CYNTHIA STORIES

😁nqogo 😃

BEHIND CLOSED DOORS
CYNTHIA S NDLOVU
ISAHLUKO 13

Selihlabela enkanda yendoda ilanga , litshisa bhe ! Kuze kutshisa lenhlabathi .
UThabo selokhe efikileyo endaweni yakhe asebenzela khona kakatholi ngitsho eyodwa inqolamlilo azayilungisa .
Uhleli emthunzini ubambe isihlathi , selokhe iviki liqalileyo uselungise eyodwa kuphela.
Uyabalisa emcabangweni yakhe , nxa engasatholanga imota azayilungisa kumbe omunye umsebenzinyana uzababhadalela ngani abantwabakhe esikolo .
Zinengi indlela azicabangayo angazenza kodwa zonke zifuna imali .

"Ndoda wahlala wadana kwenzenjani ?" Kubuza umngane wakhe osebenza laye .

"Dawu , uyabona kodwa ukuthi siyalamba , asemangaki amalanga sivukela khonapha singatholi lutho ?"

"Kunzima mfowethu mina ngisola lona ilizwe leli , yikho abantu becina betshontsha phela kubuhlungu ukubuka abantwabakho belamba ukhona ."

"Ungatsho uliphinde lelo . Ngihleli lapha ngiyacabanga ukuthi kuyini okunye esingakwenza vele okungasilethela imali ,ukwenzela ukuthi nxa kuthule ngapha sibe sisenza khona ."

"Akulalutho , ngaphandle kokuthengisa ,njalo wonke umuntu usethengisa lapha edolobheni, nxa sesithengisa sonke kuzathenga bani ? Futhi labo abathengisayo bayakhala bathi alihambi ibhizimisi ." Kusitsho uDawu .

"Mina mfowethu angisakwazi ngicabangeni . Umakhelwane wami uthengisa amatamatisi ukhala njalo nxa esebolile engazange athengwa wonke ."

"Kunzima mfowethu ."

Besaphakathi kokuxoxa , kuqhamuke unyanyavu lwemota , bavele basukume ngokuphangisa bayihlangabeze .

"Yikho lapha mfowethu , uThabo wakhona nguye lowu futhi angeke uze uzisole ngokuletha imota yakho kuye ." Kutsho owesilisa eyehla emoteni kunye lomtshayeli wayo .
Umtshayeli akhiphe i$5 ayiqhubele lowu oweslisa abonge .
"Ngiyabonga ukuthi uthathe isikhathi sakho wangiphelekezela ."

"Salibonani madoda , ngizwe kuthwa uThabo ungudokotela wezimota ."

"Kimi ufike kuhle mfowethu ,imota vele yizinto zami ."

"Kuhle nxa kunjalo , abantu engihlala ngihambisa khona imota bafika batshontshe amabhawudo , ngasengilayelwa lapha ekhaya . Ibizo lami ngingu Lucky wako Gumede isibongo. "

"Hayi ufike kuhle Gumede , futhi awusoze uzisole ."

"Kulungile ke imota ngiyitshiyela wena , ngizezwa ngawe nxa sekufanele ngiyilande . Ngicela usondele emoteni mgithathe imniningwane yakho ."

Ngemva kokuba esethathile imniningwane yakhe , amtshele inkinga esemoteni yakhe aqede ambhadale ingxenye yemali aphinde amtshiyele leyokuthenga insimbi ezifunekayo .
Sebeqedile bavalelisane ahambe uLucky .

"Sizasebenza sonke mfowethu ,lawe bamba leyi abantwana angeke balale ngendlala siphila ." UThabo eqhubela uDawu eyinye ingxenye yemali .

"Yingakho ngikuzwisisa mfowethu ."

"Lawe uhlala ungibala awukaze ungivalele phandle , ngithanda nje indlela esiphila ngayo , omunye nxa ethe wadobha kuhle siqamulelane ."

"Ngiyabonga mfowethu."

Bengadlalisi isikhathi bavele baqalise ukusebenza ngemota kaLucky .
Angene phambili uThabo ukuze ayisondeze lapho abasebenzela khona ,engakayisusi ananzelele umakhalekhukhwini.

"Waze wafana lomakhalekhukhwini kaSakhile obewusebenzisa nje ." Atsho ewuthatha , lakanye athole kuyiwo .

Akhiphe umakhalekhukhwini wakhe atshayele uLucky avele alubambe ngokuphangisa.
"Kulomakhalekhukhwini lapha emoteni, awudingakali ?"

"Ungakhathazeki wawusetshenziswa ngunkosikazi wami kudala engakathengi omutsha , ungawigcina khonapho emoteni ."

"Kulungile mfowethu besengikhathazekile ." Atsho lawo aqede aluqume ucingo awuthathe njalo umakhalekhukhwini azame ukuwuvula kodwa ayehluleke .

"Wow !" Awubeke kuhle aqede asondeze imota baqalise ngomsebenzi .

Endlini KaVusani. Usemkulwini uNkanyezi uzenzela isidlo sasemini , kusenjalo azwe ngomkhosi kodwa aqhubeke ngokupheka aze aqede , aphakulule ayebeka etafuleni ahlale phansi aqalise ukudla .

"Awungizwa ngikhala , isisu sami sibuhlungu umntwana usendleleni wena uhlezi khonapho ." NguAngel ehamba kancane kancane.
Azithulele uNkanyezi aqhubeke ezidlela ukudla kwakhe .

"Nxa ungasoze ungisize ngicela utshayele uVusani ngiyafa ." Usebambelele umduli uAngel .

"Angikhumbuli ngikhulelisa umuntu mina ,awumtshayeli ngani owakukhulelisa akuhambise esibhedlela." Aphendule ezipholele uNkanyezi.
UAngel usezame kanengi ukutshaye uVusani ucingo kodwa engalubambi .

"Kalubambi ucingo lwami ngicela umtshayele wena ."

Azithulele uNkanyezi , asukume lesitsha sakhe aphume aqonde phandle ayehlala emthunzini.
Adonse isikhwama sakhe uAngel akhale eqonda esangweni khona ezabiza imota ezamhambisa esibhedlela.

Iyaqhubeka

Isimo engidlula kuso manje ungabona sidlula ngizolithumela ama 1k each 😵😪

BEHIND CLOSED DOORS
CYNTHIA S NDLOVU
ISAHLUKO 12

USakhile uthumeza njalo izithombe zakhe enkundleni zokuxhumana , phela selokhe wathuthela endlini ka Lucky udla enatha aphinde atshone ecambalele esofeni .
Utshonela ukuthuma umama oncedisayo lapha endlini .
UThabo sewaze wabona kungcono ukukhipha inombolo yakhe kumakhalekhukhwini wakhe waphinda wamvala lakwezinye inkundla zokuxhumana ukuze engaboni lutho. Ilokhe isafutha inhliziyo yakhe uThabo nxa embona , kuyafika isikhathi azizwe eyisehluleki sendoda nanko phela uSakhile ubonakala esemuhle kakhulu emehlweni akhe ngenxa yemsebenzi yeyinye indoda , uphinda aziduduze njalo ngokuthi kuzalunga ngelinye ilanga njalo okuqakathekileyo yikuthi abantwabakhe uyabanakekela .

Liyatshisa ilanga amalanga lawa , amavila atshonela ukuhlala emthunzini liphuma lize liyetshona ilanga .
USakhile laye selokhe evukileyo uhleli egumbini lokuphumulela.
Aphendle inombolo ka Nkanyezi ."Ngoba sekuphumelele mina abasafuni siphume njengakuqala ." NguSakhile etshayela inombolo kaNkanyezi , khonokho nje atsho eseyibambile .

"Mfazi unjani ?"

"Ngithukuthele , kumbe selaphuma kimi ? Kunini kodwa ngilifakela imlayezelo lingayisabeli ? Siphuma nini vele ?"

"Uxolo Sakhile bengisabambekile , kodwa ke ayikho inkinga singaphuma emini kusasa ."

"Kusasa mina ngizabe ngingekho ,ngicela sihlangane lamuhla ."

"Kulungile ke ,ngicela utshayele uLydia ." Kuphendula uNkanyezi aqede aluqume ucingo .
Asukume esofeni ngokuphangisa uSakhile kwazise kade alulindele lokusuku selokhe elempahla ezidulayo azithengelwe ngu Lucky. Inhloso yakhe yikubatshengisa zona ukuze babone ukuthi laye useyitholile indoda elemali .
Usevele wageza ngokuphangisa wagqoka wathatha lesikhwamanyana sakhe esigaxwayo .
Athathe umakhalekhukhwini aphume endlini , uze afise lokuthi ngabe usekwazi ukutshayela inqolamlilo ubezathatha eyodwa ahambe ngayo khona bezambona kuhle abantu .

UNkanyezi laye usephuma endlini, nxa efika emnyango athole uhluthulelwe avele afunde kwezakhe ukuthi uAngel nguye ohluthuleleyo. Atshibilike aqonde kuAngel ohleli esofeni , afike ambambe ngenwele .

"Ngicela ikhiye ."

"Uyangilimaza wena nyumbandini ,kumbe ufuna khona ukungibulalela abantwana . Yindaba ufuna ukuhamba ekubeni uVusa engitshiye ngaphansi kwakho ukuthi unginakekela ."
Amvale ngempama uNkanyezi, esathi uyakhuluma amphinde ngeyinye .

"Ngithe ngicela ikhiye ." Akhulume ngezwi eliphansi kodwa elibhubhudla amagwebu , useyethukile uAngel phela uyaqala ukubona uNkanyezi ethukuthule enje. Asikhiphe ngokuphangisa amqhubele phela uyabona ukuthi nxa engaqhubeka esenza inkani akula ongamlamulela selokhe uVusani engekho ekhaya .

"Lalela lapha ke nzalabantu . Umuntu owabuya laye lapha ekhaya nguVusani hayi mina , ungake uphinde udlalele kimi ngizathatha umhedla ngisike isisu sakho ngikhiphe umntanakho ngiyemphosela izinja , uyayazi inyumba wena ? Nxa unyoko wathi ekukhulisa wakufundisa ukuthi uhamb evulela amadoda wonke imlenze qhubeka ngesiko lakho ,kodwa ungahambi uphaphela abanye abantu .
Ukukhuleliswa yindoda yomunye umuntu akungakwenzi uzibone usuqakatheke kakhulu , ngoba kusasa umntabakho lowo omthweleyo uzayangeka kakhulu esesizwa ukuthi waba ngumphumela wobuwule , zinuke amakhwapha ." Aqede atshibilike ahambe uNkanyezi atshiye uAngel ebambe isihlathi .
Ahlale esofeni sezimgubha inhloni , phela ubezitshela ukuthi uqakatheke kakhulu emehlweni kaNkanyezi kanti umbona ngeyinye indlela .

Lamhla bahlangane eThe smoke , njengenjwayelo uLydia imlenze ithe dandalazi phandle .
Kwesinye isikhathi uNkanyezi uze abe lenhloni zokuhamba laye ngoba alikho elamahala , uhlala njalo egqoke ezitshengisa imhlathi yezihlalo .
"Lydia , wena uyake ugqoke kodwa impahla edlula amadolo ?" Kususa uNkanyezi.

"Nkanyezi wena uthanda ezinde hlala unjalo awukaze ungizwe ngisola." Kuphendula uLydia.

"Bengingasoli uxolo bengibuza nje ."

"Asiyitshiye leyo . Waze wabamuhle Sakhile , uyabona ukuthi ngakufaka ezintweni ngabe usahlala loThabo ngabe usuvele wadla inyama yonke leyi wayiqeda , phela wayethwala lokutshiywe yithi ephathela abantwabakhe." Kusitsho uLydia .

"Lawe Lydia , pho sekufanele uhlale umkhumbuza ? Nxa wayethwalela abantwabakhe ukudla esasikutshiya lingaphi iphutha ? Lami vele ngabe ngilabo bengizabaphathela ."

"Nkanyezi wena ulomona , ufuna sihlale sibonela kuwe . Sasivumelana ukuthi athole indoda elemali useyitholile awusafuni ."

"Zikhona izimo empilweni ezisenza sikhulume loba yini . Ngiyamjabulela ngomuzi omutsha , kodwa ngifisa ngabe kazange watshiya umuzi wakhe kanye labantwabakhe . Sakhile ,ulala udlile, ugqoke kuhle uphina mnandi , kodwa abantwabakho bayakudinga , khumbula abazange bakucele ukuthi abalethe emhlabeni . Ababili abazeleyo kufanele banakekele abantwana , bafake iziidingo zabantwana phambili ,ngoba yini elakhetha ukubazala angithi , pho yindaba kufanele ubatshiye ngoba usuthole impilo engcono." Kukhuluma uNkanyezi .

"Uqinisile uLydia , ulomoya omubi Nkanyezi sengikubonile . Kuvela ngaphi konke lokho okukhulumayo . Ngoba sengithole indoda engithandayo engenzela konke usuzenza wena olungileyo , ufuna sibe sibonela kuwe mxm ." Kutsho uSakhile esukuma pbansi .

"Pho usuhamba ?" Kubuza uLydia esukuma phansi .

"Ngizabe ngisahlaleleni, dlanini ukudla kwenu kunengi lokhu endlini yami ." Atsho ehamba uSakhile .

"Dlana konke ukudla lokhu Nkanyezi ,lokuzenza ngcono ngiyahamba ."

"Hambani angeke ngilincenge mina ." Abalandelise ngezwi uNkanyezi , aqede acele bamfakele ukudla konke phakathi kwebhokisana uzadlula eziphela abahlala emgwaqweni.

Iyaqhubeka

Lingalambi ngikhona

BEHIND CLOSED DOORS
CYNTHIA S NDLOVU
ISAHLUKO 11

Ligwaze umhlaba ilanga, litshisa bhe !
Uhleli eceleni kwedamunyana lokubhukutshela uNkanyezi, esandleni uphethe umakhalekhukhwini wakhe .
Aqale ngokuthalaza ukuthi akula oseduzane aqede akhiphe ikhadi elile nombolo zika Frank azifake ngokuphangisa aphinde athalaze njalo ukuthi uVusani kakho eduzane .

"Ngimtshayele ?" Athikaze kabili kodwa acine eseyitshayele , ikhale kabili ayibambe .

"Mr Frank okhulumayo, hello ."

"Unjani Frank , nguNkanyezi okutshayelayo ."

"UNkanyezi engake ngahlangana laye eWhitestone?" Abuze uFrank .

"Yebo kunjalo . Uxolo ukuthatha isikhathi esingaka , bengisacabanga nje ngempilo yami kodwa ke sengibuyile ngiyafisa ukukhipha okusenhliziyweni kodwa sikhangelene hatshi ngomakhalekhukhwini ."

"Ayikho inkinga nkosazana , njalo ukhululeke usezandleni ezinhle. Ngizakuthumezela ikheli ."

"Kulungile, ngingabuya kathesi kumbe ubambekile ?"

"Yebo ungabuya nkosazana ."

Ngemva kokukhuluma lo Frank asukume aqonde endlini afike ageze agqoke aqede aphume enyenya ahambe .
UVusani lamuhla uvuke wazivalela ekamelweni lakhe , uNkanyezi kazange wazihlupha ngaye , uAngel nguye olokhe eqoqoda kokuphela efuna ukungena .
Lezinsuku uVusani kasamqakathekisi uAngel , uze amtshele emehlweni ukuthi ayenze azale ahambe kasamfuni endlini yakhe .

Ngemva kwemizuzu engaba ngamatshumi amabili afike lapho okusebenzela khona uFrank uNkanyezi , amise inqolamlilo yakhe ayehle .

"Wamukeliwe nkosazana, ngicela singene ." NguFrank eyamukela uNkanyezi baqhubane bayehlala phansi .

"Ngingakwenzela itiye kumbe inamunede ?"

"Hahaha ! Itiye kutshisa kunje , ngicela inamunede ."

"Mina ngiyayinatha itiye kutshisa kunje ngafuza ugogo wami ." Kusitsho uFrank , bahleke .

Baqalise ngokuxoxa ngalokhu lalokhuyana , uyenza lokho uFrank ukuze azizwe ekhululeka khona kuzakuba lula ukuthi avule isifuba .
Kwelikade ahlale kuhle uFrank akhangele uNkanyezi emehlweni.
"Ngicela ukhululeke usendaweni ephephileyo ,njalo mina esami isifuba asizange sakhahlelwa lidube , ngaze ngakuhambela esikolo ukugcina indaba zabantu .
Ukuvalela ubuhlungu ngaphakathi kuyalimaza , yingakho ubona silamathuna amanengi abantu abazibulalayo . Mina umsebenzi wami yikukuthoba amanxeba , ngikubambe ngesandla ngiphinde ngikubonise indlela eqondileyo okufanele uyithathe ." NguFrank esebambe isandla sika Nkanyezi . Ikhanjana lakhe uligebhele phansi , amehlo akhe asevele agcwala inyembezi.

Usephakathi kwemicabango lapho uVusani emhlukumeza emtshaya , emthethisa aze amkhafulele amathe ebusweni , kodwa kukho konke uvuka azenze yena ojabulileyo emtshadweni wakhe . Ukukhuluma lo Frank sekumenze wananzelela indlela aselimele ngayo kanye lomthwalo osemahlombe akhe . Kumehlulele ukuzibambe acine esehlaba umkhosi ezidonsa inwele .

"Let it all out . Khala ukhiphe bonke ubuhlungu, khala uze uzizwe usungcono , ungazibambi njalo akula ozakubamba iphutha ngalokho ."

Ngemva kwemizuzwana ekhala uNkanyezi ayesule zonke inyembezi athule zwi ,athwale imkhono ekhanda samuntu ocabanga nzima .
"Usukulungele ukukhuluma loba usafuna isikhatshana?" Abuze uFrank , esathi uyavula umlomo lukhale ucingo lwakhe kutshaya uVusani , akhangele uFrank ngaphambili kokuthi aluphendule .

"Hello !" Ngomoya ophansi .

"Ngiyakudinga Nkanyezi ungaphi?"

"Ngiyabuya ."

"Angithi ngivala amehlo ngiphinda ngiwavula ube usufikile endlini , ngumkhuba wa......" Avele aluqume ucingo engakaqedi ukukhuluma uNkanyezi.

"Ngizaphenduka ." UNkanyezi athatha isikhwamanyana sakhe aphume ahambe .
Endleleni uhamba ebihla aze ayefika endlini , athi ngokuvula isango engena uVusani abe esemile phandle .
Amise inqolamlilo aqede aqhubeke ehleli phakathi, inyembezi ziqabulana esilevini uyehluleka lokuzilawula .
Asondele uVusani afike avule isivalo semota ."Wakhala kufe bani ?" Ngu Vusani , anxaphe uNkanyezi okokuqala ngqa empilweni yakhe ukunxaphela uVusani . Selokhe wayendela kuVusani kakaze amdelele langelilodwa ilanga , kodwa lamuhla umbona ngeyinye indlela , njalo uzizwa eselenzondo ngaye .

"Unxaphela mina wena Nkanyezi ?"

"Yenza odume ngakho Vusani. Sengidiniwe ngawe ndodandini , selokhe ngafika lapha ekhaya uyangihlukumeza , angisazazi lokuthi ngingubani . Ngizibulale yini khona uzajabula Vusani ? Ngiphilela ukuvalela wena ihlazo phandle lapha , abantu nxa bengibona bacabanga ukuthi ngijabule ungiphethe kuhle bengazi ukuthi ungumhlukumezi ."

"Yingakho ngikwenzela konke , uhamba ngemota ezinhle pho ukhalelani ?"

"Thatha imota zakho , thatha imali yakho Vusani , mina engikudingayo yikuthula empilweni ngitsho ngingahlupheka angiselandaba , s**a phambili kwami uyangenyanyisa . Nxa ufuna ukungitshaya kathesi ngicela uvele ungibulale ." Atsho ephuma emoteni adlule ethuza uVusani aqonde endlini ayedlula esunduzela uAngel eceleni .

"Wena lesisu leso udlalele katshana lami ngoba ngizakukhahlela mina ulale uzala ." Atsho ngolaka uNkanyezi aqede aqonde ekamelweni lakhe .

"Uzathula vele ungatsho lutho ngoNkanyezi Vusani ?" UAngel.

"Ayi vala umlomo ugxile ekudleni ngoba ngendlela odla ngayo lapha ekhaya kuyatsho ukuthi uyakuqabuka ." Atsho emndlula emnyango.

Iyaqhubeka

BEHIND CLOSED DOORS
CYNTHIA S NDLOVU
ISAHLUKO 10

Imali yimpande yesono batsho beqinisile abadala. USakhile wabadela abantwabakhe owabathwala inyanga eziyifica munwe munye ngenxa yemali . Walidela ikhaya lakhe wayidela indoda elothando ebimthanda njalo imhlonipha futhi ifisa ukumjabulisa , kodwa emehlweni ka Sakhile ubengumuntu omubi ngenxa yokuswela imali . Icala likaThabo kwaba yikuphelelwa ngumsebenzi , kwavele kwaphela uthando enhliziyweni kaSakhile .
USakhile waqalisa ngokutshintsha ukwenza , waba ngumuntu ongasamhloniphiyo umnyeni wakhe , wacina esemqathanisa lamadoda alemali afanana lo Vusani .
Wazisalela labantwabakhe uThabo , uvuka ekuseni abalungisele bahambe esikolo laye asale esiyazama imali , emini uphinda atshayise ahambe ayebahlangabeza endlini afike abaphekele aqede abancedise ngemsebenzi yabo yesikolo .
Abakwabozala sewababikela mayelana lokuhamba kuka Sakhile njalo wabatshela ukuthi usehlala leyinye indoda .
UnakaSakhile ulokhe ezame njalo ukukhulumisana lendodakazi yakhe mayelana lehlazo abathela ngalo kodwa kufana lokuthela amanzi emhlane wedada ,ngoba konke akukhulumayo kuvele kungene ngendlebe yesokudla kuyephuma ngendlebe yenxele.
Laye usekhethe ukuyekela kukhule lokhula , eginya amaganu ithembe umphumela .

ULydia uvukele ukuyahlola isisu kudokotela wakhe lamuhla . Ujabule umanzi nte ! Phela loba engakahloli uselaso isiqiniseko sokuthi engabe ezithwele nanko inyanga isiphelile engakavakatsheli emfuleni , njalo lasemzimbeni usekhuluphele kancane.
Aphume esambuzini legajana lakhe elilomthambiso afike alibeke etafuleni ukuze udokotela wakhe ahlole aqede ayehlala phansi alindele ukubikelwa indaba ezinhle ngudokotela .

"Kubonakala ngilenyanga ezingaki dokotela?'' Abuze ezidlalidlalisa isisu uLydia.

"Ngiyaxolisa nkosazana ubonakala umfuna umntwana uze ungalilahli ithemba uzamthola . Awukhulelwanga ,njalo ngingakucebisa ukuthi ubuye lomnyeni wakhe lizohlolwa lonke hlezi nguye olenkinga ." Kusitsho udokotela avele ahwaqe ebusweni uLydia , ukumoyizela konke kutshabalale .

"Angizithwalanga ? Ulesiqiniseko dokotela? Angikahambi emfuleni ngicela siphinde ukuhlola kufanele ngikhulelwe ."

"Sekungenzeka uphuzile ukuhamba enyangeni leyi njalo kuyinto vele eyenzakalayo emzimbeni wesifazane . Lydia , sekukanengi ubuya lapha uzehlola isisu kanye lesibeletho sakho .
Ayikho into embi ngawe , yingakho ngikucebisa ukuthi buya lomnyeni wakho ."

"Kudala ngizama dokotela ukumletha kodwa kafuni . Kodwa ngilecebo dokotela, ngingabuya lenhlanyelo yakhe . Ngizathi sisebenzise ijazi likamkhwenyana ."

"Kumele azivumele yena ukuhlolwa nkosazana ngoba kulicala elibomvu ukuhlola umuntu ngaphandle kwemvumo yakhe ."

"Angeke aze abekwazi angeke ngimtshele ."

"Cha , angifuni ukudatshulelwa isithupha sami engasisebenzela nzima kangaka ."
Anxaphe uLydia aqede asukume ahambe .

"UVusani uyazala nje ? Mhlawumbe yikho bengelabo abantwana lo Nkanyezi . Speaking of uNkanyezi , sengilesikhathi ngamcina kumbe kasafuni sibe ngabangani , nguye ongangitshela ngcono ngomnyeni wakhe ." Akhulume yedwa uLydia aqede akhiphe umakhalekhukhwini atshayele inombolo kaNkanyezi.

"Hello Lydia." Kusabela uNkanyezi ecingweni .

"Kanti sewasilahla yini ntombi ? Ngicela sihlangane endaweni yethu phela kunini ngakucina kodwa ." Kusitsho uLydia .

"Kulungile singahlangana , ubufuna sihlangane sikhathi bani ?"

"Loba kathesi kulungile kimi ."

"Ayikho inkinga ."

Avele adinge imota ezamhambisa uLydia . Usefikile endaweni abayandise ukuhlangana khona , ulokhe ethalaza emnyango kwazise kasayenelisi ukuthi afike uNkanyezi.
Esalibele atheleke uNkanyezi afike ambingelele aqede ahlale phansi .

"Umnyeni wathi uhlukane lomngane ongatshadanga yini uzakutshelela eceleni?" Kususa uLydia , ahleke uNkanyezi.

"Uyathanda ukungisukela kodwa Lydia. Ungaphi uSakhile ,laye kudala ngamcina ?" Abuze uNkanyezi.

"Lowo , usehlala lendoda entsha ngikutshele ."

"Uthini kimi ? Watshiya uThabo labantwana masinyane kangaka ? Kwakufanele aqale abone ukuthi indoda leyo ingumuntu onjani ngaphambili kokuthi ayehlala laye ." Kusitsho uNkanyezi.

"Ungu baba olungileyo ngiyamazi mina ."

"Ohh kanje nguwe owathi umdingele indoda Lydia, asethembe angeke kuhluphe kusasa ."

"Khululeka , angithi lawe wawufisa ukuthi athole indoda elemali , useyitholile pho yindaba ungamjabuleli ?"

"Yebo ngake ngafisa kodwa ngabuya ngananzelela ukuthi impilo ayifuni imali kuphela ,lenjabulo siyayidinga ."

"Wena awujabulanga yini emzini wakho ? Uze awuhluphi ngokuzalela uVusani. Umzalela nini vele kumbe ufuna aze akutshiye ?"

Azihlekise uNkanyezi kodwa ngaphakathi iyamudla indaba yokungatholi abantwana lo Vusani .
"Ngicela singakhulumi ngayo leyo , ngesikhathi esiqondileyo sizabazala abantwana ."

Iyaqhubeka

Akekho ofree lathi siyeziqalela okuyinto kwethu emaphandleni njengo VusuThando MC🥰🥰

BEHIND CLOSED DOORS
CYNTHIA S NDLOVU
ISAHLUKO 9

"Hello beautiful!" Izwi lowesilisa eceleni kuka Nkanyezi , avuse ubuso akhangele lowu ombingelelayo . Yindoda ende elebala elikhanyayo , ugqoke isude enhle , uyabonakala ukuthi engabe ephume emsebenzini ukuzekudla isidlo sasemini . Unukelela mnandi , amakha aziqhole ngawo yilawa adulayo njalo angapheliyo emzimbeni ngitsho lempahla loba sezihlanjiwe zisala zinukelela mnandi .

"Unjani mnewethu?" Avume uNkanyezi .

"Ngiyaphila wena omuhle , bengicela ukuhlala lawe okwemzuzwana embalwa nje ." Acele ngapha esehleli phansi .

"Kulungile."

"Kudala ngikukhangele ntokazi , uthe nje ungena ngakhangwa yibuhle bakho langendlela nje obunyathela ngakhona. Unyathelisa okwentombi elesimilo eyalaywa yalayeka . Ngiyaxolisa ukungazazisi kuwe , mina ibizo lami ngingu Frank ." Etsho eqhuba isandla , asiqhube laye esakhe uNkanyezi baxhawulane .

"Kuhle ukubakwazi Frank , mina ngingu Nkanyezi ." Aphendule ngezwi eliphansi uNkanyezi.

"Ngibonile vele ukuthi wena uyiNkanyezi ekhanyisa ukwedlula zonke esibhakabhakeni , lihle ibizo lakho mama lifanana lawe nse !"

Amamatheke engaqedi uNkanyezi, phela kudala wacina ukutshelwa amazwi amahle kangaka selokhe sewaba ngumuntu omubi emehlweni kaVusani . Uthi engavela nje ebusweni bakhe anyukubalise ubuso athukuthele aze agane unwabu , ngalokho wavele wazitshela ukuthi mubi kulabanye abasifazane .

"Ngiyabonga Frank ngokubona ubuhle bami kutsho okukhulu kimi lokho ." Aphendule uNkanyezi , aqede aphakamise igilasi lenamunede athi mothu .

"Yindaba engathi ulenxeba lapha esihlathini kumbe angiboni kuhle ?" Abuze uFrank ezama ukuthinta lapho abona khona inxebana .

"Inxeba ? Cha , angilanxeba ngicabanga ukuthi yi make-up , umuntu ongenzileyo ungiyenze kubi yazi , ngike ngazinanzelela nje esibukweni semota ukuthi ayifakwanga kuhle ." Akhulume ngelivevezelayo uNkanyezi ,ngapha ezama ukuzihlekisa into engekho , uzama ukuvala vala ukuthi kubonakale ukuthi uyahlukuluzwa ekhaya .

"Lalela Nkanyezi . Ungowesifazane omuhle kakhulu , njalo nxa ungangipha imvumo yokuthi ngiphawule ngomzimba wakho , ngingathi mina uNkulunkulu wakudala isikhathi sisekhona, wathatha isikhathi sakhe sonke wakudala muntu wesifazane waqeda wakulolonga kuhle . Njengoba ugqokile nje ungaze ufunge ukuthi impahla lezo zathungelwa kowakho umzimba ngendlela nje ofanaleke ngayo .
Ngalokhu ngichaza ukuthi , ungavumeli ukuhlukuluzwa , ngicela ungangizwa kubi angichazi ukuthi uyahlukuluzwa kodwa indlela engikubona ngayo mina uyethukile ngesikhathi ngibuza ngenxaba . Ngiyakubona mina ukuthi yinxeba akudalwanga yi -make up .
I'm a Therapist njalo umuntu ohlukuluzwayo ngiyambona indlela ayenza ngayo , ngicela uthathe nanti ikhadi lenombolo yami ungitshayele nxa ungazizwa kuthi uvule isifuba . Ngiyakuthembisa ntokazi angisoze ngikwehlulele , umsebenzi wami yikuthi ngikuthobe amanxeba ,ngikubambe ngesandla , ngikwesule inyembezi njalo lokho ngizakwenza mahala ." Atsho ebeka ikhadi lakhe phambili kuka Nkanyezi osevele wagebhela ikhanda phansi .

"Ungabi lamahloni ngesimo sakho , ungumuntu lawe ulemizwa njalo ungayesabi ukuvula isifuba sakho . Ngicela ixhumane lami , ikhefu lami seliphelile usale kuhle ." Atsho lawe uFrank aqede ahambe . Akhokhe umoya uNkanyezi adonse ikhadi lika Frank alikhangele okomzuzu aqede alitshutheke esikhwameni sakhe .

"Ubuyalelani ? Khangela nje ukuthi sizijabulise njani ?" NguLydia ngemva kokuthokozisana lo Vusani osekhefuzela laphaya esofeni .
Adobhe impahla zika Vusani amphosele zona ,azithathe ngokuthula agqoke uVusani aqede asukume phansi .

"Ngizakubona , ngicela uyekele indaba yakho yokuthi uzafaka izithombe leziyana enkundleni , uzikhiphe kumakhalekhukhwini , nxa ungakwenzanga lokho angeke usathola imali kimi ."
Ahleke uLydia aqede asondele kuVusani .

"Kuphela nje ubuya kimi kanje angeke ungizwe ngisola , into engingayithandiyo yikuthi ungifuqele katshana ."

"Ungakhathazeki angeke ngisakwenza lokho ." Atsho lawo uVusani aqede amqabule isiphongo aphume aqonde emoteni yakhe .
Avule umakhalekhukhwini wakhe athola imlayezo elitshumi ebifakwa ngu Angel waphinda wamtshayela kanengi .

"Lowu laye ngesisu esikhulu ." Anxaphe uVusani aqede aphosele umakhalekhukhwini wakhe eceleni asuse inqolamlilo aqonde endlini .
Esefikile endlini , athole uNkanyezi egumbini lokuphumulela ebukele umabonakude.

"Unjani ?" NguVusani , azithulele uNkanyezi .

"Angibingeleli wena Nkanyezi ?" Atshinge uVusani .

"Babakhe ,usubuyile ? Lowo ubengekho imini yonke angazi ubeyengaphi ."

"Ubuyengaphi Nkanyezi ungangitshelanga ?" Kuthetha uVusani.

"Yindaba ulamanga wena Angel ? Ngike ngaphuma mina ngingaphi ?" Usezimisele ukuphikisa uNkanyezi ukuze uAngel laye abe ngumuntu omubi emehlweni ka Vusani .

"Uphumile Nkanyezi ."

"Ngingaphi ? Ngiyazigulela mina ,liphose langibulala lina lobabili amandla okuphuma bengizawathatha ngaphi ?" Atsho esekhala uNkanyezi .

"Haa umfazi wakho Vusani , yindaba elamanga kangaka ?"

"Usomangasi nguwe Angel ." Atsho edlulela ekamelweni lakhe uVusani , amlandele emuva uAngel bayengenisana ekamelweni afike ahlale embhedeni .
"Ngitshone ngikutshayela ucingo imini yonke ungalubambi yindaba ?"

"Wena Angel inkinga yakho ucabanga ukuthi ngisebenza wena angithi?" Aphendule ngapha ekhumula impahla ukuze ageze .

"Hayibo ! Vusani, wahlanekela ibhulugwe langaphansi kutheni ? Ugqoke ngikukhangele ekuseni ubungalihlabekelanga ."

"Khangelana lendaba zakho kanye lesisu sakho esikhulu utshiyane lami ." Atsho eqonda egumbini lokugezela uVusani."

Iyaqhubeka

Yazi ngihleli lapha ngiyazibuza ukuthi isibindi sokubulala omunye us**a usithathe ngaphi 🥺mina ngiyesaba ukubulala inkukhu edliwayo ke 😔
Liphephe bakithi lapho elihamba khona kubi . Always share you live location lomuntu osondelane laye