Akha Newcreation Studio

cawq cawqtaf-eu jeq-aq dawqtawvluf-anr lavpar-eu mae
05-10-2026การสามัคคีธรรมซึ่งเปลี่ยนทุกสิ่งทุกอย่าง

“Sanqpaq Yeqsur Kali-euq guiqlanq yawdzanr, Miqyaer-euq gaq-eu jeq hawr-eu Yawshawr Saflar-euq lafkhoer cawq cawqtaf-eu jeq, nawmaf yawqghaq navluf-euq khoertav jav luf-ur. Aqmeq.”
‭‭(2 Gawrliqtu‬ ‭13‬:‭14‬)

Yaerbof heudeuv-aq Baoq yawshaef khanqsaer khavdui dui-eu Miqyaer nae panmaeq naeq-euq jeq mae, Khoer-aq, Sanqpaq Yeqsur Kali-euq guiqlanq yawdzanr, Miqyaer-euq gaq-eu jeq hawr-eu Yawshawr Saflar-euq lafkhoer cawq cawqtaf-eu jeq mae, guiqlanq yawdzanr-aq Sanqpaq Yeqsur-anr nae oe-euq mae. Gaq-eu jeq-aq Miqyaer-anr nae oe-euq mae. Aerkhawf muiq-eu jeq Miqyaer nae nawq-anr laeqhmq naeqtaq-euq jeq khoer-aq, yawshawr saflar naeq-aer cawq cawqtaf-eu garnae oe-euq mae,

Nawr, guiqlanq yawdzanr hawr-eu Miqyaer-eu gaq-eu jeq-anr yawbui bui-eu gar ngaeqkeuv-eu dur! Aerkhawf khoerjeq nawq-eu daefzir lafkhoer aqdir pyeuflar nya-eu-aq, yawshawr saflar pawnae mae, yawshawr saflar-aq, khoerdeuq nawq-eu daefzir lafkhoer bi dovle-eu gharduq sheuqghae-eu ghaq mae, Nawr, yawshawr saflar-anr siqnya nar-aq dawqtawvluf par-ir-eu mae, nawq-eu daefzir lafkhoer muiq-eu jeq, yawshaef khanqsaer, hawr-eu byankuf-eu jeq urlar-eu mae. Aqyawf nawq-anr lafkhoer pawnae ghaq bifluf-eu mae

Yawshawr saflar aqmyanluf nawq-eu lafkhoer hawr-eu nawq naeq-aer jawr-eu mae. tiqkhaeq larkhaeq taef maqngeur-a, ‭‭(Yorhaq‬ ‭14‬:‭16) lafkhoer Sanqpaq Yeqsur aer-eu “Ngar, Aqda-anr shar-awr, aqmyanluf nawmaf naeq-aer bijawr-eu gharduq, aqyawf, nawmaf-anr Cawba-eu ghaq, tiq ghaq bifnaeqlaf taef-a.” laer aer-eu mae, Aqyawf-aq, nawq-eu saqlaq pyeufmae, yaerbof lafkhoer aer-eu “cawba-eu ghaq pyeuf-eu yawshawr saflar…nawmaf-anr yawqjeq navluf maeqnaeq-eu mae laer aertaq-euq mae, (Yorhaq 16:26) aqyawf nawq-anr nuima pannaeq-awr yaerbof-anr bi ghovshaw-eu mae, Nawr, Miqyaer nae kurtaq-euq lof-aer guiqlanq-eu lafkhoer yawdaef bidaef nya-eu gharduq mae

(‭‭1 Gawrliqtu‬ ‭2‬:‭12) lafkhoer aer-eu
“Aqdui-aq, mirtsaq heu-euq saflar zataq-euq maqngeur, Miqyaer nae aqdui-anr yawqngaef-aer bifnaeq laf-euq guiqlanq deuq-anr siqnya’ni, Miqyaer-anr nae oe-euq muiq-eu Saflar zataq-euq ma.” laer aertaq-euq mae, Miqyaer nawq-anr ghovshaw nya-eu jeq bifnaeq-euq mae, Aqyawf-eu yawtsaq yawdawr jeq siqnya-awr zaf taq-euq Miqyaer mirkhanq-eu garkawv siqnya ni panmaeq naeq-eu mae, Aqyawf-eu pawnae nawq-eu daefzir gorlar-awr Nawr zanqler paq-aer ghae-eu jeq hawmawr nya-eu mae, Nawr, zifdan ni yawduq baw-eu lafkhoer yawdaef daefnya-eu mae

Nawr, yawshawr saflar-anr siqnya nar-aq, Nawr li-eu maqbaw ni mrnya-eu mae, Nawr pyeufler nya-eu jeq-anr. lafkhoer pawnae yawduq baw-eu mae, Heu-aq, nawq-anr mawrlar-eu jeq-anr nae ir-eu maqngeur-a, Aerkhawf nawq-eu lafkhoer jawr-eu yawshawr saflar-anr nae ir-eu mae, Teumirnae yawshawr saflar naeq-aer cawq cawqtaf-eu jeq lavsav taq-awr bimyaq lar-awq. Aqyawf naeq-aer yawdaef daef-awq, aqyawf naeq-aer ngaeqcawq-awq, Nawr, kharmr kharshar-eu yawqjeq navluf aqyawf nae bi sheuqghae-awq, khoernar-aq Nawr, aqmyanluf yawshaef khanqsaer lafkhoer daefnya-eu mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, yawshawr saflar-euq lafshawq hawr-eu aqyawf naeq-aer cawq cawqtaf-eu jeq bifnaeq laf-euq mirnae guiqlanq huiqma. Ngamaf yawqnan navluf heu-anr siqnya-awr nae yawdaef daef-eu ma, Ngamaf-eu daefzir-anr aqyawf sheuqghae-awr ghaq bifnaeq laf-eu mae, Ngamaf li-eu maqbaw ni yawqjeq navluf mrnya-awr Ngamaf khar-ir-eu gar Miqyaer-eu yawshaef khanqsaer byaqdov-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Yorhaq 16:13/ Lormav 8:11/ 1Gawrliqtu 2:12

Guiqlanq shar-eu paw Miqyaer-anr taq tanqshar
03-10-2026 อย่าอ้อนวอนพระเจ้าในการอธิษฐาน

“Nawmaf parya guvni zaqkhav-euq saflar zataq-euq maqngeur-a. Nawmaf-aq, zaq sheuqcu-eu, muiq-eu Saflar zataq-euq mae. Khoermirnae, aqdui “Aqba, Aqda-or” laer kur-eu ma.”
(‭‭Lormav‬ ‭8‬:‭15‬)

Nawr, Miqyaer-anr aqjox-aer noeq-awr aqyawf naeq-aer arnavni ghoerle laer nawq-eu guiqlanq Shardawq-aq heugar nae ir-eu mae, Nawr, ghovshaw tsaq-euq nar-aq. nawq-eu guiqlanq Shar-eu dawq-aq, zifdan ni yawduq baw-awr khaqduqni ghae-eu mae, Aerkhawf Nawr, ghovshaw laeq-euq nar-aq, nawq-eu guiqlanq Shar-eu-aq, shaqdui dui-awr, yawduq maqbaw ni ghae-eu mae

Nawr, Miqyaer jawrgar urler ngae aqyawf-anr maq siqnya ni tanqsar ler-eu lof-aer taqurler, Miqyaer-aq, nawq-eu Aqda mae, aqda zaq-anr nuikhanr aqjox-aer shir-eu la? Aqyawfmaf nymr lafkhoer jawrduq maqjav-eu lof-aer sharlar-eu gar nuikanr maqshir-a, Aqyawf-aq, mq-eu khoertav jawr-eu nawq-eu Aqda pyeuf-awr. nawq-anr gaq-awr, nawqnae noeqtaq-eu nav maqtser nawq-anr yawmuiq jeq bifnaeq mawf-eu mae

Heu-aq, aqdir pyeuf-eu jeq mae, Miqyaer nawq-anr gaq-eu-aq, Nawr yawqha-euq mawrdo-anr gaq-eu nav maqtser gaq-eu mae, Teumirnae Miqyaer-euq lafkhoer Nawr pyeuf-eu jeq-anr siqnya-awq, ‭‭(Heqbyaer‬ ‭4‬:‭16‬) lafkhoer aer-eu “Khoermirnae, aqdui nuima khaqduqni, guiqlanq yawdzanr-euq nuirmanq-euq maeqshi urler kar-eur. Khoergar, aqdui mawf ngae yamq-anr cawba’naeq nya-eu, ghawqshaq gaq-eu jeq za-awr, guiqlanq yawdzanr-anr ya’mawr taef-a.” laer aertaq-euq mae, Heu-aq. nawq-anr kurcawq luf-eu muiqdui dui-eu jeq mae, Miqyaer-aq nawq-anr aqmyanluf aqyawf-eu maeqshi nuima khaqduqni bi urlar mawf-eu mae, Miqyaer aqdui-anr nuikhanr shir-eu mae

‭‭(Jaceuq‬ ‭34‬:‭15) lafkhoer aer-eu
“Ya’we Miqyaer-euq myavnuiv-aq, tsaq-awr dawr-eu tsawrhaq deuq-anr hawluf-awr, Aqyawf-euq naqbawr-aq, aqyawfmaf gur-eu gar narhaq luf-eu mae.” laer aertaq-euq mae, Miqyaer nawq-anr yawmuiq jeq mrnaeq-eu laer nawq-anr narhaq luf-eu mae, Miqyaer yawqnan navluf nawq-anr yawqmuiq jeq bifnaeq mawf-eu mae, (Jaceuq-eu 68:19) Haleluya! Yeqsur Kali-euq lafkhoer Nawr, Miqyaer maeqshi urkeuvler nya-eu mae, tiqjeq-iq maq lavtsoeqlar ni urler nya-eu mae, Teumirnae heu siqnya-awr nae zmq-awq, ‭‭(Erpersu‬ ‭3‬:‭12‬) “Aqdui, Yeqsur-euq lafkhoer nuima khaqduqni taq-awr, aqyawf-anr jan-awr yawduq baw-eu mirnae, Miqyaer-euq maeqshi urler nya-eu ma.” laer aertaq-euq mae

Aqdui nae gui-euq yaerbof uqdzan-anr tiqpov parhaw-awq, zaqkhav-euq saflar bi lavdzae-awr Nawr Miqyaer-euq zaq pyeuflar-euq mae, Nawr tanqshar ngae Nawr nuinanq nuiyu taqluf-eu maqngeur-a, Aefkhawf Nawr maq siqnya-eu mirnae mae, Miqyaer khoerlof-aer ghae-eu nuinoeq-anr nuikhanr maqshir-a, Aefkhawf Nawr zaq pyeuf-eu gar siqnya-awr yawduq baw-eu gar Miqyaer nuikhanr shir-awr narhaq-eu mae, khoer-aq Miqyaer-aq nawq-eu Aqda ma laer siqnya-awr hawkhaeq heugar nae haw-awr nae yawdaef daef-awq, Miqyaer guiqlanq-anr jaceuq ma,


Ngamaf-anr Gaqdui dui-eu Aqda Miqyaer-or, Ngamaf-anr zaq pyeuf-eu saflar bifnaeq laf-euq mirnae guiqlanq huiqma, Nawr-aq Ngamaf-eu Aqda mae, Ngamaf-aq nawq-eu pyeufma laer siqnya-awr nuima khaqduqni yawdaef daef-eu ma, Kali-euq lafkhoer yawqjeq navluf Ngamaf-eu pyeufma, Ngamaf Miqyaer naeq-aer tiqsiq tiqshaq taef-aer pyeuflar-euq gar noeqtsov taq-awr nae yawdaef daef-eu ma, Kali-euq lafkhoer Ngamaf-eu jeqbir-anr siqnya-eu lafkhoer nae yawdaef daef-eu ma, Yeqsur Kali tsawrmyanr lafkhoer nae shar-eu ma. Aqmeq

Heugar guilanq nya-eu mae
Gaqlaqtiv 4:6-7/ Heqbyaer 4:16/ Lurkaf 15:31

Nawq-anr taf-eu tiqjeqpaq jav-eu mae
02-10-2026 มีบางสิ่งบางอย่างเกี่ยวกับคุณ

“Khoeruqtaf, Yeqsur-anr shir-euq gar nae bi ghofdaef lar-euq ghaq-euq Saflar, nawmaf-euq lafkhoer jawr nar-aq, Yeqsur Kali-anr shir-euq gar nae bi ghofdaef lar-euq ghaq, nawmaf-euq lafkhoer jawr-eu aqyawf-euq Saflar-anr ghoe-awr, nawmaf-euq shirnya-eu mawrdo-anr khawf bi ghofdaeflar taef-a.”
(‭‭Lormav‬ ‭8‬:‭11‬)

Kalizaq-aq zanr maqngeur-a, Aerkhawf kali nawq-eu lafkhoer jawrluf-eu mae, ( Gawrlawrsaer 1:27)aqjeq nga laer aernar-aq tsawrhaq-eu mawrdo-anr nae Miqyaer-euq daef-eu jeq byaqdov-eu jeq mae, kalizaq deuq-aq Miqyaer pyeuf-eu saevdzeuf-anr byaqhaw naeq-eu deuq mae, khoer-aq nawq-anr bi beugar-eu jeq mae, Nawr, Yeqsur kali-anr hageuf-euq nar-aq. Nawr, zanr lafkhoer urlar-euq maqngeur-a, Nawr, yawtsaq yawdawr lafkhoer urlar-euq mae

Yaerbof lafkhoer aer-eu“Sarkir kamq-eu khoer-aq heulof-aer mae: Miqyaer, aqdui-anr mqmaq maqbyav yarzir daef-eu jeq bif-euq mae. Daef-eu jeq khoer-aq, aqyawf-euq Zaqyo-euq lafkhoer anr-eu mae. Zaqyo-anr za-euq tsawrhaq-aq, daef-eu jeq za-euq mae. laer aertaq-euq mae (‭‭1 Yorhaq‬ ‭5‬:‭11‬-‭12‬) Daef-eu jeq heu-aq, zanqler paq-aer ghae-eu mae, sharnoeq hawsher-eq, cawv-ir nya-eu tsawrhaqzaq-eu mawrdo khawf siq yawshuif baepar nya-eu mae, mawrdo bimuiq davlar nya-eu mae, khoer-aq tsawrhaqzaq-eu daefzir mae, Aerkhawf daefzir khoer Aqdaq nae iqbax mr-euq mirnae cawv-ir-euq mae

Cawv-ir nya-eu daefzir khoer khoernavni gar mrnya nar-aq, maqcawv-ir nya-aer maqbi lavcawv nya-eu Miqyaer-euq daef-eu jeq ngeurdzaeq arnavni muiq paqnya!
(‭‭1 Beqtuvluv‬ ‭1‬:‭23) lafkhoer aer-eu
“Nawmaf, cawv-ir nya-eu aryoeq-anr ghoe-awr nae maqngeur-eu, maqcawv-ir nya-eu aryoeq-anr ghoe-awr nae daefpov daefpar ghaq-euq mae. Aryoeq khoer-aq, li-eu maqbawni daef-awr zifluf-eu Miqyaer-euq dawq mae.” laer aertaq-euq mae

Heujeq-aq nymq-mr nawq-eu lafkhoer ur-eu mae, kharngeur-eu jeq lavpar nya-eu daef-eu jeq mae, Sanqpaq Yeqsur aer-eu “Aerkhawf yawshawr saflar nawq-eu khoertav zafkale ngae nawqmaf baoq zataef-a laer aer-eu mae, (Ghaqkhaer 1:8) Baoq khoer-aq lavpar nya-eu baoq mae, Nawq-eu mawrdo lafkhoer gar mrluf-eu mae, nymq-mr nawq-eu lafkhoer jawrluf-eu mae

Heutsanr nawq-anr bi ghovshaw dzaeqlar-eu mae”Yeqsur-anr shir-euq gar nae bi ghofdaef lar-euq ghaq-euq Saflar, nawmaf-euq lafkhoer jawr nar-aq, Yeqsur Kali-anr shir-euq gar nae bi ghofdaef lar-euq ghaq, nawmaf-euq lafkhoer jawr-eu aqyawf-euq Saflar-anr ghoe-awr, nawmaf-euq shirnya-eu mawrdo-anr khawf bi ghofdaeflar taef-a.” laer aertaq-euq mae (‭‭Lormav‬ ‭8‬:‭11‬)
Aqyawf nawq-eu mawrdo-anr daef-eu jeq bif-euq mae (2Gawrliqtu 4:7-11) lafkhoer aqdui-anr zanqler paq-aer ghae-eu jeq aernaeq taq-euq mae, heulof-aer aertaq-euq mae ““Huiq-awr muiq-eu baoq heu-aq, nga’maf-anr nae maqngeur-eu, Miqyaer-anr nae dovle-euq ngar-a laer bisiqni, nga’maf poeq-eu myawqganq heu, mirtsaq oeqlanq-euq lafkhoer anrluf-eu ma. Nga’maf-anr yawqpaw navluf nyaefsuflar luf-eu khawf, nyaefpyaev lar-eu gar maqkeuv-a. Noeq ngae maqdov-eu khawf, noeqtmqkhar maqza-eu gar maqkeuv-a. Khaeq-awr khav-eu gar yadaq-eu khawf, byaerdzae naeqlaf-eu gar maqkeuv-a. Diqlan naeqlaf-eu gar yadaq-eu khawf, diqsaef-eu gar maqkeuv-a. Nga’maf-euq mawrdo-anr nae Yeqsur-euq daef-eu jeq byacaevni bi dovlar nya’ni, nga’maf-euq mawrdo-euq lafkhoer aqmyanluf Sanqpaq Yeqsur shir-euq jeq piluf-eu ma. Aqjeq mirnae aernar-aq, Yeqsur-euq daef-eu jeq, shirnya-eu nga’maf-euq mawrdo-anr nae byacaevni dovlar nya’ni, nga’maf daefluf-eu deuq-aq, aqmyanluf Yeqsur-euq gharduq shirni a’naeq-eu gar ya daqluf-eu ma. Khoermirnae, nga’maf-euq lafkhoer shir-eu jeq gar mrluf-eu khawf, nawmaf-euq lafkhoer daef-eu jeq gar mrluf-eu mae.”
(‭‭2 Gawrliqtu‬ ‭4‬:‭7‬-‭12‬)

Nawr, aqmyanluf heu-anr siqnya-eu lafkhoer noeqtsov taq-awr nae yaqcan-eu mae, Nawq-eu mawrdo lafkhoer tiqjeqpaq anr-eu mae, Miqyaer-euq pyeuf-awr baoq byan-eu jeq anr-eu mae, heu-aq, kharngeur ngeur-eu tsawrhaq deuq naeq-aer bi beugar-eu jeq anr-eu mae, ‭‭(1 Yorhaq‬ ‭4‬:‭4‬) lafkhoer aer-eu “Ngar gaq-eu zaqdeuq-or! Nawmaf, Miqyaer-anr taf-eu tsawrhaq pyeuf-awr, nawmaf, aqyawf maf-anr ghaqler-euq mae. Aqjeq mirnae aernar-aq, nawmaf-euq lafkhoer jawr-eu ghaq-aq, mirtsaq-euq khoertav jawr-eu ghaq navmaqtser huiqdzaeq-eu mae.” laer aertaq-euq mae, nuinoeq heu nae yawqnan navluf nawq-eu daefzir-anr bi sheuqghae-awq, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, nawq-eu daef-eu jeq Ngamaf-eu lafkhoer urluf-eu mirnae guiqlanq huiqma, Ngamaf yawshawr saflar ngmaf-eu lafkhoer gar mrluf-eu gar noeqkeuv ma, Miqyaer lof-aer ghae-eu daef-eu jeq Ngamaf-eu daefzir yawqdzer dzaq-anr navluf bi parlar-eu mae, Ngamaf aqmyanluf uvlanr-eu lafkhoer, ghaqkhav-eu lafkhoer, hawr-eu ghaqler-eu lafkhoer yawdaef daef-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
2Tirmorseq 1:6/ Lurkaf 24:49/ 1Gawrliqtu 6;19

Nawq-eu lafkhoer aqdir pyeuf-eu saevdzeuf-anr siqnya-eu
30-09-2026 ความรู้เกี่ยวกับธรรมชาติที่แท้จริงของคุณ

“Ngar garkawv heudeuq, Miqyaer-euq Zaqyo tsawrmyanr-anr jan-eu nawmaf-anr sanqbof bofanr lef-eu-aq, nawmaf mqmaq maqbyav yarzir daef-eu jeq za-euq mae laer yasiq-awr, Miqyaer-euq Zaqyo-euq tsawrmyanr-anr bi jantsaf lef-eu gharduq ma.”
(‭‭1 Yorhaq‬ ‭5‬:‭13‬)

Nawr, aqsurghaq pyeufla laer Miqyaer nawq-anr bi siqnya mawf-eu mae, yawqhar yawqha noeq-eu maqngeur-eu, Aerkhawf bi siqnya-eu laer mae, Ghaqkhaer Yorhaq yawshawr saflar sheuqghae-eu lafkhoer nae bof-euq “Ngar garkawv heudeuq, Miqyaer-euq Zaqyo tsawrmyanr-anr jan-eu nawmaf-anr sanqbof bofanr lef-eu-aq. nawmaf mqmaq maqbyav yarzir daef-eu jeq za-euq mae laer yasiq-eu gharduq ma laer aer-eu mae, Heu-aq nawq-eu arghaer saevdzeuf mae, nymq-mr kali-euq lafkhoer Nawr pyeuf-eu ghaqmae, Nawr, Miqyaer lof-aer dur-eu mae. Aqjeqmirnae aernar-aq Nawr mqmaq maqbyav yarzir anr-eu mae, Khoer-aq Miqyaer-euq daef-eu jeq mae.

Aqdui guiluf-euq yaerbof bof-euq Ghaqkhaer Yorhaq-eu garkawv-anr haw-awq, aqyawf shaqdui zandui dui-eu aryamq-anr yadaq-euq mae. aqyawf binyaef-awr huidui dui-eu oeqlanq-anr bi dzaepuf-euq mae, aqyawfmaf Yorhaq-anr pufsaef-eu laer ghae-eu mae, khoernar-aq miqdzaq miv-ir-euq mae. Khoernar-aq Yorhaq cawqtur-awr gawqyawf yawf-euq mae, aqyawfmaf Yorhaq-anr maqsaef nya-a, Aqjeqmirnae aernar-aq aqyawf-eu lafkhoer tiqjeqpaq anr-eu mae

Teumirnae tsawrhaq ghawqmya ghaq Yorhaq-anr Miqyaer lof-aer durler-eu ghaq laer khawf kur-eu mae” aqyawfmaf Yorhaq-eu khoertav pyeuflar-euq jeq maq ghovshaw nya-a, Heughaq-aq kharngeur ngeur-eu tsawrhaq maqngeur nga laer aqyawfmaf aer-eu mae, Teumirnae Aqyawfmaf Yorhaq-anr taedzae-awr. Baqmor laer kur-eu irjawlanr-anr bijawr-ir-euq mae, sharnoeq hawsher-aq. Yorhaq tiqghaq taef-aer Miqyaer lof-aer durler-eu lalar? Maqngeur-a! Aqyawf-anr Miqyaer lof-aer bi durler-eu khoer-aq, aqyawf-eu lafkhoer anr-eu daef-eu jeq mae. Aqyawf-eu lafkhoer anr-eu Mqmaq maqbyav yarzir daef-eu jeq mae, Aqyawf daef-eu jeq khoer-anr siqnya-eu mirnae mae

Khoerlof-aer ghae-eu Daef-eu jeq Nawr, kali-euq lafkhoer za-euq mae. Miqyaer-euq yaerbof lafkhoer Nawr-aq Miqyaer-euq saevdzeuf tiqkawv lof-aer za-euq tsawrhaq mae laer aertaq-euq mae, (2Beqtuvluv 1:4) aermawf-eu dawqtsuif nar-aq. Nawr-aq kharngeur ngeur-eu tsawrhaq maqngeur-a, Nawr-aq tsawrhaqzaq taef maqngeur-aq Aerkhawf Nawr-aq Miqyaer lof-aer dur-eu daef-eu jeq anr-eu mae, Aqjeqmirnae aernar-aq Miqyaer-euq daef-eu jeq nawq-eu saflar lafkhoer anr-eu mae. Aerkhawf nawr, heujeq-anr aqdir ya ghovshaw-eu mae, maqngeur nar-aq Nawr, tsawrhaqzaq-eu hawkhaeq-anr nae noeq-awr ngaeq-eu mae, khoer-aq Nawr aqdir pyeuf-eu jeq maqngeur-a

Yaerbof lafkhoer “nawmaf mqmaq maqbyav yarzir daef-eu jeq za-euq mae laer bisiq-eu gharduq ma” laer aer-eu mae, Aermawf-eu nar Miqyaer nae nawq-anr panmaeq naeqlaf-euq lof-aer bidaef mawf-eu mae, Miqyaer nawq-eu nuinoeq-anr heujeq bianr mawf-eu mae, nawq-eu lafkhoer ur-eu daef-eu jeq khoer-aq, Miqyaer-eu daef-eu jeq mae laer nawq-anr bi noeqtsov taq mawf-eu mae, heu-aq nawq-eu gharduq aqdir pyeufmae laer Miqyaer siqnya-eu mae, Nawq nae mr-awr shar-eu lafkhoer nawq-eu saevdzeuf mawrlar-eu mae, Nawr pyeuf-eu ghaq lof-aer daefnya-eu mae, Miqyaer guiqlanq-anr jaceuq ma

mr-eu jan-eu dawq
Ngar-aq Miqyaer-eu saevdzeuf-anr tiqkawv lof-aer taf-eu tsawrhaq ma, Ngar, ngaq-eu lafkhoer ur-eu Miqyaer-euq daef-eu jeq-anr noeqtsov taq-awr nae daef-eu ma, Ngar, uvlanr-eu lafkhoer, khaqduqni ghae-eu lafkhoer, hawr-eu ghaqler-eu lafkhoer can-awr ngar mr-awr shar-eu pawnae kali byaqdov-eu ma, Aqmeq

Heugar guilanq nya-eu mae
2Beqtuvluv 1:4/ Yorhaq 1:12/ 1Yorhaq 4:17

kali-euq lafkhoer nawq-eu daefzir tsovdav- awq
29-09-2026 จงสร้างตัวเองในพระคริสต์

“Aqyuif aqnyir deuq-or! Nymq-mr ngar, nawmaf-anr Miqyaer-euq aqlaf-euq lafkhoer hawr-eu aqyawf-euq guiqlanq yawdzanr-euq dawq-euq lafkhoer a’naeq-awr bi jawryaf ma. Guiqlanq yawdzanr-euq dawq khoer-aq, nawmaf-anr bihuiq bi manrlar nya-awr, lavshawr-euq tsawrhaq dawqtawvluf naeq-aer, nawmaf tiqkawv lof-aer jeqbir za’nya-eu mae.”
‭‭(Ghaqkhaer‬ ‭20‬:‭32‬)

Aqdui Yeqsur Kali-anr hageuf-euq nar-aq. Aqdui-eu daefzir aqyawf-eu lafkhoer yahuiq yamanr lar-awr yatsov dav-eu mae, ‭‭(Yorhaq‬ ‭8‬:‭31‬) lafkhoer
“ Yeqsur, aqyawf-anr heulof-aer aernaeq-euq mae, “Nawmaf, ngaq-euq dawq-euq lafkhoer jawr nar-aq, aqdir aqmar ngaq-euq zaqlanr pyeuf-eu mae.” laer aernaeq-euq mae, saflar paw huiqlar manrlar-eu-aq. nuima ya’anr-eu mae. Aqyawx yawf pyeuflar-eu jeq maqngeur-a, Nawr ya’mr-eu jeq mae. Miqyaer-euq yaerdawq nawq-eu lafkhoer tiqbyanni yabi sanrlar-eu mae (Gawrlawrsaer 3:16)

Nawq-eu gharduq tiqghaq-iq maqhuiq dan nya-a, nawq-eu saflar-anr tiqghaq-iq maqbi huiqdan lar nya-a? Nawr Kali-euq lafkhoer huiqlar manrlar-eu-aq Nawr yaerdof-anr tsoftsaf taq-euq garnae lar-eu mae.

Nawr, heulof-aer ngaeq-eu dur! Ngar, jarlif tiqdmq dmqlan ni aqdanq-eu garnae panmaeq sanqbof-anr keuvni gui-euq ma” Aefkhawf gui-awr nae taef-aer maqlof-a, Sanqpaq Yeqsur nae Miqyaer-euq yaerbof-anr povtser haw-awq laer aertaq-euq gar noeqkeuv-awq, Ghaqkhaer pawrluf khawf aqdui-anr yaerbof pyaevtser haw laer aertaq-euq mae, pyaevtser haw-eu jeq-aq nawq-anr bi ghovshaw lar-eu mae, aqdir pyeuf-eu yawtsaq yawdawr jeq mawrlar-awr Nawq-anr, zifdan ni bi ghaelar-eu mae

Nawr, yaerbof gui taef-aer gui nar-aq. Nawr, nafshuir ni ghae-eu lafkhoer, Baoq lafkhoer, hawr-eu yaerdawq-eu baoq lafkhoer nae maqdaef nya-a, Miqyaer-euq lafkhoer muiqdui dui-eu jeq ghawqmya ni jav-eu mae. Nawr nawq-eu daefzir yaerbof dzaw-eu gar lawrnaeq-awr dzardziv dziv-eu uqtaf yawshawr saflar-anr a’naeq nar-aq. Nawq-anr zaftaq-euq jeq panmaeq laf-eu mae, nawq-eu nuijan ziflar-awr nawq-eu zaqsiq tsawrganr khawf lanqlar-eu mae, Nawr, Miqyaer naeq-aer yawdaef daef-eu ziflar-awr aqmyanluf yawtsaq yawdawr lafkhoer yawf nya-eu mae

Nawr-aq, Miqyaer-euq yaerdawq nae ghaqler nya-eu mae laer siqnya-awq, Miqyaer-euq yaerdawq-aq nawq-eu jeqbir panmaeq naeq-eu mae, Miqyaer-euq yaerdawq nawq-eu lafkhoer bi sanrlar-awr nawq-eu nuinoeq yabi lavpar-eu mae, khoer nar-aq nawq-eu mr-eu shar-eu jeq hawr-eu garma parlar-eu mae, Teubaqda mirnae nawq-eu saflar huiqlar manrlar-eu gharduq maqmr ni sharshuqni taqjawr,
(‭‭1 Beqtuvluv‬ ‭2‬:‭2‬) lafkhoer aer-eu
“Zaqnanq, aqcoer dawrmawf-eu lof-aer, nawmaf khawf, shawrjaevni ghae-eu aqcoer pyeuf-eu Yaerdawq-anr dawrmawf-awq. Dawr nar-aq, nawmaf huiqlar manrlar taef-a. laer aertaq-euq mae

Kalizaq-eu daefzir lafkhoer zifdan ni ghae-eu-aq. Miqyaer-eu yaerdawq saflar lafkhoer nyif-ir taq-euq garnae ir-eu mae, Nawr, kali-anr hageuf-euq teu-aq muiqdui dui-eu mae, Teumirnae aqyawf-eu lafkhoer tsovdav-awq guiqlanq yawdzanr lafkhoer hawr-eu kali-anr siqnya-eu tsawrganr paw huiqlar manrlar-awq, yawtsaq yawdawr heu-euq lafkhoer zifdan ni jawr-awq, Heu-aq, kali-euq lafkhoer Nawr maq coqdzae-ir ni daefnya-awr muiqlar sanrlar-eu garma mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, nawq-eu guiqlanq yawdzanr Ngamaf-anr ghaq bif-awr. Kali-euq lafkhoer Ngamaf-anr zifdan ni bighae naeqlaf-euq mirnae guiqlanq huiqma, Ngamaf-aq ghaq khav-awr, duqcir yaerdawq-eu lafkhoer kanaf ghae-awr zifdan ni jawr-eu ma, Ngamaf-eu daefzir-aq Miqyaer-euq yaerdawq nae bi lavmuiq luf-eu ma, Ngamaf Miqyaer-euq guiqlanq yawdzanr hawr-eu yawshaef khanqsaer lanqlar luf-eu lafkhoer daef-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
2Tirmorseq 2:15/ Gawrlawrsaer 2:6-7/ Yurdav 1:20

Nawq-eu kakhof-eu jeq taq bishm
27-09-2026 อย่าสูญเสียความรอดของคุณ

“Khoermirnae, tsawrhaq tiqghaqnav, ngar zifdanni yawfluf-eu ma laer noeq nar-aq, aqyawf maqya coq-ir ni yanr-eu tsaq taef-a.”
(‭‭1 Gawrliqtu‬ ‭10‬:‭12‬)

Mirtsaq khoertav jav-eu tiqjeq-iq kakhof-eu jeq naeq-aer maq sheutsaev nya-a, nawq nae mrza taq-eu jeq, nawq-eu hawkhaeq, nawq-eu tsawrmyanr dov-eu jeq, khoer-aq tiqjeq-iq maqanr-a, nawq-eu daefzir lafkhoer nae aryaer huiqdui dui-eu jeq khoer-aq kakhof-eu jeq mae, kakhof-eu jeq maqanr nar-aq, yawqjeq navluf yawqngaef mae, Nawr, mirtsaq khoertav yawdaef daef-eu-aq. Nawq-eu kakhof -eu jeq-anr lavsav taq-awr aqcawq-anr kakhof-eu jeq biza-eu laer mae, Nawr, heujeq-anr ghovshaw nar-aq, Nawr byankuf-eu lafkhoer jawr-eu mae

Tsawrhaq ghawqmya ghaq aqyawfmaf laejae laejae-aer gar mrshaef lef mae, nuima dzerloni bif-awr damq-eu uqtaf Miqyaer gar mrdui dui-eu mae, Aerkhawf aqyawfmaf kakhof-eu jeq shm-eu mae, Aqjeqmirnae aernar-aq aqyawfmaf garma canbanq taq-euq mae, Nawr-aq yawqjeq navluf cawmr-eu tsawrhaq pyeuf-awr aqcawq ciqhuiq-eu tsawrhaq pyeuf-eu lawkhawf aqdir aqyaer huiq-eu jeq shm-eu dur? Khoerlof-aer ghae-eu jeq taqbi pyeuflar, Nawq-eu kakhof-eu jeq-aq nawq-eu poeqdui lawqdui dui-eu jeq mae, taq hawdzeur. Garma heukanr nae taqbi geudov ghae

Tsawrhaq tiqghaq nav aqcawq nae aqyawf maf-eu garma-anr nae bi gheudov ghae-eu mae, maqgawfler paq-aer ghae-eu garkawv-anr gawfler-eu mae, zifdan ni maqyawf nya-a. Miqyaer naeq-aer yawdaef daef-eu paw ghaq baq-ir-eu mae, khoer-aq nawq-eu garma maqngeur-a. Teumirnae yawtsaq yawdawr lafkhoer jawr-awr. Kali-euq lafkhoer yawdaef daef-awr nawq-eu nuima lavsav taq-awa, ‭‭(Gawrlawrsaer‬ ‭2‬:‭6‬-‭7‬) lafkhoer aer-eu “Khoermirnae, nawmaf, Sanqpaq Yeqsur Kali-anr hageuf-euq lof-aer, aqyawf-euq lafkhoer daef-awq. Nawmaf, aqyawf-euq lafkhoer duqcir ka’naf ghae-awr, tsovgordav lef-awq. Guiqlanq-anr jaceuq-eu jeq byankhar luf-eu lafkhoer, nawmaf nae yadzaw-euq lof-aer, jan-eu jeq-euq lafkhoer zifdanni jawr-awq.” laer aertaq-euq mae,

Miqyaer naeq-aer yawdaef daef-eu-aq yawqha-euq garkawv mae, Miqyaer aqbyaqhaq-anr kur-euq nar-aq, Aqyawf tiqghaq-anr kur-euq taef mae, Khoerlof-aer durni Miqyaer lafkhoer yamr-awr ya lavsav taq-eu jeq khawf Nawr tiqghaq yamr-eu jeq pyeuf-eu taef mae, arsaq saq-eu aryamq heu lafkhoer tiqghaq nae-iq, nawq-anr garma taqbi sheuqbanq hawr-eu nawr khawf yawqhar yawqha maqngeur garma paw taqcan-ir, yawmuiq-aer noeq-awr yaerbof lafkhoer zifdan ni jawr-awq.

Sanqpaq Yeqsur-anr hageuf-eu-aq aqdanq bae-eu tiv taefmae, arsaq saq-eu tiv maqngeur-a, Miqyaer lafkhoer huiqlar manrlar-awq, mawrdo lawrnaeq-awr yaerbof dzaw-eu paw laejae-awq, Miqyaer-eu yaerbof-anr povtser haw-awq laer Sanqpaq Yeqsur aer-eu mae, (Yorhaq 5:39) khoernar-aq
Ghaqkhaer Pawrluv ‭‭(2 Tivmorseq‬ ‭2‬:‭15‬) lafkhoer aer-eu “Nawr, Miqyaer-euq maeqshi, tsermr haw-eu jeq-anr daqdzeur nya-eu tsawrhaq, shafdawr khar maqza-eu gar mrzaq hawr-eu yawtsaq yawdawr-euq dawq-anr dawrcoeni maeqnaeq nya-eu tsawrhaq pyeuflarni laejae duidui-awq.” laer aertaq-euq mae, Nawr, nawq-eu mawrdo Miqyaer-euq yaerdawq-anr a’naeq nar-aq, yawshawr saflar nawq-anr nafdui dui-eu jeq panmaeq naeq-eu mae, nawq-eu nuijan ziflar-awr Nawr, yawtsaq yawdawr lafkhoer zifdan ni yawfnya-eu mae


Ngamaf-anr Gaqdui dui-eu Aqda Miqyaer-or, Kali-euq lafkhoer Ngamaf-anr poeqdui lawqdui dui-eu kakhof-eu lafshawq bifnaeq laf-euq mirnae guiqlanq huiqma, Ngamaf yanr-awr zifdan ni ghae-awr duqcir yaerdawq-eu lafkhoer kanaf ghae-eu ma, Ngamaf Miqyaer-euq yaerdawq naeq-aer maqtsaq-eu jeqnae maqbi gheupyawv ghae, Kali-euq lafkhoer Ngamaf ghaq zaq-euq ma. Ngamaf guiqlanq yawdzanr lafkhoer hawr-eu yaerdawq siqnya-eu lafkhoer huiqlar manrlar luf-eu ma. Ngamaf-anr yawshaef khanqsaer lafkhoer sheuqghae naeqlaf-euq gharduq guiqlanq huiqma, Yeqsur Kali tsawrmyanr lafkhoer nae shar-eu ma. Aqmeq

Heugar guilanq nya-eu mae
Heqbyaer 2:1/ Pirlirpiv 2:12/ Ghaqkaer 20:29

Aqyawfmaf can paq-aer ghae-eu garma maeqnaeq-awq
26-09-2026 จงฝึกฝนพวกเขาในทางที่พวกเขาควรจะเดินไป

Zaq can paq-aer ghae-eu garma maeqduq naeq-awq.
Aqyawf arkhof lar ngae, garma heu-anr nae maqdov-ir-ar.
(Dawqdaq 22:6)

Zaq cugar tafler nae marjawv ni yaerbof lafkhoer aertaq-euq mae, Khoer-aq yawqha-euq nuinoeq hawr-eu zanrsanr khof naeq-aer maqtaf ler-a, Miqyaer-euq Yaerbof lafkhoer
Zaq can paq-aer ghae-eu garma maeqduq naeq-awq. laer aertaq-euq mae, aqyawfmaf nae tser-euq garma hawr-eu aqcawq nae tser-euq garma maqngeur-eu, Nawr, mawf-eu garma paw khawf maqngeur-aer. Aerkhawf aqyawf yacan ghae-eu garma kanr mae, garma khoerkanr-aq, Miqyaer-euq yaerdawq mae

Tsawrhaq tiqghaq nav zaq cu-eu gar maqtsaq-eu nuinoeq ‘anr-eu mae. Aqyawfmaf heulof-aer aer-eu mae, aqdui-euq nymr lafkhoer jawr-eu yawqghaq navluf aqjeq-anr jan-awr aqjeq mrle laer tsernya mae” laer aer-aer-eu mae khoer-aq kalizaq-eu zawfjir maqmgeur-a, kalizaq-aq aqjox-aer khawf zamae laer maqngeur-a, Nawr, kalizaq pyeuf-awr zaq cule laernar-aq. darsav sav-eu jeq jav-eu mae, darsav khoer-aq Miqyaer-euq yaerdawq mae,

Miqyaer-anr siqnya-eu-aq aryaer huiq-eu garkawv maqngeur nga laer noeq-eu tsawrhaq deuq-anr yaerbof lafkhoer aertaq-euq mae, (Lormav 1:28) tsawrkhav khavlar-euq deu aqyawfmaf khoerlof-aer noeq-eu-aq. Aqyawx yawf noeq-eu maqngeur-a, Aerkhawf aqyawfmaf zaq ngaenae khoerlof-aer huiqlar-awr bimaeq laf-euq mirnae mae, Miqyaer gar Mr-eu gharduq maq bimaeq naeqlaf-euq mirnae mae, aqyawfmaf huiqlar ngae Miqyaer-anr maq noeqkeuv ni huiqlar-eu mae, Heu-aq saflar shmdui dui-eu jeq pyeuf-ir nya-eu mae

Nawr, zaq-anr maqmaeq ni maq yaghae-a, Aqjeqmirnae aernar-aq yaerbof-eu lafkhoer heulof-aer aer-eu mae, “Yawdzawq yawgan jeq, zaq-euq nuima-anr paftawf taq-euq mae. Dzawpar-eu darcuir nae, garmanr kaq-eu gar taedzae nya-eu mae.”
(‭‭Dawqdaq‬ ‭22‬:‭15‬) Teubaqda mirnae Nawr kalizaq-eu Aqda hawr-eu Aqma nar-aq pyeufnar-aq, Nawq-eu zaq uqduq tanqnymr-anr maq-ir ni taq bighae, yawqha cumawf-eu lof-aer taef-aer taqcu. Aerkhawf aqdir pyeuf-eu yawtsaq yawdawr lafkhoer bican-eu laer cu-awq

Nawr, Miqyaer-euq garma paw zifdanni jawr-awr nae gaq-eu lafkhoer nae cunar-aq. Nawr, Aqyawf-anr khaeqluf-eu maqngeur-a, Aerkhawr Nawr, Miqyaer-euq aerdawq-anr narhaq luf-eu mae, khoernar-aq arsiq siqle-eu khoer-aq muiqdui dui-eu mae, aqyawfmaf huiqlar ngae aqyawfmaf garma khoerkanr nae maqdov-ir-a, aqdui nae aqyawf maf-anr maeqnaeq-euq khoer Aqyawf maf-anr saflar paw garma sheuqghae-eu narliq lof-aer pyeuf-eu mae, Aqyawf maf-anr lavsav-awr sheuqghae-eu mae, Nawr-aq zaq bi huiqlar-eu laer taef-aer maq yacu-a, Aerkhawf zaqdeuq Miqyaer garma paw can-awr. Yawtsaq yawdawr lafkhoer daefnya ni Miqyaer-anr siqnya larni yacu-eu mae, Heu-aq Miqyaer nae nawq-anr bimr-eu laer khaertaq-euq jeq mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, nawq-eu zaqsiq tsawrganr Ngamaf-eu daefzir lafkhoer gar mrluf-eu mirnae guiqlanq huiqma, Ngamaf-aq nawq-eu yaerdawq-eu yawshaef lafkhoer yawdaef daef-eu ma, gaq-eu lafkhoer nae aqmyanluf zmq-ir-eu ma,Ngama-eu nymr-aq Miqyaer-euq yaerdawq-eu khoertav tsovtaq-euq ma, Ngamaf-eu nymr-euq lafkhoer jawr-eu tsawrhaq deuq Miqyaer-anr siqnya-awr tsaq-awr dawr-eu jeq-anr siqnya larni culuf-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Erpersuv 6:4/ 2Tirmorseq 3:16/ Dawqmaeq 6:7

Naef saqdaq-aq aryaer huiq-eu jeq maqngeur-a
24-09-2026 วิญญาณชั่วไม่ได้เป็นปัจจัยสำคัญ

“Miqyaer, aqdui-anr Kali naeq-aer tiqkawv lof-aer bi ghofdaef lar-awr, Yeqsur Kali-euq lafkhoer, mq-euq khoertav aqyawf naeq-aer tiqkawv lof-aer binuir naeqlaf-euq mae.”
(‭‭Erpersu‬ ‭2‬:‭6‬)

Nawr, aryaer huiqdui dui-eu tiqjeq ya ghovshaw-eu mae, Khoer-aq Nawr, naef saqdaq-eu tiv-anr tiqkawv lof-aer jawr-eu maqngeur-a. Aqyawfmaf arnavni gor-eu lawkhawf. Nawr-aq mqtav kali naeq-aer tiqkawv lof-aer nuirluf-eu mae, khoer-aq nawq-eu artiv mae , garkawv heu-aq Nawr ya ghovshaw-eu jeq pyeu mae

Teumirnae naef saqdaq-anr lavtsoeq-eu gar aerkeuv ngae. Nawr laejae laejae-aer guirdeuv-eu gar aermawf-eu maqngeur-a, aqyawfmaf naeq-aer ngaeqcae cae-eu gar aermawf-eu maqngeur-a, heu-aq Miqyaer-euq yaerbof lafkhoer aertaq-euq arbar maqngeur-a, Nawr, naef saqdaq naeq-aer maqya ngaeqcae cae-a, Aerkhawf aqyawf-anr yatae dov-eu mae, Sanqpaq Yeqsur nae baoq khavdui dui-eu dawq ngaeqtaq-euq mae, “Nawmaf ngaq-eu tsawrmyanr-anr ghoe-awr naef-anr taedov taef-a, laer aertaq-euq mae (Maqkuv 16:17)

“Tae-eu” laer aernar-aq. “daeqdov ghae-eu, taedov-eu, hawr-eu gheudov-eu gar aermawf-eu mae, yawkhav-aer daedov dzae-eu arbar bi mawrlar-eu mae, Khoer-aq Miqyaer nae nawq-anr bifnaeq laf-euq baoq mae, Nawr, naef yawjawf deuq-anr dov-ir laer dawq yabif-eu mae, Miqyaer nawq-anr li-eu maqbaw-eu baoq bifnaeq taq-euq mae, Aqyawf dawqpae jawrnar-aq Nawr taedov nyamae, aerkhawf aqyawf garmanr jawrnar-aq Nawr, maqtae dovnya-a. laer Miqyaer nawq-anr maqaer-a, Miqyaer nawq-anr tsawrmyanr yawqmyanr navluf nav maqtser huiqdzaeq-eu tsawrmyanr bifnaeq-euq mae, ‭‭Pirlirpiv‬ ‭(2‬:‭10‬) lafkhoer aer-eu “Mq-euq khoertav, mirtsaq-euq khoertav hawr-eu mirtsaq-euq dawqdan khardaef kharjawr-eu jeq, Yeqsur-euq tsawrmyanr-anr yawqghaq navluf pawqtsuif pawqdmq yadmq taef-a.” laer aertaq-euq mae

Teubaqda mirnae aqyawfmaf aqgeugar jawr-eu la laer aryaer maqhuiq-a, Nawr, Yeqsur tsawrmyanr nae ngaeq nar-aq. Aqyawfmaf ya narhaq-eu mae, Nawr, aqgar jawrnae yaerdawq ngaeq-eu khawf naef sqdaq aqyawfmaf nawq-eu tersar yagaq-awr, nawq-eu dawq-anr ya narhaq-eu mae, Teubaqda mirnae naef saqdaq-aq aryaer huiq-eu jeq maqngeur-a, aqyawfmaf nawq-eu baoq-anr siqnya-eu mae

Heu-aq aqdir pyeuf-eu jeq mae, Khoer-aq Nawr, Yeqsur kali naeq-aer tiqkawv lof-aer mqtav paw nuirluf-eu mae, Nawr-aq uvlanr-eu baoq anr-eu jawrduq-anr nae yawdaef daef-eu mae, Teumirnae guv-eu jeq-anr taq hageuf. naef yawjawf deuq naeq-aer taqcae, Aerkhawf nawq-eu baoq zmq-awr Yeqsur-euq tsawrmyanr nae aqyawf-anr taedov-awq, Miqyaer guiqlanq-anr jaceuq ma

mr-eu jan-eu dawq
Ngar-aq mqtav paw Yeqsur naeq-aer tiqkhawv lof-aer nuirluf-eu ma, Naef saqdaq, mqsanr deuq hawr-eu kharjav-eu tsawrmyanr yawqmyanr nav maqtser huiqdzaeq-eu mae, Ngar-aq Yeqsur-euq tsawrmyanr nae baoq zmq-eu ma, yawzanr paw jawr-eu yawqjeq navluf ngaq-eu dawq-anr narhaq-eu mae, Ngar, Yeqsu naeq tiqkawv lof-aer uvlanr luf-eu ma, Naef saqdaq hawr-eu aqyawfmaf-eu armaf deuq ngaq-eu aqkuir-euq uvmov jawr-eu mae, Aqmeq

Heugar guilanq nya-eu mae
Maqkuv 16:17/ Pirlirpiv 2:9-10/ Lurkaf 10:19

Kaerdar taq-euq guiqlanq dawq khoer nuima khaqduq ni mrluiv awq
23-09-2026 จงทำให้คำสั่งของข่าวประเสริฐสำเร็จด้วยความกล้าหาญ

Maqguv ni khaqduqni ghae-awq laer Ngar nawq-anr aer-eu maqgeur-a lor? guv-eu jeq hawr-eu ghaq baq-eu jeq nawq-eu nuima lafkhoer taqbi anrlar, Aqjeqmirnae aernar-aq nawq-eu Ya’We Miqyaer pyeuf-eu ghaq Nawr khar-ir kharlar-eu gar nawq naeq-aer jawr-eu mae
(Yawrsuv 1:9)

Aqgeu jeq-eu garkawv keuvle-eu lawkhawf Nuima khaqduqni ghae-eu jeq-aq. Miqyaer-anr nae oe-euq yawduq baw-awr Miayaer nuima tsaq-eu jeq mr-eu jeq pyeufmae, yawshawr saflar byanle-eu garnae oe-euq jeq pyeuf mae, Khoer-aq. Baoq anr-eu lafkhoer nae guiqlanq dawq ngaeq-eu jeq mae, nuima khaqduqni guiqlanq dawq ngaeq-eu jeq pyeuf mae, (Ghaqkhaer 4:31) lafkhoer ghaqkhaer deuq yawshawr saflar byanle-awr khaeq-awr khav-eu aqgeu jeq-anr yadaq-euq lawkhawf Miqyaer-euq yaer dawq nuima khaqduqni ngaeq-euq mae,

Nymq-mr sarkaq-anr mirtsaq khoertav aqdui heujeq loqdui dui-eu mae, khoer-aq, nuima khaqduqni guiqlanq dawq ngaeq-eu jeq mae, Nuima khaqduqni ghae-eu tsawrhaq deuq-aq, aqgeu jeq-eu garkawv jav-eu lawkhawf ghaqler nya-awr guiqlanq dawq ngaeq-eu aryamq nga laer haw-eu mae, khoer-aq yawbae ngae ghaqkhaer deuqnae mr-euq gar-anr aqdui nae yamawr-euq jeq ma, aqyawfmaf khaeq-awr khav-eu jeq-anr yadaq ngae aqyawfmaf maqcaev-aq, Aefkhawf aqyawfmaf nuima khaqduqni guiqlanq dawq ngaeqdui dui-euq mae.

Khaeq-awr khav-eu jeq javngae Aqyawf maf-anr bosav naeqlaf laer aqyawfmaf maqshar-aq, Aefkhawf khaqduqni ghae-eu nuima bianr naeqlaf laer aqyawfmaf shar-euq mae, khoernar-aq aqyawfmaf yawshawr saflar byanle-euq nar-aq, aqyawfmaf nuima khaqduqni Miqyaer-euq yaerdawq ngaeq-euq mae, (Ghaqkhaer 4:29-31) aqyawfmaf guiqlanq dawq taqmaeq laer bidiq-awr biaer-eu lawkhawf aqyawfmaf nuima keuv-eu lafkhoer nae yeqsur kali-euq garkawv ngaeqtsaf lef-euq mae (Ghaqkhaer 5:40-42)

Aqyawfmaf uvlanr-eu Sanqpaq-anr maqguv-aer shir-eu jeq-anr khawf maqguv-a, aqyawfmaf ghaq khavdui dui-awr nuima khaqduq ni ghae-eu mae, tsaqler dzoerler-eu gar heu Miqyaer aqdui-anr A’naeq taq-euq mae, ( 2Gawrliqtu 5:18) Nawr, Yeqsur kali-euq gharduq guiqlanq dawq mirkhanq doeqni maeq-ir laer bi kurtaq-euq mae. Teumirnae nawq-eu daefzir-aq guiqlanq dawq maeq-eu gar ya bitaf-eu mae, kharngeur-eu jeq nae nawq-eu daefzir-anr taqbi lavtsoeq lar
Ghaqkhaer Pawrluv (‭‭1 Gawrliqtu‬ ‭9‬:‭16) lafkhoer aer-eu “Ngar guiqlanqdawq yamaeq-eu-mae Aqjeq mirnae aernar-aq, ngar guiqlanqdawq maqngaeq nar-aq, yawhaiq jeq ngaq-eu khoertav keuvle-eu mae. laer aertaq-euq mae (THSV) Nawr, heu-anr ya noeqtsov taq-eu mae, Nawr-aq heujeq ya’mr-eu kali-euq zaqlanr mae, nawq-eu dawqpae jawr-eu iqbaxzaq deuq-anr taq hawdzeur, Miqyaer tsawrhaqzaq tiqghaq taef-aer khawf maq bicawv-ir mawf-a, (2Beqtuvluv 3:9) Miqyaer aqyawfmaf-anr bibuq-ir mawf-eu mae. hawr-eu Miqyaer nawq-anr nuima taq-eu mae

(Lormav 10:14) lafkhoer Aaerkhawf aqyawfmaf-anr aernaeq-eu tsawrhaq maqjawr nar-aq aqyawfmaf aqjox-aer janlar nya-eu nmr? laer aertaq-euq mae, Nawr-aq aernaeq-eu khoerghaq mae. ciqcur ni taqjawr, nuima khaqduqni jan-eu lafkhoer nae yawduq baw-awr nae guiqlanq dawq ngaeq-awq, Heu-aq nawq-eu aryamq mae, Nawr, ya’mr-eu jeq nuima khaqduqni mr-awq, Nawq-eu jawrkhanq-anr Yeqsur Kali-euq guiqlanq dawq bikeuv-ir-awq, Miqyaer guiqlanq-anr jaceuq ma

mr-eu jan-eu dawq
Ngar-aq ghaq khav-awr nuima khaqduqni ghae-eu ma, Ngar, guiqlanq dawq nuima khaqduqni ngaeq-eu gharduq yawshawr saflar ngaq-anr ghaq bif-awr, Ngar jan-eu lafkhoer, Baoq lafkhoer, hawr-eu nuima khaqduqni ghae-eu lafkhoer nae ngaeq-eu ma, Ngar-aq kali-euq zaqlanr ma, ngaq-eu daefzir pawnae Miqyaer-euq dawq mirtsqqzaq-anr keuv ir-eu mae, Ngar, tsawrhaq ghawqmya ghaq-eu khoertaq kakhof-eu biza-awr lavpar-eu ma, Yeqsur Kali tsawrmyanr lafkhoer nae , Aqmeq

Heugar guilanq nya-eu mae
2Gawrliqtu 5:18-20/ 1Gawrliqtu 9:16/ Lormav 10:13-14