Koos van der Merwe

Koos oor Leonard Cohen...

“Verlede jaar het ek sy liedjie, “Show me the Place”, vir ons Paasfees in die kerk vertaal.
‘‘Wys my die plek waar die woord as mens verskyn
Wys my die plek waar’s die oorsprong van die pyn’’

En net daar het dit begin. Ek was so opgeneem, byna in besit geneem deur die betowering van die woorde, dat elke plek verander het in ’n dinkplek en skryfplek. En nog een. Uiteindelik het ek maande en nagte gesit … nagte! As ek weer sien, is dit drieuur in die oggend. Ek oordryf nie as ek sê ek het elke liriek omtrent twintig keer herverwerk nie. Tot ek voel okei, ek kan niks meer daaraan doen nie. Kyk ek nou, amper ’n jaar later daarna, lyk dit so voor die hand liggend. Maar as jy net die Engelse liriek voor jou het … Dis ’n pad om van een taal na ’n ander nie die emosie en skoonheid te verloor nie, om dit nie gedwonge te laat voel nie.”

En nou gaan hy Cohen-konserte hou …

“ Die oomblik wat ek hierdie liedjies sing, is ek op dieselfde planeet as toe ek dit vertaal het. Ek het al bietjie eksperimenteer in vertonings: ’n Mengsel van Cohen, hier en daar my eie gedigte en bietjie kommentaar. Ek ervaar daar gebeur iets met mense as hulle so ’n aand van skoonheid en diepte beleef.”