Knowledge Zone

နှစ်ပေါင်း 120ကျော်ခန့် ကြာပြီးနောက် တောင်ကိုရီးယားနိုင်ငံ ဆိုးလ်မြို့🖼️

ဖိလစ်ပိုင် ပင်လယ်ကွေ့ထဲက ကွန်ကရစ် စစ်သင်္ဘောကြီး Fort Drum ရဲ့ အလွန်ထူးခြားလှတဲ့ နောက်ခံသမိုင်း ကြောင်း
•••••••••••••••••••••••••••••••••••••••••••••••••••••••••••••••••••
မနီလာပင်လယ်ကွေ့ရဲ့ အဝင်ဝမှာ စစ်သင်္ဘောတစ်စင်း ရပ်တန့်နေသလို ထင်မှတ်ရပေမဲ့ တကယ်တော့ ရေထဲမှာ သံမဏိနှင့် သံကွန်ကရစ်များဖြင့် အခိုင်အမာ ဖန်တီးတည်ဆောက်ထားတဲ့ ထူးဆန်းလှတဲ့ စစ်ဘက်ဆိုင်ရာ ခံတပ်ကြီးတစ်ခု ရှိပါတယ်။

အဲ့ဒါကတော့ ဒုတိယကမ္ဘာစစ် သမိုင်းမှာ "The Concrete Battleship" (ကွန်ကရစ် စစ်သင်္ဘော) လို့ လူသိများခဲ့တဲ့ Fort Drum ခံတပ်ကြီးပဲ ဖြစ်ပါတယ်။ ဒီခံတပ်ကြီးရဲ့ စတင်ဖြစ်ပေါ်လာပုံကတော့ အလွန်ကို စိတ်ဝင်စားဖို့ ကောင်းပါတယ်။

၁၉၀၉ ခုနှစ် အမေရိကန်-ဖိလစ်ပိုင် စစ်ပွဲအပြီးမှာ အမေရိကန် စစ်တပ်ဟာ မနီလာမြို့တော်ကို ရေကြောင်းကနေ ရန်သူတွေ မဝင်ရောက်နိုင်အောင် ကာကွယ်ဖို့ အစီအစဉ်ဆွဲခဲ့ပါတယ်။

အဲဒီအခါ မနီလာပင်လယ်ကွေ့ အဝင်မှာရှိတဲ့ El Fraile ဆိုတဲ့ ကျောက်ကျွန်းငယ်လေးကို မြေညှိ၊ ဖြိုချလိုက်ပြီး သံကွန်ကရစ် အပြည့်လောင်းကာ စစ်သင်္ဘော ပုံစံ ခံတပ်ကြီးအဖြစ် ပြောင်းလဲ တည်ဆောက်ခဲ့တာပါ။

ခံတပ်ရဲ့ ဘေးနံရံတွေကို ၁၆ ပေကနေ အထူဆုံး ၃၆ ပေအထိ ထူထဲစွာ တည်ဆောက်ခဲ့ရုံတင်မကဘဲ အပေါ်ယံမှာလည်း စစ်သင်္ဘောကြီးတွေမှာ သုံးတဲ့ ၁၄ လက်မ အမြောက်ကြီး ၄ လက်ကို သံမဏိ မျှော်စင်ကြီးတွေနဲ့ တပ်ဆင်ခဲ့တာကြောင့် ပင်လယ်ထဲမှာ ဘယ်တော့မှ မြှုပ်မသွားနိုင်တဲ့ ကွန်ကရစ် စစ်သင်္ဘောကြီးတစ်စင်း ဖြစ်လာခဲ့ပါတယ်။

ဒီလို ခိုင်မာလှတဲ့ တည်ဆောက်မှုကြောင့်ပဲ ဒုတိယကမ္ဘာစစ်အတွင်း ဂျပန်တပ်တွေ ဖိလစ်ပိုင်ကို စတင်တိုက်ခိုက်ချိန်မှာ Fort Drum ဟာ သိမ်းပိုက်ဖို့ အခက်ခဲဆုံး သံမဏိခံတပ်ကြီး ဖြစ်ခဲ့ပါတယ်။

ဂျပန်တို့ရဲ့ ဗုံးကြဲမှု၊ အမြောက်နဲ့ ရာဂဏန်းမက ပစ်ခတ်မှုတွေကို နေ့စဉ်နဲ့အမျှ ခံခဲ့ရပေမဲ့ ထူထဲလှတဲ့ ကွန်ကရစ် အကာအကွယ်ကြောင့် အထဲက စစ်သည်တွေ မထိခိုက်ခဲ့ပါဘူး။

ပတ်ဝန်းကျင်က ကျွန်းတွေနဲ့ ခံတပ်တွေ အားလုံး ကျဆုံးသွားချိန်မှာတောင် မနီလာပင်လယ်ကွေ့ထဲမှာ ကျန်ခဲ့တဲ့ တစ်ခုတည်းသော ခံတပ်ကြီးအဖြစ် ကြံ့ကြံ့ခံ ပြန်လည် ပစ်ခတ်ခုခံခဲ့ပါတယ်။

ဒါပေမဲ့ ဒီခံတပ်ကြီးရဲ့ အဆုံးသတ်ကတော့ အလွန်ပဲ ထိန့်လန့်စရာကောင်းလှပါတယ်။ ၁၉၄၅ ခုနှစ်မှာ အမေရိကန်တပ်တွေ ဖိလစ်ပိုင်ကို ပြန်လည် သိမ်းပိုက်ချိန်မှာတော့ ဂျပန်စစ်သားတွေက ဒီခံတပ်ကြီးအထဲမှာ ပုန်းအောင်းပြီး အဆုံးထိ ဒူးမထောက်ဘဲ ခုခံခဲ့ကြပါတယ်။

ခံတပ်အထဲကို ဝင်ရောက်ဖို့ မလွယ်ကူတာကြောင့် အမေရိကန် တပ်ဖွဲ့တွေဟာ ခံတပ်ရဲ့ လေဝင်ပေါက်တွေကနေတစ်ဆင့် ဓာတ်ဆီနဲ့ ဒီဇယ် ဂါလန် ၅,၀၀၀ ကျော်ကို အထဲသို့ လောင်းထည့်ကာ မီးရှို့ဖျက်ဆီးခဲ့ပါတယ်။ ခံတပ်ကြီးဟာ ရက်ပေါင်းများစွာ မီးလောင်ကျွမ်းခဲ့ပြီး အထဲက ဂျပန်တပ်ဖွဲ့ဝင် အားလုံး သေဆုံးကာ စစ်ပွဲ အဆုံးသတ်သွားခဲ့ရပါတယ်။

ယခုအခါမှာတော့ Fort Drum ဟာ ပျက်စီးယိုယွင်းနေပြီ ဖြစ်ပေမဲ့ မနီလာပင်လယ်ကွေ့ထဲမှာ ဒုတိယကမ္ဘာစစ်ရဲ့ ကြမ်းတမ်းလှတဲ့ အခြေအနေတွေကို ပြန်လည်အမှတ်ရ‌စေမယ့် အမွေအနှစ် နေရာတစ်ခုအဖြစ် ခိုင်ခိုင်မာမာ ဆက်လက် ရပ်တည်နေဆဲ ဖြစ်ပါတယ်။

#ဗဟုသုတ #ခံတပ်

လူပေါင်း နှစ်သိန်းကျော် အသက်ဆုံးရှုံးခဲ့ရတဲ့ တရုတ်နိုင်ငံက ကမ္ဘာ့အဆိုးဝါးဆုံး ဗန်ချောင် ရေကာတာ ကျိုးပေါက်မှု
••••••••••••••••••••••••••••••••••••••••••••••••••••••••••••••••

ကမ္ဘာ့သမိုင်းမှာ လူအသေအပျောက် အများဆုံးနဲ့ အဆိုးဝါးဆုံး အင်ဂျင်နီယာဆိုင်ရာ ဘေးအန္တရာယ်ကြီးတစ်ခုကို ပြပါဆိုရင် ၁၉၇၅ ခုနှစ်က တရုတ်နိုင်ငံ၊ ဟဲနန်ပြည်နယ်မှာ ဖြစ်ပွားခဲ့တဲ့ ဗန်ချောင် ရေကာတာ (Banqiao Dam) ကျိုးပေါက်မှု ဖြစ်စဉ်ကိုပဲ ညွှန်ပြရမှာ ဖြစ်ပါတယ်။

ဒီမတော်တဆမှုကြောင့် အသက်ပေါင်း ၂၆,၀၀၀ မှ ၂၄၀,၀၀၀ အထိ သေဆုံးခဲ့ရပြီး လူပေါင်း ၁၁ သန်းကျော် အိမ်ခြေမဲ့ ဖြစ်ခဲ့ရတာကြောင့် ကမ္ဘာ့ရေကာတာ သမိုင်းမှာ မေ့ပျောက်လို့ မရနိုင်တဲ့ သမိုင်းဝင် သင်ခန်းစာကြီးတစ်ခု ဖြစ်ခဲ့ရတာပါ။

ဒီ ရေကာတာကြီးကို ၁၉၅၀ ပြည့်လွန်နှစ်တွေမှာ ဆိုဗီယက် အင်ဂျင်နီယာတွေရဲ့ ကူညီမှုနဲ့ တည်ဆောက်ခဲ့တာ ဖြစ်ပါတယ်။

ထိုစဉ်က အင်ဂျင်နီယာတွေက ဒီရေကာတာကို "နှစ်ပေါင်း ၁,၀၀၀ အတွင်း တစ်ကြိမ်မှ မကြုံတွေ့နိုင်တဲ့ ရေကြီးရေလျှံမှု" ကိုပင် ခံနိုင်ရည်ရှိအောင် ဒီဇိုင်းထုတ်ထားတာမို့ "သံမဏိ ရေကာတာကြီး" (Iron Dam) လို့တောင် တင်စားခေါ်ဝေါ်ခဲ့ကြတာပါ။ ဒါပေမဲ့လည်း အင်ဂျင်နီယာဆိုင်ရာ တွက်ချက်မှုနဲ့ ဒီဇိုင်းပိုင်းမှာ ကြီးမားတဲ့ အားနည်းချက်အချို့ ပါဝင်နေခဲ့ပါတယ်။

အဓိက အင်ဂျင်နီယာဆိုင်ရာ အမှားအယွင်းကတော့ ရေကာတာရဲ့ ရေပိုလွှဲ (Spillway) ပမာဏ နည်းပါးလွန်းတာပဲ ဖြစ်ပါတယ်။ တည်ဆောက်စဉ်က ကုန်ကျစရိတ် ချွေတာဖို့နဲ့ လယ်ယာစိုက်ပျိုးရေးအတွက် ရေများများ သိုလှောင်နိုင်ဖို့ကိုပဲ ဦးစားပေးခဲ့တာကြောင့် အရေးပေါ် ရေထုတ်နိုင်တဲ့ ရေတံခါး အရေအတွက်ကို လျှော့ချခဲ့တာပါ။

အခြေအနေကို ပိုဆိုးသွားစေတာကတော့ ၁၉၇၅ ခုနှစ် သြဂုတ်လမှာ ဝင်ရောက်ခဲ့တဲ့ "ဆူပါ တိုင်ဖုန်း နီနာ" (Super Typhoon Nina) မုန်တိုင်းကြီးပဲ ဖြစ်ပါတယ်။ မုန်တိုင်းကြောင့် တစ်ရက်တည်းမှာတင် တစ်နှစ်စာ မိုးရေချိန်ထက် ပိုမိုတဲ့ မိုးရေတွေ သည်းထန်စွာ ရွာသွန်းခဲ့တာကြောင့် ရေကာတာထဲကို ရေတွေ အဆမတန် စီးဝင်လာခဲ့တာပါ။

ရေကာတာ ထိန်းချုပ်သူတွေဟာ ရေပိုလွှဲ ရေတံခါးတွေကို ဖွင့်ဖို့ ကြိုးစားခဲ့ကြပေမယ့် မြေပြိုမှုတွေနဲ့ သဲနုန်းတွေ အောက်ခံပိတ်နေတာကြောင့် ရေတံခါးအချို့ ပိတ်ဆို့သွားခဲ့ပါတယ်။

ဒါ့အပြင် အင်ဂျင်နီယာ ဒီဇိုင်းအရ ရေကာတာ အထက်မျက်နှာပြင်ထက် ရေကျော်တက်သွားတာကို ခံနိုင်ရည်မရှိတဲ့ မြေသားဓာတ်ပေါင်းစပ် ရေကာတာ (Earthen Dam) အမျိုးအစား ဖြစ်နေတာကလည်း အဓိက အချက်ဖြစ်ခဲ့ပါတယ်။

စီးဝင်လာတဲ့ ရေပမာဏဟာ ရေကာတာရဲ့ အမြင့်ထက် ကျော်လွန်သွားတဲ့အခါ ရေကာတာ မြေသားတွေ စတင် တိုက်စားခံရပြီး နောက်ဆုံးမှာတော့ ဗန်ချောင် ရေကာတာကြီးဟာ အရှိန်အဟုန်နဲ့ ကျိုးပေါက်သွားခဲ့ရတာ ဖြစ်ပါတယ်။

ဒါတင်မကသေးဘဲ ဗန်ချောင် ရေကာတာ ကျိုးပေါက်သွားတဲ့အခါ စီးထွက်သွားတဲ့ ရေလှိုင်းကြီးတွေဟာ အောက်ဘက်က အခြား ရေကာတာ ၆၀ ကျော်ကိုပါ ဆက်တိုက် ရိုက်ခတ် ပျက်စီးစေခဲ့တဲ့ "Cascade Effect" (ကက်စကေး သက်ရောက်မှု) ဖြစ်ပွားခဲ့တာကြောင့် ပျက်စီးဆုံးရှုံးမှုဟာ ထိန်းမနိုင် သိမ်းမရ ဖြစ်သွားခဲ့ရတာပါ။

ဒီဖြစ်စဉ်ဟာ အင်ဂျင်နီယာ လောကအတွက် သဘာဝဘေးအန္တရာယ် ခန့်မှန်းချက်တွေကို လျှော့တွက်လို့ မရကြောင်းနဲ့၊ ရေကာတာ ဒီဇိုင်းဆွဲရာမှာ ဘေးအန္တရာယ် ကာကွယ်ရေးစနစ် (Safety Margins) တွေကို အပြည့်အဝ ထည့်သွင်းရမည်ဖြစ်ကြောင်း ကမ္ဘာ့သမိုင်းမှာ အကြီးမားဆုံး သင်ခန်းစာ ပေးသွားခဲ့တာပဲ ဖြစ်ပါတယ်။

#ဗဟုသုတ #ရေကာတာ
#ဆည်

ပင်လယ်နီ ကမ်းခြေက ဟန်ပြ အပန်းဖြေစခန်းနဲ့ မော့ဆက်တို့ရဲ့ လျှို့ဝှက်စစ်ဆင်ရေး
•••••••••••••••••••••••••••••••••••••••••••••••••••••••••••••••

ကမ္ဘာ့ထောက်လှမ်းရေး သမိုင်းမှာ ဟောလိဝုဒ် ရုပ်ရှင်ဇာတ်ကားတစ်ကားထက်ပင် ပိုဆန်းကြယ်ပြီး စိတ်လှုပ်ရှားဖို့ ကောင်းခဲ့တဲ့ သမိုင်းဝင် လျှို့ဝှက်စစ်ဆင်ရေးကြီးတစ်ခု ၁၉၈၀ ပြည့်လွန်နှစ်တွေတုန်းက ပင်လယ်နီ ကမ်းခြေမှာ ဖြစ်ပွားခဲ့ဖူးပါတယ်။

အဲဒါကတော့ အီသီယိုးပီးယားနိုင်ငံမှာ စစ်ဘေးနဲ့ ငတ်မွတ်ခေါင်းပါးမှုတွေကြောင့် ဒုက္ခရောက်နေကြတဲ့ ဘီတာ အစ္စရေး (Beta Israel) ခေါ် အီသီယိုးပီးယား ဂျူးလူမျိုးထောင်ပေါင်းများစွာကို အစ္စရေး ထောက်လှမ်း ရေးအဖွဲ့ (Mossad) က ပင်လယ်နီကို ဖြတ်သန်းပြီး ဘေးကင်းရာဆီ လျှို့ဝှက် ကယ်ထုတ်ပေးခဲ့တဲ့ စစ်ဆင်ရေးကြီးပဲ ဖြစ်ပါတယ်။

အဲဒီအချိန်တုန်းက အီသီယိုးပီးယားနိုင်ငံကနေ အစ္စရေးနိုင်ငံဆီ တိုက်ရိုက် ထွက်ခွာဖို့ မဖြစ်နိုင်ခဲ့တာကြောင့် ဂျူးလူမျိုး ထောင်ပေါင်းများစွာဟာ အာဖရိက သဲကန္တာရတွေကို ခြေလျင်ဖြတ်သန်းပြီး အိမ်နီးချင်း ဆူဒန်နိုင်ငံဆီ ဒုက္ခသည်အဖြစ် ထွက်ပြေးခဲ့ကြရပါတယ်။

အစ္စရေးအစိုးရဟာ ဒီဒုက္ခသည်တွေကို ကယ်ထုတ်ဖို့အတွက် အလွန်ဆန်းသစ်ပြီး ရဲရင့်တဲ့အစီအစဉ်တစ်ခုကို ရေးဆွဲခဲ့ပါတယ်။ အဲဒါကတော့ ဆူဒန်နိုင်ငံ၊ ပင်လယ်နီ ကမ်းခြေမှာရှိတဲ့ အီတာလျံ လုပ်ငန်းရှင်တွေ စွန့်ပစ်ထားခဲ့တဲ့ Arous ဆိုတဲ့ ဟိုတယ်အပျက်ကြီးကို အီတလီ ခရီးသွား ကုမ္ပဏီတစ်ခုအနေနဲ့ ဟန်ပြ ငှားရမ်းလိုက်တာပဲ ဖြစ်ပါတယ်။

ဒီစစ်ဆင်ရေးကို Operation Bros ဒါမှမဟုတ် Red Sea Resort စစ်ဆင်ရေး လို့ ခေါ်ဆိုခဲ့ကြပြီး၊ မော့ဆက် အေးဂျင့်အဖွဲ့ဟာ အဲဒီ အပန်းဖြေစခန်းကို အမှန်တကယ်ပဲ ဒိုင်ဗင်း အပန်းဖြေစခန်းတစ်ခုအဖြစ် ပြန်လည်ပြင်ဆင် ဖွင့်လှစ်ခဲ့ပါတယ်။

နေ့ဘက်တွေမှာ အစ္စရေး အေးဂျင့်တွေဟာ ဥရောပက လာရောက်ကြတဲ့ ခရီးသွားတွေကို ရေငုပ်နည်း သင်ပေးတာ၊ ဧည့်ဝတ်ပြုတာတွေ လုပ်ဆောင်ခဲ့ကြပြီး၊ ညဘက် ရောက်ပြီဆိုရင်တော့ တူညီတဲ့ ထောက်လှမ်းရေး အေးဂျင့်တွေဟာ သဲကန္တာရထဲဆီ သွားရောက်ကာ အီသီယိုးပီးယား ဂျူးဒုက္ခသည်တွေကို ကားတွေနဲ့ သယ်ဆောင်လာခဲ့ကြတာပါ။

အဲဒီနောက် ပင်လယ်နီ ကမ်းခြေကနေတစ်ဆင့် အစ္စရေး ရေတပ်ရဲ့ အထူးတပ်ဖွဲ့ဝင်တွေနဲ့ အသင့်စောင့်ကြိုနေတဲ့စစ်သင်္ဘောတွေ၊ ရေငုပ်သင်္ဘောတွေဆီ ဆူဒန် စစ်တပ် မရိပ်မိနိုင်အောင်လျှို့ဝှက် ကူးပြောင်းပေးခဲ့ကြပါတယ်။

အချိန်ကြာလာတာနဲ့အမျှ ဒုက္ခသည် ဦးရေ ပိုမိုများပြားလာခဲ့တာကြောင့် ပင်လယ်နီ ရေကြောင်းလမ်းအပြင် လေကြောင်းလိုင်းကိုပါ အသုံးပြုဖို့ ဆုံးဖြတ်ခဲ့ကြပါတယ်။

ဒီအခါမှာတော့ Operation Moses စစ်ဆင်ရေးကိုစတင်ခဲ့ပြီး မော့ဆက် အေးဂျင့်တွေဟာ သဲကန္တာရ အလယ်တည့်တည့်မှာရှိတဲ့ စက်ပြင်ကွင်းဟောင်းတွေကို လေယာဉ်ပြေးလမ်းအဖြစ် အသုံးပြုကာ အစ္စရေး လေတပ်ရဲ့ C-130 စစ်ဘက်သုံး ကုန်တင်လေယာဉ်ကြီးတွေကို မှောင်မိုက်နေတဲ့ ညဘက်တွေမှာ လျှို့ဝှက် ဆင်းသက်စေခဲ့တာပါ။

ဒီနည်းနဲ့ ပင်လယ်နီ ကမ်းခြေနဲ့ သဲကန္တာရ လေကြောင်းလိုင်းတို့မှတစ်ဆင့် ဂျူးဒုက္ခသည်ပေါင်း ၈,၀၀၀ ကျော်ကို အစ္စရေးဆီ ဘေးကင်းစွာ ကယ်ထုတ်နိုင်ခဲ့ပါတယ်။

ဆူဒန် စစ်တပ်နဲ့ အာဏာပိုင်တွေဟာ သူတို့နိုင်ငံရဲ့ ကမ်းခြေပေါ်မှာ အစ္စရေး ထောက်လှမ်းရေးတွေက အပန်းဖြေစခန်း ဟန်ပြဖွင့်ပြီး လူပေါင်း ထောင်ပေါင်းများစွာ ကယ်ထုတ်နေတယ်ဆိုတာကို နှစ်ပေါင်းများစွာ ကြာသည်အထိ လုံးဝ မသိရှိခဲ့ကြပါဘူး။

၁၉၈၅ ခုနှစ်မှာ လျှို့ဝှက်ချက် ပေါက်ကြားသွားပြီး စစ်ဆင်ရေး ရပ်ဆိုင်းလိုက်ရတဲ့ အချိန်ကျမှသာ မော့ဆက် အေးဂျင့်တွေဟာ အပန်းဖြေစခန်းကို စွန့်ခွာခဲ့ကြပြီး အိမ်ပြန်သွားခဲ့ကြတာ ဖြစ်ပါတယ်။

ဒီ ပင်လယ်နီ စစ်ဆင်ရေးကြီးဟာ ကမ္ဘာ့ထောက်လှမ်းရေး သမိုင်းမှာ ရဲရင့်မှု၊ ပါးနပ်မှုနဲ့ လူသားဆန်မှုတို့ ပေါင်းစပ်ထားတဲ့ အံ့မခန်း အောင်မြင်ခဲ့တဲ့ ကမ္ဘာ‌ကျော် လျှို့ဝှက်စစ်ဆင်ရေးကြီးတစ်ခုပဲ ဖြစ်ပါတယ်။

နှစ်ပေါင်း ၇၀ ခန့်ကြာပြီးနောက် ကနေဒါနိုင်ငံ တိုရွန်တိုမြို့🇨🇦

အာရှသားတွေကြားက တောက်ပတဲ့ အပြာရောင် မျက်လုံးပိုင်ရှင် "ဘူတွန်ကျွန်းသားများ"

အရှေ့တောင်အာရှသား အများစုရဲ့ သဘာဝ ရုပ်ပိုင်းဆိုင်ရာ လက္ခဏာဟာ အသားညိုပြီး နက်မှောင်တဲ့ မျက်လုံးအိမ် ပိုင်ရှင်တွေ ဖြစ်ကြတာ များပါတယ်။

ဒါပေမယ့် အင်ဒိုနီးရှားနိုင်ငံ၊ စူလာဝေစီ ကမ်းလွန်က ဘူတွန်ကျွန်းပေါ်မှာရှိတဲ့ ကိုင်ဘူလာဝါ (Kaimbulawa) ဆိုတဲ့ မျိုးနွယ်စုငယ်လေးထဲမှာတော့ အခြားသူတွေနဲ့ မတူဘဲ တောက်ပတဲ့ အပြာရောင် မျက်လုံးပိုင်ရှင်တွေ ရှိနေကြပါတယ်။

ဒါတင်မကသေးဘဲ အချို့ဆိုရင် မျက်လုံးတစ်ဖက်က ညိုပြီး ကျန်တစ်ဖက်က ပြာနေတဲ့ (Heterochromia) လို့ခေါ်တဲ့ မျက်လုံးမျိုးကိုပါ ပိုင်ဆိုင်ထားကြတာကြောင့် ကျွန်တော်တို့ ရင်းနှီးထားတဲ့ အရှေ့တောင်အာရှသားတွေရဲ့ ရုပ်သွင်နဲ့ လုံးဝ ကွဲပြားခြားနားနေတာ ဖြစ်ပါတယ်။

ဒီလို ထူးဆန်းဆန်းပြားလှတဲ့ အလှတရားဟာ ၂၀၂၀ ခုနှစ် မတိုင်ခင်အထိ ကမ္ဘာပေါ်မှာ လူသိနည်းနေခဲ့သေးတာ ဖြစ်ပါတယ်။

ဒါပေမယ့် ၂၀၂၀ ခုနှစ်မှာတော့ အင်ဒိုနီးရှား အမျိုးသား ဓာတ်ပုံဆရာနှင့် ဇီဝဗေဒပညာရှင်တစ်ဦးဖြစ်သူ Korchnoi Pasaribu က ဒီကျွန်းပေါ်ကို သွားရောက်ပြီး သူတို့ရဲ့ သဘာဝအတိုင်း နေထိုင်မှု ပုံရိပ်တွေကို ရိုက်ကူးမှတ်တမ်းတင်ခဲ့ရာကနေ အဆိုပါ ဓာတ်ပုံတွေဟာ အင်တာနက်ပေါ်မှာ ချက်ချင်းဆိုသလို တဟုန်ထိုး ပျံ့နှံ့သွားပြီး တစ်ကမ္ဘာလုံးက လူတွေရဲ့ အာရုံစိုက်မှုကို စတင်ရရှိခဲ့တာ ဖြစ်ပါတယ်။

ဒီလို ထူးဆန်းတဲ့ မျက်လုံးရောင်ကို ပိုင်ဆိုင်ထားရခြင်းရဲ့ နောက်ကွယ်မှာတော့ စိတ်ဝင်စားဖို့ကောင်းတဲ့ သိပ္ပံနည်း ကျ ဆေးပညာဆိုင်ရာ အကြောင်းရင်းတွေ ရှိနေပါတယ်။

ဒါဟာ အလွန်ရှားပါးလှတဲ့ မျိုးဗီဇ ဖောက်ပြန်မှုတစ်မျိုးကြောင့် ဖြစ်ပြီး ဆေးပညာအရ ဝါဒန်ဘတ် ရောဂါလက္ခဏာစု (Waardenburg syndrome) လို့ ခေါ်ဆိုပါတယ်။

ဒီရောဂါလက္ခဏာဟာ ကမ္ဘာပေါ်မှာ လူဦးရေ ၄၂,၀၀၀ မှာမှ ၁ ယောက်နှုန်းလောက်သာ တွေ့ရှိရလောက်အောင် အလွန်ရှားပါးပါတယ်။

သန္ဓေသား ဘဝကတည်းက မျိုးဗီဇပြောင်းလဲမှုကြောင့် ခန္ဓာကိုယ်အတွင်း အရောင်မဲ (Melanin) ပေးပို့တဲ့ Neural crest ဆဲလ်တွေရဲ့ လုပ်ဆောင်ချက် ပုံမှန်မဟုတ်တော့ဘဲ ခန္ဓာကိုယ်ရဲ့ အချို့နေရာတွေမှာ အရောင်ခြယ် မဲဆီ (Pigment) ခင်းကျင်းမှု လျော့နည်းသွားတာကြောင့် သူငယ်အိမ်တွေဟာ တောက်ပတဲ့ အပြာရောင် ဖြစ်သွားရခြင်း ဖြစ်ပါတယ်။

ထို့အပြင် ဒီရောဂါစုပါဝင်သူ အချို့မှာတော့ မွေးရာပါ နားမကြားနိုင်တဲ့ လက္ခဏာများလည်း ပူးတွဲပါဝင်တတ်ပါတယ်။

ဒါပေမယ့်လည်း ဒီလို မျိုးဗီဇဆိုင်ရာ ကွဲပြားမှုကြောင့် အခြားသူတွေနဲ့ မတူဘဲ ထူးခြားနေကြပေမယ့် ဘူတွန်ကျွန်းပေါ်က မျက်လုံးပြာ ပိုင်ရှင်လေးတွေဟာ သူတို့ရဲ့ ရိုးရာပင်လယ်ပြင် တိုင်းရင်းသား သဘာဝအတိုင်း ရိုးရှင်းစွာပဲ ဆက်လက် နေထိုင်နေကြပါတယ်။

သူတို့ဟာ ကျွန်းပေါ်က ပုံမှန် မျက်လုံးညိုရောင်ရှိတဲ့ အခြားမျိုးနွယ်စုဝင်တွေနဲ့အတူ အေးအတူ ပူအမျှ၊ ရိုးရာယဉ်ကျေးမှုတွေကို အတူတကွ ထိန်းသိမ်းရင်း ငြိမ်းချမ်းစွာ ယှဉ်တွဲနေထိုင်လျက် ရှိကြတာပဲ ဖြစ်ပါတယ်။

#ဗဟုသုတ #အင်ဒိုနီးရှား #ထူးဆန်းထွေလာ

ဇိမ်ခံတိုက်ခန်းရဲ့ မျက်နှာကြက်အက်ကြောင်းကနေ ရှာဖွေတွေ့ရှိခဲ့တဲ့ အမိုးပေါ်က ဧရာမကျောက်တောင်ကြီး
˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚
မိမိတို့ နေထိုင်တဲ့ အိမ်ခန်းမျက်နှာကြက်တွေမှာ ရုတ်တရက် အက်ကြောင်းတွေပေါ်လာပြီး ရေတွေစိမ့်ထွက်လာတဲ့ ပြဿနာဟာ အိမ်ခေါင်မိုးပေါ်က တောင်ကြီးတစ်လုံးကြောင့်လို့ ဘယ်သူမှ ထင်မှတ်ထားကြမှာ မဟုတ်ပါဘူး။

တရုတ်နိုင်ငံ၊ ပေကျင်းမြို့က အထပ် ၂၆ ထပ်ရှိတဲ့ "Park View" ဆိုတဲ့ ဇိမ်ခံအထပ်မြင့်တိုက်ခန်းကြီးမှာ နေထိုင်ကြသူတွေဟာ သူတို့အိမ်တွေထဲ ရေယိုစိမ့်မှုတွေ ကြုံရပြီး မျက်နှာကြက်တွေ အက်ကွဲလာတဲ့အခါ အဖြေရှာမရဘဲ စိတ်ပျက်ခဲ့ကြရပါတယ်။

ဒါပေမယ့် အမှန်တရားကို သိလိုက်ရတဲ့အခါမှာတော့ တစ်တိုက်လုံးက အိမ်နီးချင်းတွေဟာ ကိုယ့်မျက်စိကိုယ်တောင် မယုံနိုင်လောက်အောင် အံ့ဩထိတ်လန့်သွားခဲ့ကြရပါတယ်။ အကြောင်းရင်းကတော့ ထိုဇိမ်ခံတိုက်ခန်းကြီးရဲ့ အမိုးအပြားပေါ်မှာ တရားခံက အထင်အရှား ရှိနေလို့ပဲ ဖြစ်ပါတယ်။

ဒီအဆောက်အအုံရဲ့ အပေါ်ဆုံးထပ်မှာ နေထိုင်တဲ့ Zhang Biqing (ကျန်းပီချင်း) လို့ခေါ်တဲ့ ချမ်းသာကြွယ်ဝတဲ့ တရုတ်တိုင်းရင်းဆေး ပါမောက္ခတစ်ဦးဟာ သက်ဆိုင်ရာ အာဏာပိုင်တွေရဲ့ ခွင့်ပြုချက် လုံးဝမရှိဘဲ ခေါင်မိုးထပ်ကွင်းပြင်တစ်ခုလုံးကို ဧရာမ ကျောက်တောင်ကြီးတစ်ခုအဖြစ် ၆ နှစ်ပတ်လုံး တိတ်တဆိတ် တည်ဆောက်ခဲ့တာ ဖြစ်ပါတယ်။

ဒါဟာ သာမန် ဝရန်တာချဲ့ထွင်မှုမျိုး မဟုတ်ဘဲ တကယ့် ကျောက်ဆောင်အတုကြီးတွေ၊ သစ်ပင်ကြီးငယ်တွေနဲ့ ချုံနွယ်ပိတ်ပေါင်းတွေအပြင် လမ်းလျှောက်စင်္ကြံတွေပါ ထည့်သွင်းထားတာကြောင့် ခေါင်မိုးပေါ်မှာ တောအုပ်ငယ်တစ်ခု ရောက်နေသလိုမျိုး ဆန်းပြားစွာ ဖန်တီးထားခဲ့ခြင်း ဖြစ်ပါတယ်။

အချိန်ကြာလာတာနဲ့အမျှ ဒီ ကျောက်တောင်တုကြီးရဲ့ အဆမတန်လေးလံတဲ့ အလေးချိန်ဒဏ်၊ ရေစီးရေလာ ပိတ်ဆို့မှုတွေကြောင့် အောက်ထပ်က အိမ်နီးချင်းတွေဟာ အဆောက် အအုံကြီး တစ်ခုလုံး ပြိုကျပျက်စီးသွားမှာကို ပြင်းထန်စွာ စိုးရိမ်လာကြပြီး တိုင်ကြားစာတွေ အကြိမ်ကြိမ် ပေးပို့ခဲ့ကြပါတယ်။

ဒီထူးဆန်းလှတဲ့ ဒီကျောက်တောင်တုကြီးကို ဒေသခံတွေက အကြိမ်ကြိမ် တိုင်ကြားခဲ့ကြပေမယ့်လည်း နှစ်ပေါင်းများစွာကြာအောင် ဘာအရေးယူမှုမှ မရှိဘဲ ဆက်လက်တည်ရှိနေခဲ့ပါတယ်။

ဒါပေမယ့် ၂၀၁၃ ခုနှစ်မှာတော့ ၎င်းရဲ့ မယုံနိုင်စရာ ဓာတ်ပုံတွေဟာ အင်တာနက်ပေါ် ပျံ့နှံ့သွားပြီး တစ်ကမ္ဘာလုံး ဟိုးဟိုးကျော်သွားခဲ့ပါတယ်။

ထိုအခါမှသာ မြို့ပြစီမံခန့်ခွဲရေး အာဏာပိုင်တွေက ဖိအားဒဏ်ကြောင့် ချက်ချင်း ဝင်ရောက်စီးနင်းခဲ့ပြီး အဆောက်အအုံ စည်းမျဉ်းစည်းကမ်း ချိုးဖောက်မှု၊ လူထုဘေးကင်းရေး ခြိမ်းခြောက်မှုတွေကြောင့် ဤတောင်တုကြီးတစ်ခုလုံးကို ၁၅ရက်အတွင်း အပြီးတိုင် ဖြိုဖျက်ရှင်းလင်းပစ်ဖို့ အမိန့်ပေးခဲ့ပါတယ်။

တကယ်တမ်း ပြန်လည်ဖြိုဖျက်တဲ့အခါမှာတော့ တောင်ကြီးက အလွန်ကြီးမားလွန်းတာကြောင့် ၁ နှစ်နီးပါး အချိန်ယူပြီး ခက်ခက်ခဲခဲ ဖြိုချခဲ့ရတာဖြစ်ပါတယ်။ ဒီဖြစ်ရပ်ဟာ သမိုင်းတစ်လျှောက် မြို့ပြဗိသုကာလောကရဲ့ အဆန်းပြားဆုံး တရားမဝင်ဆောက်လုပ်မှုတစ်ခုအဖြစ် ကမ္ဘာ့သတင်းတွေမှာပါ ဟိုးဟိုးကျော်အောင် ဖော်ပြခြင်းခံခဲ့ရတဲ့အထိ ထူးခြားခဲ့တာပဲ ဖြစ်ပါတယ်။

#ဗဟုသုတ #ထူးဆန်းထွေလာ

ဘောလုံးကွင်းတစ်ဝက်စာ အကျယ်အဝန်းနဲ့ ကမ္ဘာ့လူဦးရေအသိပ်သည်းဆုံး ကျွန်းငယ်လေး - Migingo
˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚
အာဖရိကတိုက်ရဲ့ အကြီးမားဆုံး ဝိတိုရိယရေကန် (Lake Victoria) ကြီးရဲ့ အလယ်ဗဟိုမှာတော့ ၂,၀၀၀ စတုရန်းမီတာ (၀.၄၉ ဧကခန့်) သာ ကျယ်ဝန်းပြီး သွပ်ပြားအမိုးအကာတွေနဲ့ ကျွန်းအပြည့် ဖုံးလွှမ်းနေတဲ့ "မီဂျင်ဂို (Migingo)" ဆိုတဲ့ ထူးဆန်းလှတဲ့ ကျွန်းငယ်လေးတစ်ကျွန်း ရှိနေပါတယ်။

ဒီကျွန်းငယ်လေးဟာ ၎င်းရဲ့ အလွန်သေးငယ်တဲ့ အရွယ်အစားနဲ့ မလိုက်ဖက်အောင်ပင် လူဦးရေ ၅၀၀ ကျော်အထိ နေထိုင်ကြတာကြောင့် ကမ္ဘာပေါ်က လူဦးရေအထူထပ်ဆုံး ဒေသတစ်ခုအဖြစ်လည်း တည်ရှိနေတာ ဖြစ်ပါတယ်။

မီဂျင်ဂိုကျွန်းပတ်ပတ်လည်ရဲ့ ပတ်ဝန်းကျင်ရေပြင်ဟာ စီးပွားရေးအရ အလွန်တွက်ချေကိုက်ပြီး ဥရောပစျေးကွက်အထိ တင်ပို့နိုင်တဲ့ နိုင်းငါးရံ့ သားပေါက်များ အလွန်ကြွယ်ဝရာ အချက်အချာဒေသ ဖြစ်ပါတယ်။

ဒီ့အတွက်ကြောင့်ပဲ အနီးနားက ကင်ညာနိုင်ငံနဲ့ ယူဂန်ဒါနိုင်ငံတို့ဟာ ဒီကျွန်းငယ်လေးကို မိမိတို့ပိုင်ဆိုင်ကြောင်း ယနေ့ထက်တိုင် စစ်ရေး၊ နိုင်ငံရေးအရ အငြင်းပွားနေကြဆဲ ဖြစ်ပါတယ်။

ဒီ Migingo ကျွန်းနဲ့ ပတ်သက်ပြီး အံ့ဩစရာကောင်း တဲ့ အချက်ကတော့ နေရာအကန့်အသတ် အလွန်ကျဉ်းမြောင်းလှပြီး နိုင်ငံရေးအရ တင်းမာမှုတွေ ရှိနေပေမယ့်လည်း ကျွန်းပေါ်မှာတော့ ဘားတွေ၊ အလှပြင်ဆိုင်တွေ၊ ဟိုတယ်အသေးစားလေးတွေနဲ့ ရဲစခန်းတစ်ခုအပြင် ဆေးခန်းငယ်လေးတွေပါမကျန် မြို့ပြငယ်တစ်ခုလို စုံလင်စွာ တည်ရှိနေပါသေးတယ်။

ဒါတွေအားလုံးဟာ ဘောလုံးကွင်းတကွင်းစာထက် သေးငယ်တဲ့ ၎င်းနေရာလေးတစ်ခုထဲမှာပဲ တည်ရှိနေကြတာဖြစ်ပါတယ်

ဧဝရက်တောင်ထက် ၃ဆနီးပါးပိုမြင့်တဲ့ နေအဖွဲ့အစည်းအတွင်းက ဧရာမ မီးတောင်ကြီး "အိုလံပတ်စ်မွန်းစ်"
˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚
လူသားတို့ရဲ့ သမိုင်းတစ်လျှောက်မှာ ပင်လယ်ရေမျက်နှာပြင်အထက် ၈,၈၄၈ မီတာအထိ မြင့်မားတဲ့ ဧဝရက်တောင်ကြီးဟာ အမြင့်ဆုံး နေရာတစ်ခုအဖြစ် တည်ရှိနေခဲ့ပါတယ်။

ကမ္ဘာ့မြေပြင်ကျောက်ထုချပ်တွေ အချင်းချင်း တိုက်မိနေလို့ နှစ်စဉ် မီလီမီတာအနည်းငယ်စီ ဆက်လက်ကြီးထွားနေတဲ့ ဧဝရက်တောင်ကြီးဟာ ကမ္ဘာ့အထင်ကရ အမြင့်ဆုံး အမှတ်အသားဖြစ်ပေမယ့်... စကြဝဠာရဲ့ နေအဖွဲ့အစည်းအတိုင်းအတာနဲ့ နှိုင်းယှဉ်ကြည့်လိုက်မယ်ဆိုရင်တော့ အလွန်သေးငယ်တဲ့ တောင်ကုန်းလေးတစ်ခုမျှသာ ဖြစ်သွားပါတယ်။

အကြောင်းကတော့ အင်္ဂါဂြိုဟ် (Mars) ပေါ်မှာ ဧဝရက်တောင်ထက် ၂ ဆခွဲမက ပိုမိုမြင့်မားပြီး ထုထည်ပမာဏ ဧရာမကြီးမားလှတဲ့ "အိုလံပတ်စ်မွန်းစ် (Olympus Mons)" ဆိုတဲ့ ဧရာမမီးတောင်ကြီး တည်ရှိနေလို့ပဲ ဖြစ်ပါတယ်။
အမြင့်ပေ ၂၁,၂၂၂ မီတာအထိ ဟင်းလင်းပြင်ထဲ ထိုးထွက်နေတဲ့ ဒီမီးတောင်ကြီး ဘာကြောင့် ဒီလောက်အထိ ကြီးမားနေရသလဲဆိုတဲ့ လျှို့ဝှက်ချက်ကတော့ အင်္ဂါဂြိုဟ်ရဲ့ မြေအောက်မျက်နှာပြင် တည်ဆောက်ပုံကြောင့် ဖြစ်ပါတယ်။

ကမ္ဘာမြေကြီးမှာတော့ မြေပြင်ကျောက်ထုချပ်တွေဟာ အမြဲတမ်း ရွေ့လျားနေတာကြောင့် မီးတောင်တွေဟာ အချိန်ကြာလာတာနဲ့အမျှ ချော်ရည်ပူထွက်တဲ့ နေရာကနေ ရွေ့လျားသွားပြီး တောင်တန်းတွေအဖြစ် ကွဲထွက်သွားလေ့ရှိပါတယ်။

သို့သော်လည်း အင်္ဂါဂြိုဟ်ပေါ်မှာတော့ မြေပြင်ချပ်တွေ ရွေ့လျားမှု လုံးဝမရှိဘဲ နှစ်သန်းပေါင်းများစွာကြာအောင် တစ်နေရာတည်းမှာပဲ တည်ငြိမ်နေခဲ့တဲ့အတွက် မြေအောက်က ထွက်လာတဲ့ ချော်ရည်ပူလွှာတွေဟာ တစ်လွှာပြီးတစ်လွှာ ထပ်ဆင့်စုပုံပြီး နေစကြဝဠာရဲ့ အကြီးမားဆုံး မီးတောင်ကြီးတစ်ခုအဖြစ် စုစည်းဖြစ်တည်သွားခဲ့တာ ဖြစ်ပါတယ်။
ဒီအိုလံပတ်စ်မွန်းစ် မီးတောင်ကြီးဟာ ဘယ်လောက်အထိ ကျယ်ဝန်းသလဲဆိုရင် သူ့ရဲ့ အောက်ခြေအကျယ်အဝန်းဟာ ဥရောပက ပြင်သစ်နိုင်ငံတစ်ခုလုံးနီးပါး အရွယ်အစားရှိပါတယ်။

တောင်စောင်းရဲ့ မတ်စောက်မှုဟာ ၅ ဒီဂရီခန့်သာရှိပြီး အလွန်ပြေပြစ်လွန်းတာကြောင့် သင်ဟာ အဲဒီတောင်ကြီးရဲ့ အောက်ခြေမှာ ရောက်နေရင်တောင် တောင်ထိပ်ဖျားဟာ ကမ္ဘာ့မိုးကုပ်စက်ဝိုင်းရဲ့ အလွန်မှာ ပျောက်ကွယ်နေမှာ ဖြစ်ပါတယ်။

ဒါကြောင့် သင်ဟာ စကြဝဠာရဲ့ အကြီးဆုံး မီးတောင်ကြီးပေါ်ကို တက်နေမှန်းတောင် ကိုယ့်ကိုယ်ကိုယ် သတိမထားမိဘဲ ဖြစ်နေနိုင်ပါတယ်။
ဒီအချက်က ဘာကို သက်သေပြနေလဲဆိုရင် ကျွန်တော်တို့ လူသားတွေ ကမ္ဘာမြေပေါ်မှာ အကြီးမားဆုံး၊ အမြင့်မားဆုံးလို့ သတ်မှတ်ထားတဲ့ အရာတွေဟာ တကယ်တော့ အနန္တစကြဝဠာကြီးရဲ့ အတိုင်းအတာနဲ့ ယှဉ်လိုက်ရင်တော့ သေးငယ်တဲ့ ဖုန်မှုန့်လေးတွေမျှသာ ဖြစ်နေသေးတယ်ဆိုတာကို မီးမောင်းထိုးပြနေပါတယ်။

ဆုံးဖြတ်ချက်ချလိုက်တာနဲ့ "ညတွင်းချင်း" နျူကလီးယားလက်နက် ပိုင်ဆိုင်မယ့်နိုင်ငံ
˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚
အာရှတိုက်ရဲ့ အရှေ့ဖျားဆီက စီးပွားရေးနဲ့ နည်းပညာထိပ်သီး ဂျပန်နိုင်ငံဟာ ကမ္ဘာ့တစ်ခုတည်းသော အဏုမြူဗုံးဒဏ်ကို ခါးသီးစွာ ခံစားခဲ့ရဖူးတဲ့ နိုင်ငံဖြစ်တာကြောင့် "နျူကလီးယားလက်နက်များ မထုတ်လုပ်၊ မပိုင်ဆိုင်၊ မသယ်ဆောင်" ဆိုတဲ့ ငြိမ်းချမ်းရေးမူဝါဒကို ဆယ်စုနှစ်ပေါင်းများစွာ တင်းကျပ်စွာ ကျင့်သုံးလာခဲ့တာ ဖြစ်ပါတယ်။

ဒါပေမယ့် နိုင်ငံတကာ စစ်ရေးလေ့လာသူတွေနဲ့ ဗျူဟာမြောက် သုတေသီတွေရဲ့ အဆိုအရ ဂျပန်နိုင်ငံဟာ ကမ္ဘာပေါ်မှာ အန္တရာယ်အရှိဆုံးနဲ့ လျှို့ဝှက်ချက်အကောင်းဆုံး "အသံတိတ် နျူကလီးယားအင်အားကြီးနိုင်ငံ" တစ်ခုအဖြစ် တည်ရှိနေတယ်လို့ ဆိုကြပါတယ်။

ဘာကြောင့်လဲဆိုရင် အကယ်၍သာ ဂျပန်အစိုးရအနေနဲ့ နျူကလီးယားလက်နက် ထုတ်လုပ်ဖို့ နိုင်ငံရေးအရ ဆုံးဖြတ်ချက် တစ်ချက်ချလိုက်ရုံရုံနဲ့တင် အချိန်အနည်းငယ်အတွင်းမှာတင် နျူကလီးယားပိုင်ဆိုင်တဲ့ နိုင်ငံဖြစ်လာနိုင်စွမ်း ရှိနေလို့ပါပဲ။

ဒီလို ထူးခြားလှတဲ့ အရည်အချင်းရှိနေရခြင်းရဲ့ နောက်ကွယ်မှာတော့ ဂျပန်နိုင်ငံရဲ့ ကမ္ဘာ့ထိပ်တန်း သိပ္ပံနည်းကျ အခြေခံအဆောက်အအုံတွေ၊ ထက်မြက်လှတဲ့ နျူကလီးယားပညာရှင်အင်အားစုတွေနဲ့ အားကောင်းမောင်းသန် စီးပွားရေးအင်အားတွေ ရှိနေခြင်းကြောင့် ဖြစ်ပါတယ်။

ထို့အပြင် စိတ်ဝင်စားစရာ အကောင်းဆုံးအချက်ကတော့ ဂျပန်နိုင်ငံဟာ ၎င်းတို့ရဲ့ အရပ်ဘက် နျူကလီးယားဓာတ်အားပေးစက်ရုံတွေကနေ ဘေးထွက်ပစ္စည်းအဖြစ် ထွက်ရှိလာတဲ့ လက်နက်အဆင့် ပြောင်းလဲနိုင်စွမ်းရှိတဲ့ ပလူတိုနီယမ် (Plutonium) အမြောက်အမြားကို နှစ်ပေါင်းများစွာကတည်းက စနစ်တကျ စုဆောင်းသိမ်းဆည်းထားရှိတာ ဖြစ်ပါတယ်။

အချို့သော သတင်းရင်းမြစ်တွေရဲ့ အဆိုအရ ဂျပန်နိုင်ငံရဲ့ ပိုင်ဆိုင်မှုထဲမှာ နျူကလီးယားထိပ်ဖူး ထောင်ပေါင်းများစွာကို အလွယ်တကူ ထုတ်လုပ်နိုင်လောက်တဲ့အထိ ကုန်ကြမ်းပစ္စည်းတွေ လုံလောက်စွာ ရှိနေတယ်လို့ သိရပါတယ်။

ထို့ကြောင့်ပင် စစ်ရေးဗျူဟာလောကမှာ ဂျပန်နိုင်ငံကို ညတွင်းချင်း နျူကလီးယားအဆင်သင့်ဖြစ်နိုင်သည့် နိုင်ငံ (Turnkey Nuclear State) လို့ တင်စားခေါ်ဝေါ်ကြပြီး၊ လက်နက်အဖြစ် တိုက်ရိုက် မထုတ်လုပ်ထားရုံကလွဲရင် ကျန်တဲ့ နည်းပညာ၊ ကုန်ကြမ်းနဲ့ ပစ်လွှတ်နိုင်စွမ်းအားလုံးဟာ အပြည့်အဝ အဆင်သင့် ရှိနေတာ ဖြစ်ပါတယ်။

ဒါဟာ ဂျပန်နိုင်ငံရဲ့ ကမ္ဘာ့ဇာတ်ခုံပေါ်က အသံတိတ် စစ်ရေးအင်အားနဲ့ နည်းပညာစွမ်းပကား ဘယ်လောက်အထိ နက်ရှိုင်းလဲဆိုတာကို သက်သေပြနေတာပဲ ဖြစ်ပါတယ်။