FFTL

𝐊𝐚𝐫𝐤𝐞𝐭𝐮 𝐃𝐢𝐥𝐢 𝐅𝐜 𝐇𝐚𝐥𝐚'𝐨 𝐒𝐞𝐫𝐢𝐦ó𝐧𝐢𝐚 𝐃𝐞𝐬𝐩𝐞𝐝𝐢𝐝𝐚 𝐀𝐧𝐭𝐞𝐬 𝐀𝐫𝐚𝐧𝐤𝐚 𝐛𝐚 𝐏𝐚𝐫𝐭𝐢𝐬𝐢𝐩𝐚 𝐉𝐨𝐠𝐮 𝐐𝐮𝐚𝐥𝐢𝐟𝐢𝐜𝐚𝐭𝐢𝐨𝐧 𝐀𝐅𝐂 𝐂𝐡𝐚𝐥𝐥𝐞𝐧𝐠𝐞 𝐋𝐞𝐚𝐠𝐮𝐞 𝐈𝐡𝐚 𝐁𝐫𝐮𝐧𝐞𝐢

𝗙𝗙𝗧𝗟- Klubu Karketu Dili Fc sei reprezenta klubu iha Timor-Leste ba partisipa kompetisaun jogu Qualification AFC Challenge League iha Brunei Darusalam.

Tanba ne'e, ekipa Karketu Dili Fc hala'o ona serimónia despedida ho Federasaun Futebol Timor-Leste (FFTL) iha salaun Xanana Sport Centre antes aranka ba Brunei Darrusalam iha loron 04 Setembru 2026.

Ba kompetisaun ne'e, Karketu Dili Fc sei hala'o jogu preliminary/play-off ho Klube Kasuka Fc husi Brunei Darrusalam, karik mak hetan vitória iha jogu refere, entaun sei tama iha grupu E, ne'ebe hamutuk ho klubu Manila Digger Fc husi nasaun Philippines, Shan United Fc husi Myanmar (hanesan uma na'in), no New Taipei City Hang Yuan Fc husi Taiwan, hodi kompete ba iha jogu AFC Challenge 2026/2027.

Tuir órariu ekipa Karketu Dili FC sei aranka ba Brunei Darrusalam iha loron 04 Setembru 2026 no sei hahú jogu iha loron 08 Setembru 2026, ne'ebe hasoru klubu Kasuka Fc husi nasaun Brunei Darusalam.

Oportunidade ne'e, klubu Karketu Dili Fc hetan konvite direta husi AFC, tanba sai nu'udár kampeaun ba Liga Timorense 2025, nune'e FFTL liu husi Diresaun Kompetisaun fasilita prosesu rejistrasaun antes ba partisipa kompetisaun refere.

Oportunidade ida ne'e, importante tebes tanba oinsá atu foti Timor-Leste nia naran liu husi futebol iha mundu internacional.

Iha serimónia ne'e, Sekretáriu Jerál FFTL, Sr. José Adilson Ribeiro fó parabens ba klubu Karketu Dili Fc ne'ebe hetan oportunidade ida ne'e hodi ba kompete, no husu atu halo komunikasaun di'ak, esforsu no disiplina nafatin iha eventu sira.

FFTL nakloke atu fasilita klubu hotu ba eventu internasionál, bainhira hetan konvite ruma husi AFC atu partisipa iha kompetisaun sira.

Husu atu aproveita didi'ak oportunidade hirak ne'e atu kontinua aumenta esperénsia iha mundu futebol.

Espera Karketu Dili Fc bele hetan rezultadu pozitivu iha kompetisaun refere, no bom susesu ba ekipa.

𝐅𝐅𝐓𝐋 𝐒𝐞𝐥𝐞𝐛𝐫𝐚 𝐎𝐧𝐚 𝐊𝐨𝐧𝐭𝐫𝐚𝐭𝐮 𝐡𝐨 𝐓𝐫𝐞𝐢𝐧𝐚𝐝ó𝐫 𝟐𝟒 𝐇𝐨𝐝𝐢 𝐑𝐞𝐚𝐭𝐢𝐯𝐚 𝐒𝐞𝐧𝐭𝐫𝐮 𝐉𝐮𝐯𝐞𝐧𝐢𝐥 𝐊𝐚𝐝𝐚 𝐀𝐬𝐨𝐬𝐢𝐚𝐬𝐚𝐮𝐧 𝐅𝐮𝐭𝐞𝐛𝐨𝐥 𝐌𝐮𝐧𝐢𝐬í𝐩𝐢𝐮

‎𝐅𝐅𝐓𝐋- Iha loron 26 Agostu 2026, Federasaun Futebol Timor-Leste (FFTL), selebra ona kontratu ho treinadór hamutuk na'in-24 kada Asosiasaun Futebol Munisípiu sira atu reativa hikas sentru juvenil iha baze ba Sub-13 to'o 15 Mane no Feto.

‎Selebrasaun kontratu ne'e, prezensa direta husi Sekretáriu Jeral Federasaun Futebol Timor-Leste (FFTL), Sr. Jose Adilson Ribeiro, no Adjuntu Sekretáriu Jeral, Sr. Fernando Baptista Xavier, Adjuntu Kordenadór Tékniku FFTL, Sr. Gaspar Quintão, Kordenadór Dezenvolvimentu Asosiasaun Membru FFTL, Sr. Crisogno da Costa no reprezentane Asosiasaun Futebol Munisípiu sira.

Selebrasaun kontratu ne'e, nu'udár kompromísiu programa FFTL iha mandatu Prezidente Sr. Nilton T. Gusmão dos Santos.
‎
‎Tanba ne'e, Sekretáriu Jeral Federasaun Futebol Timor-Leste (FFTL), Sr. Jose Adilson Ribeiro, afirma katak, akordu ne'e nu'udar motivasaun boot ida ne'ebé durante FFTL no Asosiasaun Futebol sira hatudu iha ninia responsabilidade.
‎
Parte FFTL mós relata ba delegasaun FIFA nian sobre lala'ok treinamentu ba sub-15, sub17 ne'ebé durante realiza kada Asosiasaun Futebol iha Timor-Leste.

Nune'e, hetan mós apresiasaun husi delegasaun FIFA ba atividade Juvenil ne'ebe la'o di'ak tebes, tanba ne'e parte FIFA komprometidu katak sei kontinua apoiu dezenvovimentu Futebol iha Timor-Leste ba oin.
‎
‎Liuhusi atividade ne'e, hakarak hato'o ba treinadór sira katak, aleinde fó treinamentu ba Juvenil sira tenki halo mós relatóriu, nune'e husi Nasional bele monitoriza nafatin treinamentu sira.

Relatóriu ne'e, atu relata ba FIFA no AFC hodi haree, tanba programa ne'ebé ezekuta ne'e mai husi FIFA no AFC.
‎
‎Hakarak hato'o mós deseju ba treinadór sira atu kontinua esforsu hodi produs estrela jogadores husi Munisípiu ida-idak nian atu garante kualidade selesaun nasional ba esperansa tinan lima mai.
‎
‎Iha serimónia kontratu ne'e mós distribui sertifikadu ba treinadór hamutuk na'in-24 husi Asosiasaun Futebol Munisípiu sira ne'ebé kada Asosiasaun ida reprezenta treinadór rua.

Parte FIFA no AFC informa katak, bainhira jestaun ba atividade ne'e la'o di'ak mak tinan oin mai sei aumenta treinadór ba ema na'in-4.
‎
‎Iha sorin seluk Adjuntu Sekretáriu Jerál (FFTL), Sr. Fernando Baptista Xavier mós informa katak, kontratu ba treinadór sira durasaun tinan ida, tanba tuir kriteriu treinadór sira tenki iha sertifikadu nivel-C.
‎
Nune'e, ‎husu mós ba treinadór sira ne'ebé sertifikadu iha nivel-D tenki "update", tanba atu fó treinamentu ba juvenil sira presiza komprova katak, treinadór iha duni koiñesementu no sertifikadu liuhusi formasaun sira ne'ebé durante AFC fó.
‎
‎Hakarak reforsa liután katak, treinador sira tenki obedese no ezerse funsaun hanesan treinadór tuir kna'ar no dever ne'ebé kontempla ona iha kontratu laran.

𝐀𝐬𝐨𝐬𝐢𝐚𝐬𝐚𝐮𝐧 𝐅𝐮𝐭𝐞𝐛𝐨𝐥 𝐋𝐢𝐪𝐮𝐢ç𝐚 𝐄𝐧𝐬𝐞𝐫𝐚 𝐂𝐨𝐩𝐚 𝐉𝐮𝐯𝐞𝐧𝐢𝐥 𝟐𝟎𝟐𝟔 𝐒𝐮𝐛-𝟏𝟓 𝐅𝐞𝐭𝐨 𝐧𝐨 𝐌𝐚𝐧𝐞
‎
‎𝐅𝐅𝐓𝐋- Loron 22 Agostu 2026, estrutura Asosiasaun Futebol Liquiça hamutuk ho reprezentante Federasaun Futebol Timor Leste (FFTL), Adjuntu Sekretáriu Jeral, Sr. Fernando Baptista Xavier no amantes futebol hotu iha Município Liquiça ensera ona Copa Juvenil 2026 Sub-15 Feto no Mane.
‎
‎Eventu Copa Juvenil Sub-15 ne'e apoiu masimu husi Federasaun Futebol Timor Leste (FFTL), liuhusi departamentu Membru Dezenvolvimentu Asosiasaun (MDA), Timor Telecom (TT), GOTA, KTON no VIP GAS.
‎
‎Iha ámbitu enseramentu Copa Juvenil sub-15 ne'e, Adjuntu Sekretáriu Jerál Federasaun Futebol Timor Leste (FFTL), Sr. Fernando Baptista Xavier, lori Federasaun Futebol Timor-Leste nia naran ho respeitu agradese ba Prezidente Autoridade Munisípiu Liquiça, no entidades hotu iha Município ne’ebe fó mós kontribuisaun ba susesu Copa Juvenil 2026 Sub-15.
‎
Kongratula mós estrutura Asosiasaun Futebol Liquiça, no klubu sira hotu ne'ebé durante ne'e esforsu makas hodi partisipa iha eventu ne'e, espesialmente ba ekipa finalista sira tantu feto no mane husi klubu FC Leopa, no Dark Blue FC.
‎
‎Hakarak mós informa katak eventu sira ne'e la’o tanba kompromisiu husi Prezidente Federasaun Futebol Timor Leste (FFTL), Sr. Nilton Telmo Gusmão dos Santos, ne'ebé ho hanoin ida katak transforma futebol sai orgulho nasional, nune’e mak husi estrutura FFTL servisu makas hodi dezenvolve futebol hahú husi baze to’o nasional.
‎
‎Tanba estrutura FTTL ne'ebé eleitu iha 2025 ho kompromisiu ida katak, tenki konkretiza Futebol sai orgullu nasional, tanba ne’e FFTL fó biban ba Asosiasaun Futebol iha Timor laran tomak organiza eventu sub-15, sub-17 Feto no Mane hodi reforsa ekipa Selesaun Nasional.
‎
‎Aleinde finaliza Copa Juvenil sub-15, FFTL no Asosiasaun Futebol sira hotu iha Território Timor laran tomak iha objetivu prinsipal ida tan katak, sei kontinua reativa fali Copa Juvenil ba sub-17 feto no mane, tanba ne’e husu ba alin sira esforsu-aan nafatin hodi hatudu performe ne'ebé di'ak atu Asosiasaun Futebol Munisípiu sira haree hodi foti ita boot sira ba reforsa ekipa Selesaun Nasional.
‎
Tempu tuir mai FFTL ho Asosiasaun Futebol sira husi Município sei servisu hamutuk hodi kontrata treinador rua, feto (1), mane (1) kada Asosiasaun Futebol Município sira hodi fó treinu alin sira sub-13, atu garante katak eventu sira hanesan ne'e la’os mai kompete de’it, maibé tenki preparadu.

Tanba ne’e, FFTL hahú ona prosesu ba reativasaun sentru juvenil kada Assosiasaun Futebol Município sira, tanba atu garante futebol ida mais kompetitivu liu presiza dezenvolve talent futebol husi baze.

Serimonia enseramentu Jogu Copa Juvenil 2026 iha Municípiu Liquiça prezensa mós husi reprezentante Prezidente Autoridade Municipál Liquiça, responsavel klubu no komunidade sira.







GAS

𝐇𝐀𝐌𝐔𝐓𝐔𝐊 𝐈𝐇𝐀 𝐀𝐌𝐈𝐙𝐀𝐃𝐄, 𝐁𝐀 𝐅𝐔𝐓𝐔𝐑𝐔 𝐅𝐔𝐓𝐄𝐁𝐎́𝐋 𝐓𝐈𝐌𝐎𝐑-𝐋𝐄𝐒𝐓𝐄

Prezidente FFTL, Nilton Telmo Gusmão dos Santos, hasoru dala ida tan Prezidente FIFA, Gianni Infantino, iha Vietname, molok jogu final leg-II ASEAN Hyundai Cup 2026 entre Vietname no Tailândia.

Liuhosi amizade no relasaun di’ak no forte ho família futeból internasionál, FFTL kontinua buka oportunidade foun atu dezenvolve no promove futeból Timor-Leste.

Dalan ba futuru sei naruk, maibé liuhosi amizade, konfiansa no esperansa, ita bele servisu hamutuk hodi harii futuru ida ne’ebé di’ak liután ba futeból Timor-Leste.

Hamutuk, ita kontinua transforma futeból sai orgullu nasionál.

📢 𝐓𝐄𝐍𝐃𝐄𝐑 𝐀𝐍𝐍𝐎𝐔𝐍𝐂𝐄𝐌𝐄𝐍𝐓

🇹🇱 𝗧𝗲́𝘁𝘂𝗺
𝐑𝐞𝐚𝐛𝐢𝐥𝐢𝐭𝐚𝐬𝐚𝐮𝐧 𝐧𝐨 𝐄𝐱𝐩𝐚𝐧𝐬𝐚𝐮𝐧 𝐛𝐚 𝐄𝐬𝐭á𝐝𝐢𝐨 𝐌𝐮𝐧𝐢𝐜𝐢𝐩𝐚𝐥 𝐝𝐞 𝐃í𝐥𝐢

Ami konvida kontratór interesadu sira hodi hetan detallu rekizitu tender, no asesu ba informasaun ne’ebé iha flyer ofisiál.

---------------------------------------------------------

🇬🇧 𝗘𝗻𝗴𝗹𝗶𝘀𝗵
𝐑𝐞𝐡𝐚𝐛𝐢𝐥𝐢𝐭𝐚𝐭𝐢𝐨𝐧 𝐚𝐧𝐝 𝐄𝐱𝐩𝐚𝐧𝐬𝐢𝐨𝐧 𝐨𝐟 𝐄𝐬𝐭á𝐝𝐢𝐨 𝐌𝐮𝐧𝐢𝐜𝐢𝐩𝐚𝐥 𝐝𝐞 𝐃í𝐥𝐢

We invite interested contractors to acquire the tender details, requirements, and access the information provided in the official flyer.

𝐄𝐍𝐊𝐎𝐍𝐓𝐑𝐔 𝐎𝐅𝐈𝐒𝐈Á𝐋 𝐃𝐄𝐋𝐄𝐆𝐀𝐒𝐀𝐔𝐍 𝐅𝐈𝐅𝐀 𝐇𝐎 𝐒𝐄𝐊𝐑𝐄𝐓Á𝐑𝐈𝐔 𝐄𝐒𝐓𝐀𝐃𝐔 𝐓𝐄𝐑𝐑𝐀𝐒 𝐍𝐎 𝐏𝐑𝐎𝐏𝐑𝐈𝐄𝐃𝐀𝐃𝐄𝐒

Federasaun Futebol Timor-Leste (FFTL) kontinua hametin kooperasaun ho Governu Timor-Leste no Fédération Internationale de Football Association (FIFA) atu dezenvolve infraestrutura no futeból iha Timor-Leste.

Delegasaun FIFA, kompostu husi Christoph Suppiger, Head of Member Association Finance Services; Lorenzo Fofi, MA Regional Manager; no Karan Mirchandani, MA Development Manager, hala’o enkontru ofisiál ho Sekretáriu Estadu Terras no Propriedades (SETP), Sua Excelénsia Sr. Jaime Xavier Lopez, M.Eng., ne’ebé akompaña husi Diretór-Jerál Terras no Propriedades (DGTP) Dr. Lucas António da Costa, no Xefe Gabinete, Sr. Mariano Barreto.

Delegasaun ne’e mós akompaña husi reprezentante FFTL, Janio Tilman, Diretór Departamentu Marketing, Komunikasaun no Parseria, no Iduk Vicente, Diretór Infraestruturas no Projetu.

Sua Excelénsia Sr. Jaime Xavier Lopez, M.Eng., reafirma kompromisu Governu atu kontinua apoia FIFA, AFC no FFTL, liuliu kona-ba provizaun rai ba konstrusaun kampu futeból no futsal iha territóriu Timor-Leste.

Nia mós husu atu rai sira ne’ebé aloka ona bele uza liuhusi asaun konkretu ba konstrusaun infraestrutura desportiva, no hametin preparasaun Timor-Leste atu simu atividade no kompetisaun futeból iha nível nasionál no internasionál iha futuru.

Nia subliña katak futeból iha papel importante atu hametin estabilidade nasionál, promove unidade no solidariedade iha komunidade, dezenvolve talentu no disiplina ba joven sira, no kontribui ba kresimentu ekonómiku no bem-estar komunidade.

Iha parte seluk, reprezentante FIFA hato’o apresiasaun ba Governu Timor-Leste, liuhusi Ministériu Justisa (MJ) no Sekretaria Estadu Terras no Propriedades (SETP), ba apoiu no disponibilizasaun rai ba dezenvolvimentu futeból.

FIFA mós hato’o ninia esperansa boot atu Timor-Leste bele fila fali sai uma-na’in ba kompetisaun futeból internasionál, depois liu ona tinan barak Timor-Leste la simu kompetisaun hanesan ne’e. FIFA afirma katak sira prontu atu fó apoiu atu “𝐟𝐮𝐭𝐞𝐛𝐨́𝐥 𝐟𝐢𝐥𝐚 𝐟𝐚𝐥𝐢 𝐛𝐚 𝐮𝐦𝐚”.

Mensajen ida-ne’e hetan resposta pozitivu husi Sua Excelénsia Sr. Jaime Xavier Lopez, M.Eng., ne’ebé hato’o katak “𝐢𝐝𝐚-𝐧𝐞’𝐞 𝐦𝐚𝐤 𝐛𝐮𝐚𝐭 𝐧𝐞’𝐞𝐛𝐞́ 𝐚𝐦𝐢 𝐡𝐚𝐤𝐚𝐫𝐚𝐤, 𝐧𝐨 𝐦𝐨́𝐬 𝐛𝐮𝐚𝐭 𝐧𝐞’𝐞𝐛𝐞́ 𝐩𝐨𝐯𝐮 𝐓𝐢𝐦𝐨𝐫-𝐋𝐞𝐬𝐭𝐞 𝐡𝐚𝐤𝐚𝐫𝐚𝐤.”

Nia reafirma katak Governu prontu atu servisu hamutuk ho FIFA, AFC no FFTL atu konkretiza objetivu ida-ne’e.

FIFA espera katak kooperasaun ida-ne’e bele kontinua no hametin iha futuru, atu apoia dezenvolvimentu futeból iha Timor-Leste no asegura katak infraestrutura desportiva ne’ebé dezenvolve bele fó benefísiu ba futeból Timor-Leste iha futuru.

Hafoin remata enkontru ofisiál ne’e, delegasaun FIFA dezloka ba Kampu Futeból Benet, Ai-Mutin, atu hala’o inspeksaun ba fatin ne’ebé, tuir planu, sei konstrui fasilidade FIFA Arena Mini-Pitch. Fatin ne’e lokaliza iha Aldeia São José, Suku Comoro, Postu Administrativu Dom Aleixo, Munisípiu Dili.

Iha ne’ebá, delegasaun FIFA hetan akompañamentu husi Prezidente Asosiasaun Futeból Díli-Oeste (AFDO), Sr. Luis Evaristo dos Santos Soares, Sekretáriu-Jerál, Sr. Estanislau Baptista, membru sira husi estrutura AFDO, Xefe Aldeia, Sr. José Musa Cana, no komunidade lokál sira.

𝗔𝘀𝘀𝗼𝘀𝗶𝗮𝘀𝗮𝘂𝗻 𝗙𝘂𝘁𝗲𝗯𝗼𝗹 𝗗𝗶𝗹𝗶 𝗢𝗲𝘀𝘁𝗲 𝐇𝐚𝐥𝐚'𝐨 𝐒𝐞𝐫𝐢𝐦ó𝐧𝐢𝐚 𝐀𝐛𝐞𝐫𝐭𝐮𝐫𝐚 𝐛𝐚 𝗝𝗼𝗴𝘂 𝗖𝗼𝗽𝗮 𝗝𝘂𝘃𝗲𝗻𝗶𝗹 𝟮𝟬𝟮𝟲 𝗦𝘂𝗯-𝟭𝟕

𝗙𝗙𝗧𝗟- Iha loron 21 Agostu 2026, Assosiasaun Futebol Dili Oeste (AFDO) hala'o ona serimónia abertura ba jogu Copa Juvenil époka 2026 sub-17 iha kampo futebol fatuhada Dili.

Copa Juvenil époka 2026 sub-17, organiza direta husi Prezidente Assosiasaun Futebol Dili Oeste, Sr. Luis Evaresto dos Santos Soares ho nia estrutura tomak ne'ebe partisipa husi klubu hamutuk 12.

Iha eventu ne'e, Adjuntu Sekretáriu Jerál FFTL, Sr. Fernando Baptista Xavier lori Federasaun Futebol Timor-Leste nia naran hakarak hato'o parabens ba Prezidente Assosiasaun Futebol Dili Oeste ho nia estrutura tomak no komisaun organizadora sira ne'ebe hala'o esforsu makas hodi konsege realiza ona Copa Juvenil ba Sub-17 époka 2026.

Hakarak afirma katak, iha mandatu Prezidente FFTL, Sr. Nilton T. Gusmão dos Santos nian, hala'o ona Copa Juvenil Sub-15 no Sub-17 Mane no Feto ba dala rua ona kada Assosiasaun Futebol Municípiu sira, tanba hahú ona iha tinan 2025 no tinan 2026 kontinua nafatin.

Husi programa ne'e, fó lembra fali katak, dezenvolvimentu futebol iha Timor-Leste komesa book aan ba oin, tanba durante periodu hirak liu ba Copa Juvenil la'o duni, maibé la to'o iha Municípiu sira, konsentra de'it iha Dili.

Maibé iha mandatu prezidente FFTL atuál nian laiha jogadór selesaun nacionál ne'ebe mak liu husi sistema familíarizmu, maibé oportunidade nakloke ba jogadór hotu-hotu tantu iha Dili no Municípiu sira.

Tanba, komprova no justifika ona katak, iha tinan 2025 selesaun nacional Timor-Leste Sub-17 ne'ebe ba partisipa jogu AFC U17 ASIAN CUP 2026 QUALIFIERS iha Xina, jogadór sira selesiona husi munucípiu hotu, la'ós Dili de'it.

Programa sira ne'e hala'o, tanba atuál prezidente FFTL ne'ebe mai ho moto ida katak, " Hanoin Ida Hodi Transforma Futebol Sai Orgulho Nacional".

Tanba ne'e, husu ba alin jogadór sira hotu nafatin disiplina hodi prepara aan sai mós fini ba Selesaun Nacionál iha futuru, nune'e buka atu dezenvolve talentu ne'ebe iha, tanba odamatan FFTL nakloke ba jogadór se de'it mak hakarak atu aprende.

Ko'alia kona-ba dezenvolvimentu futebol, la'ós hahú ohin aban hetan kedas rezultadu, maibé prosesu la'o neineik, loron ida sei hetan rezultadu ida mais pozitivu liu.

Atu garante ba rezultadu ida pozitivu liu iha futuru, importante mak parte hotu-hotu ninia apoiu, kolaborasaun no kooperasaun ne'ebe di'ak oinsá atu konsentra ba dezenvolvimentu futebol iha Timor-Leste.

Serimónia abertura ne'e, prezensa mós husi reprezentante Prezidente Autoridade Municipál Dili, reprezentante Postu Administrativu Dom Aleixo, responsavel klubu, no komunidade sira.

𝗔𝘀𝘀𝗼𝘀𝗶𝗮𝘀𝗮𝘂𝗻 𝗙𝘂𝘁𝗲𝗯𝗼𝗹 𝗗𝗶𝗹𝗶 𝗢𝗲𝘀𝘁𝗲 𝗘𝗻𝘀𝗲𝗿𝗮 𝗝𝗼𝗴𝘂 𝗖𝗼𝗽𝗮 𝗝𝘂𝘃𝗲𝗻𝗶𝗹 𝟮𝟬𝟮𝟲 𝗦𝘂𝗯-𝟭𝟱

𝗙𝗙𝗧𝗟- Iha loron 16 Agostu 2026, Assosiasaun Futebol Dili Oeste (AFDO) ensera ona jogu Copa Juvenil époka 2026 sub-15 iha kampo futebol fatuhada Dili.

Copa Juvenil époka 2026 sub-15, ekipa COMADE II mak sai kampiaun hafoin halakon ninia adversáriu iha finál.

Serimónia enseramentu ne'e, prezensa husi Prezidente Autoridade Municipál Dili, Sr. Francisco dos Santos, reprezentante husi Ministériu Juventude no Desportu, Arte no Kultura (MJDAK), Sr. David Tomas de Deus.

Copa juvenil ne'e, organiza direta husi Prezidente Assosiasaun Futebol Dili Oeste, Sr. Luis Evaresto dos Santos Soares ho nia estrutura tomak ne'ebe hala'o abertura iha loron 26 Julho 2026 no termina ona iha loron 16 Agostu 2026.

Ekipa ne'ebe partisipa jogu Copa Juvenil époka 2026 ne'e hamutuk 14 la inklui feto.

𝗙𝗙𝗧𝗟 𝗣𝗮𝗿𝘁𝗶𝘀𝗶𝗽𝗮 𝗦𝗲𝗿𝗶𝗺𝗼𝗻𝗶𝗮 𝗔𝗯𝗲𝗿𝘁𝘂𝗿𝗮 𝗝𝗼𝗴𝘂 𝗖𝗼𝗽𝗮 𝗝𝘂𝘃𝗲𝗻𝗶𝗹 𝗦𝘂𝗯-𝟭𝟱 𝗜𝗵𝗮 𝗔𝘀𝘀𝗼𝘀𝗶𝗮𝘀𝗮𝘂𝗻 𝗙𝘂𝘁𝗲𝗯𝗼𝗹 𝗗𝗶𝗹𝗶 𝗟𝗲𝘀𝘁𝗲
‎
‎𝗙𝗙𝗧𝗟-Loron 13 Agostu 2026, Federasaun Futebol Timor Leste (FFTL), reprezenta husi Diretór Média Marketing no Komunikasaun, Sr. Janio Tilman akompaña husi Kordenadór Dezenvolvimentu Asosiasaun Membru FFTL, Sr. Crisogno da Costa, partisipa serimonia abertura ba Copa Juvenil Sub-15 Mane no Feto ne’ebe organiza husi Assosiasaun Futebol Dili Leste iha kampo lecidere Dili.
‎
‎Programa ne'e organiza husi Asosiasaun Futebol Dili Leste, Sr. Aleixo da Silva Gama “COBRA” ho nia estrutura tomak ne'ebé partisipa husi klubu hamutuk (12) kompostu husi ekipa mane (6) no feto (6).
‎
‎Iha ámbito abertura ne'e marka prezensa husi representante Federasaun Futebol Timor-Leste (FFTL), Sr. Janio Tilman no Crisogno da Costa nomos partisipante sira seluk hanesan Reprezentante Ministériu Juventude Desportu Arte e Kultura, Ministériu Edukasaun, Komandu PNTL postu na’in feto inklui emprezariu Timoroan balun.
‎
‎Iha momentu abertura ne'e, reprezentante Federasaun Futebol Timor Leste (FFTL), Sr. Janio Tilman, hato’o agradese ba Asosiasaun Futebol Dili Leste no klubu sira ne'ebé partisipa iha abertura Copa Juvenil époka 2026.
‎
‎Haree ba Copa Juvenil ne’e partisipante sira maioria husi eskola, tanba ne'e FFTL iha ona planu atu kolabora ho Ministériu edukasaun liuhusi eskola sira hodi inisia atividade balun relasiona ho infrastrutura futebol ninian ne'ebé hakbesik liuba eskola.
‎
‎Dadaun iha hela preparasaun ba kompetisaun festival WordCup sub15 iha Ajerbaizan iha setembru 2026, tanba ne'e husu alin sira hatudu talent ho disiplina iha joga hodi ekipa selesaun nasional haree karik iha balun bele reforsa ekipa sub-15 ba kompete festival WordCup.
‎
Oportunidade ne’e, lori FFTL nia naran hakarak hato'o agradese wa'in mós ba Timor Telecom no emprezáriu sira hotu ne'ebé ho laran luak durante ne'e apoiu ekipa sub-15 no sub-17 hodi kontinua atividade Copa Juvenil 2026 ba oin.
‎
‎Aleinde ne'e Prezidente Asosiasaun Futebol Dili Leste, Sr. Aleixo da Silva Gama “COBRA” rekomenda ba representante FFTL atu haree jogador sira ne'ebé prestasaun di’ak hodi ba enkaixa mós iha selesaun nasional.
‎
‎Sorin seluk representante Ministério Juventude Desportu Arte e Kultura (MJDC) mós enkoraja alin sira atu mantein disiplina tantu feto no mane, tanba Ministériu Juventude Desportu Arte e Kultura odamatan nakloke ba ema hotu liuliu ba atividade desportu sira.

Espera ho atividade jogu ne’ebe organiza husi Assosiasaun sira bele hasa’e kualidade jogadór nian ba futuru hodi garante Selesaun Nacional ida forte liu.