anr cawba mawf-eu gaq-eu nuima arnav ni anr-eu nga laer mawrlar-eu mae,
“Yeqlursaqlaeq-or! Or, Yeqlursaqlaeq, nawr, Miqyaer gharduq ngaeqdan-eu tsawrhaq deuq-anr saef-awr, nawr jawr-eu gar bi’oe-euq deuq-anr khawf khaqlo nae biqsaef-eu mae. Yaciv ya’ma, yazaq deuq-anr danrkhawv khawvuiq-eu lof-aer, ngar, nawq-euq zaqdeuq-anr armyav pov khawvuiq mawf-eu khawf, nawmaf maqbi khawvuiq naeqlaf-eu beu.” laer aer-eu mae, Aqyawf nae ngaeq-euq dawq Heugar byandui dui-eu Miqyaer-euq gaq-eu jeq mawrlar-eu mae,

Gaq-eu jeq-aq, tsawrhaqzaq-eu sharnoeq-eu jeq, yawqha-eu nuima, hawr-eu ghaq baq-eu jeq-anr nae maqir-a, gaq-eu jeq-aq, aqdui-anr panmaeq laf-euq Sanqpaq Yeqsur mae,Aqyawf-aq Miqyaer pyeuf-eu jeq hawr-eu tsawrhaqzaq pyeuf-eu jeq byan-eu mae, Nawr yaerdawq paw hawr-eu Ysawshawr saflar pawnae aqyawf-anr ngaeq-aer siqnya nar-aq, Nawr gaq-eu jeq-anr ngaeq-aer siqnya lar-eu mae, hawr-eu nawr Miqayer-euq saevdzeuf lof-aer yawdaef daef-awr, nawr mirtsaq khoertav Miqyaer-euq gaq-eu jeq byaqhaw naeq-eu tsawrhaq pyeuflar-eu mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, Sanqpaq Yeqsur pawnae ngamaf-anr maqpov maq parlar-eu byandui dui-eu nawq-eu gaq-eu bimawr naeqlaf-euq mirnae guiqlanq huiqma, Ngamaf-eu lafkhoer ur-eu nawq-eu daef-eu jeq-aq, gaq-eu daefzir pyeufmae, Ngamaf Miqyaer-euq yaerdawq-eu yawshaef lafkhoer yawdaef daef-awr, Miqyaer pyeuf-eu jeq byaqdov-eu ma, Ngamaf-eu daefzir pawnae tsawrhaq ghawqmya ghaq gaq-eu jeq, ghawqshaq gaq-eu jeq, guiqlanq yawdzanr hawr-eu Miqyaer-euq baoq-anr yamawr-awr daefzir parlar-eu mae, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
1Yorhaq 4:9/ Yorhaq 13:34/ Yorhaq 15:12-13

Pyeufler nya-eu garkawv ngaeqnaeq-eu ghaq
15-07-2026 ผู้ประกาศข้อความที่ได้ผล

“Sanqpaq Miqyaer, dawq bifdov lef-euq, Tsawrhaq-euq baqmaf mafma dawq khoer dzawrgaq-eu mae.”
(‭‭Jaceuq‬ ‭68‬:‭11‬)

Laqkhaq caer-eu guiqlanq dawq-aq mirtsaq khoertav khardaef-awr kharjawr-eu tsawrjeuq dawqtawvluf-anr bi ngaeqnaeq-eu laer biftaq-euq mae, Sanqpaq Yeqsur ‭‭(Maqkuv‬ ‭16‬:‭15) lafkhoer aer-eu “Mirkhanq doeni ir-awr, tsawrhaq dawqtawv luf-anr guiqlanqdawq maeqnaeq-ir-awq. laer aer-eu mae, Arsaq saq-eu aryamq heuyamq lafkhoer guiqlanq dawq yawqgar navluf irkeuv luf-awr tsawrhaq-anr lavpar luf-eu mae

Tsawrhaqzaq nae sarkir kamq-eu dawq khoer-aq, Miqyaer-euq yaerdawq-aq daefluf-awr baoq khav-eu nga laer mawrlar-eu mae, kakhof-eu jeq, lavsav taq-eu jeq, tsaqler dzoerler-eu jeq, hawr-eu shir-euq tsawrhaq-anr khawf bi ghofdaef lar nga laer mawrlar-eu mae, Sanqpaq Yeqsur-aq, mirnan iqnan hawr-eu mqmaq maqbyav yarzir tiqkawv mae, hawr-eu aqayawf-eu Baoq khoer maqpov ma parlar-a, iqnan aqdui mrluf-eu jeq-aq, Miqayer-euq yawtsaq yawdawr dawq khoer yurdov-awr maeqnaeq-eu ghaq ma,

Aqdui-aq, guiqlanq dawq khoer yawqhar yawqha baedov laf-eu maqngeur, aqdui-aq guiqlanq dawq khoer shaqtsaf-eu tsawrhaq ma, Miqyaer gharduq ngaeqdan-eu deuq hawr-eu ghaqkhaer deuq yawshawr saflar pawnae guiqlanq dawq khoer za-euq mae, khoermirnae yawshawr saflar-anr ghoe-awr aqyawfmaf boftaq-euq mae, aqyawfmaf-aq guiqlanq dawq bifkhawq-eu ghaq mae, Aerkhawf iqnan aqdui-aq, aqyawfmaf nae mr-euq khoer mrtsaf-eu tsawrhaq ma, kharjav-eu Dawq mae yurdov-awr guiqlanq dawq bifkhawq ghae-eu ma,

Aqkar guiqlanq dawq-eu gar mr-euq tsawrhaq yawqghaq navluf, Dawq yurdov-eu deuq, dawqmaeq maeq-eu deuq, bif-eu damq-eu deuq, hawr-eu shatsaf-eu deuq yawqghaq navluf Miqayer-anr nae lafshawq za-eu mae, Nawq nae mr-euq yawqjeq navluf maqbi hawdzeur-a, Teumirnae ghaq taqbaq guiqlanq bifkhawq ghae-eu gar laejae-awq

Mirtsaq heu-aq, guiqlanq dawq hawr-eu kakhof-eu jeq mawf-eu mae, Khoernav maqtser aqyawfmaf Miqayer-euq yaerdawq maeqnaeq-eu gar loq-eu mae, Aqyawfmaf Kali-euq lafkhoer aqsur ghaq pyeuf-awr, yawqha aqjeq jav-awr aqjeq mrnya nga laer yasiq nya-eu mae, hawr-eu Miqyaer nuima tsaqni aqjox-aer yadaef-eu nga laer yabi siq nya-eu mae, Khoer-aq, Miqyaer nuima tsaq-eu jeq mae, khoer-aq, aqyawfmaf Kali naeq-aer jeqbir of-eu tsawrhaq pyeuf-awr aqyawf naeq-aer tiqkawv lof-aer uvlanr-eu jeq mae

Mirtsaq heu-aq, Miqyaer-euq pyeufmae, Aqyawf nae bae-euq jeq-anr nae tiq pavnav taefmae, Aerkhawf aqyawf aqdui-euq gharduq shirdan le-euq mae, aqdui-aq, aqyawf nae shirdan-awr zeurlaf-euq Miqayer-euq
poeqdui lawqdui dui-eu jeq ma, Miqyaer-euq jeqbir hawr-eu Miqyaer-euq lafzar ma

Teumirnae aqdui nae mr-euq garKhkoerdeuq pawnae daefzir parlar-euq tsawrhaq mawrlar-euq mirnae heu-aq jirjeuq mir-a, sarkir kamq-eu dawq pawnae guiqlanq dawq-aq Miqayer-euq pyeufnga laer mawrlar-eu mae, aqdui-aq, aqcawq-anr aernaeq-eu jeq javma, guiqlanq dawq-eu gharduq mr-eu aqdui-euq gar khoer-aq, aryaer huiqdui dui-eu mae, aqdui-aq, tsawrjeuq tsawrca deuq noeqtmq duq pyeufma, aqdui-aq, pyeufler nya-eu garkawv ngaeqnaeq-eu ghaqma, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, Ngamaf-anr nawq-eu yawtsaq yawdawr dawq ngaeq-eu tsawrhaq bipyeuf-awr, mirkhanq doeni kakhof-eu jeq shatsaf-eu tsawrhaq bipyeuf naeqlaf-euq mirnae guiqlanq huiqma, Ngamaf yawqgar navluf guiqlanq dawq maeq ’ir-eu ghaqduq yawshawr saflar-anr nae ghaq za-euq ma, Miqyaer-euq yaerdawq pawnae tsawrhaqzaq-eu daefzir-anr lavpar-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Maqkuv 16:15/ Lormav 10-14-25

Aqmyanluf Yawshawr saflar byan-awq
14-07-2026 จงเต็มด้วยพระวิญญาณเสมอ

“Jirbaq taq dawryaef. Dawryaef nar-aq, yawuq uq-ir nya-eu mae. Aerkhawf, nawmaf-euq lafkhoer muiq-eu Saflar bi byanlar-awq.”
(‭‭Erpersu‬ ‭5‬:‭18‬)

Miqyaer nawq-anr aqmyanluf yawshawr saflar bibyan mawf-eu mae, Khoernar-aq aqdui yawshawr saflar aqjox-aer yabyan-eu nga laer deuvzaq 19-21 lafkhoer aertaq-euq mae,
“Nawmaf, tiqghaq tirghaq ngaeqcawq ngae, jaceuq-eu dawq, jaceuq-eu cardawq hawr-eu saflar paw-euq cardawq nae ngaeqcawq-awq. Nuima-euq lafkhoer keuvni carcar-aer Sanqpaq Miqyaer-anr jaceuq-awq. Aqdui-euq Sanqpaq Yeqsur Kali-euq tsawrmyanr-anr ghoe-awr, aqmyanluf yawqjeq navluf-euq lafkhoer, Aqda Miqyaer-anr jaceuq-awq. Miqyaer-anr yawzeu baw-eu lafkhoer, tiq ghaq-euq lafov tiq ghaq yawmuiq-aer jawr-awq.”
(‭‭Erpersu‬ ‭5‬:‭19‬-‭21‬)

Aqdui yawshawr saflar byan-eu gharduq aqjox-aer yajanr nga laer Miqyaer aqdui-anr aernaeq-eu
Heu-aq, nafdui dui-eu jeq mae, Aerkhawf Nawr, heujeq nawq-eu daefzir lafkhoer ur-awr nae zmqnya-eu khoer-aq, nawq-anr nae ir-eu mae, Heu-aq Nawr, khanqlanr-eu jeq, guv-eu jeq, hawr-eu noeqshaq-eu jeq-anr nae bibuq,ir-eu mae, Yawshawr saflar maqbyan-eu tsawrhaq deuq-aq, khanqlanr-awr noeqshaq-eu yaw’awq mae, aqsur ghaq-anr daeqlaef nyanga laer haw-eu mae,

Aerkhawf nawr, yawshawr saflar byan-eu lafkhoer yawdaef daefnar-aq, Nawr laqkhaq caer-eu jeq jav-awr, nuisar of-awr, ghaqnaq ya’naq-eu mae, Nawr laejae laejae-aer maqteuv-a, nawq-eu nuijan-aq. ghaqler-eu mae, Nawr aqmyanluf Miqyaer nae laeqhmq taq-euq jeq-eu lafkhoer, ghaq khav-eu lafkhoer, hawr-eu Miqyaer-anr nae oe-euq zaqsiq tsawrganr lafkhoer nae yawdaef daef-eu mae, beurlar-awr noeqlar-awq, aqmyanluf saflar paw-euq garkawv-anr hawtsov taq-euq zifdan ni ghae-eu nuima anr-awq,
Heu-aq, Nawr, ya’mr-awr ya lavsav taq-euq jeq pyeufmae, saflar paw khoergar-aq, maqpov maq parlar ni mqmaq maqbyav yarzir zifdan ni bi ghae-eu mae, Nawr nawq-eu daefzir lafkhoer tanqpuq-eu jeq-anr ya uvlanr-eu mae, Nawr, aqmyanluf yawshawr saflar lafkhoer nae ghaq khavlar-awr cawqtur lar-awr yawshaef bya-eu mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, Ngamaf-anr aqmyanluf yawshawr saflar bibyan naeqlaf-euq guiqlanq gharduq guiqlanq huiqma, Ngamaf-eu daefzir lafkhoer yawshawr saflar byan-eu jeq lavsav taqma, Ngamaf ngamaf-eu lafkhoer jawr-eu Miqyaer-euq tsaq-awr dawr-eu jeq, yawshaef khanqsaer, muiq-eu jeq, hawr-eu mqmaq maqbyav yarzir-anr noeqkeuv ma, Ngamaf yawshawr saflar-euq khanq-anr nae yawdaef daef-awr mirtsaq khoertav Miqyaer-euq Baoq hawr-eu yawshaef khanqsaer nae uvlanr-eu ma, Yeqsu Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Erpersuv 5:18-19/ 2Gawrliqtu 4:17-18/ Gawrlawrsaer 1:9

Nawq-eu arhgaer saevdzeuf siqnya-eu
12-07-2026 ความรู้ถึงอัตลักณ์ของคุณ

“Aerkhawf, nawmaf-aq, Miqyaer nae tserdov taq-euq heuzir-euq tsawrhaq pyeuf-awr, sanqpaq hawr-eu pirma pyeuf-eu uqtaf, shawr-eu tsawrjeuq tsawrca pyeuf-awr, aqdir Miqyaer-euq tsawrhaq pyeuf-eu mae. Khoer-aq, Miqyaer nae mr-euq jaceuq paq-aer ghae-eu garkawv, dawqdzawr bimr-eu laer nawmaf-anr yawzanr-euq lafkhoer nae kurdov-awr, zanqler paq-aer ghae-eu yawshaef-euq lafkhoer sheuqur naeqlaf-euq mae.
(‭‭1 Beqtuvluv‬ ‭2‬:‭9‬)

Yaerbof-eu lafkhoer aqdui-aq, Miqyaer nae tserdov taq-euq tsawrjeuq tsawrca pyeuf-awr sanqpaq hawr-eu Piqma pyeuf-eu mae. laer aertaq-euq mae, Miqayer nae zeur taq-euq tsawrjeuq pyeufmae, Nawr-aq, Miqyaer-anr nae daefle-euq mae, Teubaqda mirnae Nawr-aq, maq daefpov maq daefpar-euq tsawrhaq deuq naeq-aer beugar-eu mae, Nawr-aq, saflar paw Miqyaer-euq arghaer saevdzeuf’anr-eu mae, Nawr-aq, Miqyaer-anr nae daeqle-euq mae, Heu-aq, Kai-euq lafkhoer nawq-eu arghaer mae

Miqyaer nawq-anr bae-euq-aq, Aqyawf-eu zanqler paq-aer ghae-eu ‘gar bi byaqdov-eu gharduq bae-euq mae, Aqyawf-eu dawr-eu tsaq-eu jeq, byan-eu jeq, hawr-eu yawshaef khanqsaer muiq-eu jeq mirtsaq khoertav bibyaq dov-eu laer mae, Aqyawf aqdui-euq daefzir pawnae mirtsaqzaq-anr bimawr nya-eu gharduq Miqyaer nawq-anr yawzanr-euq lafkhoer nae kurdov-awr, zanqler paq-aer ghae-eu yawshaef-euq lafkhoer sheuqur naeqlaf-euq mae. Khoernav maqtser Nawr-aq, Miqyaer-euq tsaq-awr dawr-eu tsawrhaq mae, (2Gawrliqtu 5:21) Nawr-aq, dawr-awr tsaq-eu Miqyaer nae kamqtaq-euq jeq mae,

Nawr yawdaef khoerlof-aer daefnya-eu gharduq kali-euq lafkhoer nawq-eu arghaer pyeuf-eu Yawtsaq yawdawr heu hawr-eu nuideuq-anr siqnya-eu-aq aryaer huiqdui dui-eu mae, Nawr yawqha aqsur ghaq pyeufnga laer aqdir ya sinya-eu mae, aqdui dzawgeuf nya-eu muiqdui dui-eu garma khoer-aq Miqyaer-euq yaerdawq pawnae mae, Khoerdeuq-aq, Ghaqkhaer deuqnae bof-euq sanqbof arpur-anr ,( tsawrhaq yawshuif pyeuflar-euq) hawkhaeq lafkhoer ur-eu mae,

Miqyaer-euq yaerdawq pawnae Nawr, yawqha-anr siqnya lar-awr, mawrnya lar-eu mae, Nawr kali-euq lafkhoer nawq-eu saflar yawshuif ghaq-eu arghaer-anr siqnya lar-eu mae, aqdui-aq, beugar-eu saflar ‘anr-eu ma, aqdui-aq, Miqyaer-euq tsawrjeuq tsawrca ma, Aqdui nae gui-eu yaerbof uqdzan-anr Nawr, aqsur ghaq pyeufnga laer panqmaeq taq-euq nga laer haw-awq, Nawr aqgeu jeq javnga? hawr-eu kali-euq lafkhoer Nawr aqjeq mrnya nga?

Nawr aqsur ghaq pyeufnga laer nawq-eu saflar lafkhoer panmaeq laf nar-aq, nawq-eu nuima saqdaef saqnar anrlar-awr Nawr, Miqayer-euq yaerdawq lof-aer nuima khaqduq ni ngaeqpeuq lar-eu mae, Khoernar-aq, sarkir kamq-eu jeq, ghaqler-eu jeq, hawr-eu li-eu maqbaw-eu laqkhaq caer-eu jeq, bawle zale-eu jeq, keuvle-eu mae, Kali-euq lafkhoer nawr pyeuf-eu ghaq, hawr-eu jeqbif-anr siqnya-eu-aq, nawq-anr ghaq urlar-awr, maeqhu paw taef-aer bi candav lef-eu mae, Nawq-anr aqmyanluf tsaq-awr dawr-eu lafkhoer hawr-eu uvlanr-eu lafkhoer yawdaef bidaef-eu mae, Miqyaer guiqlanq-anr jaceuq ma!

mr-eu jan-eu dawq
Ngar-aq Miqyaer-euq poeqdui lawqdui dui-eu jeq pyeuf ma, shawr-awr. Tsaq-awr dawr-eu uqtaf bi cirshawr-awr tsaqlar dawrlar-euq ma, Ngar-aq Miqayer-euq tsawrjeuq pyeuf-eu ngaq-eu arghaer-anr siqnya-awr, kali-euq dawr-awr tsaq-eu jeq hawr-eu byankuf-eu jeq mirtsaq khoertav byaqdov naeqma, Miqyaer-euq yaerdawq-aq, ngaq-eu daefzir ma, Teubaqda mirnae muiq-eu jeq, ghaqler-eu jeq, hawr-eu li-eu maqbaw ni laqkhaq caer-eu jeq-aq, ngaq-eu daefzir-euq jmq pyeuf ma, Ngar-aq byankuf-eu kali-euq guiqlanq dawq-eu guiqlanq lafkhoer nae yawdaef daef-eu ma, Aqmeq

Heugar guiqlanq nya-eu mae
1Beqtuvluv 2:9/ Lurkaf 9:55/ 1Yorhaq 4:17